من الغلاف للغلاف : يحررها محمد عبدالماجد عند اللزوم فقط الاهداء الى اولئك.. الذين يجلسون على اطراف اصابعهم ..حتى لا يزعجوا احد. يزعجوننا هم – بابتعادهم هذا. ثم نقلب (القهوة) في المقيل فنجدها فقدت (النكهة) والطعم والريحة والسكر. نقوم جاريين على الباب بدون مناسبة (دق). محمد
أهداف مساوي بعد ان استلم (الكوكي) الامور الفنية في الهلال ..بقى (مساوي) في اي مباراة برفعوا ليه (كورنر). بجيب ليه قون ضربة رأسية. بجري يسجد لله شكرا. سجل مساوي بهذه الطريقة امام الرابطة كوستي. وسجل مساوي بنفس الطريقة امام سانغا الكونغولي. واحد من ناس الحلة الفوق ..قالوا ليه قول لينا (5) انواع من انواع الفاكهة. قال ليهم : الموز. والمنقا. والتفاح. وهدف مساوي في سانغا الكونغولي. وقف على كدا. قطع شحن.
ضفر وأمير كمال وعلي جعفر برددوا الأيامات دي في (هل ننسى أياما مضت) تحت – تحت.. الكلام دا ما يطلع برة الصفحة دي ..عشان ما يعمل لينا (احراجات). بعمل لينا مشاكل. قالوا ناس المريخ الايامات دي بقوّموا ناس ضفر وعلي جعفر وراجي عبدالعاطي وامير كمال وعلاءالدين يوسف من النجمة ..وبقولوا ليهم يلا رددوا كلكم : هل ننسى أياماً مضت هل ننسى ذكراها هل ننسى أياما مضت مرحاً قضيناها. من أجل أيام مضت من أجل ذكراها فلنرفعن علم الوفا من أجل ذكراها كم قد رتعنا في الربى فرحاً بمثواها كم قد قطفنا من زهور من ثناياها كم قد مشيناها خطى كم قد مشيناها فلنرفعن علم الوفا من أجل ذكراها النشيد دا طبعا معروف في العالم كلو وهو (نشيد الوداع)..برددوه في مناسبات الفراق ..وقت الزول يكون راحل. او وقت تكون في مرحلة انتهت من مراحل عمر الزول. النشيد باللغة السكوتلاندية هو Auld lang syne ويعني بالعربية منذ القديم. النشيد كتبه الشاعر السكوتلاندي روبرت برنز. عشان ما تقعدوا تغالطوا فينا ساكت. الكلام دا عالمي. ما جبتوا من رأسي دا. الكلام دا ثابت. جبناه ليكم المرة دي بالسكوتلاندية ..عشان ما تفهموا اي حاجة. لكن الحاجة العاوز اقولها ليكم قبل ما اطلع من الحتة دي ...(ضفر) ما حافظ. ضفر بفتح خشمو ويسدو ساكت. الحركات دي نحن زمان كنا بنعملها ونحن صغار في المدرسة ..انت يا ضفر عاوز تعملها بعد السن دي. أماني جمال سالم ...شالوا منو (الجواز) عشان السفر الى تونس ..قالوا ليه : (نفسك في شنو؟). قال ليهم : نفسي ألعب في (الموردة). صاحبكم عاوز يمرق منها. أحلام اتنين اتلاقوا في موقف جبرة .. واحد ماشي شندي. والتاني ماشي بورتسودان. الجايباهم في موقف جبرة شنو؟. لو ما حركات منهم.
إحتمال لو في الخرطوم ناس الترجي قلعوا لي رمضان عجب (ضرسو) في رادس يعملوا ليه شنو؟. اكيد ما بخلوا ليه (ضرس). يا رمضان عجب ..خليك عارف. خليك فاهم. نحن في الهلال بدون (ضروس) ما بنسجلك. حافظ على ضروسك حتى مايو القادم. وكمان عشان تكون عارف..المرة دي امشي جاهز. امشي تونس (مبنج)...امشي ليهم (مخدر). اتبنج ليهم من (الشهداء) حقتنا دي. خلع الضرس بدون بنج (موت احمر). هسع كلامي دا كلو فيه (احتمال). ولا احتمال. لكن اعمل ليكم شنو؟. الاحتمالات في البلد دي منعوها!!.
