ناس ايشيا ديل عمرهم ما شافوا ليهم (نحلة) – ح يقدروا يلعبوا مع (النحل) دا كيف؟..دا انا بخاف من البعوض يطلع لي نحل قصدوا يضعوكم امام اصعب الامتحانات..عاوزين البدايات تحبطكم ..وتفرتق وحدتكم
غايتو المباراة دي لو كان انتهت بالتعادل ...الجماعة ديل مع (النحل) دا تاني ما بقعدونا في البلد دي البدلاء قالوا كلمتهم كينيدي سجل القون الاول وهو الذي دخل بديلا لولاءالدين..ووليد الشعلة سجل وهو الذي دخل بديلا لمدثر كاريكا * بيني وبينكم (الخوفة) دخلتنا بعد ما شفنا امس الاول (النحل) يحاصر ملعب المباراة في كادوقلي. * ناس ايشيا ديل عمرهم ما شافوا ليهم (نحلة) – ح يقدروا يلعبوا مع (النحل) دا كيف؟. * دا انا بخاف من البعوض يطلع لي نحل. * نحن في ملعب كادوقلي بدون (نحل) المباراة بتصعب علينا. * كمان جابت ليها (نحل). * يعني لجنة الاستئنافات دي ما خلت حاجة عشان الهلال ما يخسر. * يجيبوا لينا في حكام مهمتهم عرقلة الهلال. * الهلال ينتصر في الملعب ويتصدر بفارق (9) نقاط من (الوصيف) مع ذلك الاتحاد العام بيتوج المريخ. * والهلال ما بقيف. * جابوا تراوري ما نفع. * جابوا بكري المدينة ما نفع. * جابوا غارزيتو ما نفع. * جابوا سمير فضل ماعمل حاجة. * آخر حاجة قاموا جابوا لينا (نحل). * والله دا الفضل. * مباراة الهلال القادمة في الابيض – ما تستبعدوا يجيبوا ليكم (عقارب). * انتوا قايلين (النحل) دا طالع من فراغ. * النحل جابوه ناس اسامة عطا المنان. * قالوا الهلال دا عملنا ليه اي حاجة ما اتوقف. * عشان كدا ناس هلال كادوقلي المرة دي جونا بي (نحلهم). * ناس كافالي في الملاعب دي (40) سنة – ما حصل قابلتهم حكاية زي الحكاية دي. * نحن (رجفة) عبدالمولى الصديق له الرحمة والمغفرة دخلتنا. * قلنا موضوع (النحل) دا اصلو ما طبيعي. * يعني ح تقنعونا ان الموضوع دا (صدفة) ساكت. * وان (النحل) جابوا الطريق. * الله يستر. * الكلام دا كنا بنقول فيه امس. * لكن قلنا ما نظهر الحكاية دي – ندسها. * نعمل فيها ثابتين. * معقولة شهر اعداد في تونس يروح ساكت. * والله (النحل) دا لا بعرف ليك تونس ولا بعرف ليك انجلترا. * النحل دا اي حاجة عندو واحد. * ما في شيء فارقة معاهو. * عشان كدا امس يوم المباراة كنا اليوم كلو قاعدين نلف في الشارع. * وكل مرة نسأل عن النتيجة. * ونشوف الزمن. * نفتح التلفون. * نرجع نقفلو تاني وقت ما نلقى لينا رسالة. * نتوكل ونسأل من النتيجة يقولوا لينا الشوط الاول انتهي تعادل. * تعادل بعد معسكر تونس دا. * تعادل وجوهرتنا الزرقاء بقى فيها تلاتة طوابق. * معقولة بس. * نحن عندنا مدرب فرنسي. * وعندنا هيثم مصطفى. * وبشه وكاريكا. * وابوعاقلة وولاءالدين. * وبعد دا تقولوا لينا تعادل. * مالكم عاوزين تجهجهونا. * النحل دا يكون جادي في الموضوع وإلّا شنو؟. * اصلو (النحل) دا ما بكون دخل المباراة ساكت. * بكون في فهم. * عندو رأي. * قمنا نحوم تاني. * نلف – ونقيف. * بدون مناسبة نفتح التلاجة. * وبدون مناسبة نقفلها. * عاوزين زول ساكت يبشرنا. * الشافع البتلاقه في الشارع ..