معقولة ضفر بقى زي (الريد) ... ضفر بقى يجمع ويفرق ...بحر """""""""""""""""""""""""""""""" صلاح احمد ابراهيم كان وقت يدخل ليه (حرف جر) في جملة مفيدة – البلد كلها بتقعد تشهق """"""""""""""""""""""""""""""" طيب يا ضفر لو عندك سلطات قدر دي – ما تشوف لينا حل لي ازمة الغاز """""""""""""""""""""""" هل يمكن ان يأتِ زمن يصبح فيه (الشاي باللبن) بالواسطة بدلا ما باللبن؟ """"""""""""""""""""""""""""""" • معقولة يا عالم. • افتحوا قوس واقعدوا برة منو. • معقولة ضفر بقى زي (الريد). • ضفر – بقى يجمع ويفرق ...بحر. • ضفر بقى (بحر) مرة واحدة كدا. • جماعتنا البي جاي ديل مصيرهم بقى يحددو (ضفر). • مصيرهم معلق في يد (ضفر). • هو البشيل وهو البرجع. • وهو البقرر. • مع تحيات مجلس المريخ. • ناس جمال الوالي. • ناس عبدالصمد. • الفريق طارق. • مصيرهم عند (ضفر). • قدموا الاستقالة يوم الاربعاء بسبب علي جعفر ..وسحبوها يوم الاحد بسبب (ضفر). • شفتوا ليكم مجلس ادارة محترم كدا ..بقرن مصيرو بي لاعب كورة. • اعملوا ليكم صالون لي (ضفر). • اعملوا ليه منتدى ثقافي – الزول دا بقى ما ساهل. • بقى بتحكم في مصير مجلس. • ضربة الجزاء التى اهدرها (اكرا) كان ممكن تطيح بي المجلس كلو. • يعني لو ما ضفر جاب القون ..جماعتكم ديل كانوا اصروا. • كانوا استقالوا. • وكانوا قالوا عاوزين نتيح الفرصة للاخرين. • عليكم الله ديل (مجلس ادارة)..وإلّا عشرة كوتشينة البفرتكها ويقعدها (ضفر). • وقالوا ليك المجلس ح يقعد مع (الوزير). • وزير شنو؟. • اقعدوا مع (ضفر). • احسموا معاه مواضيعكم. • الزول دا ما مضمون – المباراة القادمة يمكن يكون خارج نطاق الخدمة. • ح تقعدوا تربطوا مصيركم بي (ضفر). • قول ضفر دا قام زعل – تقوموا تفرتكوا. • مجلس محترم. • مجلس جاء بالانتخابات وعن طريق صناديق الاقتراع. • دفع مليارات الجنيهات. • ما خلى حاجة. • اصلو ما قصر. • يبقى مصيرو كلو في ايد أحمد عبدالله ضفر. • قيام. • جلوس. • لي احمد عبدالله ضفر. • طيب يا ضفر لو عندك سلطات قدر دي – ما تشوف لينا حل لي ازمة الغاز. • وبالمرة كدا شوف لينا معاك (كوبري المنشية). • البلد اضايقت خالص. • ناس بقعدوا ويقوموا بي (ضفر). • غايتو (الحكايات) وقت تبقى زي (اولاد المدارس). • الناس ديل بزعلوا بدون سبب. • يقوموا يقفلوا تلفوناتهم ويمشوا يقعدوا في بيتوهم. • يقوموا الموضوع يبقى ليهم حار ، يفتقدوا الاضواء والصور – يرجعوا تاني. • شهر – شهرين يقوموا يزعلوا. • يقدموا استقالة (صورية). • الجماعة يقعدوا يحنّسوا. • يرجعوا من جديد. • يقولوا المصلحة العامة فوق اي شيء. • يفرحوا شوية كدا – يقوموا بدون مقدمات يزعلوا لينا. • تقوم البلد كلها تقعد تحنّس. • يرجعوا. • يزعلوا – لكن المرة دي يخلوا تلفوناتهم فاتحة. • برضوا منهم وليهم. • يرجعوا. • يزعلوا. • يستقيلوا. • يسحبوا الاستقالة. • الاستقالة عندهم زي (المشبك)...يشروها ساكت. • ويرجعوا يلموها. • انتوا مشروع (الجزيرة) سمع بي البتعملوا فيه دا؟. • طيب مالوا (فشل) كدا؟. • يستقيلوا الخميس. • يرجعوا الاحد. • حكايات – المساخة مرات بتبقى ظاهرة ليك في (درب) الزول. • في اترو. • ظاهرة ليك في الواطة. • في علوم كدا. • وفي فلسفة قريبة من الموضوع دا. • هل يمكن ان يأتي زمن يصبح فيه (الشاي باللبن) بالواسطة بدلا ما باللبن؟. • ممكن. • اي حاجة جايزة. • ممكن يجي زمن (حروف الجر) تبقى (اسماء) عديل كدا. • في مصر قالوا ايام مبارك حصلت ازمة في (حروف الجر). • الشعب كلو طلع ميدان التحرير. • عاوزين شنو؟. • عاوزين (حروف الجر). • حروف الجر ما تهملوها – حروف الجر حاجة ما ساهلة. • قالوا ليك صلاح احمد ابراهيم كان وقت يدخل ليه (حرف جر) في جملة مفيدة – البلد كلها بتقعد تشهق. • وقالوا ليك كمان استاذ جاء جديد المدرسة – واي معلم بجي المدرسة جديد بحاول يثبّت نفسو. • بحاول يثبّت شخصيتو عشان الطلبة الشفوت ما