بالعربى الكسيح محمد الطيب الأمين اللقيمات منكم واللبن مننا والكبابي منهم !! * أخطر حاجه في (الماضى) انو ما بتنسى ، وأخطر حاجة في (الحاضر) انه سيصبح (ماضى) .. * والماضى لو (كعب) ذكرياتو بتكون أليمه ، ولو كان الماضى جميل ذكرياتو بتكون سعيده .. * ومرات الماضى بخليك (تخجل) ومرات بيخليك (ترفع رأسك) .. * وحتى يكون المعنى واضحا أقول : ناس المريخ مثلا لما يشوفو (زيكو) في التلفزيون بتذكرو (شيلة الكوره والهروب) .. * ولما تجيب ليهم سيرة الاردن بتذكرو (شلبيايه) .. * ده غير ذكرياتهم مع البودى قارد والطباخين و(الخاتم) اللقوهو مدفون في الفاشر وساماتا والتلاته الحلاته .. * ودى ذكريات أليمه دون شك .. * وإحنا في الهلال لو في زول تانى جاب لينا سيرة الإتحاد العام طوالى بنتذكر (اللقيمات) .. * والله صحى . * أمبارح الهلال عمل (يوم) لما نتذكرو في المستقبل ( ح نخلف رجل فوق رجل) .. * يوم امبارح ده لما يبقى ماضى ونتذكرو أكيد ح نتبسم ونضحك بدون سبب .. * يوم للتاريخ .. * والتاريخ يسجل (أيام الهلال الحافله بالمواقف) ، والتاريخ نفسه يسجل للمريخ والاتحاد (أيام حافله باللقيمات) .. * فرق كبير .. ناس تنضال من أجل (الحق) ، وناس تضرب اللقيمات عشان تنصر (الباطل) .. * والباطل لن ينتصر في وجود الهلال حتى ولو عملو (كاكاو للبن) و(جوز هند للقيمات) .. * هو الهلال .. والأسم يسر البال .. * وحينما يتحدث كبير البلد يجب ان (يخرس) الصغار .. * لما نتكلم إحنا ناس (الزلابيه) حقو يسكتو .. * والهلال هو الواحد الصحيح ومن بعده انديه تملأ العين مثل أمل عطبره وأنيق كسلا .. * إلتقى أمس (حديد الهلال) ب(نار عطبرة) فشهدت أم در فرح لا يقل عن عظيم فرحنا ب(طرد قوات خليل) من قبل قواتنا النظاميه الباسله .. * رفع الكاردينال رأس كل هلالابي وهو يبدأ اول الخطوات العمليه في إتجاه تصحيح مسار الكره السوانية وإعادة الهيبة للقانون (المغتصب) .. * من حق اى هلالابي ان يفتخر ويعتز بالهلال لانه معلم (يُربى ويعلم ويوجه ويصحح) .. * الناس بتحب الهلال عشان مواقفو ، وفي ناس بتحب الرياضه عشان (الزلابيه) .. * دكتور كمال شداد ده (40) سنة في الوسط الرياضى لا سمعنا بيهو مشى أكل (لقيمات ولا طعميه) .. * المهم .. * لقد اطربنا الكاردينال بحديثه القوى والشجاع وهو يكشف للأمة الهلاليه حجم الفساد والمجالات والترضيات و(اللقيمات) التى تدار بها الكره السودانيه .. * وقد يختلف الناس حول خطاب الكاردينال والطريقه التى (عبر عنها) ولكن حسب وجهة نظري ارى ان هذا الاتحاد لا تنفع معه اى طريقة خطابيه اخرى بخلاف الطريقه التى تحدث بها رئيس نادى الهلال .. * مرات الدبلماسيه والكلام الناعم والطاعم ما بينفع .. * ناس الاتحاد ديل بالذات ما بينفع معاهم إلا الكلام القالو الكاردينال .. * وخطاب الكاردينال هذا بأذن الله سنتطرق له طوال الاسبوع القادم حتى نتحدث عن كل جوانبه بداية من (قضية تسجيل جمعة جيناور ونهاية باللقيمات) .. * موضوع اللقيمات ده سنتحدث عنه (كل أربعاء وخميس) لانو الكاردينال قال الجماعة ديل بأكلو اللقيمات في الايام دى تحديدا .. * كل أربعاء وخميس .. * هسه عليك الله لو ما ساى إراده في زول بيأكل لقيمات يوم الخميس ؟؟ * الناس ديل حتى أيام (الأكل) ما بعرفوها .. * طبعا الكاردينال حدد أيام اللقيمات (الأربعاء والخميس) ولكنه لم يحدد ايام (البيتزا) .. * اعتقد إنو الأربعاء والخميس أيام (اللقيمات) ، الجمعة والسبت أيام (البيتزا) ، الأحد والاتنين أيام (السمك) ، ويوم الثلاثاء هو يوم (الضأن) .. * يعنى هسه يا الكاردينال كأس الممتاز بتاع السنة دى ممكن نطلق عليه (كأس الزلابيه) ؟؟ * والله لكن فهنا شي وعرفنا حاجه .. * قلت لي يضربو في (اللقيمات) ويقررو إعادة المباريات .. * غايتو جنس غايتو ؟؟ * الجماعة بتكلمو عن ولاء الدين ، وامير كمال مكالماتو مدوره مع ناس الهلال .. * بعوعو في ولاء الدين وأمير كمال بصلتو في النار .. * الهلال شغل ليك ناس المريخ بالانسحاب قامت الحكومة جابت ليهم رئيس هلالابي .. * إحنا بنبارك للرجل الهلالى الكبير (اسامه ونسى) ونتمنى له رئاسة طيبه لنادى المريخ .. * تعيين رئيس هلالى للمريخ يؤكد ان للهلال مهام اخرى وادوار تتجاوز حتى الهلال .. * اسامه ونسى الهلالابي المعروف هو الان في مهمه وطنية مع المريخ .. * نتمنى له التوفيق .. * ونتمنى ان يتعاون مجلس الهلال مع اسامه ونسى ويدعمه حتى ينجح في مهمته الوطنيه هذه .. * اسامة ونسى يتشرف بالهلال والهلال يتشرف به .. * طبعا يا جماعة أظرف حاجه الكاردينال قال : (بجيبو للمريخ حكام بيفرحو بأقوان المريخ وبنططو اكتر من اللاعبين) .. * معنى الكلام ده يا جماعة الحكم لو ما مسيحى عادى ممكن (يسجد شكرا لله) لما المريخ يجيب قون .. * حكم بفرح بفوز المريخ اكتر من بكرى المدينه .. * قال ليك الحكم بنطط من الفرح .. * مرات اللقيمات بتخلى الزول ينطط .. * الموضوع عادى يا محمد سيد أحمد .. * معروف اللقيمات عندها علاقة بالنطيط .. * هسه نطيط صلاح ولى ده عندو علاقة باللقيمات .. * صلاح ولى قبل ما يمشى بيت المناسبه بضرب ليهو (صحن لقيمات) و بعد الفاصل الاول برضو بضرب ليهو صحن لقيمات .. * عشان كده قاعد ينطط .. * بس أنا عندي سؤال صغير للكاردينال .. * بالنسبة للقيمات دى يا ريس هل ناس سمير فضل وأعضاء لجنة الاستئنافات برضو داخلين في الموضوع ولا اللقيمات دى حصريا على الضابط الاربعه ؟؟ * حاجة تكسف .. * إحنا زمان بنعرف اللقيمات بعملوها في (السمايه) و(فطور العريس) و(طهور الأطفال) و(الرحمتات) .. * لكن هسه كبرنا وعرفنا (اللقيمات) عندها علاقة بالقرارات .. * ما مشكلة يا شباب في النهايه الحاله واحدة .. * والناس ديل ناسنا .. * وإحنا اصلا بنأكل مما نزرع .. * يعنى دقيق اللقيمات من زراعتنا واللبن من بقرنا .. * الموضوع عادى .. * نتمنى إنو الناس ما تعمل الموضوع شخصي .. * في كثير من الاحيان هنالك قضايا عامه ولكنها بدون مقدمات تصبح قضايا شخصية .. * إحنا شعب بحب (شخصنة القضايا) .. * وشخصنة القضايا في السودان بلغت مرحلة حرجه جدا .. * قول لي كيف ؟؟ * زمان في السوان كان عندنا (زيت سمسم) و(زيت فول) .. * والفول والسمسم (حاجه عامه) .. * وعشان إحنا بنحب شخصنة القضايا قمنا عملنا (زيت الطيب) و(زيت صباح) و(زيت ابرار) .. * والله صحى .. * والكاردينال قال ناس الإتحاد بيمشو يشربو (لبن بى لقيمات) في بيت رئيس المريخ كل (أربعاء وخميس) .. * وأنا والله يا الكارينال موضوع اللقيمات ده بيهمني في حاجتين إتنين .. * الحاجة الأولى : اللقيمات دى معموله ب(زيت الطيب ولا زيت صباح)؟؟ * دى حاجة .. * الحاجة التانية .. دقيق اللقمات ده (سيقا) ولا (زادنا) ؟؟ * طبعا لو الزيت زيت الطيب والدقيق دقيق سيقا يبقى لجنة الإستئنافات من حقها تعمل فينا العايزاهو .. * ولو كمان الزيت زيت صباح والدقيق دقيق زادنا يبقى إحنا معانا حق ننسحب .. * سنسحب إنسحابنا هذا إذا تأكد لنا إن (لقيمات حى الصفا) معمول ب(زيت الطيب ودقيق زادنا) .. * والله يا جماعة إحنا زاتنا سجمانين وردمدانين .. * لو ما سجمانين ما بيحكمنا إتحاد اللقيمات .. * هسه بدل اللقيمات مش اخير ليكم الباسطة ؟؟ * باسطة أو حتى (لقة القاضى) .. * و(لقمة القاضى) أصغر حجما من اللقيمات يا معتصم جعفر .. * المهم .. * تانى قسما وعظما اى مباراة بنعرف فيها لقيمات ولا بلح شام .. * كورة اللقيمات بتكون ظاهره وكورة بلح الشام برضو بتكون ظاهره .. * الكوره تانى بنعرفها من لقيماتها .. * انا عندي إحساس إنو مباراة المريخ والعلمه بالجزائر كانت مباراة (بلح شام) .. * عندي إحساس كده .. * واى زول طبعا حر في (محاسيسو) .. * غايتو موضوع الانسحاب والجوطه دى كلها المستفيد منها هى (اللقيمات) .. * الشعب السودانى نسى اللقيمات قام الكاردينال بدون مقدمات رجع اللقيمات للسوق مجددا .. * عندي سؤال أخير .. * بعد إستقالة الوالى اللقيمات ح تتواصل بشكلها الاسبوعى ده ولا ح تبقى شهريه ؟؟ * شهريه ب(العاء) .. * و..و.. * وكنت جمبك أشيل همك ويا خسارة الريد البعتو ب…..( صحن لقيمات) ..