لا يذكر مامون ابوشيبة في ذلك غير (عرقلة) أحمد النور لمهاجم المريخ عبدالمجيد جعفر سنة 1996م """"""""""""""""""""""""""""""""""" ناس فيصل سيحة والذي كان وقتها رئيس للجنة الحكام ..هسع بعد العمر دا ..وبعد الاعتزال بقول ليك هدف الهلال جاء من تسلل """"""""""""""""""""""""""""""""""" كوفي في مباراة المريخ الاخيرة ...لعبها (ضعيفة) تقول من اعضاء فرقة طيور الجنة """""""""""""""""""""""""""""""" اها من الزمن داك ..عمري ما شفت لي ضربة جزاء ضائعة في الدوري الانجليزي """"""""""""""""""""""""""""""""""""" • مامون ابوشيبة زمان كان بقول الهلال في مباريات القمة بيحسبوا ليه (ضربات جزاء). • ساكت كدا. • بيدوها ليه من السما. • بدون اي داعي. • الكورة تكون (جدعة) يحسبوها ليه (ضربة جزاء). • وبقعد يحتج على هذا الاساس. • يعترض ليك لمن تصدق كلامو. • وكان بقول ليه المريخ ما بيحسبوا ليهو (ضربة جزاء) وقت يلعب مع الهلال؟. • انتوا يا ابوشيبة (ضربات الجزاء) عندكم ليها رأس. • خسارة ضربات ساكت. • عليكم الله ديل ناس ضربات الجزاء حقتهم بتمشي (الكشافات). • بتمشي السماء. • العكسيات بتمشي وين؟. • وكان ابوشيبة رافع ليه شعار كدا – يقول ليك من سنة 1996 ما احتسبوا للمريخ ضربة جزاء. • سنة 1996م ...الزول بقول كان في خريف. • كان في ضربة جوية. • كان في فيضان. • كان في كسوف. • كان في خسوف. • كان في شنو؟. • مامون ابوشيبة يقول ليك سنة 1994م كان في (ضربة جزاء) الحكم لم يحتسبها للمريخ. • ما عارف لو احتسبها كان بيحصل شنو؟. • ونحن كنا بنقول لي ابوشيبة ما شرط. • وليس من الضرورة في شيء. • الموضوع عادي بيحصل في ارقى العائلات. • لكن مامون ابوشيبة كان بتكلم على اساس ان المريخ في اول خمس دقائق عندما يكون لاعب ضد الهلال مفروض الحكم يقوم يحتسب ليهو (ضربة جزاء) هدية كدا باعتبار ما كان. • على اساس ان احمد النور الذي اصبح (مدربا الان) كان قد عرقل (عبدالمجيد جعفر) سنة 1996. • مواليد سنة 1996 هسع دخلوا الجامعات. • وحايمين كمان من كافتريا لي كافتريا. • ومامون ابوشيبة ممكن ينسي اي حاجة. • ممكن يسامح في اي شيء. • إلّا ضربة جزاء يظنها صحيحة لم تحتسب للمريخ. • مامون ابوشيبة بصحيح العبارة كان بيظن ان الحكام بحتسبوا للهلال ضربات جزاء (وهمية) في مباريات القمة. • بينما بيصرفوا للمريخ ضربات جزاء صحيحة. • ولا يذكر مامون ابوشيبة في ذلك غير (عرقلة) أحمد النور لمهاجم المريخ عبدالمجيد جعفر سنة 1996م. • تقول العرقلة دي حدثت بضرب نار. • او في شارع التحدي. • ابوشيبة بيديك احساس ان العرقلة كان فيها موت. • وان عبدالمجيد جعفر زول بريء ..اطيب زول ..لا بعرف يمثل ..ولا بقع في الواطة بدون سبب. • الغلط من أحمد النور. • نوع العرقلات دي يا ابوشيبة ..