بكري من زمالة نزار حامد وبشه – بقى زميل بله جابر وعلي جعفر عادي ينافس ليكم بكري المدينة بي قروشو دي عمر محمود خالد – ومامون حميدة ذاتو رجعوا موسى الزومة أحسن ليكم من (العك) البعملوا فيه الريح علي وعلي جعفر الشغيل كان في المريخ بتاع (شلاليت) جاء الهلال بقى يصنع في الأقوان...ويمرر في الباصات الجابرنا شنو على التلتلة دي؟. الكان جابرنا شنو على المغص دا؟. نحن يا دوب عرفنا الكان برفع لينا (الضغط) في الهلال منو؟. عرفنا السبب. اتارينا كنا ما بنشوف. اتارينا كنا ما بنسمع. مرات الزول بكون ما ظريف مع ذلك بكون عامل فيها هو (ابوالظرافة) ذاتها. يخفف في دمو – ويتراشق. يحكي ليك في الدقيقة (10) نكات – كلها بائخة وقديمة – وسمعتها قبل كدا. نحن مع بكري المدينة دا – كنا قاعدين نتراشق ساكت. بنعترف ليكم – نعمل شنو؟. قعدنا نتراشق لمن سعر بكري المدينة اصبح (3) مليارات. طبعا ناس المريخ ديل عندهم عقدة من الهلال. اللاعب لو جاهم من الهلال – لو كان في الهلال كان حارس ليه بوابة – ممكن في المريخ يبقى (نبر ون). وممكن سعرو يصل (3) مليار جنيه. في واحد سمع السعر دا ( وهو اصلا ما عندو علاقة بالكورة) – قال لي بكري المدينة دا ناس المريخ سجلوه بي (مدينتو). صاحكبم فاكر بكري معاه (المدينة الرياضية). في زول بدفع ليه (3) مليار في لاعب. (3) مليار – ناس بله جابر ديل بلعبوا في المريخ عمرهم كلو ما في واحد منهم طلع ليه بي (مليار) واحد. بكري المدينة في (5) دقائق في المريخ دفعوا ليه (3) مليار. بله جابر دا لو كان عاوز يكون لاعب كبير – وعاوز يطلع ليه ب (5) مليار – كان يمشي المريخ من الهلال. كان عملوا لينا بله جابر نجم. وكانوا قالوا لينا بله جابر دا اخطر لاعب في السودان. بكري المدينة لو زول فالح بي قروشو دي – طوالي يفتح ليه عيادة في شارع الدكاترة. قروشو دي بتعمل ليه (عيادة). وطول ما عندو (3) مليار جنيه ممكن نقول ليه يا دكتور. دكتور بكري المدينة. وممكن بكري المدينة في البلد دي يطلع اختصاصي امعاء دقيقة. اي تخصص عاوزو ما عندنا معاه مشكلة – موش عندو (3) مليار جنيه. عادي ينافس ليكم بكري المدينة بي قروشو دي عمر محمود خالد – ومامون حميدة ذاتو. موش عندو (3) مليار جنيه. ولو ما بكري المدينة كمان ما عاجبو الطب..ممكن يمشي اتحاد المهن الموسيقية ويشيل قروشو دي ويبقى (فنان). ب (3) مليار جنيه وفي البلد دي – ممكن بكري المدينة يبقى فنان. وممكن ينافس محمد الامين وصلاح بن البادية ومحمد ميرغني. الآن معكم الفنان بكري المدينة. من الله خلقكم سمعتوا ليكم بي فنان اسمو بكري المدينة. لكن مع القروش دي بتسمعوا. موش عندو (3) مليار جنيه. ممكن. لو ما عاوز الفن – كلموه يعمل ليه (جريدة). اي زول عندو قروش ممكن يعمل ليه جريدة. وممكن بكري المدينة بي قروشو دي يكتب ليه (عمود). ويكون في كتابة العمود أخطر من صلاح إدريس. ممكن. ممكن بي قروشو دي يبقى (شاعر). ويطلع أخطر من أشرف الكاردينال. موش عندو (3) مليار جنيه. الشاعر الخطير بكري المدينة. وممكن يعملوا ليلة شعرية – يتحدث في الليلة التجاني حاج موسي وازهري محمد علي وهاشم صديق وبكري المدينة. اتخيلوا في ليلة شعرية بكري المدينة يتحدث مع هاشم صديق وازهري محمد علي. يمين بكري كلمة ما يقدر يقولها. إلا يعمل ليهم حركة العقرب. اكتر من كدا ما بقدر يقول اي حاجة. ح يقول شنو يعني؟. في قصيدة بتبدأ بي (الهدف تسلل). في قصيدة فيها (كورنر). فيها جدعة. بكري المدينة ما بقدر يقول ليكم اكتر من كدا. ممكن. ممكن بكري المدينة يبقى (رسام). يرسم زي ما هو عاوز – ما في اي زول بسألو. نسألو كيف مع ال (3) مليار دي. بكري بعد كدا مفروض ينسى موضوع الكورة دي. والظاهر بكري المدينة نسى الكورة فعلا – (الحكاية دي ظاهرة في مباراة الامس). زولكم علاقتو بالكورة بقت علاقة (مقصورة). كورة شنو البلعبها ليكم بكري المدينة ب (3) مليار. كلموه