غتاتة مريخابي غتيت ..سأل ..قال ليهم كورة الهلال في كينشاسا انتهت كم؟. قالوا ليه الهلال فاز 1 / صفر. المريخابي الغتيت ..قال ليهم : والله كينشاسا دي عند ناس الهلال بقت زي (الصافية). مرة يغلبوا مازمبي. ومرة يغلبوا سانغا. خلاص انجهونا.. عاوزين تدونا عين.
إقتراح مدرب سوداني كبير قالوا ليه تقترح على ناس المريخ في تونس يلعبوا بي ياتو طريقة؟. المدرب السوداني عاين ليهم كدا ..وقال ليهم بقترح يلعبوا بي طريقة (عذبني وزيد عذابي يمكن قلبي يقسي)...وبهدي الاغنية للاهل في الكاملين وعطبرة وقوز الحاج. الجماعة عرفوا ليك الموضوع صعب. هسع دا (اقتراح) دا.
علبة طحنية مشى لبتاع الدكان – قال ليه : والله انا الليلة جيعان شديد – ان شاءالله عندك (طحنية). بتاع الدكان قال ليه طحنية مافي ..لكن عندنا (صابون) عجيب. قال ليه خلاص عليك الله احشي لي تلات (صابونات) ..و(الظهرة) خليها برة. بالله شوف الزول. علاقة الطحنية بالصابون شنو؟.
خطاب سياسي جدا قالوا ليك في مرشح في الانتخابات وقف وخاطب ليك الجماعة في ندوة سياسية كبرى. قال ليهم السنة دي الخريف ما عندكم فيه اي مشكلة ...المجاري كلها جاهزة..والشوارع نضيفة. وقال ليهم .في رمضان ح نجيب السكر والدقيق والغاز – اصلو ما عندكم مشكلة. ما عندكم اي قضية. وح نعمل ليكم مستشفى من (30) طابق ..اي طابق فيه تخصص معين. وح نعمل (50) شارع زلط. وح نوزع للناس (طحنية). الناس سمعوا كلمة (الطحنية) وقعدوا يهتفوا ليك. المرشح الانتخابي انفعل وقال ليهم ح نعمل ليكم كوبري بين بورتسودن وجدة ..تاني ح تمشوا السعودية بي العجلات. واحد في الجماعة القاعدين وراء ..الكلام دا ما عجبو. قام طوالي رفع ليك ايدو فوق. ادوه (المايك)..قالوا ليه عاوز تقول شنو؟. قال ليه يا مولانا ..نحن كلامك دا كلو عندنا ما كعب ..اصلو ما عندنا فوقو رأي..لكن ما قلت لينا مباراة الترجي القادمة ح تعمل لينا فيها شنو؟. الناس كلها طلعت من الندوة ..وقت جابوا ليها سيرة (الترجي). قال ليهم يعني بعد (ضربة الجزاء) اعمل ليكم شنو؟.
حاجة حريصة حاجة حريصة مشت تفحص الملاريا. الفحيص طعنها ليك في اصبعها ..وقال ليها تدفعي (25) جنيه رسوم الفحص. حاجة حريصة عاينت لي اصبعها ..وقالت للفحيص (25) جنيه بعد (الدم) البكب من اصبعي دا. هسع الدم دا يروح ساكت كدا.
سؤال ضفر قالوا ليه انت خايف من منو في (رادس) خايف من اسامة الدراجي وإلا يانغ وإلّا خايف من السبعة. ضفر مسك خشمو ..وقال ليهم والله خايف على (ضروسي) دي.
