الفكي جاب ليهو الابريق وقال للزول بتاع التهيؤات ..اقعد في الواطة دي ..واحكي لي انت بتشوف شنو؟ زولكم بتاع التهيؤات دا ..اهلو قالوا تهيؤاتو كترت ..نحن لازم نوديه لي (فقير) اصحاب السيارات ان شافوه في (الكوبري) بخلوا ليه الكوبري وبقعوا بي سياراتهم في البحر اوباما دا كان عندو قميص واحد ..لغاية الآن بتذكرو قميص (اسود) من اللبس الكتير لونو بقى (اخضر)
· الكلام دا ما بقدر يحلو غير (فكي)
· فيلم (اجنبي) قديم تحدث عن (التهيؤات).
· الفكرة ذاتها نقلوها لفيلم عربي (ابيض واسود).
· كل الافكار العربية منقولة من الدول الغربية.
· العرب فقط بنجحوا في (النقل).
· كلهم بيشفوا من ورقة الزول الجنبهم...(من الخواجات).
· دكتور كبير ...اسم طول وعرض وعيادة خارجية ...عمل ليه عملية زايدة لاحد المرضى.
· الدكتور شال (الزايدة) ونسى (شاحن الموبايل) في بطن المريض.
· يعني ما عمل اي حاجة.
· الدكتور بعد (21) يوم قالوا ليه انت نسيت (شاحن الموبايل) في بطن المريض.
· الدكتور قعد يتجرس ليك ...ويتحلّف.
· الجماعة قالوا ليه مالك؟..انت الحركة دي طوالي ما قاعد تعملها.
· الدكتور قال ليهم قاعد اعملها ..بس المرة دي (شاحن الموبايل) النسيتو في بطن المريض ..شاحن اصلي.
· وانا ما خليت حتة ...قلبت البيت والمكتب ..الحاجة الوحيدة الما خطرت على بالي (بطن) المريض دا.
· دكتور تاني ...مشكلتو في الدنيا دي ..اي مريض بمشي عليه ...بقوم الدكتور ينوم ب (الباقي).
· ما برجع ليه باقى الكشف.
· لا باقى الكشف.
· ولا باقى الرسوم.
· لا باقى الفحص.
· اي (باقى) بقوم بيه.
· الناس اتحيروا في الدكتور دا.
· قالوا الدكتور دا بعمل كدا ليه؟.
· آخر حاجة في زول شفت من دفعة الدكتور اكتشف ليك السر.
· الدكتور - (الطالب) الكان قاعد يشف من ورقتو ...طلع (كمساري).
· عشان كدا بقى ينوم ب (الباقي) زي الكمساري.
· دكتور يشف ليه من كمساري ...دي اول مرة اسمع بيها في العمود دا.
· في زول صعب.
· صعب شديد.
· عندو (9) اولاد.
· اقل واحد فيهم سفير في اوروبا.
· زولكم الصعب دا كان (تاجر)..بحسبها ليك بالورقة والقلم.
· الدنيا دي عندو فيها (الدخل) بس هو المهم.
· عاوز يدخل قروش بي اي طريقة.
· صاحبكم دا يوم ساق اصحابو ...وبعض اعيان الاهل ومشى لي اخوه الكبير.
· اخوه الكبير ما قصر.
· اي حاجة عملها ليه.
· ضبحوا ليهم ..وجابوا ليهم الحاجة الباردة ...والبطيخ.
· البطيخ مدور للسحور.
· ما في زول قال كلمة.
· عمك في النهاية قال يشوف الزيارة دي غرضها شنو؟...قام قال لي اخوه ان شاءالله خير.
· زولكم الصعب قال ليه : خير – اصلو ما في عوجة...بس نحن قاصدنك في غرض.
· اخوه الكبير ..قال ليه حرم ما بتطلعوا من غير ما غرضكم يقضى...(الاخو الكبير مفكر في حاجة تانية).
· الزول الصعب قال ليه والله دي المحرية فيك – عارفنك ما بتقصر.
· صاحبكم تفكيرو مشى بعيد...قام قال لي اخوه ...اها (البنت) عاوزها لي ياتو واحد في اولادك؟.
· الزول الصعب قام على حيلو ...وقال ليه اولاد شنو؟...الجاب سيرة الاولاد هنا شنو؟.
· عمك قال ليه طيب عاوز (البنت) لي شنو؟.
· الزول الصعب قال ليه عاوز البنت عشان افتح ليها (محل اتصالات)..والله يا حاج الطيب قالوا ليك محلات الاتصالات الايامات دي شغالة شغل.
· الكلام دا ايام موضة محلات الاتصالات.
· عمك حاج الطيب قام على حيلو غضبان ..وقال ليه لو عاوز بنتي لي (محل اتصالات) في داعي تجيب معاك (السيرة) دي.
· وكمان تجيني في نص الليل – على الطلاق ما بتمرقو ساكت ..يا جنا اجري جيب (المأذون).
· الزول الصعب قام على حيلو ..وقال ليه يا زول (مأذون) شنو؟.
· عمك قال ليه والله ما بتمرقوا ساكت ...انت عاوز الناس يقولوا حاج الطيب ضبح لي بنتو عشان (محل اتصالات).
· المأذون جاء داخل.
· انا ما عارف الجماعة ديل بيستعجلوا كدا ليه؟.
