المرور هنا ما زي (المرور) على صفحتك في (الفيس) حيث يتداول الناس (شكرا على مرورك الجميل) كلمات بسيطة و لكن معبرة عشان كدا (بيت) الشعر عند (عوض جبريل) زي (العمارة) المن عشرين طابق
حاجاتو بتشبهنا ..واغنياته بتعبر عننا ..لمن نقيف في الشارع ..وما نقدر نقول اي شيء
الواحد لمن يموت ما بقول (احبك)..بموت بيها ..وبظل يدسدس فيها لمن يبقى زي العود..دي ما (غتة) دي محبة زايدة *****************************************************
· عوض جبريل كان شاعرا يكتب (الشعر) من (عرق الجباه)...تحس بالتعب والرهق والحب الحلال في قصائده.
· بتشوف نفسك في اغنياته ..وتبقى كل مرة بتتر شوية لي قدام ..لمن تلقى نفسك بتبارك للعروس.
· وبترجع تاني تقيف في الصف الاخير.
· عوض جبريل له الرحمة والمغفرة يفعل ذلك ويترجم كل تلك (المعاناة) في كلمات بسيطة وسهلة ..تدخل غرف اي زول من غير ما تقيف في الباب.
· تشيل (الاستغراب) وتقعد تغالط في نفسك.
· نحن (الغلاط) عندنا زي (شاي الصباح) لو ما اتغالطنا بيمسكنا صداع.
· ما بنستعدل...وشوفنا يبقى (طشاش – طشاش).
· اغنيات عوض تشبه الناس ..ما بجيب حاجة من برة...عبّر عن الغلابة وعن (الحب) لمن يكون في اللفة الاولى.
· ابتعد لينا من الحب بتاع السينما ..والحب بتاع الروايات (الحب الكبار داك)..وجاب لينا حب سوداني خالص.
· حب حقنا نحن.
· (شفت التوب وما لاقانى أجمل منو..بس التوب...شوفو التوب وسيد التوب يكون كيفنو).
· تدخل في ضفورك من العجب.
· الحب السوداني كدا ..ما فيه تعقيد وفلسفة وتنظير ...حب بسيط وتلقائي وعفوي ..كما في اغنيات عوض جبريل تماما.
· الواحد لمن يموت ما بقول (احبك)..بموت بيها ..وبظل يدسدس فيها لمن يبقى زي العود.
· ما غتة من الزول – لكن محبة زيادة.
· حاجاتو بتشبهنا ..واغنياته بتعبر عننا ..لمن نقيف في الشارع ..وما نقدر نقول اي شيء.
· تشيل جك الفول ..وتجي راجع ساكت.
· يقولوا ليك وينو الفول؟.
· تقول ليهم : هو انتوا قلتوا عاوزين فول!!.
· عوض جبريل عندما وقع بيتو في الخريف في خريف 1976م ..كتب لنا اجمل ما يمكن ان نجابه به الصعاب ونتحدى بيه الايام ..ونمرق بيه في الحوش (ما تهتموا للايام ظروف بتعدي – طبيعة الدنيا زي الموج تشيل وتودي ما تهتموا للايام).
· ثبت زوجتو بي الكلمات دي ..ما كان عندو حق لوري التراب ...وكمينة الطوب.
· ما في حكمة ولا في قوة اكتر من الكلام البقول فيه عوض جبريل : (سبيل الزول عشان يفتح طريق يادوب - يكون زادوا البشيلو معاهو شوق مشبوب.. عشان يلقي انتصارو يازمن محبوب - يضوق المرة ويتوشح بصبر أيوب).
· الكلام دا لا بصرفوا ليك دكتور.
· ولا وزير.
· ولا فيلسوف.
· ولا (سادومبا) ذاتو.
· الكلام دا بس عند عوض جبريل.
· حبنا كدا ..نقعد (نتبلد)...لمن يفهموا حاجة.
