الشارع كان متل الزول البحل ليه في (كلمات متقاطعة) ..كل مرة يجي زول يسألك """"""""""""""""""""""""""" لو جبنا لينا (هنود)..هنود من مومباي..وقعدنا نحكي ليهم عن علي عبداللطيف والماظ وعبدالقادر ود حبوبة يختوا ايدهم في رأسهم """"""""""""""""""""""""""""""""" أيمن سعيد اتخارج...عليكم الله لو المصري دا ما مفتّح ..في زول بسافر القاهرة في توقيت زي دي """"""""""""""""""""""""""""""""""""""" يا بشه ..الشغيل ...نيلسون ..كاريكا ..انتبهوا لجمال سالم ..بفك الكورة وبطلع من المرمى ..وبتعصب """""""""""""""""""""""""""""""""""""" • بيني وبين نفسي ..خليت في مسافة..وطلعت لي كرسي وتربيزة وشلت لي (جك) موية. • حتة بتشيل ليها (كرسي) ما (عنقريب). • عندي احساس ان (العناقريب) شفقانة. • شفقتها زايدة حبتين. • الشارع كان متل الزول البحل ليه في (كلمات متقاطعة) ..كل مرة يجي زول يسألك. • وانت تقعد بحسن نية (توصف) وتفور وتندلق ..لمن الزول يصل المكان البسأل منو. • لو في زول سألك من حتة وطلعت ما بتعرفها بتحس بي كرامتك اتجرحت. • رغم انو ما في علاقة بين عدم معرفة المكان والكرامة. • لكن نحن برانا بنحددها مع نفسنا. • بنصعبها. • الحركات دي كنا بنعملها زمان. • وقت الدنيا كانت بي خيرها....الضل بتلقى فيه (نبقة). • هسع انا ما عارف (شجر النبق) دا مشى وين؟. • رغم اننا بقينا نغني للنبق. • تتصوروا لي (6) شهور ما شفت لي شجرة (نبق). • الحكومة عندها رأي في (النبق). • طيب وين النبق؟. • يا جماعة انا بتكلم عن النبق حقنا دا ..ما النبق الفارسي. • عشان ما تقولوني كلام انا ما قلتو. • ولا لمحت ساكت. • اوعكم. • ما علينا ..انتوا قايلين نحن سايلين في زول. • نطلع ونقعد في الشارع ..ونتفش في (هوا) الله دا. • الحركات دي كانت بتدينا احساس بالتفكير العميق. • رغم انو ما في اي تفكير. • وتشعرك بالفلسفة. • وما في فلسفة. • والشاي واللبن. • يا زول ما تغلط ..الشاي واللبن الدخلو في الموضوع دا شنو؟. • عندنا زول (دغري). • زول صعب ..تجيب ليه الشاي باللبن ..يقول ليك يا زول هوي جيب لي الشاي براهو واللبن براهو ..انا اللخبطة بتاعة ناس الخرطوم دي ما بتنفع معانا. • اللخبطة انا في الشاي ما بدورها. • الخلط ما بدورو. • المهم عشان ما نتغالط ساكت ..الحركات دي بتديك احساس بتاع (شاعرية) كدا – تفكها في نفسك ..لمن تصدق... • تقعد تكتب.. • ......ألخبط في عيونك شاي ...ادفق بن..اداخل النظرة من عينيك مع الجبنة..واسوي الشاي ..واكب الشاي ...شربت الشاي ..وانا الداسيك في النكهة ..بشوفك عابرة جوة اللون مع القهوة.... • الواحد يقعد يكتب ليه في حاجات كدا ..وقت ينتهي يتبسط ليك ..ويشيل كرسيه ويرجع البيت. • في المسافة دي. • المسافة الكانت بيني وبين نفسي ..(متر إلّا ربع كدا)..شايف ان البطل علي عبداللطيف اتظلم تاريخيا..