ممكن تحصل شيء واحدة...هنا ...وهناك ..ويكون الاحساس مختلف ، مع ان الامر الذي حدث لا اختلاف فيه. المكان عنده شروطه واحساسه ..وسلطته...وبفرض طقوسه بكل تفاصيلها.
بعيدا عن هذا وذاك ...(الامكنة) اكثر وفاء ، واخلاصا من (الازمنة) ..الزمن بتغيّر ..لكن المكان يبقى يمنحك الاحساس الذي اعطاك له في المرة الاولى.
قديما كتب فاروق جويدة ..(العطر ..عطرك ..والمكان هو المكان لكن شيء قد تكسر بيننا لا انت انت ولا الزمان هو الزمان).
في قول جويدة هذا اثبات على تغيّر الشخص وتغيّر الزمن ...(بين الضيق والفرج والعكس).
صروف الزمن كثيرة ..وإلا ما قيل ان الايام دول ..من سره زمنا ابكته ازمانا.
لكن المكان مثل (العطر) يحتفظ بنكهته ابد الدهر...حتى وان تغيّر شكليا.
البيت الولدوّك واتربيّت فيه ...تحتفظ له بحنين خاص ..ومودة معينة ..وان ابتعدت عنه سنوات وسنوات...(وما حب الديار شغفن قلبي ولكن حب من سكن الديار).
حصل (الخريف) دا من غير ميعاد كدا ..تلب ليه في بيت واحد فيكم في فصل الشتاء.
بتتفاجأوا ليه؟.
نفسي اعرف ..ليه؟.
يا جماعة الله ...الزول لو جاتو (رسالة) بتديّهو (جرس)...انتوا لى هسع قاعدين لي تتفاجأوا بالخريف.
طيب لو (الخريف) بفاجاؤكم ...(العدو) بعمل ليكم شنو؟.
الطيارات الاسرائيلية دي بتصرفوا معاها كيف؟.
وانتوا (جراد) بجهجهكم...اقصد (خريف).
عليك الله بس ..لو سمحت ...(الجراد) ما تدخلوا لينا في الموضوع دا.
ما تلخبط لينا الكيمان ساكت.
شفتوا نحن بعيدين كيف ؟...الخريف كل سنة بجي في البلد دي ...كل سنة بجي في نفس التوقيت ...مع ذلك نحن مازلنا بنتفاجأ (بالخريف).
ناس امريكا واستراليا ..المتغيرات والزلازل الذي يأتي لهم في كل 400 سنة مرة ما قاعدين يتفاجأوا بيهو.
بكونوا منتظرينو بالساعة والدقيقة والثانية.
عارفنو بجي الساعة كم ؟..ووين ؟...وح يعمل شنو؟..وح يستمر كم ثانية او دقيقة؟.
ديك العواصف بحسبوا ليها (خسائرها).
لمن تجي مطرة في الخرطوم ...انت بتكون بتفكر على هذا النحو..(التنظير دا خلينا منو؟).
الباعوض ح يتكاثر ...نوم ما في من بكرة وانت ماشي لي غادي.
كمان (جبرة) دي فيها باعوض ..الباعوضة اول حاجة تعمل ليك رسالة فاضية.
تقوم من السرير ..وتجدع الملايا والبطانية ، وتولع النور عشان تشوف الرسالة ..الباعوضة تدخل ليك.
عشان كدا ..اي رسالة تجيك بعد تسعة ما تفتحها.
ولمن تجي مطرة ..برضو بتفكر.
آنيا ...الكهرباء ح تقطع ، هسع دي ح تقطع من غير شك ...(ح تصرف كيف في المطرة دي؟)...بطارية موبايلك ما مشحونة ...(يا دي الحكاية اتعقدت خالص).
الحاجات كلها بتتعقد في ساعة واحدة.
الصالون ذاتو يمكن يقع ...(سقفو) على الهبشة ...لو المطر (مسكلت) ليه ..بجي الواطة.
عندنا في الحلة (صالون) واقف على الرشة.
الصالون دا فيه (حيطة)...لو سمعت حمد الريح بغني في (عجبوني الليلة جوا ..ترسوا البحر رجعوا) ..تجي واقعة.
احساس ساكت بوقعها.
لمن الولد يقيف يرش جنبها بالخرطوش ..ابوه بقول ليه : يا ود تعال جاي الحيطة دي ما تقع فيك.
لو كنت داخل هذا الصالون ..بتلقى في تنبيه واضح وصريح ، على شمالك بقول ليك ..حفاظا على الارواح والممتلكات شغل موبايلك (هزاز)...رنة الموبايل خطرة على السقف.
والمطر لمن تصب ...بتقعد تتلخبط كدا.
قد تقفز ابعد من ذلك ..وتقول الواحد مع (الزيفة) دي ياكل شنو؟...اكيد ح تجوع ...والتلاجة فيها علبة زبادي واحدة ليها 21 يوم...وبيضة ..وعلبة ساردين فاضية.
حافظها حفظ التلاجة دي.
والبوش لا بنفع مع المطرة دي ...ولا حاجة ...(البياكل ليه بوش منو في الاجواء المكفهرة دي؟).
