علي جعفر كورتو إلى الآن كورة 1819 م – الزول دا جايبنو بي كورتو القديمة دي من وين؟ مزمل أبوالقاسم تاني في ترويسة العمود إلا يضع صورة (وديدي الفاتح) – ما عندهم زول بجيب ليه قون غيرو إنتظرونا ..وامسكوا (الكشافات) – بكري المدينة وعنكبة في تشكيلة واحدة • عندما سجل الهلال المحترف الزمبابوي اداورد سادومبا – ناس المريخ (ضفر وباسكال ونجم الدين) قالوا لي مزمل ابوالقاسم شوف لينا (حل) للكارثة دي. • نحن لا بنقدر عليه ولا حاجة. • كلهم قالوا عندهم (رباط صليبي) بي حسن محجوب. • قالوا لي مزمل ابوالقاسم نحن لو بنقدر على (سادومبا) كنا لعبنا في الدوري الانجليزي. • اكرم الهادي سليم من كرت سادومبا وصل – مسكتو ليك (حصوة). • الحصوة دي قدر ما يفتفتوها – سادومبا يجيب ليه قون ترجع تاني. • وضفر قال ما عاوز كورة تانية. • احسن اشوف لي زراعة او حافلة في الميناء البري – مالي ومال (التلتلة) دي؟. • انتوا عاوزين تدمروا مستقبلي. • بله جابر ..(وإلّا سيبك) بله بقوم يزعل. • بله جابر ما عمل اي حاجة. • المهم المريخاب دخلوا بي جاي وطلعوا بي جاي..وقت الموضوع غلبهم قالوا نمشي لي مزمل ابوالقاسم يشوف لينا اي حل. • ان شاء الله يخت لينا صورة (كلتشي) في ترويسة عمودو. • مشوا لي مزمل ابوالقاسم ..قالوا ليه الهلال جاب ليه (مهاجم) – يحاور ليك (اسماعيل حسن) في مكتبو. • وشجرابي بقع. • سلك دا تعاين ليه (15 – 15). • يعني (سلك) دا تعاين ليه زي (البالة). • مهاجم صعب – القون بسجلو ليك عن طريق (4) رسائل. • زي الموبايل كلو رسالة بي فهم براها. • اكرم مرة قالوا كان حارس مرمى المريخ – الاقوان بتجي فيه من اي حتة. • مدرب الحراس – احتار في اكرم. • اكرم قال ليه يا كوتش – نسيت اقفل (البلوتوث)...اقوان سادومبا دي بتجي بي (البلوتوث). • ناس ضفر ديل طبعا ما عندهم اي علاقة بالبلوتوث. • نجم الدين عبد الله انتوا قايلين الشطبو شنو من المريخ؟. • شطبو (البلوتوث). • علاقتو بالبلوتوث ضعيفة. • اما اكرم – خلوه لي بكمل ليكم فهمو. • اكرم الهادي سليم بقى ليكم زي (صينية الكعك) يعيروه ويرجعوه – ما بنستر اصلا مع سادومبا. • صينية كعك شنو؟. • اكرم الهادي سليم دا متل (المكوة) الوحيدة في الحلة. • اي زول عندو قميص عاوز يكويه بمشي يتسلف (المكوة) يكوي ويرجعها تاني. • الحلة كلها بتسلف (المكوة). • معقولة بس ..تسجيلات يعيرو اكرم الهادي سليم. • وتسجيلات يرجعوه. • تسجيلات يقولوا اكرم الهادي سليم لاعب مستهتر وغير منضبط وكلامو كتير. • وتسجيلات يقولوا ليك (جبل الجليد). • تسجيلات يقرروا يشطبوه. • يطلعوا الخطاب. • يلحقوا الخطاب في الاتحاد – يقولوا لا ما عاوزين نشطب اكرم الهادي سليم – عاوزين نعيرو فقط. • يعيروه. • التسجيلات القادمة يجيبوه ليك. • اكرم الهادي سليم بقى زي (الهايس) الشغالة ترحيلات مدارس. • تسجيلات تجي. • وتسجيلات تفوت. • تسجيلات تجي. • وتسجيلات تفوت. • وايهاب زغبير (قريب غطا). • يعيروا اكرم الهادي سليم يرجعوا ايهاب زغبير. • يقوموا في التسجيلات القادمة يتفننوا...