خطوبة (15) سنة قالت ليه يا حاج فضل الله انت ما شايف خطوبتنا دي طولت شوية ..ما معقول خطوبة (15) سنة. قال ليها انتي يا (التومة) ما تحمدي الله ساكت ..انا اخوي الكبير حاج عثمان خطوبتو استمرت (21) سنة. التومة قالت ليه وبعد ال (21) سنة. حاج فضل الله قال ليها بعد ال (21) سنة ..فسخوا خطوبتهم. (طبعا جبت ليكم اسماء قديمة شوية ..عشان الخطوبة طولت).
شولة ما عندها موضوع مشى للدكتور ..وقال ليه يا دكتور انا عندي مشكلة في (الهضم). الدكتور قال ليه قاعد تفطر بي شنو؟. قال ليه بفطر بي (51) رغيفة ...وصبة قراصة صغيرة كدا ..وحرف كسرة + (7) فرخات و قفة برتقال و (27) كيلو موز. الدكتور قال ليه انت مشكلتك ما في (الهضم)..انت مشكلتك في (الاكل). انت يا زول عامل ليك مناسبة في (معدتك).
كيلو شقاوة هسع دي مقارنة... محترف الترجي الكاميروني (يانغ) لو جابوا ليه (120) احمد عبدالله ضفر بمر منهم كلهم وبقول ليهم وين علي جعفر؟. علي جعفر وبلة جابر بعد كدا مفروض ينزلوا تمارين مع مريخ الفاشر. في المريخ الكبير ما قاعدين نشوفهم. عيادة خارجية الدكتور فحص ليه..وقال ليه عندك خمسة صلائب في الدم. قال ليه يا دكتور نحن الخسمة في الدم ما خايفين منها. نحن خايفين والله من الخمسة في رادس. كان على الدم – هينة. إختراع مريخابي قال للمريخابي التاني. صاحبو. قال ليه اسمع انا في النوم بقت تحصل لي حاجات غريبة شديد. صاحبو قال ليه قاعد يحصل ليك شنو؟. المريخابي قال ليه تصور مرات بكون نايم ..بدون ما اشعر اكورك اطلع يا امير ..يا جمال سالم ما تطلع ..يا ضفر لا...الموضوع دا بكون من شنو؟. صاحبو قال ليه يكون من (الهلالاب) ديل ..اصلو ما بتفوتهم الحركات دي ..انا ذاتي يوم داك جاني واحد هلالابي في المنام قال لي الترجي بيديكم خمسة في رادس. المرخابي قال ليه ..وعملت شنو؟. قال ليه قلت ليه الهدف الرابع جاء من تسلل واضح. نظرية رمضان (ضرس). واحمد عبدالله (ضفر). يا بكري المدينة اعمل سحاب لي (نخرتك) ناس الترجي ديل بالطريقة دي ما بخلوا ليكم (نخرة) حايمة. تسمم محمد ود جاد الرب ...جاهو (تسمم).. امو قالت ليه : من (الجبنة) البتأكل فيها دي. محمد ود جاد الرب ..قال ليها ما من (الجبنة) ..من الشيء البعمل فيه (ضفر)..بتقدم وما يرجع. والله في (رادس) يعمل حركاتو دي ...عشرة ما تمرقنا.
علي تفتيحة علي تفتيحة عندو ولدو عاوز يعرس...قال ليه اسمع يا ولدي عاوز اوصيك.. قبل العرس. ولدو قال ليه عاوز تقول شنو يا حاج؟. على تفتيحة قال ليه اوعك (عروستك) تقول ليك جيب لينا تلاجة وتلفزيون وبوتجاز ودولاب خمسة ضلف...الحاجات دي كلها بقى ما في داعي ليها مع (الواتساب).
سواق قندران سواق قندران النوع البخاف من رمضان ..عندو صاحبو بتاع ركشة لاقاهو في الشارع ..قال ليه انت تعال هنا السنة دي رمضان 30 يوم وإلّا 29 يوم. بتاع الركشة قال لسواق القندران – رمضان انا ما عارفو ..لكن الترجي بيضرب المريخ (خمسة).