وما لقى مكانتو البستحقها. • ونحن مقصرين لمن بي غادي. • وشايف كمان ان البطل عبدالقادر ود حبوبة اتظلم برضو. • ونحن متلومين شديد. • الناس ديل بيستحقوا مننا اكتر من كدا. • الابطال في اي دولة ما بهملوهم. • النماذج دي بتصدّر الشموخ والعزة والثبات والقوة والهيبة والكبرياء ..ونحن محتاجين للحاجات دي. • عندنا نقص عام في هذه الاشياء. • الابطال ديل ..لو ما علقنا صورهم في صوالينا ..بنكون قصرنا في حقهم. • اتلومنا فيهم. • نحن ما نبعرف قيمة ابطالنا. • يمكن لو جبنا لينا روس. • روس شنو؟...خلوهم الروس ..عشان ما تقولوا الزول دا قاصد (الروس). • لو جبنا لينا (هنود)..هنود من مومباي..وقعدنا نحكي ليهم عن علي عبداللطيف وعبدالقادر ود حبوبة يختوا ايدهم في رأسهم. • وما يصدقوا. • الهنود بتاعين الخيال بندهشوا. • لو حكينا ليهم عن علي عبداللطيف وعبدالقادر ود حبوبة انا متأكد ..بخلوا الافلام الخيالية البعملوا فيها دي ..وبقعدوا يعملوا افلام عالمية تفوز باوسكار عن عبدالليطف وود حبوبة. • بكتشفوا ان حاجاتهم دي (عوارة) ساكت. • افلامهم الخيالية ..بتاعة البطل في النهاية يطلع اخو البطلة ...والزول يطلع فيه قطر ما تجيه الحبة ...وبطل يتلب من الطابق العشرين ما تجيه اي حاجة.. حاجاتهم دي كانوا خلوها. • وكانوا صاقروا علي عبداللطيف وعبدالقادر ود حبوبة. • الابطال ديل ما كتبوا عنهم ..ولا انصفوهم ..ولا سجلوا مواقفهم وحياتهم بصورة توازي ما قدموه. • الحاجات دي في مقرراتنا الدراسية ضعيفة. • انتوا يا سودانيين منتظرين الهنود يكتبوا ليكم تاريخكم. • منتظرين الروس ..يندهشوا بي ابطالكم. • طبعا كلنا مقصرين ..كلنا غلطانين ..اي واحد مفتح مفروض ..يطلع للموضوع دا ويمشي يبحث فيه عشان يقدم للامة السودانية ما تفتخر به. • ونحن محتاجين لي ناس زي ديل. • محتاجين لي ناس يسندونا ..ويقيفوا معانا ويبقوا القدوة للاجيال كلها. • محتاجين نطلع من حتة الموقف حولوه. • ومن ازمة الغاز. • وطه سليمان. • واحمد الصادق. • نحن عندنا حاجات اكبر من الحاجات دي ..ما تملونا (هوا) ساكت. • علي عبداللطيف كتب ليه مقال صحفي هاجم فيه الاستعمار. • المقال ما نشروه ..مع ذلك حاكموا على عبداللطيف. • في قوة اكتر من كدا. • زول حاكموه على مقال كتبه كقاريء ..لم ينشر ليه في الصحيفة التى ارسل لها المقال مع ذلك (حبسوه). • علي عبداللطيف في عام 1924 عمل جمعية اللواء الابيض الذي كان له القدح المعلي في محاربة الاستعمار. • من الاسم يوضح ان شعار اللواء الابيض كان اللون (الابيض). • اها جيتكم في حتتكم يا مريخاب. • نحن من سنة 1924 ..عندنا لون ونكهة مختلفة. • انتوا كنتوا وين عام 1924..تلقاكم الوقت داك اللون الاخضر من الاحمر ما بتفرزوه. • العبرة في هذا التاريخ ان البطل عبدالفضيل الماظ والذي استشهد في مستشفى النهر في شارع النيل بعد ان رفض الاستسلام ..رغم الرصاص الذي كان ينهمر على جسده ..ليجدوه ميتا وهو ممسكا بسلاحه (المكسيم). • يعني شنو يا مريخاب؟. • يعني (مكسيم) دا ..