يطلعوا ليه في رأسو. • الاستاذ بتاع (لغة عربية) صعب – النوع الما بعاين بالشباك. • ولا بشك القميص. • ولا بتلفت. • تركيزو كلو في الفصل. • تركيزو مع الطلبة. • دخل الفصل في اول حصة قال يرهب الطلبة – قام قوّم ليه طالب (شفت) قال ليه قول لي اخوات إنّ. • الطالب مسطح – قال ليه اخوات إنّ : الطحنية والجبنة والطعمية والزيتون. • الاستاذ قال ليه اخواتها في شنو؟. • الطالب قال ليه اخواتها بالرضاعة. • الاستاذ ما عرف يتصرف كيف – عشان (خوة) الرضاعة دي صعب الزول يقدر يثبتها. • الاستاذ قوّم ليه طالب تاني وقال ليه وريني اخوات كان. • الطالب قال ليه مازال واصبح واضحى وظل وبات... • الاستاذ قبل ما يقول ليه شاطر ممتاز.. الطالب قال ليه ونفيسة بنت جاد الله. • الاستاذ قال ليه نفيسة بنت جاد الله دي شنو كمان؟. • الطالب قال ليه نفيسة دي يا استاذ دائما بتكون واقفة في الباب وبتقول ليك نحن زمان – وايامنا الماضية...ناس الحلة قالوا نفيسة بنت جاد الله دي اخت كان الكبيرة. • الاستاذ ما كضب طوالي ضم ليك نفيسة بنت جاد الله ضمن اخوات كان. • واحد من الشفوت البقعدوا ورا رفع ايدو. • الاستاذ قال ليه اها في شنو؟ – عاوز تقول شنو تاني؟. • الطالب قال ليه عاوز اضم (المريخ) لاخوات كان يا استاذ ..ديل ما عندهم جملة من غير (كان). • واحد شفت تاني ..قال ليهم المريخ ليس من اخوات كان – المريخ دا (كان) ذاتو. • الاستاذ فهم حاجة – وعرف ليك المنطقة دي منطقة هلالاب شفوت – يعني ما في اي طريقة لى اللولوة واللف والدوران. • يا سلك – قالوا ليك مريخابي مبسوط – النوع البتلقاه بدون مناسبة داك بدفق فرح. • بدون سبب بتلقاه بيضحك. • المريخابي يا سلك مشى ليه (ملحمة). • مشى ليه (جزارة). • مع بسطتو دي قال للجزار عليك الله نزل لي (كراع) الخروف دي. • الجزار عاين ليه كدا – وقال ليه عثمان ما معقولة ...الليلة لاعبين ضد (جزيرة الفيل) مالكم شايلين ليكم كراع خروف واحدة بس. • محلل فني ..استضافوه في التلفزيون – قال ليهم المريخ قبل مباراة مريخ الفاشر لو ضبح ليه (عنبلوك) ما كان اتغلب. • عنبلوك كان بمرقكم. • محسن سيد قالوا ليك ..(من باب الفايدة) برضو قدم ليه تقرير فني لمجلس ادارة المريخ قال ليهم المريخ للمباراة الافريقية القادمة بيحتاج ليه (17) خروف. • بلة جابر ..طلع من تشكيلة المريخ لاسباب صحية. • بلة جابر لقى (اللحمة) دي تاني ما بركز ليكم في الكورة. • .......... • ملحوظة : يا ربي القاعد يسمسر في الخرفان دي منو؟. هوامش • تلقوا الخروف ب (800) جنيه يقولوا بي (1600). • اشاد السيد وزير الشباب والرياضية بولاية الخرطوم السيد بله يوسف بالاداء المتميز لمجلس ادارة نادي المريخ وحرصه على الالتقاء به بشكل دوري وتقديم تقارير اداء بشكل منتظم , مشيدا بانتصار فريق المريخ على عزام التنزاني وتأهله للدور الاول من بطولة دوري الأبطال , واعدا بتذليل كل الصعاب التى تعوق مسيرة النادي. حسب ما جاء في المواقع امس. • مجلس المريخ جاء عبر جمعية عمومية ..لم يأت عن طريق الوزير. • هذا خلط سلطوي واضح. • يجب ان يقدم المجلس تقريره للجمعية العمومية وليس الوزير. • لكن المجلس جاء بالتعيين كان يمكن قبول ذلك. • بس نقول شنو؟. • في المريخ تسير الامور على تلك الطريقة. • كان تشيلوا ليكم (خروف) وتضبحوه في الوزارة. • عشان الامور تظبط. • الفريق طارق رئيس بعثة المريخ الى شندي. • ناس شندي لو مشى ليهم عبدالصمد كان رجعوه ليك من الشوط الاول. • اخيرا الفريق طارق. • الاهلي شندي عندما يلعب امام المريخ دائما بشكي من الاصابات وعدم تسديد المرتبات. • دائما يواجه المريخ فريق الاهلي شندي والاخير في حالة من الفوضى. • اين صلاح ادريس؟. • هل رفع صلاح ادريس يده من الاهلي شندي؟. • اين هاشم احمدونا الذي كان يصرح قبل مباراة الهلال ب (21) يوما؟. • احمدونا برضو مصاب؟. • ............ • عاجل : ضربة جزاء (اكرا) زي الحفلة البعملوها برة البيت.