عارفين بعملوا شنو؟. • بقلبوا الحكاية. • يعيروا ايهاب زعبير او ينهوا اعارته – ويرجعوا اكرم الهادي سليم. • لمن يكونوا عاوزين يجيبوا ايهاب زغبير بقولوا ليك الحارس الشاب صاحب البنية الجسمانية القوية. • لمن يكونوا عاوزين يعملوا العكس – بقولوا ليك (جبل الجليد) يعود للمنتخب ويتألق. • غايتو ناس المريخ ديل. • العاوزين يرفعوه السما برفعوه. • والعاوزين يدقوا بيه الدلجة بدقوا بيه الدلجة. • ونحن بنقعد ونستمتع بالمسرحيات دي. • الجماعة على هذا الفهم مشوا لي مزمل ابوالقاسم عشان يشوف ليهم طريقة. • مزمل قعد يمخمخ في الموضوع. • قال ليهم الوكيل. • قالوا ليه (الوكيل) دي بقت قديمة وما بتقسم تاني – شوف لينا حاجة جديدة. • قال ليهم (المحامي الفرنسي). • قالوا ليه يعني عاوز تعمل لينا (المحامي الفرنسي) دا شغلة – الموضوع دا مع كلتشي ما جاب حاجة. • قال ليهم (سادومبا دا قاصر). • قالوا ليه قاصر شنو؟..دا على شوية كدا يبقى مدير فني. • مزمل ابوالقاسم ما عرف يتصرف كيف؟. • دخل بي جاي وطلع بي جاي ..وقال ليهم خلاص لقيتها. • قالوا ليه لقيت شنو؟. • قال ليهم (المسح الايميل). • المريخاب قالوا ليه اصلو ما عندك مشكلة – كلنا بنردد معاك (المسح الايميل) منو؟. • اها الجماعة ديل دوروا ليكم في المسلسل التركي دا لمن كمل – ما طلعوا بي حاجة. • سادومبا كل ما يقولوا ليه المسح الايميل منو؟. • يقوم يسمح ليه لاعب من المريخ. • لمن عدمهم الحبة. • هسع ناس المريخ – الموضوع كبر عليهم. • الموضوع غلبهم. • اعاروا (جقود) وما عرفو يتصرفوا كيف؟. • عرفوا ليك الهلال جاب ليه لاعب (داهية) – الطرف دا يفلفلو ليك زي (الرز). • ما بتقابل. • نوع دا يقابلو ليك بله جابر – وإلّا بله جابر خلوه (بقوم يزعل ساكت). • خلاص انتوا افهموها براكم. • الطرف الشمال بتاع الهلال يقوم يقابلو ليك الطرف اليمين بتاع المريخ – يخلي ليك بله دا كل (ب) في حتة. • موش بله فيها (ب) واحدة. • بوتاكو عندو قدرة يخلي ليك بله جابر فيه (21) ب – غير (الجركانات). • جركانات شنو كمان؟. • انا قلت بله جابر – انا قاصد الطرف اليمين بتاع المريخ (بله جابر ما عندنا قضية معاه). • يقوم يزعل ساكت. • وبله جابر دا (زعلة) بتشطبو من المريخ. • بعدين لو شطبوا بله جابر – نحن نتصرف كيف؟. • نحن نقول شنو؟. • عليكم الله بله دا لا تعيروه – ولا تشطبوه. • خلوه لينا كدا. • نحن عاوزين بله. • المريخاب مشوا لي مزمل ابوالقاسم وقالوا ليه شوف لينا طريقة من طريقاتك دي. • غشنا عليك الله ونحن بنقول ليك (كمل – كمل يا مزمل). • عندنا اتحاد عام جمال الوالي بشغلو بالريموت كنترول. • مزمل ابوالقاسم وقت شاف مباريات بوتاكو في شرائط الفيديو – قال ح يرجع لقواعده سالم. • قال ح يشجع اهلي شندي. • مالو ومال المريخ. • المريخاب قالوا ليه – انت لو مشيت اهلي شندي – البقعد لي ناس ضفر ديل منو؟. • مزمل قال ليهم لكن موضوع (بوتاكو) دا صعب. • لا بقدر عليه ولا حاجة. • قالوا ليه كدا فكر ما بتعدم حيلة. • مزمل ابوالقاسم قال ليهم (الوكيل). • قالوا ليه الوكيل بتاعو ما عندو اي مشكلة – وكمان وكيلتو وكيلة. • قال ليهم (المحامي الفرنسي). • قالوا ليه المحامي الفرنسي ما بتقسم مع الهلالاب ديل. • قال ليهم (قاصر). • قالوا ليه قاصر شنو؟...شوف لينا حاجة جديدة. • مزمل دخل وطلع كدا – قال ليهم (المسح الايميل منو؟). • قالوا ليه هو يعني (المسح الايميل) مع سادومبا جابت شنو ؟