قلاب تراب واحد اشتري ليه بيت كبير ..كتب في بابو (الرجاء عدم الازعاج). زولكم نايم في بيتو..الباب قعد يدق. مشى فتح الباب ..لقى ليك بنت النفايات. دعك عينو ..وقال ليها انا اللافتة دي كاتبها لي (سيد اللبن)..ورجع نام تاني. هسع وينو قلاب التراب هنا؟.
قصة طويلة جدا لكنها قصيرة جاهو جاري زي (النبلة)..قال ليه (ست النفر بنت لبن العشر) خطبوها. قال ليه ودي الخطبها منو؟ ..عمرها (71) سنة غير (الجلحاتها) التسعة. قال ليه خطبها عباس ود التمرجية. قال ليه دحين عباس دا موش مات قبل 19 سنة؟. قال ليه بلحيل!!. قال ليه طيب خطبها كيف؟. قال ليه يعني (ست النفر بنت لبن العشر) عيونها الاتنين نور قصير ح يخطبها منو غير زول (ميت) ..وقنعان من حياتو. دي ما بعملها إلّا زول مات وشبع موت.
افهموها براكم رمضان عجب قالوا ليه اغنيتك المفضلة شنو؟. قال ليهم (هلالي الهل واتكمل). قالوا ليه فنانك المفضل؟. قال ليهم : حمادة هلال. قالوا ليه مسلسلك ؟. قال ليهم : سكة الهلالي. قالوا ليه شخصية معجب بها؟. قال ليهم : ابوزيد الهلالي. بعد كدا يعمل ليكم شنو يا مريخاب؟ ..مفروض تفهموها براكم. لكن انتوا ما بتفهموها ...فهمكم تقيل. إلا تشوفوه مع بشه في تشكيلة واحدة.
دغالة بالسمن البلدي زول دغل شديد.. كل ما تلفونو يدق ..يقول خلوه يضرب. اصلو ما برفع.
عامر الجوهري الصوت الذي يأتي كما (المساء) الفنان عامر الجوهري فنان صاحب رؤية ثقافية عالية ..يحسب لخطواته ويدرس لاغنياته ..فيجعله ذلك ان يقدم لنا اغانيات مساحة (الغلوتية) فيها عالية. الغربة واضحة في (اغنياته) يقدم (التناقضات) العاطفية برؤية مختلفة. يتخلل تلك الثقافة صوت تتمالكه القدرة على ان يهز (الحجر) ويجعله يتمايل (طربا). قبل ايام جلست مع عامر الجوهري ..فألتقطت من بعض كلماته تلك بعض الجمل..فكان صوته الذي يأتي كما المساء. (1) عامر الجوهري درس في جامعة القاهرة فرع الخرطوم ..لتقدمه لنا جامعة القاهرة كما قدمت جامعة الخرطوم الفنان سيف الجامعة. الجوهري ظل في صراع طويل مع اجل ان يغني للناس ..فهو كان شديد الخجل ..يتساقط عرقه عندما يغني امام مجموعة. لذلك هو لم يغن في الحلة ..ولم يبدأ مشاوره الفني كفنان (حلة) يغني في مناسباتها وافراح الاهل والاقارب. الى ان دفعه اصحابه وشجعوه على الغناء ..ليخرج ذلك الصوت الكامن في دواخله فيحدث كل ذلك الطرب. (2) عامر الجوهري في بداية مشواره الفني غنى لشرحبيل أحمد اغنياته الصعبة ..