امام (50) الف مشجع بنلعب عادي ..زي التقول قاعدين نلعب في ميدان المولد
اذا تحدثنا عن الشغيل لا بد لنا من ان نتحدث عن (الامين البرير) الذي قدمه للهلال وتحمل حملة صحفية وجماهيرية عنيفة كانت ترفض اللاعب
نلعب معاهم فاطرين بنغلبهم في ارضهم...نلعب معاهم صايمين ..بنتعادل معاهم
(المرا) قبل ما تشيل (استغرابها) وتطلع ...الراجل واصل في كلامو ..اعملي لينا (مازمبي) شوربة كوارع
· قبل الفطور...(المرا) جابت (العصائر)...وطلعت (المروحة) برة.
· ما عارف علاقة (المروحة) بالفطور شنو؟.
· رصت ليك (العصائر) متل بوليس السواري.
· جابت (العصيدة)...بوخها يلوي.
· نزلت (سلطة الروب).
· العجور طار السماء ...الموضوع لو استمر بالطريقة دي ..نحن تاني (سلطة الروب) دي بنعملها (سادة) ساكت من غير (عجور).
· يعني ضروري (العجور).
· عمكم قاعد مراقبا لحركة مرور (الصحانة) كل مرة بيسأل ..وين (البطيخة) الجبتها امس؟ ..عليك الله قطيعها لينا ..(الليلة في عطش شديد)...ان شاءالله بس تكون طلعت حلوة.
· المرة الفاتت جبت لي بطيخة طلعت (ديديه) ساكت.
· والحلو مر يكون (بارد) شديد ..دائما بتجيبوه لينا (مسخن)...ارمي ليك فيها (تلجات).
· التلجات في ناس برموها في (الحلومر) وفي ناس برموها للمدير.
· والشوربة ...طلعيها لينا برة الصينية...جيبها لينا في الكبابي الكبيرة ...كبابيك الصغيرة ديك ما تجيبها لينا.
· والنشأ اهم شيء تكون دافئة شوية.
· الراجل كان بعمل مراجعات لكل الاشياء في (الصينية).
· والمرا تشيل وتنزل ..تقول بتنزل ليها في (فطور عريس).
· ما خلت حاجة.
· الراجل قبل ما ينزل على (البرش).. بعد ما حسم موضوع المباراة ونفسو اتفتحت للفطور ..قال ليها وين (مازمبي)؟.
· (المرا) قبل ما تشيل (استغرابها) وتطلع ...الراجل واصل في كلامو ..اعملي لينا (مازمبي) شوربة كوارع.
· الحمام خلينا للمريخ.
· الليلة نحن فطرنا بي مازمبي.
· مازمبي دا قاصدنا.
· مرة يلاقينا في الادوار الاولى..ومرة في المجموعات ..ومرة في الفطر ..ومرة في الصيام.
· تقول ما عندو شغلة غيرنا.
· بقينا تخصص (مازمبي).
· عرفنا ليهم.
· امام (50) الف مشجع بنلعب عادي ..زي التقول قاعدين نلعب في ميدان المولد.
· ما شغالين بي شيء.
· بقينا ما شغالين بي (مازمبي).
· بنلعب امام مازمبي زي ما بنلعب امام (مريخ الفاشر).
· عادي ..اتعودنا على مازمبي.
· مازمبي نحن في كل رمضان بقينا نقابلو.
· مازمبي بقى لينا زي (اغاني واغاني) ثابت عندنا في رمضان.
· بقينا نقطعها ليهم في رأسهم.
· ناس مازمبي ديل ..جابوا ليهم حكم عاقل ما قدروا علينا.
· المرة دي قالوا يغيروا الحكم..جابوا ليهم حكم (مجنون).
· لا عاقل.
· ولا مجنون بقدروا على الهلال.
· نلعب معاهم فاطرين بنغلبهم في ارضهم.
· نلعب معاهم صايمين ..بنتعادل معاهم.
· والكلام بجيب الكلام.
· شوفتوا الفرق بين الهلال والمريخ – الهلال بمشي لي قدام بي خطوات مدروسة.
· بي ناس اطهر الطاهر وليد علاءالدين وعماد الصيني.
· والجوهرة الزرقاء شغالين فيها زي الطلقة.
· ما بنمشي بي عمر بخيت والمعز محجوب وعلاءالدين يوسف وبكري المدينة.
· ما بنرجع عشرة سنوات للوراء ..عشان نعمل لينا حاجة.
· عليك الله يا بكري المدينة ..هسع دا (حمام) يتشقلبوا ليه.
· بقيت تتشقلب للحمام ..حليلك وحليل ايامك.
· الموضوع ابسط من كدا.
· نحن بي اطهر الطاهر ووليد علاءالدين وعماد الصيني بنشق طريقنا ونرمي لي قدام.
· اصلو ما عاوزين لينا حاجة من برة.
· ما قاعدين نتلفت.
· ولا بننتظر الحكومة تدعمنا ..او تسجل لينا.
· ما عاوزين لينا (ضربة جزاء) غير صحيحة.
· ولا بنفتش لينا لي (حكم).
· بنفوز هكذا ..بي ناس اطهر ووليد والصيني.
· بنلعب ونطلع باغلى نقطة في نهار رمضان.
· ولا بنفطر.
· ولا بنعمل تعبئة شعبية..واستنفار.
· اولادنا ما محتاجين للشغل دا ..هم بفوزوا رهانا على امكانياتهم الفنية.
· ما عاوزين ليهم حاجة من برة.
· شوفوا الفرق بين الهلال والمريخ.
