في مباراة القمة القادمة في الاسبوع الرابع للدوري الممتاز ...ما شايل هم في الدنيا دي إلا على (الروس)...انا ما عارف ح يستوعبوا الحكاية دي كيف؟. هيثم في المريخ ...والشغيل في الهلال.
الموضوع دا ..موش نحن حسمناه.
لا لسع ..عندنا تاني كلام.
القرعة ذاتها ..ما راعت (الروس)...وما اعطتهم فرصة للاستيعاب والفهم ...مباراة القمة واقعة في الاسبوع الرابع للدوري الممتاز...يعني ان شاءالله (المريخ) سوف يكون (وصيف) من قولة تتيت ..زي الدوري الممتاز الفات...المريخ خسر من الاسبوع الاول.
الكوكي دا ...(شوط) ما بثبت.
دي حاجة اسألوني منها.
غايتو السنة دي مباراة هلال مريخ ...عاوزة ليها (مترجم)...الحكاية ملخبطة شديدة.
والزول النظرو ما ستة من ستة ...ما يتعب نفسو ..ويدخل الكورة ..احسن يحضرها في (اعمدتنا) دي.
من الضرورة ...تدخل المباراة شايل ليك كتاب (جغرافيا) وقاموس انجليزي عربي..وشايل خريطة الكنز ..عشان ما تكون (مسطح) ساكت ..زي الاطرش في الزفة.
أي زول ما بذاكر كويس ...ما يدخل المباراة ... ولا يجازف من الاساس ..عشان أي (دقسة) بتلقى نفسك بتشجع في الفريق التاني.
قالوا ليك هلالابي دخل مباراة القمة شوط كامل ...45 دقيقة ...قاعد يشجع في المريخ.
شايف هيثم مصطفى ..والمريخ ...الهلال.
لمن الزول الجنبو لكزو.
ادوهو حبة بندول ..وصلحوا ليه (اريل) التشجيع.
زي الاذاعة ..وقت تكون فاكر نفسك بتابع في اذاعة ام درمان ومنتظر الاذاعة تنتقل الي الاستديوهات الخارجية ..تقوم تكتشف انك قاعد تتابع في اذاعة لندن.
مرات في تداخل بحصل في (الموجات).
السنة دي مباراة القمة عاوزة ليها (حرفنة)..عاوزة ليها زول (مركز)...تركيزو مية المية...عشان ما يلخبط.
يعني ممكن تكون (مريخابي)...بدون ما تشعر تلقى نفسك بتشجع في (الهلال)...لو ما كنت حريف ..ومتابع وعارف أي حاجة.
وممكن يحصل العكس ..زي ما قلت ليكم.
في ناس الي الان ما مصدقين ..انو هيثم مصطفى بيلعب في المريخ.
قالوا ليك ...(والكلام دا ما يطلع من العمود دا)..مزمل ابوالقاسم ...كلو يوم بكتب عمودو ..وبهاجم في (هيثم مصطفى).
وكل يوم مامون ابوشيبة بشيل العمود وبرجعو لي مزمل ابوالقاسم ..وبقول ليه ...(هيثم مصطفى) دا (ولدنا)..هيثم مصطفى دا بيلعب في المريخ يا مزمل ..انت (نسيت) والا شنو؟.
مزمل يقوم (يدلت) العمود ..ويكبت عمود جديد عن (سيدا).
عشان كدا ..انتقال هيثم مصطفى للمريخ ...اكتر زول تضرر منه مزمل ابوالقاسم.
عارفين ليه؟.
عشان مزمل بكتب عموده (كبد الحقيقة) مرتين.
مرة بدون (نظارة)..ومرة بالنظارة.
الجمهور السوداني ..ممكن يستوعب (الشقلبة) دي ...يعملوا شنو ما مجبورين؟.
لكن (الروس)..بستوعبوا الحكاية دي كيف؟.
الجابرهم شنو على (التلتلة) دي.
روسي دخل ستاد الهلال ..(الكلام دا في الاسبوع الرابع للممتاز)...شاف ليك (الشغيل) بسخن بي شعار الهلال.
الروسي طوالي اتلفت للزول الجنبو ..وشال (نضارتو)..وقال ليه معليش ...الظاهر نسيت (نضارتي) في البيت.
الكلام دا طبعا بالروسي.
روسي تاني شاف علاءالدين يوسف في تشكيلة المريخ ....ضرب تلفون ..وقال لي زوجتو ...الظاهر الليلة البيبسي الشربتو دا فيه (طحنية) و (flutab ).
