* كتب:محمد الطيب الأمين * * واحدة من أكبر مشاكل الجمل أنه لا يلاحظ (عوجة رقبته) ، ولذلك تجده يضحك على بقية الحيوانات .. * يظن الجمل أن (عوجة رقبته) زينة ، بينما تراها بقية الحيوانات (عيب خلقي) .. * وما ينطبق على (رقبة الجمل) ينطبق على إعلام المريخ الذي يظن أن (إعوجاج فريقه) زينة بينما نراه نحن نقص ونقص كبير .. * إعلام المريخ يتحدث عن (هدف صحيح) لأهلي شندي في شبكة الهلال بينما كل فريق في الممتاز عندو على الأقل (3) أهداف في شبكة المريخ غير محتسبة .. * فاقد الشئ لا يعطيه والمريخ مستفيد من الظلم ولذلك عليه أن لا يتحدث عن المظاليم .. * بمناسبة المظاليم .. * وين أخونا (الأراقوز) ؟؟ * في الثقافة العامة بيقول ليك : (مد كراعك قدر غطاك) .. * ومن إفرازت الأزمة التي فجرها الهلال في الموسم السابق هي : (كل زول تصريحاتو قدر لقيماتو) .. * لو شبعت لقيمات تصريحاتك بتكون كتيرة ومسيخة ولو كما أكلت لقيمات نص نص كده تصريحاتك بتكون معتدلة .. * وأظن واضح بالنسبة ليكم من هم الذين (تقلُو في ضرب اللقيمات) ؟؟ * غايتو جنس غايتو ؟؟ * في الوقت الذي كان فيه كافالي يوقع على العقد بفندق القراند هولدي فيلا كانت (بصلته في النار) .. * ولذلك إقالته غير مستغربة .. * ناس الهلال بقو بجهزوا (خطاب) إقالة المدرب مع (خطاب) التعيين مباشرة .. * بعملوا خطابين .. واحد خطاب تعيين والخطاب التاني بتاع إقالة .. * والله صحي .. * هسه مش طارق العشري المفروض يجي الليلة ويوقع العقد ؟؟ * أنا أحلف ليكم إنو خطاب إقالتو بيكون جاهز .. * قد يكون فعلاً كافالي مدرباً فاشلاً ولكن هذا لا يعفي مجلس الإدارة من التخبط لأن كافالي جاء بقرار مجلس ولم يأت (هوادة مع شيخ موكورو) .. * في موضوع المدربين الهلال (شم ريحة الدم) ولذلك لن يشبع من (الكركدي) .. * وأنا لاحظته حاجة .. * لاحظت إنو كافالي هو الزول الوحيد الما لبس (الكسكتة) أيام التفاوض ولذلك غادر سريعاً .. * كل الناس الفاوضوهم ولبسوهم (الكسكتة) قاعدين في آمان الله .. * ما عدا كافالي .. * وبما أن ذلك كذلك فنحن ننصح مبارك سلمان بأن لا يباشر مهامه إلا بعد أن يتصور ب(الكسكتة).. * والله صحي .. * عموماً طارق العشري هو مدرب كبير وبلا شك سيشكل إضافة للهلال إذا توفر للهلال الصبر .. * كونو لاعب المريخ (النعسان) يجيب قون في الأمير .. ده ما خبر .. * ولكن الخبر أن النعسان جاب القون في الشوط الثاني .. * يعني جاب القون بعد الساعة تسعة ونص .. * وهذا يؤكد أن النعسان ما بنوم بدري .. * عندي إحساس إنو النعسان ده يوم المباراة نام بالنهار .. * إحساسي كده .. * وأي زول طبعاً حر في (محاسيسو) .. * يا نام بالنهار ويا كمان بدل شاي المغرب شرب قهوة المغرب .. * غايتو جنس غايتو ؟؟ * الذي لا شك فيه أنني أشعر بكثير من السعادة بعودتي اليوم إلى صحيفة (قوون) .. * و(قوون) تظل الأولى في عالمها مثل (الشامة) في خد الحسناء كثيرة العشاق .. * بمناسبة (الشامة) .. * بتذكر زمان في حلتنا كان عندنا بت عندها شامة .. * وموقع (الشامة) كان شمال شرق (العين) جنوب غرب (الخد) .. * البت دي كانت كثيرة العشاق .. * كانوا بيحبوها زي (19) نفر .. * وال(19) ديل فيهم (14) بيحبو (الشامة) والخمسة الباقين بحبو (ست الشامة) .. * أرهقناها بالحب والغزل حتى كادت أن تتلاشى (شامتها) .. * شوف ساي شامتها بقت صغيرة .. * مرات شوف العين لو ما كتل الغزالة بجهجها .. * والله صحي .. * والبت دي ما إتحلت مننا إلا بعد ما ظهرت بت تانية عندها (فلجة) .. * خلينا (الشامة) وقبلنا علي (الفلجة) .. * وإحنا وأولاد حلتنا عندنا غرام غير عادي مع (الفلجة) وحب عجيب مع (الشامة) وجنون كبير مع (الوجنة) .. * المهم .. * (قوون) تظل (شامة) موقعها شمال شرق (العين) وجنوب غرب (الخد) .. * (عين) الإعلام عموماً ، و(خد) الإعلام الرياضي تحديداً .. * والتحية لمجلس إدارتها وهيئة التحرير ولكل الزملاء والعاملين ومن قبلهم القراء الأحباب .. * وكل الأمنيات أن أوفق في مشواري الذي لن يكن سهلاً لأن إرضاءً أذواق وضمائر شعب الهلال يحتاج لكثير من البذل والعطاء والإخلاص .. * والله صحي .. * سوء السلوك الذي يعاني منه تراوري يحتاج لعين حمراء من الحكام .. * تراوري ده لو ما قادرين تحسمو عمار الدمازين بختو ليكم في (علبو) .. * عمار الدمازين ما شاء الله قلبو حار .. * قال ليك عمار الدمازين شدة ما قلبو حار بيلبس (القميص مكرفس) .. * ما بيكوي القميص .. * قميص عمار الدمازين بحرارة القلب بتكوي .. * عمار يجب أن يتحول للإرتكاز عشان يكتمها لينا بعيداً عن خط ال(18) .. * عمار الدمازين في أقل من شهر حلل قروشو والمعز محجوب في أكتر من سنة شارك في ثلاث مباريات فقط .. * هل تصدق إنو أبوعاقلة في خمس مباريات شارك في أربع أساسياً بينما المعز محجوب في موسم وربع مع المريخ شارك في ثلاث مباريات (ترضية ساكت) .. * غايتو جنس غايتو ؟؟ * طارق العشري سيوقع للهلال يوم (عيد الحب) وهذا يعني لو في طلاق يجب أن لا يكون إلا بعد عام .. * البيجي يوم عيد الحب لازم نصبر عليهو يا الكاردينال .. * فتح باب الطابق الثاني بإستاد الهلال للجمهور وهو بهذه الحالة يعتبر مجازفة خطيرة جداً .. * سلامة الجمهور مهمة ولذلك يجب عدم التهاون في السماح لهم بالجلوس على الطابق الثاني حتى ولو أدى ذلك لتحويل المباريات إلى دار الرياضة أم درمان .. * اللعب بالأرواح ما حبابو .. * كلما أشاهد بكري المدينة طوالي بتذكر (يوسف البلايلي) .. * بلايلي ب(القاء) .. * داير تعرف إنو المريخ (نادي ساكت) شوف قصة تراوري مع النجمة فهو أول وآخر محترف في تاريخ الرياضية يمضي سنة ونصف بعيداً عن فريقه ثم يعود ويشارك أساسياً دون عقاب أو حساب .. * وأنا والله خايف يكون (الحنطور) دفع لتراوري مرتبات السنة والنص الما لعب فيها ولا مباراة .. * مع الحنطور ده تتوقع أي حاجة .. * ديل ما بخجلوا .. * قبل كده الحضري قال إنو (عزو) ما كان بيحلم يسلم عليهو في يدو .. * قال كلامو الجراح ده ومع ذلك عاش ملكاً في ديار النجمة الما بتختشي .. * والله صحي .. * و..و.. * وباسم الحب بقدم ليك حياتي ومعاها ...(أنوبة غاز) .