· انظروا لنصرالدين الشغيل في الهلال وبكري المدينة في المريخ الآن ..يمكنكم ان تخرجوا الفارق.
· قبل ان استخلص لكم الفوارق ..اذكر في (2007) كان الهلال يعسكر في الدوحة في بدايات الموسم.
· الهلال في ذلك الموسم كان قد سجل علاءالدين يوسف ..في الوقت الذي سجل فيه المريخ نصرالدين الشغيل.
· كان علاءالدين يوسف نجم معروف لا يشق له غبار انتقل للهلال بعد احداث (البصمة) الشهيرة.
· وبصم وما بصم.
· نصرالدين الشغيل جاء للمريخ من احد اندية الدرجة الثانية ..لاعب صغير في السن ..لا يعرفه احد.
· غير ان لاعب الهلال وارتكازه الشهير منقستو كان يعرفه.
· اذكر اني حاورت وقتها منقستو في الدوحة عندما كان الهلال يعسكر هناك ..فتوقف منقستو عند اللاعب نصرالدين الشغيل.
· ما ذاكره ان منقستو قال ان المريخ سجل لاعب ارتكاز سوف يكون مستقبله مشرقا.
· وان اللاعب سوف يكون اضافة كبيرة للمريخ وللكورة السودانية ..شهد بذلك منقستو ..والشغيل بلعب في المريخ ...وهو لاعب صغير لا يعرفه احد.
· حديث منقستو كنا قد نشرناه في صحيفة (قوون) وقتها وهو موجود الآن اذا رجعنا للارشيف.
· تذكرت حديث منقستو هذا وهو يتحدث امس في قناة بي ان سبورت عن اللاعب نصرالدين الشغيل ..ويشيد بمستواه المتميز.
· ما اشبه الليلة بالبارحة.
· قلت في نفسي تحققت نبوءة منقستو ..وجاء الوقت الذي يعيد فيه منقستو كلامه بعد ان اصبح الشغيل افضل لاعبي الارتكاز في السودان.
· اعود ونقارن بين بكري المدينة الذي انتقل للمريخ من الهلال وبين نصرالدين الشغيل الذي انتقل للهلال من المريخ.
· نصرالدين الشغيل في الهلال يقدم ارقى كورة ..بعيدا عن الضجيج ..والاضواء والاعلام.
· بلعب كورتو بس ..لا تجد للشغيل حتى (تصريح) في الصحف ..رغم نجوميته تلك.
· تخلص الشغيل من كل عيوبه ..وتخلى حتى من عصبيته واصبح يلعب كورتو فقط .
· الشغيل اصبح لا ينال الكروت الملونة ..فهو لم يتوقف بهذا السبب عن مباريات الهلال الافريقية والمحلية.
· فوق هذا فان الشغيل والحمد لله فترته في الهلال فترة خالية من (الاصابات)..قولوا ما شاءالله ..عكس ما كان في المريخ اذا كان اللاعب عرضة للاصابات.
· وقد شطب المريخ الشغيل مرتين بسبب الاصابات..ليأتي الشغيل ويقدم كل هذا الحسن والابداع في الهلال.
· اذا تحدثنا عن الشغيل لا بد لنا من ان نتحدث عن (الامين البرير) الذي قدمه للهلال وتحمل حملة صحفية وجماهيرية عنيفة كانت ترفض اللاعب.
· عندما انتقل هيثم مصطفى للمريخ ..جاء الشغيل وهو مصابا للهلال ..من هنا خرجت الحملة وكانت المفارقات.
· إلّا ان الامين البرير راهن على الشغيل ..وقاتل من اجله ليكسب البرير الرهان كما كسبه منقستو ذو النظرة الفنية المبشرة باللاعب.
· اعلام الهلال لا يضخم وزن الشغيل لأنه فقط جاء من المريخ كما يفعل اعلام المريخ مع بكري المدينة.
· لذلك يقدم الشغيل الان اجمل الفصول مع الهلال من غير اي ضغوط ..بل يقدم افضل مواسمه على الاطلاق من غير ما يقعد (يتشقلب).
· في المريخ الصورة مغايرة تماما مع بكري المدينة ..الذي رفعه اعلام المريخ وحاول ان يخلق منه (بعبعا)..وهو لاعب عادي وفوضوي وما منضبط وبضرب الحكم بونية كمان.
· اذا قارنا بين المستويات سوف نجد الفوارق كبيرة لصالح الشغيل ..فبكري المدينة تاميها (اعلام).
· واعلام المريخ ومجتمعه اصلا عندهم (عقدة) من الهلال لذلك بنفخوا في بكري المدينة بهذه الصورة.
· بكري لا تظهر بصمته واهدافه إلّا امام (الحمام).
· سجل بكري في (العلمة) ..وعندما كان في الهلال سجل في (المريخ) وكل حمام في حمام.
· عشان كدا ما اشتغلنا بيه كتير.
· في جانب السلوك فلا مقارنة بين فوضى بكري المدينة وانضباط الشغيل.
· بكري بتاع تصريحات ..وما عندو ولاء حتى لتاريخه ..عكس الشغيل الذي لا يتحدث عن المريخ إلّا بي كل ادب.
· امس قدم الشغيل اجمل مبارياته ..لعب كورة عالية ..وكان رجل المباراة الاول ..دون ان يصرح او يتشقلب.
· بالهدوء الذي يعرفه عنه الهدوء والانضباط الذي يلزمه والقوة التى تميزه ..يقدم الشغيل اعلى المستويات.
· اتذكر اني كتبت من قبل في صحيفة (قوون) عمود عن الشغيل تحت عنوان (الشغيل الازرق يليق بك).