غير المستهلكة غنائيا. كما غنى للفنان محمد أحمد عوض الذي يتوقف عنده الجوهري توقف خاص ..ويشهد له بالريادة في مجال مستعصى لكل الفنانين. ابدع عامر الجوهري في اغنيات محمد أحمد عوض الشعبية ..وتنقل الجوهري الى مساحات اخرى ليغني على كل الايقاعات ..فيبدع في (الدليب) عندما يغني للنعام آدم ..ويبدع عندما يتجه للحديث فيجلّد اغنيات عبدالعزيز محمد داؤود ويغني اغنيات الغرب فيجيد.. هكذا كانت بدايات عامر الجوهري الذي ذهب بعد ذلك ليصنع خصوصيته الغنائية فيغني لمحمد طه القدال وعبدالوهاب هلاوي ومجدي النور والشاعر الشاب محمود الجيلي. في كل اغنياته ..كان عامر الجوهري يحمل معه (غربيته) ليقدم لنا كل الدهشة. (3) الغربة خصمت الكثير من عامر الجوهري الذي تغرب لعدة سنوات خارج البلاد. لكن مع ذلك كان يجوّد في مسيرته ..ويقدم في كل ما هو جميل. عامر الجوهري له تجارب ناجحة في اغاني (الفيديو كليب) وهو يرتب الآن لعمل غنائي جديد عبر (الفيديو كليب). المفاجأة التى يعد لها الفنان عامر الجوهري ..هو اغنية للهلال سوف يقدمها الجوهري في الايام القادمة بعد الانتهاء من مراحل تشكيلها الغنائي.
بالوصف موظف ..زوجتو كرهتو ..كل يوم تقول ليه لازم نغيّر الستائر ..لازم نغيّر الستائر. من الصباح تقوم بالجملة دي. يوم صاحبكم قام قرفان من الصباح ..زوجتو جات طالعة من المطبخ قالت ليه : لازم نغيّر الستائر. صاحبكم قال لي زوجتو ..اسمعي هنا ..انا لو غيرت الستائر بغيّر (المرا) برضو. زوجتو طوالي قالت ليه ..نغيّر الستائر ليه ؟..كمان الفلهمة العلينا في بيت الايجار شنو؟.
غار(تراوري) وليس غار(زيتو) غارزيتو صعب ..قال تراوري تاني ما بدقها في المريخ ..وهو عائش على وجه الارض دي. الكلام دا ح يقولوا غارزيتو على بكري المدينة في الموسم القادم لو غارزيتو استمر معاكم للموسم القادم. هسع بكري عشان (جديد) ما عاوزين يشمتوا فيه الهلالاب ساكت.
كلام منطقي عبدالماجد قلت ليه الجماعة ديل موقفهم في تونس كيف؟. قال لي موقفهم ما كعب لو (الترجي) انسحب...لكن ناس بكري المدينة ديل لو الترجي انسحب ح يصعد القطن الكاميروني.
الحل في الحل الضباط الاربعة للمريخ استقالوا. قدموا استقالاتهم للوزير في السر. وبعد دا قعدوا ينكروا فيها. يعني يا مزمل ابوالقاسم ويا بابكر سلك ..(الترجي) دا عاوزين تقابلوه بي ناس متوكل أحمد علي. انتوا مالكم مصعبنها على نفسكم كدا.