يفكر في حاجة تانية – غير الكورة. لو عاوز يبقى وزير الصحة – ممكن. وزير التربية – ممكن. وزير المالية – ممكن. موش عندو (3) مليار جنيه. لو عاوز يعمل ليه (معارضة) صغيرة – ممكن. ولو عاوز يكون ليه حكومة براهو – ممكن. ان شاءالله يجيب فيها بله جابر وزير خارجية. بله جابر تاني. ايوا بله جابر – خلاص بكري المدينة بقى زميل بله جابر. بكري من زمالة نزار حامد وبشه – بقى زميل بله جابر وعلي جعفر. الناس (الروش) كلهم اتلموا في حتة واحدة. ريحونا. نشيل (ضحكنا) وندخل على مباريات المريخ. وننفقع ليكم في المدرجات (ضحك) من الدقيقة الخامسة. الكوميديا الفي المريخ في فرقة الاصدقاء مافي. الغريبة زمان وقت كان بكري المدينة في الهلال كنا فاكرين بكري المدينة عندو كورة. وكانت كورة بكري المدينة عاجبانا. صحيح الجمل ما بعرف عوجة رقبتو. نحن كنا مغشوشين ساكت – كنا نشيل ونشكر في بكري المدينة – فاكرنو مهاجم خطير. ناس سلك صدقو. الموضوع اتاريه طلع (كلام جرايد) ساكت. الزول دا لا خطير ولا حاجة. ولا مهاجم في الاساس. الهلال كان متستر على بكري المدينة ساكت – وحقيقة الهلال هو الذي يضع السحر والبهاء والهيبة في اللاعب. اللاعب عندنا قد يكون ما عندو كورة – لكن الهلال بصلح ليه كورتو – ويجملها ليه – ويخلي للاعب قيمة. اقل لاعب بطلع من الهلال سعرو ما بقل من (3) مليار جنيه. ناس المريخ ...بنتظروا اي لاعب. امس وقت شفنا بكري المدينة امام جنوب افريقيا – قلنا الزول دا كنا صابرين عليه كيف؟. كنا بنستحمل اللاعب دا كيف؟. دا لا لاعب بستحملو كورتو ولا حاجة. كنا ممكونين. بالله بكري المدينة المباراة كلها (يشلت) في الناس. الشليت دا كان بعملو في الهلال. ابدا – ما كنا شايفين ليه اي شليت. خلاص بكري المدينة اعصابو فلتت. مشى محل الفوضى العالمي. وعشان ما تقولوا بتكلم ساكت. شوفوا كورة نصرالدين الشغيل بقت كيف؟. امس الشغيل يلعب ويمرر ويقطع ويصنع في الاقوان. الشغيل امس تقول بالع ليه مكتب هندسي (ما شاءالله). كورة راقية وجميلة – وفاهمة كمان. الشغيل دا كورتو في المريخ كانت كدا. ابدا. الشغيل كان في المريخ بتاع (شلاليت) جاء الهلال بقى يصنع في الاقوان...ويمرر في الباصات. الشلاليت انتقلت من الشغيل الى بكري المدينة. بكري بقى يشلت. انتوا ماشيين بعيد ليه؟. علاءالدين يوسف كورتو كانت كدا. فييرا في الهلال تشوفو تقول مفروض يحترف في انجلترا. تعال شوفوا الآن. فييرا بقى ما فاضلة فيه حاجة غير (البصمة). بقى عبارة عن (بصمة). قلنا ليكم الهلال دا سحرو براهو. وقلنا ليكم السر في الهلال – ما في اللاعب. ممكن جمال الوالي بقروش الحكومة يشتري ليه لاعب – اتنين – تلاتة من الهلال. لكن حاجات الهلال وثوابته وجماله وروعته وروحه لا تشترى بي ثمن.\ هي اشياء لا تشترى. ...... ملحوظة : لو دي كورة بكري المدينة يا عماد الطيب – الفيفا ذاتها ما تمشوا ليها – امشوا المنطقة الصناعية. هوامش في عريس بلعب كورة كدا. دي لا كورة عريس ولا حاجة. ولا بنغشكم. واضح ان انتقال بكري المدينة من الهلال اثر في نفسياتو. مازدا أخرج نزار حامد أفضل لاعب في المباراة ..ولولا انه عوضه بالشغيل الذي كان افضل منه لحدثت كارثة. الروعة كانت يمكن ان تكون اذا لعب الشغيل جوار نزار حامد. بعدين مازدا من البداية واضع الشغيل في الكنبة ليه؟. دا لاعب بخلو في الكنبة. الريح علي – الله شافنا منو؟. الحمدلله ما جاء الهلال. يا ما انت كريم يا رب. الريح علي دا لو سجلتوه بي اكتر من تلفون جلاكسي تكونوا انضربتو فيه. كمان نحن ما بنعرف السوق. هسع دي كورة (مليار). يا حليلك يا بله. اقول ليكم حاجة. رجعوا موسى الزومة احسن ليكم من (العك) البعملوا فيه الريح علي وعلي جعفر. ....... عاجل : والله لو دي كورتك يا بكري المدينة (نسابتك) ذاتهم مفروض يكون عندهم فيك (شورة) بعد مباراة امس. وإن طال السفر - محمد عبد الماجد صحيفة قوون