بتتخيلوا يقول ليك الهلال جاب ليه قون. * الشوط التاني نصو اتقسم. * وما في حاجة. * يا جماعة انتوا مالكم عاوزين تمسخوا لينا (جوهرتنا الزرقاء). * مالكم عاوزين تمسخوا لينا فرحتنا ب (شيبوب). * نقوم ندخل. * ونطلع تاني. * ونقيف في الباب. * ونعمل فيها ما شغالين بالمباراة. * ولا عارفين الحاصل شنو؟. * غايتو المباراة دي لو انتهت بالتعادل ...الجماعة ديل مع (النحل) دا تاني ما بقعدونا في البلد دي. * نمرق عديل كدا. * نشوف لينا بلد تاني. * والنحل ذاتو ح يبقى موضوع. * يعني تاني اي فريق عاوز يتعادل مع الهلال يشوف ليه (خلية) نحل يفكها قبل المباراة. * لكن الهلال بيلعب. * نحل شنو البيقيف قدام الهلال؟. * اتشجعنا وسألنا من النتيجة. * قالوا لينا الهلال جاب ليه قون. * قلنا دا منو الشفت دا الجاب ليه قون مع (النحل) دا. * والله دا ما (برد) قون. * زول يجيب ليه قون في البرد دي – اصلو ما اعتيادي. * اصلو ما طبيعي. * قالوا لينا دا ايشيا كينيدي – قلنا المحترف الكلو (يا يات) دا جنسو شنو؟. * والله الزول دا ما ساهل. * قعدنا نصلح في الكلام. * ونبدل فيه. * قلنا الفرنسي كافالي ذاتو نظرتو بعيدة. * ولمسة هيثم مصطفى في قون كينيدي ظهرت. * الشغل دا شغل عالي. * تونس ظهرت في القون. * عمار الدمازين ..اصلو ما بتقول الزول دا جاء من الدمازين. * ما بتقول من عطبرة. * الخبرة البيلعب بيها عمار الدمازين دي خبرة زول جاء من لندن. * خبرة الدوري الانجليزي ذاتو. * وابوعاقلة – ما شاءالله عليه ..زولكم بيدخل المباراة شايل ليه كتاب جغرافيا. * الكورة عندو زي الجغرافيا. * بيلعبها بالمساحات. * بالمربعات. * وولاءالدين – نسخة تانية من والي الدين محمد عبدالله. * زول شباح ..وخطير في الالعاب الهوائية. * كينيدي يكفي انو جاب ليه قون في (نحل) عجيب. * من اول مباراة. * من اول لمسة. * كينيدي لم يكن اساسيا في المباراة. * نحن نفسنا قايم كدا. * وخايفين من (النشلة). * وتدخلات لجنة الحكام. * وليد الشعلة – ما شاءالله عليه جاب ليه قون في الدقيقة 47 من الشوط التاني. * ما عاوزين نشوف لينا تاني اي (نحلة) في البلد دي. * قال نحل قال. * على العموم جدعة المدير الفني الفرنسي كافالي تمثلت في ان البدلاء سجلوا الاقوان. * كينيدي سجل القون الاول وهو الذي دخل بديلا لولاءالدين. * ووليد الشعلة سجل وهو الذي دخل بديلا لمدثر كاريكا. * الغريبة الاتنين سجلوا. * النظرة الفرنسية واضحة في الاقوان. * واللمسة (البرنسية) ظاهرة – ما في ذلك شك. * الهلال انتصر بهدفين ..وقد كان الهلال متعادلا في كادوقلي في الدوري الممتاز الماضي. * هذا تقدم ملحوظ. * خاصة ان ملعب كادوقلي جاب ليه السنة دي (نحل). * ومع النحل ..