اسم سلاح ..اوعكم ...تجوا حايمين في خط 18. • في ملعب الهلال ما عاوزين نشوفكم. • خلاصة الكلام دا كلو شنو؟. • نحن الليلة بنلعب في قمة الإستقلال ..ولا بد من ان نستشف من ذلك التاريخ العظيم. • الشغيل في الإستقلال ما بتفاهم. • بفور. • ببقي كم شغيل كدا. • ببقي جمعية كاملة. • اقول ليكم. • ببقي جمعية اللواء الابيض ذاتها. • ببقي علي عبداللطيف والماظ. • على الاقل الشغيل فيه الهيبة. • وفيه الطول. • وعندو الشخصية. • وقت يحوم ليك في الوسط كدا ..ما في اي عجب ..بقرب من المنطقة. • لا عجب لا باشا. • لموا اجانبكم عليكم ..ناس اكرا ديل بعد مباراة اليوم ح تحولهم الى (الرديف). • الإستقلال ليس هو رفع العلم السوداني فقط. • هناك مواقف يجب ان نقيف عندها ..حتى لو كانت في كورة او مباراة. • ود حبوبة ..كان نموذج اخر للفروسية والقوة والعزة والشرف. • في صباح الأحد الموافق 17 مايو1908 اعدموا عبدالقادر ود حبوبة ..في موتة يتمناه كل الناس. • موتة يحسده عليها الاعداء ..فقد جاء الى الموت كأنه (عريس). • نعم كان عريس ..والدليل على ذلك اننا الى وقتنا هذا نغني في عرسه هذا. • مازلنا نحتفل به ونغني له (هزيت البلد من اليمن للشام). • في شنو اعظم من كدا؟. • خلونا ونحن في قمة الإستقلال ..نطلع على الناس ..نتونس بيهم..ونفرح. • علي عبداللطيف والماظ وقبلهم ود حبوبة ..وبعدهم الزعيم اسماعيل الازهري. • وكثيرون قدموا لهذا الوطن الكثير ..فهل نبخل عليهم بالذكر. • ....... • ملحوظة : غايتو انا كلمتكم ..الليلة نصرالدين الشغيل ..عامل فيها جمعية اللواء الابيض عديل كدا. هوامش • الشغيل الليلة بعملها فيكم يا مريخاب. • هذه ليلة الشغيل. • قون الشغيل. • وهناك مدثر كاريكا ونزار حامد ونيلسون وفيصل موسى...عيييك. • انتوا لو عاقلين ..تتخارجوا من البلد. • دي ما بلد يقعدوا فيها مع الجماعة ديل. • الكلام دا غير وليد علاءالدين. • وبشه. • اقول ليكم حاجة. • اوعكم يا مريخاب تجازفوا ..وتتدخلوا المباراة ..ح تصدموا ساكت. • احسن احضروها في بيوتكم في البرد دا. • خلوا الاستاد للهلالاب. • اصلا نحن برانا البنحتفل بالإستقلال. • انتوا المواضيع دي ما بتقدروا عليه. • برهان عرفها. • وايمن سعيد اتخارج. • عليكم الله لو المصري دا ما مفتح ..في زول بسافر القاهرة في توقيت زي دا. • يا بشه ..الشغيل ...نيلسون ..كاريكا ..انتبهوا لجمال سالم ..بفك الكورة وبطلع من المرمى. • جمال سالم دا بيطلع ساي. • الليلة اتفرجوا فيه. • الزول لو حارس ليه (بطيخ) ما بطلع يخليه. • وزولكم دا بطلع مع ناس كاريكا وصلاح الجزولي وكيبي. • يا زول انت جنيت. • اتقهم قبلك. • بكرة فرحة اخرى. • وكلام تاني. • ................... • عاجل : يا اتير توماس لو عاوز تثبّت بكري المدينة وتطلعو من جو المباراة..شيل معاك للمباراة صورة من عقده مع الهلال...وكل ما يقرب عليك قول ليه (فيفا)...الجمهور ذاتو خلوه يهتف ليه (فيفا).