روسي تاني ...في مباراة القمة نفسها .....هيثم مصطفى شات ليه كورة ضربت في (العراضة).
الروسي قام ..وقعد يكورك في هيثم ..يا هيثم مصطفى ...(العراضة) تبقى احن منك.
العراضة تبقى (اوفي) منك.
الروس ديل طبعا كلهم هلالاب...ما عندهم روسي واحد مريخابي.
عشان كدا ..ما بجاملوا ولا بكضبوا.
غايتو مباراة القمة القادمة ...اي زول لازم يدخل الاستاد ب (بوصلة).
والاولاد ..والباعة ..خليهم يكتروا (قصب السكر).
اقول ليكم حاجة يا هلالاب ..شوفوا هيثم مصطفى شايت وين؟...وشجعوا عكسو.
عشان ما تتلخبطوا ساكت.
اها دا كلام بتقبل يا جماعة.
هلال مريخ القادمة زي الفيلم الاجنبي ...الترجمتو ما واضحة.
زي الشاي بالبلح.
زي العرس الفيه (وفأة).
اقول ليكم حاجة اقرب من كدا.
مباراة هلال مريخ ..بقت زي الديوان المفرشنو ..وهو (شبابكو وابوابو) لسع ما ركبوها.
اقول ليكم حاجة اوضح.
زي فتة العدس ...الما فيها (عدس).
او زي شوربة الضان ...المعمولة بالعجالي.
حاجة كدا ما مفهومة ..ولا مبلوعة.
اوصفها ليكم كيف؟.
انتوا ساعدوني بالصنة.
مباراة هلال مريخ .. زي الضيف البيجيك الساعة تلاتة (ضهر)..تقول ليه اتغديت.
يقول ليك : والله انا فطور ما فاطر.
انت بتسألوا ليه؟...ما تعمل (الغدا) طوالي.
هلال مريخ دي .اقول ليكم شنو؟.
اتذكرت.
هلال مريخ دي زي المسلسل السوداني في قناة (mbc ).
غايتو السنة دي قناة (طيور الجنة) نسبة مشاهدتها في السودان ح تكون عالية.
يمين ما في زول فاهم حاجة.
هلال مريخ ..بقت زي الزول (المطوفش)..البجي في اخر الصينية ..يقوم يلقى البامية ..مع القرع ..مع سلطة الاسود مع الكستر ..يقوم يلخبط ليك الحكاية دي كلها في ماعون واحد..ويقول ليكم اكلو ..اصلها كلها ماشي البطن.
الحكاية هسع اتلخبطت على الاخر كدا.
انا بتخيل حاجات كدا ...في مباراة القمة القادمة ح تحصل ..وح اقول ليكم مواقف في القمة القادمة.
بس الكلام البقولوا ليكم دا ...(ما يطلع من العمود دا).
يقوم ناس مجلس الصحافة يقولوا لي انت الكلام دا بتجيبوا من وين؟.
عشان الكلام ..دا خطير شديد ..وسري للغاية....اكتلوه قبلو.
يقوم ينقص (كرسي) في استاد المريخ ..يقولوا النقيصة دي من اعلام الهلال.
قالوا ليك ..مشجع هلالابي (قاطع) ..النوع البدخل ليك في غلاط من تصبح ..وقت الهلال يكون عندو مباراة.
عمك طلع شايل علمو ..وطارتو ..ولابس فانلة الهلال ..وبشجع في (سيد البلد).
ما سايل في زول.
اصلو ناس الهلال كدا ..عندهم عزة ..وقوة وكبرياء ..وانفة ..ورأي في أي حاجة.
المشجع دا ..شايل حاجاتو دي ...ومشي دخل في المساطب الجنوبية ..قعد ليك بي شعاراتو دي في وسط المريخاب.
ولا سايل في زول.
في واحد ..قال الزول دا مجنون ...الزول دا المدخلو بي جاي شنو؟..يمين مهند الطاهر يجيب ليه هدف في المريخ ...(طوب المسطبة) دا كلو يقع في رأسو.
كمان لابس شعار الهلال ..وبشجع في (سيد البلد).
زولكم مشي عليه ...قبل المباراة تبدأ وقال يخارجو من هنا ...يمكن يكون ما عارف.
يمكن يكون داخل بالغلط.
يمكن في واحد ..مقلبو ..ودخلو في مساطب المريخاب.
مشي عليه ..قال ليه : اسمع يا عمك ..انت داخل غلط ...المساطب دي مساطب المريخاب.
عمك عاين ليه كدا ..من فوق لي تحت ..وقال ليه ..يا زول مريخ شنو؟..انتوا ميتن عملتوا ليكم (مساطب) مع الناس ؟.