نحن عندنا الف واحدة الحكم ما احتسبها لينا في مباريات القمة. • محمد حمدان. • والي الدين محمد عبدالله. • عمر النقي. • عثمان الجلال. • وليم. • بعدين انتوا يا ابوشيبة (الحكام) ما يحسبوا ليكم (ضربات جزاء) ليه؟..وانتوا بتختاروا الحكام بالاسم. • على كيفكم. • بتحددوا (الحكام) براكم. • وما يحسبوا ليكم يا ابوشيبة. • معقولة بس. • ناس فيصل سيحة والذي كان وقتها رئيس للجنة الحكام ..هسع بعد العمر دا ..وبعد الاعتزال بقول ليك هدف الهلال جاء من تسلل. • وبقول ليك لا وجود للتسلل – هدف المريخ صحيح. • طيب الزول دا وقت كان حكم ..كان بعمل شنو؟. • زولكم دا في تلفزيونو هسع – قاعد في الاستديو ...وفي هذا العمر وبعد كل هذه الخبرات ..بقول ليك هدف الهلال جاء من تسلل واضح. • ولا وجود للتسلل – هدف المريخ صحيح. • نوع ديل ..تتوقعوا يظلموا المريخ. • ديل الى الان ما قادرين يطلعوا من لونيتهم. • الى الان في حالة تعصب كامل. • نفسي في ملاح قرع. • يا زول القرع الدخلو شنو؟. • مالك عاوز تلخبط لينا. • مامون ابوشيبة الذي شكك في حكام مباريات القمة ..ماذا يقول الان مع الحكام الافارقة الذين اصبحوا في كل مباراة بيحتسبوا للمريخ (ضربة جزاء). • المريخ في اي مباراة افريقية بقى عندو (ضربة جزاء). • حكم مباراة المريخ وعزام احتسب ليهم (ضربة جزاء) برة (المدينة). • اكرا ...وداها (الكورنر). • كوفي في مباراة المريخ الاخيرة ...لعبها (ضعيفة) تقول من اعضاء فرقة طيور الجنة. • يا ابو شيبة الجماعة ديل بجيبوا ليكم (الهوا). • بيحسبوا ليكم في (ضربات الجزاء) ..وما مستفيدين انتوا منها في حاجة. • ضربات جزاء جايبة ليكم الكلام ساكت. • في الموسم الماضي..باسكال اضاع امام كمبالا سيتي وكذلك اضاع تراوري. • ضربة جزاء برة. • وضربة جزاء جوة. • الاتنين ضاعوا. • الطريف في الامر ان بكري المدينة كمّل الناقصة ..واضاع ليه ضربة جزاء امام مريخ الفاشر. • يعني محلي وقاري. • جوة وبرة. • كل ضائع. • يا مامون ابوشيبة بتفسيراتك ذاتها ..هل يمكن ان تفسر لينا هذه الظاهرة؟. • ظاهرة اضاعة ضربات الجزاء...ما ظاهرة احتسبناها. • بس انتوا جاريين للحاجات الكعبة. • الغريبة الجماعة ديل ما قصروا في (الخرفان). • قاعدين يضبحوا. • مع ذلك اسهل حاجة في كورة القدم – بيضيعوها. • بحضر في الدوري الانجليزي من زمن بجيبوه (مؤجز). • قبل ما تظهر السماعات. • زمن ما كان في طريقة لي اعادة القون. • تشوفو مرة واحدة بس. • لو عاوز الاعادة ..إلّا تنتظر بكرة. • يعيدوا ليك المباراة كلها. • ما بقدروا يعيدوا ليك الهدف. • اها من الزمن داك ..عمري ما شفت لي ضربة جزاء ضائعة في الدوري الانجليزي. • انجليزي شنو؟. • الدوري الاثيوبي ما قاعد اشوف لي فيه ضربة جزاء ضائعه. • لكن تعالوا شوفوا المريخاب ..