خدمة تحويل الرصيد في مريخابي زعلان شديد. عاوز يطرشق من الزعل. قال لي كيف يعني؟. قلت ليه يا زول في شنو؟. قال لي بس قولي كيف يعني؟. قلت ليه في شنو؟. وصاحبكم يمشي ويقول في الكلام دا ما بجي. الكلام دا ما معقول. كيف يعني؟. مسكتوا ليك من رقبتو ..قلت ليه يا زول في شنو؟. مالك؟. الحاصل عليك شنو؟. قال لي اصلو ما معقول. يا زول في شنو؟. اصلو ما ممكن. يا زول مالك؟. دي ما طريقة دي. رميتو ليكم في الواطة ..وقلت ليه في شنو؟. قال لي جمال الوالي. قلت ليه جمال الوالي مالو؟. قال لي اصلو ما معقول ..جمال الوالي دا يعودنا على الصرف والمليارات والقروش الكتيرة ..ويفوت يخلينا. قلت ليه يفوت وين؟. قال لي يستقيل. قلت ليه الزول دا تاني ما بقعد ليكم بعد (الجوهرة الزرقاء). المريخ بمشي الكونفدرالية ..والهلال بمشي المجموعات. البقعدوا ليكم شنو؟. قال لي طيب بعد الصرف الكان بصرفو جمال الوالي ..البصرف علينا منو؟. قلت ليه الزول دا عمل ليكم (خدمة تحويل الرصيد). قال لي (خدمة تحويل الرصيد) عاوزة تمسك ليها زول. خدمة تحويل الرصيد عاوزة تمسك ليها نادي. خدمة تحويل الرصيد ..(بيت) ما بتفتحوا ..معقولة تفتح ليها (نادي). بعدين ما معقول (النفط) يكون بديلو (تحويل الرصيد). الجماعة ديل بيلعبوا. الجماعة ديل بيستهبلوا. قلت ليه يا زول اهدى شوية. يا زول روق. قال لي لا بهدأ ولا حاجة. ولا بقعد ليكم تاني في البلد دي. قلت ليه يا زول هسع الدخل (البلد) في الموضوع شنو؟. خليل فرح ..يا بليبل الدوح اتقطعت في غيبتك • لا ادري لماذا تذكرت (خليل فرح) الان ؟.. ولا ادري لماذا اقرن حديثي هذا به ؟.. بعض الاشياء لا تجد له تفسيرا .. او قد تجد (التفسير) .. ولكنه يكون غير كافيا او مقنعا. • من مفرداته تقفز تلك (الوطنية) .. يدسها حينا ويظهرها حينا آخر .. وهي من عجبا .. قد توضح اكثر عندما تختفي. • مثل .. (محمد الحسن سالم حميد) .. الذي كرس للدهشة كلها في ذلك العنوان (المتناقض) .. (يا متخبئة خلف وضوحك) .. كأن (الوضوح) كان للتخبئة .. والمشي علي اطراف الاصابع. • هذا زمان .. ان تجلس في كافتريا (مرطبات) علي كرسي من (اربعة) ارجل .. وكأن هنالك .. (كرسي من ثلاثة ارجل) .. او (من رجل واحدة) .. تتصفح (الصحيفة) باستهزاء واضح .. لا يعجبك فيها اي شيء .. تطلب كوبا من (الليمون) البارد .. كما يفعلوا في (الافلام الاجنبية) تماما .. يأتيك (الجرسون) بعد حين يحمل فنجانا من (القهوة) .. ثم يدخل معك في جدل عريضا .. في انك لم تطلب (كوبا من الليمون) .. وانما طلبت (فنجان قهوة). • الجرسون يحاول ان يقنعك بذلك .. وانت امام إلحاحه .. واصراره .. تجد لا مفر لك من (الاقتناع).. اكتسابا للوقت .. وحفاظا على ما تبقي لك من (وقار). • تشرب القهوة .. بنكهة (ليمون) الغلاط. • ثم تمضي .. هكذا يختار لنا (الجرسونات) ما نشرب ... واخشي ان يأتي يوم فيختاروا لنا ما (نلبس). • تدور بعض الافكار في رأسك في هذا اليوم تحديدا ... لاول مرة ألحظ ان (مروحة) السقف في الصالون الكبير .. تدور عكس دوران المراوح المعتاد. • مراوح كل الناس .. في كل البيوت تدور من الشمال الي اليمين .. عدا هذه (المروحة) المجنونة .. تدور من اليمين الي