انتوا صدقتوا وإلا شنو ؟...بعدين يا ود الناس الحكاية اتلخبطت من كبارها...ما في حاجة اسمها دي مساطب الهلال ..ودي مساطب المريخ.
الحالة بقت واحدة.
ما في حاجة اسمها مسطبة المريخ عشان تكون عارف ...ولا في حاجة اسمها جانب جماهير المريخ ...الحكاية شكوها.
بعدين انت لو عامل فيها عاقل ...وعندك احساس ..امشي قول لي هيثم مصطفى البسخن داك .....قول ليه : انت لابس شعار المريخ ..لابس (النجمة)...وقول ليه كمان انت بتلعب في الفريق الخطأ.
يعني الحكاية بقت على انا ..هيثم مصطفى دا جايبنو يا مريخاب من (ابوعنجة).
يمين نقعد في أي حتة ...وما في زول بقدر يقول لينا حاجة...قال مساطب المريخ قال.
مساطيبكم دي انا عندي فيها (45) رطل سكر...ومقصورتكم دي على الاقل عندي فيها شوال عيش.
تخصموا ساكت ..وتزيدوا في الاسعار ..وقت ندخل نقعد ..تقولوا لينا دي مساطب جماهير المريخ.
خليها المساطب.
طيب هيثم مصطفى دا جايبنو من (عقد الجلاد).
يعني بقت على (المساطب).
زولكم قال كلامو دا ..واتلفت على جماهير المريخ ..وقعد يهتف ..(سيد البلد ..سيد البلد..سيد البلد)...خلى واحد فيهم يقدر يقول حاجة.
وقت الكلام دا حصل في استاد الهلال في الاسبوع الرابع للممتاز وفي مباراة القمة ..كان هناك حدث اخر بحصل في (شندي).
طبعا عاوزين ..تعرفوا في شندي حصل شنو؟.
اصبروا يا جماعة ..ما تضيقوا ..نحن أي حاجة عندنا بي نظام ..ونحن ما بنتكلم ساكت.
الكلام دا بنرتبو ليكم بي نظام.
ما تقعدوا تلافحوا في الكلام ..زي الزول الجاتو مطرة ..ولحفاتو برة الحوش.
واحد في شندي ..قاعد منتظر مباراة القمة في التلفزيون.
انا ما عارف ليه ..وقت تكون في مباراة كبيرة ...الواحد فينا بقعد يعزل في (المخدات).
علاقة المخدة بالكورة شنو؟.
الاستديو التحليلي بدأ...زلوكم بتاع شندي دا ..عيونو بقن 5 ضلف.
الكورة بدأت..صاحبكم شاف هيثم مصطفى مع المريخ ..وشاف الشغيل مع الهلال ...الباشا وفييرا وكلتشي واكرم في المريخ.
دا شنو؟.
زولكم دعك عينو.
الحكاية دي بالجد.
صبر خمسة دقائق ..قال يمكن دي حمي مباريات القمة.
يمكن يكون بتخيل لي ساكت.
لكن ناس شندي صعبين ..ما بتخيلوا اصلو.
ناس شندي بتشغلوا بالواقع بس.
ما عندهم حاجة اسمها (خيال).
انتوا فاكرينهم (هنود).
شوية كدا ..شاف ليك هيثم مصطفى لعب ليه كورة لي بلة جابر.
الله ..الله ..الله.
معقولة بس ..هيثم مصطفى يلعب ليه كورة لي بلة جابر.
دي بلة جابر ..يستوعبها كيف؟.
الحكاية دي ممكن تكتل بلة جابر عديل كدا.
بلة جابر شن خبرو بالفلسفة دي.
دي زي الفنان الفنان الناشيء ...البقوم طوالي كدا ..من قولة تيت يغني لي مصطفى سيد احمد.
شوية كدا ..زولكم شاف (النجمة) في صدر هيثم مصطفى.
زولكم ما كضب ...طوالي قام طلع في رأس البيت ..وقعد يظبط في (الاريل).
قال في نفسو ...الظاهر كدا ...اريلنا دا بقى يهضرب.
يعني بدل ما يجيب تلفزيون السودان ..جاب لينا (ترعة كنانة والرهد).
قام لخبط الحكاية من اساسها.
جاب الشغيل في الهلال ...وهيثم مصطفى في المريخ.
يا اخوي..اقول ليك حاجة.
العيب ما في (الاريل).
العيب في (الحكومة).
هسع الحكومة ذنبها شنو؟.
غايتو الزول وقت يكون عاوز ليه سبب.