· الماذون تقول واقف ورا الباب – من يشوف ليه (هايس) واقفة قدام البيت يجي داخل بي شنطتو.
· لكن الكلام البقول ليكم فيه دا كلو ما عندو علاقة بي (التهيؤات) الاتكلمت ليك عنها في بداية العمود.
· الكلام طار من رأسي.
· ما عارف انا قلت كدا ليه؟.
· اتذكرت.
· عندنا واحد جنو (تهيؤات).
· اليوم كلو قاعد (يتهيأ).
· يقوم من نومو بي (تهيؤاتو) دي.
· زولكم بتاع التهيؤات دا ..اهلو قالوا تهيؤاتو كترت ..نحن لازم نوديه لي (فقير).
· الكلام دا ما بقدر يحلو غير (فكي).
· ساقوه ومشوا بيه على (فكي).
· الفكي جابو ليه (الابريق).
· انا ما عارف الحكمة في (الابريق) شنو؟.
· الفكي جاب ليهو الابريق وقال للزول بتاع التهيؤات ..اقعد في الواطة دي ..واحكي لي انت بتشوف شنو؟.
· بتاع التهيؤات قال ليه بشوف مرات (زول عندو قرون) بتنطط قدامي ..قدر ما اخلى ليه الشارع بلقى قدامي.
· الفكي قال ليه ..الزول ابو قرون دا ...بيجيك اول الشهر.
· الزول بتاع التهيؤات قال ليه والله من يوم 27 بشوفو بتعارض لي في النوم.
· الفكي قال ليه دا بتاع الايجار ...انت ساكن في (شقة).
· زولكم قال ليه : بس كتلتو عديل كدا..انا ساكن في شقة واربعة شهور ما دفعت قروش الايجار.
· زول التهيؤات ..قال للفكي ..في حاجة تانية يا (تورالكر).
· تور الكر قال ليه تاني في شنو؟.
· بتاع التهيؤات قال لي (تور الكر)..مرات بتخيل لي كدا اني واقع لي (بئر)..وفي (غول) منتظرني فوق البئر.
· تور الكر قال ليه انت عارف الغول دا منو؟.
· بتاع التهيؤات قال ليه منو؟.
· قال ليه تعال جاي ..الكلام دا إلّا احدثك بيه في (اضانك)..عشان ما يطلع برة.
· تورالكر وسوس ليهو .. بتاع التهيؤات قال ليه معقولة لكن ...(انا رسوم المدرسة دفعتها).
· بتاع التهيؤات قال احسن يقضى على الموضوع من اساسو.
· لكن يا تور الكر ..ما قلت لي (الصاروخ) البقع ليه في (مظلة) يفتركها حديدة – حديدة دا شنو؟.
· تور الكر قال ليه دا (جوليام).
· معقولة.
· بتاع التهيؤات استدرك وقال ليه اوعك تقول لي (المظلة) دي (المريخ).
· تور الكر قال ليه بس كتلتهم كتل.
· واحد بتاع حكاوي.
· جنو حكاوي.
· مع الحكاوي بتاعتو بزيد الكلام.
· اقول ليكم بكضب عديل كدا.
· الزول دا من كلامو الكتير ..الناس بقوا يخلوا ليه الشارع.
· اصحاب السيارات ان شافوه في (الكوبري) بخلوا ليه الكوبري وبقعوا بي سياراتهم في البحر.
· زولكم دا مرة مشى ليه (مناسبة).
· جابوا ليه صينية الغداء...ما في زول عاوز يقعد معاه في الصينية.
· المناسبة كلها بتتحاشاه.
· لكن طبعا في زول بكون ماسك العدد ..اي صينية لازم يكملها لي بالعدد الكامل.
· المهم زولكم بتاع الكلام دا قعدوا معاه تمانية اشخاص (مجبورين)...وصاحبكم فتح في الكلام.
· قال ليهم اوباما دا كان ساكن جوارنا في (الحاج يوسف).
· يا حاج.
· وكان دائما بكون قاعد مع (حليمة) بتاعة الشاي الفى آخر محطة.
· يا حاج.
· اوباما دا حق الرصيد ما كان عندو ..كان ما بضرب تلفون بمسكل بس.
· زولكم بحكي عن (اوباما) وبيضرب في (الضلعة).
· ما خلى فيها حاجة.
· جماعتك المعاهو في الصينية مندهشين بالحكاوي دي ..وهو بضرب في (الضلعة).
· قال ليهم اوباما دا كان عندو قميص واحد ..لغاية الآن بتذكرو قميص (اسود) من اللبس الكتير لونو بقى (اخضر).
· يا حاج.
· اثناء الحكاوي دي في واحد من الجماعة القاعدين معاهو في الصينية انتبه للضلعة.
· الكلام ما عجبو.
· اضايق شديد.
· وصاحبكم بحكي ...اوباما دا تلفونو الاخير لغاية الاسبوع الفات كان عندي..
· تصوروا اوباما موش بقى رئيس اقوى دولة في العالم ..تتخيلوا الى الآن ما بضرب.
· لغاية الآن بمسكل.
· الزول المتابع الضلعة ..اعصابو باظت ..(الضلعة) ما فضل فيها اي شيء بقت زي (المبخر)...عشان كدا قام ثبت ليك عمك بتاع الكلام الكتير ..وقال ليه يا الياس دحين انت ما عصرت على (الضلعة).