انتوا براكم شايفين البرد. * خطوة موقفة لهلال الملايين. * وانتصار بعرق الجبين. * لا بنتظر لينا شكوى. * ولا لجنة استئنافات. * نحن بننتصر عديل كدا. * بالعضل. * لا بنعرف (نحل). * ولا عندنا يا يمة ارحمينا. * صعبين. * نحن وشفوت. * ما تشوفوا (الجرسة) – القبل المباراة دي. * دي جرسة ريدة ساكت. * خوفة حب. * ما عندنا اي مشكلة – بعد ما اتجاوزنا المحطة الاولى. * لتبقى المحطة الثانية وهي الاهم والاصعب امام هلال الابيض. * عاوزين تركيز اكبر. * عاوزين كورة جد. * مسؤولية وارادة. * عشان نحسم (الممتاز) من الاسبوع التاني ونقطع ليكم رأس لجان مجدي شمس الدين واسامة عطا المنان. * عاوزين انتصار تاني في الابيض. * ونرجع الخرطوم. * قصدوا يضعوكم امام اصعب الامتحانات. * عاوزين البدايات تحبطكم ..وتفرتق وحدتكم. * ركزوا اكتر. * لأن اي انتصار يحققه الهلال سوف يجعل التماسك اكبر ..والتعاضد اعظم. * خلونا نفتح ملف هلال الابيض بي هداوة. * وخطوة عديلة عليكم ان شاءالله. * ............ * ملحوظة : بنشيل نقاطنا عديل كدا ..لا شق ولا طق. * هوامش * * الامتحان الاصعب هو الامتحان القادم. * الهلال في الموسم الماضي تعادل في كادوقلي وجاء هذا الموسم وانتصر مع (النحل) الذي كان مهدد للمباراة. * في الموسم الماضي ايضا تعادل الهلال امام هلال الابيض – وهو مطلوب منه ان ينتصر هذا الموسم على الهلال. * ليكون التقدم اكبر ان شاءالله في هذا الموسم. * ملعب الابيض افضل كثيرا من ملعب كادوقلي وهذا محفز للهلال وعامل مساعد له. * الهلال الذي عرف ان ينتصر في ارضية ملعب سيئة ومع النحل قادر باذن الله وفضله ان ينتصر في الابيض. * فقط مطلوب التركيز. * ومطلوب التعاون والتكاتف والعمل. * شيدوا حيلكم. * السنة دي ما عاوزين نفقد اي حاجة. * تجاوز محطة كادوقلي والابيض سوف يكون دافع كبير للهلال للتقدم في المنافسات كافة. * خسارة قورماهيا القت بظلال سلبية كبيرة على الهلال. * الانتصار قادر على ان يجمع الاهلة كلهم على قلب رجل واحد. * لذلك نحتاج الى انتصار آخر. * ما تعطوا اي زول فرصة. * ردوا بالانتصار. * وعودوا لينا من الابيض بالنقاط الثلاثة. * وانتم قادرون على ذلك. * مباراة الامس قدمت اكثر من لاعب جديد. * مباراة امس قدمت ولاءالدين وايشيا وموكورو وابوعاقلة وعمار الدمازين ووليد الشعلة. * تاني عاوزين اكتر من كدا شنو؟. * اي حاجة تمام. * اصلو مافي عوجة. * جمهور الابيض جمهور راقي وجميل. * جمهور الابيض سوف يساند الهلال ويدعمه في مباراته القادمة. * قدموا ليكم كورة حلوة. * هلال الابيض انتصر على الاهلي شندي. * هذا دافع كبير لهلال التبلدي. * لكن باذن الله وتوفيقه الهلال الاب ينتصر على الابن. * هذا هو الشيء الطبيعي. * اللعب بمسؤولية وحماس وقوة. * احسموا مواضيعكم من الشوط الاول. * ما عندنا اعصاب للشوط التاني. * كافالي مباراة الامس بتكون كشفت ليه الامتحان. * شاف الواقع بنفسو. * الملاعب والعنف والتحكيم. * .............. * عاجل : عسل الابيض كمان قالوا ليك اخطر من عسل كادوقلي.