الشمال. • لم يكن يدهشنا ذلك (الدوران) العكسي .. كان الذي يدهشني حقا اني لم اكتشف ذلك .. إلا في هذا اليوم. • رغم ان (المروحة) تدور بهذه الطريقة .. منذ سنوات طويلة. • قلت لكم .. ان اليوم هذا مختلفا .. يختلف عن كل الايام. • لاحظت كذلك ان حركة (الشُباك) .. في تضاربه ذهابا وايابا مع (الجدران) .. كان اعلي مما كان عليه في السابق. • هذه (الشبابيك) كأنها تتمرد الان .. او قد تكون (الجدران) .. هي التي تتمرد. • هنالك (تمرد) ما. • تذكرت .. (خليل فرح) .. هو في هذا اليوم .. يتواري وراء خلف اي فكرة. مسرح الغزلان في الحدايق والشوارع الغر والمضايق قولي كيف امسيت دمت رايق دام بهاك مشمول بالنظام • صوت خليل فرح يخرج الآن. نحن ونحن الشرف الباذخ دابي الكر شباب النيل قوم وقوم كفاك يانايم شوف شوف حداك يا لايم • ابوروف والعلالي .. والعرضة ... والنيل .. يحكي عنهم خليل فرح .. تلمحن في الوصف .. في الكلمات. من فتيح للخور للمغالق من علايل اب روف للمزالق قدلة يا مولاي حافي حالق بالطريق الشاقو الترام • الدوش يخرج من (دقة الدلوكة).. بدليل قاطع (ان الدنيا مازالت بخير). • (أهو ناس تعرس وتنبسط). • وخليل فرح اغنياته .. تدخل في الحنايا عن طريق الوطن .. تمر عبر الاوردة والشرايين .. بعد ان تتمرق بتراب الوطن. شوفوا عز الصيد في العساين يله نقنص نطرد نعاين النهار أن حر الكماين كلبي يا جمجوم أصله خاين شوفوا كيفن يبرأ الملاين هب شال وكشح المراح للقنيص الخيل خف راسن نحن ما بنخاف من مراسن المكارم غرقنا ساسن والمجاهل مين غيرنا ساسن • وخليل فرح .. يتسلل ... في هذه الاغنية .. التي يشاركك لحنها في (نبض القلب) .. يقاسمك في دقاتو. ما ألذّ نسيم وصلك ما رأيت يا جميل مثلك يا بليبل الدوح هو هذا هواك ام هوي الاسحار • الخليل .. يجعله (بليبل) .. والبلبل .. امر لا يقبل (التصغير) .. إلا اذا حجزنا قبل عشرة ايام (مقاعد للفرح). • وفي باريس .. يجلس (الفرنسي) .. يشرب قهوة الصباح .. بالطريقة ذاتها التي يشرب بها الهولندي في امستردام. • الفرنسي ما عندو (ساعة) .. وما عندو (موبايل) .. يشوف الوقت بالضل ... يقول بفرنسية (ملخبطة) .. الساعة بتكون سبعة. • الفرنسي يضرب للسواق .. (شفتوا كيف .. عندو سواق .. وما عندو ساعة) .. يقول للسواق .. اسمع الليلة امشي جيب الاولاد من المدرسة ... انا ما بقدر امشي ليهم .. عندنا كورة. • ام درمان.. كأن الذي وضع تخطيطها .. خليل فرح .. قسم شوارعها .. منحها سر تلك (الوطنية) ... البيوت هنالك .. بتمرق علي الشارع. • والشارع بمرق علي الناس .. بحلف. • لو قلت ليكم (مرق) بجيب قون في المريخ .. بتصدقوا. • لا. • طيب مالكم ... خلونا نكمل كلامنا .. وما تقاطعونا وقت نتحدث عن (خليل فرح). نحن نطارد العنزة الفاردة نحن نذود مشارع النيل نحن برانا نحمي حمانا نحن نموت ويحيا النيل ما بنندس ما بنتوصى نحن نكيل برانا نشيل نحن الطينة ومطر العينة نحن الوادي برقه يشيل • خليل فرح .. كلماته تلك تخرج علينا .. الموقف .. لا يبتعد عن ذلك .. (لخمة) الشُباك .. وقهوة الهولندي في امستردام ... وتمريرة هيثم مصطفي في شارع الاربعين .. وهوبة مهند الطاهر في (هوليوود).