ما شفت ليهم ضربة جزاء احتسبوها ليهم جاء منها هدف. • كلها ضائعة. • احسن حاجة – ممكن يطلعوا ليك من (ضربة الجزاء) بي (كورنر). • اكتر من كدا – ما بقدروا يطلعوا بي حاجة. • ضربات جزاهم (كورنر). • انتوا (الخرفان) البتضبحوا فيها دي – قاعدة تمشي وين؟. • بتودوها وين؟. • مفروض تاني (الحكم) وقت يحسب ليكم (ضربة جزاء)..يصرف ليكم مع الضربة (بطارية). • وقت انتوا ما بتشوفوا (الكشافات) لزومها شنو؟. • خسارة اضاءة ساكت. • خسارة لمبات وموية باردة. • نفسي في ملاح قرع. • يا زول قرع شنو؟. • ما تحرجنا مع الضيوف. • امس عبدالله كمال كتب في زاويته (بوضوح شديد) في صحيفة الزعيم : (لا نطلب من مجدي شمس الدين شيئا سوى ان يمنحنا حكما (نزيها) يدير معركة الاياب بين المريخ وكابوسكورب الانغولي). • بالله مجدي شمس الدين مسيطر على الاوضاع للدرجة دي. • يعني مجدي شمس الدين بقدر يعين حكم نزيه ..وحكم ما نزيه. • طيب يا مجدي شمس الدين انت وقت بتعرف في حكام ما نزيهين ..بتخلوهم ليه. • ما تشيلوهم لينا برة. • المريخ بقى يقعد ويحدد ...ومجدي شمس الدين ينفذ. • المريخاب عاوزين حكم نزيه في المباراة القادمة. • طيب يا مجدي شمس الدين – خليني اسألك سؤال ...الحكام الصرفوا لينا تلات ضربات جزاء جبتوهم لينا من وين؟. • المطاميس ديل جبتهم لينا من وين يا مجدي. • يا مجدي انت في الافريقية لاحقنا. • في البطولة الافريقية ..عاوز تعمل لينا (حركات). • وفي البطولة الافريقية بتخلي المريخاب يحددوا (الحكام). • في المحلي قالوا ما عاوزين حكام من الخرطوم. • وما عاوزين اعضاء في الاتحاد بنتموا للهلال. • كمان في البطولة الافريقية بتحددوا طبيعة الحكم. • بقيتوا خطرين عديل كدا. • ............ • ملحوظة : احسن نشوف لينا (قرع) من البتعملوا فيه دا. هوامش • امس الفاتح النقر في برنامج (زمن اضافي) باذاعة هلا 96 عبر برنامج الزميل حسن فاروق كان منطقيا لابعد حدود. • الفاتح النقر ..اكد انه رهن الهلال ..وان الهلال بيته ..وانه في اي وقت يحتاج له الهلال سوف يلبي طلب الهلال. • الفاتح النقر قال ان مدثر كاريكا ووليد علاءالدين وسيدي بيه وبشه لعبوا دور كبير في مباراة ضرب الرصاصات الملاوية. • الفاتح النقر ..اعاد كاريكا الى حالة التوهج. • قبل التعاقد مع نبيل الكوكي ..اصبروا عليه. • لو ما بتقدروا تصبروا عليه ..احسن ما تتعاقدوا معاه. • مدرب بدون (صبر) ما بعمل اي حاجة. • ناس المريخ قلنا يكونوا خايفين من الترجي ..طلعوا خايفين من كابوسكورب. • بالمناسبة النتيجة التى خرج بها المريخ نتيجة غير مطمئنة. • لو ما غلبتوا اربعة ..ما تطمئنوا. • بعدين كابو سكورب ..فريق خطير. • خلوا لينا نحن (الحمام). • بنضرب من طرف. • في حمام (رصاصات). • ............. • عاجل : تاني قبل ما يحسبوا ليكم ضربة جزاء ..كلموهم يصرفوا ليكم (بطارية) بتشيل ست حجار.