· الزول الكلمة لمن تقع من خشمو ..(فندرب) كدا.
· ما بقولها.
· بقينا نكسر كدر الايام بي وصية (عوض جبريل) ما بنهتم بيها ولا بنشتغل بالحاجات دي.
· عوض جبريل كان احرف من يكتب عن (الانتظار) ووجعه وهو يكتب (بتسيبني في عز الجمر وانت من حولي بتمر).
· دي حقارة والله.
· عوض جبريل اول زول دخل ليك (الجمر) في الحتة دي.
· نحن حسب فهمنا زمان ..كنا بنعرف (الجمر) بي (شية الجمر) ما قايلين (الجمر) المولع دا ممكن يدخل لينا في العواطف ..ويبقى لينا في (الحب).
· الزولة عند عوض حبريل بي تلك الملامح ..(العولمة) ما دخلت عليها وخلتها زي مذيعات بي بي سي.
· (الرقيقة الطيبة الحنونة - العيون بالشقى انتى لونا - كتبت الآمال يوم حنونا - يوم تركتى ديارنا ورحلتى).
· عوض جبريل قدم لعبد الله محمد اخطر اغنية (تقدير) في الدنيا ..شفتوا الزول وقت يبقى كعب ويتغير ويقابلك بي برود ما بتلقى ليه احسن من (الحنين البي ليه ما قدرو – العمر من وين يشتروه).
· وانت الشوق كاتلك.
· ما ممكن طبعا.
· مستحيل.
· وصعب عديل كدا.
· وعوض حبريل في نفس الحتة غنى ليه محمود علي الحاج (بقيت ما زي زمان).
· شوفوا الزول وقت يبقى كعب...ويعمل ليه (جلاكسي).
· ارقامو القديمة بيمسحها.
· ما كدا يا جماعة.
· اسمعوا الزول دا ..وصلحوا مشاعركم.
· رتبوا عواطفكم.
· عوض جبريل غنت له فاطمة الحاج في بداياته (الحبيب شاغل بالي دا المحير افكاري – الحبيب محروم منو لي زمن بسأل عنو).
· شوفوا السؤال.
· في (حنية) اكتر من كدا.
· عوض جبريل رغم خطورته دي ..كان بكتب وبلحن براهو وهو صاحب انتاجية ضخمة ..ويأتي في المرتبة الثانية من حيث الانتاج كتابة وتلحينا.
· مع هذه (الخطورة) عوض حبريل كان زول بسيط ..بيتو وقع وما عندو عربية ..وبتلقاهو في الشارع ما بتعرفو.
· لا اتفلهم ولا عمل ليه جلاكسي ..ولا برم شعرو.
· ولا قعد في الكافتريات.
· بكل هذه العبقريات في الكلمات والالحان ..مات عوض جبريل فقيرا ..صورته في الجرايد ما بتلقاها.
· مع احمد الجابري قدم عوض جبريل (لونية) خاصة بيه ..(حبيبتي بستلطفها وما عاوز زول يعرفها).
· شوفوا (الدسدسة).
· طبعا في حرفنة في حكاية (دسدسة) الحبيبة دي.
· ما تقول اسمها.
· وغنى له الجابري ايضا (الشغل بالي انا بريدو كل آمالي اشوف خديدو)...ما في تعبير اكتر من كدا.
· دي احترافية بقأ.
· من اجمل الاغاني القومية والوطنية لعوض حبريل اغنيته التى تغني بها عبدالوهاب الصادق (وليد دارفور بمشي معاك الليلة).
· الاغنية دي كانت بتدور في الحفلات براها ...للصباح ..الناس ما بتطلب غيرها.
· والناس ذاتها كلها بتكون في الدارة جوة ..(وامي قالت لي الليلة).
· عوض جبريل لخص (ام درمان) في اغنياته فهو من مواليد ام درمان ولد في 1932 وتوفى في عام 2003م.