ارجع ليكم لي استاد الهلال ...الاسبوع الرابع للدوري الممتاز.
اشوف ليكم موضوع (الروس) دا.
روسي قاعد ...يتابع في المباراة ...(اتفهم ليك حكاية هيثم مصطفى دا في المريخ).
قاعد بتابع في المباراة كدا ...هيثم مصطفى لعب ليه (تمريرة) بالكعب لكلتشي.
كلتشي شات الكورة في الكشافات.
الروسي طوالي قام علي حيلو ...وقال : يا هيثم (الكورة) دي قبل سبع سنوات كنت بتلعبها لي كلتشي في الهلال ..وكانت بتجي قون.
هسع بقت تمشي (الكشافات).
روسي تاني ..قاعد في المساطب الشعبية ...طلب من ست الشاي (قهوة)..البنت جابت ليه (شاي).
قال ليها يا بنت انا طلبت (قهوة)..ما شاي.
البنت عاينت للروسي كدا ..وقالت ليه يا اخوي انت من زمن تطلب قهوة ..يجيبوا ليك (قهوة)...الثوابت دي اتغيرت زمان ..هيثم في المريخ ..والشغيل في الهلال.
الروسي ما قدر يقول أي حاجة.
قفل موبايلو وطلع.
هسع الموبايل ذنبو شنو؟.
غايتو الزول وقت يكون عاوز ليه سبب.
ما بعدم الحيلة.
ملحوظة : موضوع الروس دا ...والاسبوع الرابع برجع ليه تاني ..فيه حاجات خطيرة.
هوامش
نسأل الله الرحمة والمغفرة للراحل المدقق والصحافي عبدالله بلة ...الذي كان يملأ الصحف التى يعمل بها بالبهجة.
لم نشاهده قط ..دون (الابتسامة) تسيطر على وجهه السوداني الاصيل.
كان بشوشا ...ولطيفا ..ومخلصا في عمله.
نسأل الله له الرحمة والمغفرة ..وان يجعل مثواه الجنة.
الاحزان هذه الايام تمتد على كل المساحات.
في كل يوم ..يرحل زول رائع.
اتذكر عبدالله بلة بالجلابية والعمة على كتفه ..ومريخيته الجميلة ..ونقاشه اللطيف.
القرعة في اعتقادي ظلمت الهلال وقست عليه.
وان كنت احسب ان القرعة كانت مرتبة ..ومفصلة.
الاتحاد العام اراد ان تكون مباراة الافتتاح بين الهلال والمريخ الفاشر ..في الفاشر ..فكان له ذلك.
في الموسم الماضي ..لعب الهلال اول مباراة في الممتاز امام الاهلي شندي في شندي.
وفي هذا الموسم ...وجهوا القرعة ليلعب الهلال امام مريخ الفاشر في الفاشر.
وهاشم ملاح ..قاعد يضحك في الصفوف الخلفية ..بينما كان عبدالله حسن عيسي يجلس مع وزير الشباب والرياضة والوزير الولائي ومعتصم جعفر في الصف الامامي والمقاعد الرئيسية.
معقولة الهلال يبدأ الدورة الاولي بالفاشر ..وينتهي بي شندي.
طارق عطا اعلن عن مباراة الهلال ومريخ الفاشر قبل اكتمال مراسم القرعة.
طبعا الهلال في الدورة الاولى سيمر بظروف صعبة ..اصابات وكشف ناقص ..وابتعاد الجماهير.
عشان كدا ..قصدوا ان يلعب الهلال اصعب المباريات في الدورة الاولي خارج ارضه.
مريخ الفاشر .. واتحاد مدني والامل عطبرة ..واهلي شندي ...كل هذه المباريات سوف يلعبها الهلال في الدورة الاولى خارج ارضه.
وبرضو يقولوا ليك (قرعة).
المريخ اول مباراة له في الولايات سوف تكون في الاسبوع السادس..بينما عندما يأتي الاسبوع السادس ..سوف يكون الهلال لعب في الفاشر ..ولعب في مدني امام الاتحاد.
قرعة مرتبة.
قرعة (منظمة).
يا حليل كمال شداد.
في كل حدث ..نتأكد ..اننا فقدنا الدكتور كمال شداد.
الحضري اعتزل اللعب الدولي بعد الاربعين.
الكبر ظهر.
خلاص ..العهد التنازلي بدأ.
عاجل : اقول ليكم ...مباراة القمة قدموها لينا للاسبوع التاني ..عشان نحسم (المريخاب) ديل في الفاشر وفي ام درمان من قولة تيت.