هذه بعض النماذج التى تمر على الشريط ...والمطر (شغالة).
طبعا لما المطر تصب ..اي واحد قريبك ..ما قريبك ..بضرب ليك يقول ليك عندكم (مطرة) ؟...والله هنا عندنا (مطرة) اسكت خليها ساكت ...المخازن القدام شارع الزلط ..كلهن وقعن.
وخالتك (ست النفر) ام عثمان بتاع زريبة الفحم ..وقعت في الخوار الفاصل بين حارتنا وحارة ناس عباس ..كسرت كراعها ..شلناها للدكتور ..الدكتور قال ما بعالجها لو ما جبتوا ليه رقمها الوطني.
رجعناها البيت بي كسرها ...(نجيب ليها رقم وطني من وين في المطرة دي؟).
الدكتور يقول عاوز صورة اشعة ممكن ...عاوز يقيس الضغط ممكن ..عاوز يجيبو ليه (رسوم) الدخول اول حاجة ممكن.
لكن يقول عاوز (الرقم الوطني)...نجيبوا ليه من وين نحن؟...هو عاوز يعمل ليها عملية وإلا عاوز يطلع ليها تأشيرة.
كسر هو وإلا فتح حساب في البنك.
خالتكم دي ح تموت ...(الكسر) اثر في القلب.
اثر كيف؟..بحكي ليكم.
مشينا للدكتور (دكتور تاني) ...الخالة صحتها تتلتل زي (المرفعين)..ما عندها اي حاجة غير (الكسر).
والله دخلت المستشفي بي (كرعينها).
انا ما عارف ليه اي زول بموت في المستشفى بقولوا ليك دخل المستشفي بي (كرعينو).
عاوزنو يدخل بي حلف النيتو.
قالوا ليكم البدخل بي كرعينو ما بموت.
يدخل بي (امر قبض) يعني.
عادي الحاجات دي بتحصل.
دكاترة الزمن دا الواحد لو دخل ليهم بي (دبابة) بطلع من المستشفي على (عنقريب).
ميت ..ميت.
الدكتور عاين للكسر ..اتسلط علينا ...ادي ليك الخالة ..(حقنة).
الحقنة طوالي اثرت في القلب.
شفتوا كيف (الكسر) ظهر في القلب.
ساعة كدا ...الخالة اتوفت.
راحت فيها.
عادي كدا ..تمشي المستشفي ب (ملاريا)...يجيبوا ليك (فشل كلوي)..يرشوك (كينين) لمن يجيك الفشل الكلوي.
تمشي بي كسر ..يجبوا ليك (سكتة قلبية).
تمشي (مرافق)..يشبكوك فحوصات لمن قروشك تنتهي.
المستشفيات حالها كدا.
هسع عمتكم (الزينة) دي الله يرحمها ويغفر ليها ..موش اخطاء دكاترة.
يلا.
المهم هذا ما يحدث عندما تصب مطرة في الخرطوم...(الموضوع الطويل دا هسع فهمتوا منو حاجة).
اكيد بتفشتوا لي باسكال وتراوري بين السطور.
بين السطور متصور.
في ام مستردام ...نفس المطرة ..بنفس المقدار والتوقيت ..عندما تهطل ..(الزهور بسمت لينا)...(الخضرة) تبقى (بيرقر) عديل...والناس تطلع نظيفة في المطرة دي ..زي كأنها بترش فيهم بي عطر.
ما في اي مشكلة.
ولو كنت فاضي ...ممكن تشيل الكرسي ..وتقعد برة تكتب ليك (قصيدة).
الجو ..شاعري خالص.
دي المطرة ...هنا ..والمطرة في امستردام ...(الفرق واضح).
نطلع فاصل ...ونرجع ...(القعدة طولت).
الدرس التالي.
مزلقان باسكال.
مزلقني ...باسكلني...اعمل اي حاجة.
انت يا باسكال وقت بتنزلق بالطريقة (الانفراجية) المنبعجة دي ...يبقى فرقك شنو من (نجم الدين)؟.
قول ..اتكلم ...ما تقيف لينا كدا.
قالب (جلي) بس واندلق..تتكبكب متل اللحمة الضان ..تعاين ليها في الجزارة ..وتقول للجزار اعمل لي ربع بقري.
لو شايل موبايل ..صوّر لحمة الضان دي ..قالوا فيها زيادات.
يا بسكال ..اصحي ..الكلام دا في الاسبوع الرابع ما بنفع.
والله ترواري دا (تنزلق) ليه كدا ..إلا يلقطوك في (منديل).
انت كمان ما كلموك بي (تراوري).
ما قالوا ليك.
تراوري دا ..3 مدافعين ما بثبتوه..ولا تغشوا نفسكم ساكت.
اقنعوا بس.
يا ادخلوا الامتحان بالكتاب ، بالمقرر كلو.
بخرة في ورقة ما بتحلكم.
قالوا ليك عصام الحاج ..قال لي (نجم الدين) انت بس وقت تشوف تراوري ماشي عليك ..اطلب (3) تسعات.