يا ناس الزمن دا غيرتوا اي حاجة – حتى (الطحنية) المسالمة ورضية قلبتوها لينا (ساردين) والله الطيارات الخاصة دي لا في داعي ليها ولا حاجة...لو جونا بي (كارو) بيقضوا غرضهم ويمشوا الخطوبة لمن تتطول ما بتنتهي بي عرس بتبقى زي (السلم التعليمي) في السودان طويلة بدون فائدة حرقتوا لينا اعصابنا...ما بنستحمل اي هجمة...الهدف الوحيد ..بيخليك زي (الشاحن) الرايح • الطحنية في القانون الانجليزي القديم ما (طحنية). • طيب شنو؟. • ح تقول لينا (ساردين)!!. • زبادي!!. • نحن عارفين اي حاجة – لكن ما عاوزين نتكلم. • ما عاوزين نقول اي شيء. • الحالة ما بتسمح. • يا ناس الزمن دا غيرتوا اي حاجة – حتى (الطحنية) المسالمة ورضية قلبتوها لينا (ساردين). • والساردين – ما عندو علاقة بي البتعملوا فيه دا. • بتسوها ساكت في (الساردين). • مرة في واحد عزمنا ليك فطور. • جاب لينا في الفطور (ساردين). • عاوزين نمشي على (الساردين)عشان ناكلو صاحبكم ثبتنا ليكم. • قال لينا (التحلية) دي خلوها اخر حاجة. • قلنا ليه وينها (التحلية)؟ • انتوا (الساردين) عندكم بقى من (التحلية). • الواحد ما ينوم. • صعبتوها عديل كدا. • غايتو يا ناس الزمن دا؟. • زولكم قال لينا دا ما (ساردين). • وقعد يغالط فينا. • ونحن (الغلاط) عمل لينا انيميا. • قلنا ليه طيب شنو يا فالح؟...عامل عيونك ديل زي العيادة الخارجية الفيها (14) غفير ..ودكتور واحد. • قال لينا دي (طحنية). • قلنا ليه نحن كمان لو ما بنعرف (الساردين) ما بنعرف (الطحنية)!!. • الطحنية غيروها. • عندنا واحد مستهبل ..رفع ايدو من الصحن ..وقت الناس بقوا على التحلية ..زولكم مشى على (الساردين). • ضرب ليك (الساردين) لمن الله غفر ليه. • لمن عمل ليه (كريشة) في جبهتو. • وقت عاوز يقوم – قال ليهم والله عندكم جنس (طحنية) غريبة خالص ..ريحتها سمك – سمك...وطعمها ساردين – ساردين. • صاحب العزومة قال لينا دي طحنية (سمكية). • قلنا ليه في الزمن النحن فيه دا ..ما تستغرب من اي حاجة. • يجيبوا ليك (فول) يقولوا ليك دا ما فول. • تقول ليهم دا شنو طيب؟. • يقولوا ليك (بامية مفروكة). • ونحن لو ما بنعرف (الفول) – كمان يا جنيات الزمن دا ما بنعرف (البامية المفروكة). • البامية المفروكة هي ذاتها بجيبوها ليك...ويقولوا ليك دي ما (بامية مفروكة). • تقول ليهم دي شنو؟. • يقولوا ليك دي (ملوخية بي الارانب). • اذا اقتنعنا بي (الملوخية) ..وينها (الارانب)؟. • لو ما بنعرف الملوخية وبنلخبط فيها ..ما بنعرف (الارانب). • زمن عجيب والله. • بقينا نتعقد عديل كدا. • مرة قاعدين نتابع لينا في (فيلم اجنبي). • فيلم اجنبي مسخن شديد. • البطل من الما بطل ما بتعرفو. • والخاين شيكاغو كلها بتضرب فيه. • قاعدين نتابع في الفيلم كدا – واحد من الجيران ..قال لينا دي ما (فيلم اجنبي). • كلنا اتلفتنا عليه. • كلنا استغربنا ..وقلنا ليه طيب دا شنو؟. • قال لينا دي (نشرة عشرة). • قلنا ليهم معقولة ..نحن قاعدين ومستغربين وبنشرب في الشاي وبنطقطق في اصابعنا وما بنرد على التلفونات عشان (نشرة عشرة). • ما كان تكلمونا. • كان تقولوا لينا. • على الاقل ..كنا قلبنا القناة. • غايتو يا ناس الزمن دا. • بتعملوا في حاجات غريبة. • نشراتهم من أفلامهم الاجنبية بقت ما بتتعرف. • مرة شلنا لينا واحد تعبان شديد. • مشينا المستشفى. • الدكتور قال لينا دي ما (ملاريا). • قلنا ليه نحن المستشفى دي بندخل فيها من الستينات..ما حصل في يوم من الايام قالوا لينا شيء غير (الملاريا). • الدكتور قال لينا صحيح ..بس الاعراض بتاعة الزول دا ما أعراض ملاريا. • قلنا ليه أعراض شنو يا دكتور؟. • الدكتور فتح ليه قاموس كبير. • وشرب ليه (جك) موية. • وطلع النضارة. • وقعد ينطط في عيونو متل كورة التنس. • ورجع بي الكرسي لي وراء. • وقعد يحك في صلعتو. • وقال لينا الاعراض دي اعراض (ترجي). • قمنا نحن اتشهقنا. • وضعنا ايدنا في نص رأسنا – وقلنا للدكتور ..طيب يا دكتور الحكاية دي خطيرة للدرجة دي!!. • ترجي شنو يا دكتور؟ – الجماعة ديل مريخ الفاشر بيجيب خبرهم...الشيء دي خطيرة كدا يا دكتور؟. • الدكتور قال لينا خطيرة الشوية دي...