– عشان تجيب ليها حاجة مع بوتاكو. • ناس الهلال ديل تعال ليهم عديل – المسح الايميل ..ما بتعمل ليهم اي حاجة. • مزمل رأسو ضرب. • قال ليهم (التهاب الكبد الوبائي) كيف؟. • قالوا ليه كدا جربو لينا مع (بوتاكو) دا ...الزول دا لاضفر ولا علي جعفر ما بقدرو يثبتو. • علي جفعر كورتو الى الآن كورة 1819 م – الزول دا جايبنو بي كورتو القديمة دي من وين؟. • كورة علي جعفر دا ..بتذكرني بي الطاير ابو مركوب. • غايتو المريخ في الموسم الجديد – (الروش) كلهم اتلموا في فريق واحد. • فريق (الروش) – تاني القون إلا تجيبوه معاكم في (عمود). • يا عمود صحفي – يا عمود مستشفى. • قون تجيبوه عديل كدا مع ناس بكري المدينة وعنكبة اقنعو منو؟. • تاني مامون ابوشيبة ح يرجع يكتب لينا عن ضربة الجزاء الوهمية التى كانت للمريخ سنة 1996م. • ح يعمل شنو يعني؟..ما ح يشوف ليه قون قريب. • ومزمل ابوالقاسم تاني في ترويسة العمود إلا يضع صورة وديدي الفاتح – ما عندهم زول بجيب ليه قون. • واسماعيل حسن ح يكتب عن المقصورة. • وهيثم كابو ح يرجع يكتب عن طه سليمان. • وبابكر سلك ..عشان زول خطير – برجع يجيب سيرة (ايداهور) من اول جديد. • الناس (الروش) اتلموا في فريق واحد. • قالوا ليك جماعة (روش) مشوا ليهم مناسبة عرس. • دخلوا الصيوان سألوا من العريس – وصفوا ليهم (العريس) – مشوا باركوا لبتاع الساوند. • ما روش وكدا. • سألوا من العروس ..قالوا ليهم الزولة اللابسة زفاف وقاعدة في الكوشة ديك. • مشوا على بتاع البنقز. • ما روش وكدا. • جابوا ليهم (العشاء) – قايلنو كراس الكشف – ختوا القروش وكتبو اسماءهم. • ما روش وكدا. • جابوا ليهم البيبسي بدل ما يشربوه – اتوضوا بيه ..قايلنو موية. • ما روش وكدا. • اها الحالة دي ح تبقى عليكم يا ناس المريخ. • فريقكم دا امانة ما نرشوا ليكم روشنة. • انتظرونا ..وامسكوا الكشافات – بكري المدينة وعنكبة في تشكيلة واحدة. • يا مزمل جماعتكم ديل احسن تتقل ليهم في (التهاب الكبد الوبائي) – لا بنستروا ليكم ولا حاجة. • ....... • ملحوظة : هسع بله جابر يكون نام قفا على حكاية (التهاب الكبد الوبائي) دا. هوامش • التعازي الحارة ننقلها من الاخ عبدالمحمود نورالدائم الشيخ المبارك المقيم في مدينة الدمام على رحيل رجل الهلال الصالح والمبارك عمه رئيس نادي الهلال السابق نورالدين الشيخ المبارك الذي توفى بطابت الشيخ عبدالمحمود. • نسأل الله الرحمة لذلك الرجل الصالح – الذي خدم الهلال بانسانيته – وكان سفيرا للهلال بتعامله الراقي وسلوكه الجميل. • ناس المريخ قالوا الكاردينال لو جاب ليه (قنبلة) من لندن – إلّا ينسحبوا من الممتاز. • ما تخافوا يا ناس المريخ – ح نلعب معاكم تاني بالفريق الرديف – الفريق الاول للبطولات الخارجية. • ما عندنا ليكم اكتر من (الرديف). • ناس بكري ديل ناس (بشه تو) بنتهوا منهم. • محمد موسى المهندس اشاد ب (بشه تو). • اكيد مزمل هسع بفتش ليه عن (ايميل). • يا مزمل الزول دا ما عندو (ايميل). • صلاح ادريس قنع من محترفي الكاردينال بقى يلاحق الهلال في لاعبي الرديف. • حدك المهدية يا صلاح. • .......... • عاجل : كلتشي قالوا راجع المريخ – الما برجعو شنو؟..الطاهر الحاج راجع.