المرض دا بيكتل عديل كدا. • قلنا ليه طيب والعلاج شنو؟. • قال لينا العلاج..تشطبوا ضفر وعلي جعفر واكرا وكوفي وبكري المدينة وتراوري ومتوكل أحمد علي. • قلنا ليه يا دكتور ما تغلّت علينا. • قال لينا ويا ريت بعد دا ..العلاج ينفع. • قلنا ليه تاني في شنو؟. • قال لينا رمضان عجب يمشي الهلال. • قطعنا لينا جردل موية. • قلنا ليه يا دكتور .. شغلتك دي شغلة (طب) وإلّا الموضوع فيه (غتاتة) منك..عامل (صلعتك) متل حالة الطواريء. • الدكتور قال لينا ..على كيفكم ..لو ما عملتوا الخطوات دي ..وجبتو للزول دا العلاج (24) ساعة ما بقعد ليكم ..انتوا ما عارفين الخطورة؟. • قلنا ليه الخطورة وين يا دكتور؟. • قال لينا الخطورة الترجي ح يجي بي طيارة خاصة. • قلنا ليه والحاجة دي خطيرة شديد؟. • الدكتور قال لينا ..دي اقل حاجة فيها تلاتة اهداف. • بعدين ناس ضفر (الطيارات الخاصة) دي ما بعرفوها. • وان جينا للجد. • ما في داعي للطيارات الخاصة. • ناس الترجي ديل قايلين نفسهم في حالة (عاصفة الحزم). • والله الطيارات الخاصة دي لا في داعي ليها ولا حاجة. • لو جونا بي (كارو) بيقضوا غرضهم ويمشوا. • اصلو ما في داعي للطيارات الخاصة. • المريض بتاعنا سمع كلام (الطيارات الخاصة) قام مات. • اتوفى. • شلناه ..قلنا ندفنو. • ولد المرحوم قال لينا ما بندفن لو ما طلعنا لينا تصريح دفن من الحكم الرابع. • قلنا ليه ..انت زولكم دا (مرحوم) وإلّا (زمن بدل ضائع)..حكم رابع شنو البيطلع لينا تصريح للدفن. • والله لو دا كلامكم (الطحنية) لو بقت (ام فتفت) ما في زول بقول ليها حاجة. • وطلعنا على كدا. • قلنا نشوف الرابطة كوستي. • بقت ما عندنا اعصاب للحاجات دي. • الهلال دا ما بنقبل فيه اي حاجة. • ولا كلمة. • بنكره المباراة لمن تكون نتيجتها 1 / صفر. • زي الخطوبة البتستمر (11) سنة..وبعدين ما يكون في عرس. • دي خطوبة وإلّا (السلم التعليمي) في السودان. • الخطوبة البطول ..ما بتنتهي بي عرس. • بتنتهي بي ارجاع الدبلة وكرتونة الحلاوة. • التعادل يمكن يحصل في اخر دقيقة. • حرقتوا لينا اعصابنا. • ما بنستحمل اي هجمة. • الهدف الوحيد ..بيخليك زي الشاحن الرايح. • انتوا تعالوا هنا ..الشاحن مرات قاعد يقصدها. • وإلّا الشاحن بروح بي حسن نية. • غايتو انا فقدت الثقة تماما في شواحن الموبايل. • اصلو بقى ما عندي ثقة في شاحن. • المباراة وقت تكون نتيجتها 1 / صفر...القعدة بتغلبك. • ما بتعرف تعمل شنو؟. • تدخل وتمرق. • وما بتقدر في الاساس تتابع المباراة. • كل ما تجي راجع تلقى في (كورنر) للفريق المنافس. • تقوم تتخارج. • تقيف برة. • وترجع تاني. • تلقى الكورة تاني ضربة ركنية. • تعاين للزمن. • تمشي تلف. • ترجع تلقى في كورنر للرابطة. • ناس الرابطة ديل مالهم عاوزين يعملوا لينا فيها برشلونة. • والله لو دي كورتكم ..وصافة الممتاز السنة دي بين الرابطة كوستي والمريخ الفاشر. • هسع لو مساوي ما جاب لينا القون في بداية المباراة – الواحد فينا كان ح يقلع ليه كم ضرس؟. • ما خليتوا لينا ضرس. • ................ • ملحوظة : كل تعادل بي (ضرس). هوامش • الحمدلله ان الهلال عاد بالنقاط الثلاث من كوستي. • الحسم امر لا بد منه. • ما بنقبل اي تفريط. • المهمة القادمة ..افريقية. • امر التأهل لمرحلة المجموعات يجب ان يحسمه الهلال من خارج الارض. • اي نتيجة غير جيدة في الكنغو ..سوف تجعل تأهل الهلال مستحيلا لمرحلة المجموعات. • العودة على اسوأ الفروض بي نقطة من مباراة الذهاب ..امر لا بد منه. • على الهلال ان يلعب بهذه العقلية. • يلعب من اجل الانتصار. • حركات المريخاب ديل ما بتنفع معانا. • التعبئة الجماهرية ..والاستنجاد بي مجدي شمس الدين من اجل اختيار طاقم تحكيم حنين نحن ما بنفع معانا. • تعالوا لينا من الكنغو بعد ان تكونوا حسمتوا امر التأهل لصالحكم. • الهلال قادر على تحقيق نتجية جيدة ان شاءالله خارج الارض. • ليس في ذلك شك. • شدوا الحيل. • سوف يكون رمضان عجب ..متابع ليكم من على البعد. • .................... • عاجل : تسجيلات مايو يا كاردينال هي طريقنا للّقب بإذن الله.
