* قفل الباب والشباك فاتحا يقود لذات النتيجة من حيث دخول (الهوا) .. * قد يكون هوا الشباك من حيث (الكمية) أقل ولكنه في نهاية الأمر هوا .. * وتلفزيون السودان يريد ان يقفل (باب) التعصب ولكنه ترك شباك (الامبراطور) فاتحا فدخل الهوا ولم يخرج التعصب .. * فقرة الإمبراطور التي تُقدم عبر برنامج (عالم الرياضة) هي فقرة تدعو للتعصب وتسهم في الشحن الزائد .. * ولذلك على إدارة الفضائية ان تقوم بسحب هذه الفقرة أو الإستعانة بمن يستطيع ان يقول ل(الأعور انت أعور) .. * سيحة ورضا شايفين (الأعور) لكن ما قادرين يقولو ليهو انت أعور .. * وإذا كان لابد من إقتراح فنحن نقترح ان تكون فقرة الإمبراطور خاصة بتحليل (لقطات) مباريات المريخ فقط .. * الفقرة بتاعت سيحة دي ممكن تكون متخصصة في مباريات المريخ .. * إحنا عافين ليكم .. بس ما تجيبو سيرة الهلال .. * إذا اراد الإتحاد العام ان يقنع المريخ بالسفر إلي السعودية لمواجهة الهلال في مباراة السوبر عليه ان يسلك دربين لا ثالث لهما .. * الدرب الأول .. مخاطبة السلطات السعودية بعدم السماح للأخوة من ساحل العاج بالدخول لاراضيها .. * والدرب التاني .. ان تخاطب السلطات السعودية الإتحاد العام بانها لن تسمح بدخول العاجيين إلي اراضيها .. * وفي الحالة دي مؤكد شيخ موكورو لن يستطيع السفر مع الهلال .. * والمريخ إذا وجد ضمانات تؤكد له عدم سفر شيخ موكورو مع الهلال سيذهب للسعودية طمعا في القروش التي أعلنت عنها اللجنة المنظمة للمباراة .. * الناس ديل عشان خاطر القروش دايرين يمشوا لكن خوفهم من الهلال مانعهم .. * ولذلك طول ما شيخ موكورو قاعد المريخ ما بمشي حتى ولو عرضو له مال قارون .. * والله صحي .. * بالأمس دشن طارق العشري مشواره مع الهلال .. * والعشري بخلاف فكره التدريبي فهو رجل شديد الإحترام وصاحب أخلاق عالية .. * والأهم من ده كلو (كيسو ما فاضي) .. * العشري ده لو فشل يبقى علي الكاردينال ان يراجع (الأكياس الفاضية) ولكن نحن نشهد بان العشري (كيسو ما فاضي) .. * العشري لو فشل يبقى أكياسنا إحنا الفاضية .. * أكياس لعيبتنا .. * ولكن بأذن الله سيضع العشري بصمة واضحة في الهلال .. * أحس بان العشري سيحقق مع الهلال ما لم يتحقق من قبل .. * بس قولوا (ياااااارب) .. * هروب أكرم الهادي سليم حارس أهلي الخرطوم من مواجهة المريخ يشبه الكرت الاحمر الذي منحه الحكم لأهم لاعب بصفوف فريق الأمل قبل مواجهة المريخ .. * أكرم قبل مواجهة المريخ هرب .. * والحكم في عطبرة طرد أهم لاعب في الأمل قبل مواجهة المريخ .. * والحالتين ديل القاسم المشترك بينهما هو (المريخ) .. * وانا ما بفسر وانت ما تقصر .. * فوز النسور أمس على هلال الأبيض باستاد عروس الرمال هو (جنون كورة) .. * وتسجيل علي جعفر هدفا في شباك الأهلي هو (عباطة كورة) .. * في الأبيض مارست الكرة (جنونها) فخسر هلال التبلدي .. * وفي أم درمان مارست الكرة (عباطتها) فسجل علي جعفر هدفا .. * ولكن .. عباطة الكرة هى مثل (بيضة الديك) بتجي مرة في العمر يا علي جعفر .. * علي جعفر الذي كان سببا في (90%) من أحزان المريخاب ، سجل امس الاول هدفا وساهم في اسعاد الحناطير .. * لكن أقول ليكم حاجة .. * والله العظيم القون الجابو علي جعفر ح يندمكم عليهو .. * والله صحي .. * ح تندموا لما يجيب ليكم كارثة (ضقلها يكركب) .. * أصلو زي علي جعفر ده ما بجيب إلا حاجة (ضقلها بكركب) .. * وإنتو في وإحنا في .. * وبأذن الله انا بذكركم بكارثة علي جعفر القادمة .. * كارثة تنسيكم قونو في الاهلي .. * علي جعفر ده لو بنستر إن شاء الله أنا ألحس مكوة .. * مكوة ب(الغاء) .. * أطهر الطاهر قال ان هدفه هو هدية لوالده .. * وشيخ موكورو قال ان هدفه هدية لاسرته .. * وكلام اطهر وكلام موكورو يؤكد ان (رضا الوالدين) مفتاح نجاح وجواز مرور .. * ده لو تراوري كان بيقول ليك : (انا بهدي الهدف ده لصاحبتي الإتعرفت عليها في مالي) .. * لكن نجوم الهلال فاهمين وواعين .. * والله يا جماعة ناس الهلال ديل دائما مميزين كده وفاهمين وراقين وعميقين .. * بتحس إنو الهلالابي دائما عميق .. * والكلام ده أنا ما بقولو عشان انا هلالابي .. لكن دي شهادة حق .. * وحتى لو كنت مريخابي (لا قدر الله) وإن شاء الله (نبرا ونستبرا) برضو كنت بقول نفس الكلام ده .. * عشان كده اي هلالابي عليه ان يفخر بأنه هلالابيا .. * والله صحي .. * الهلال (نعمة) مثل الماء والهوا .. * وما دون الهلال (نقمة) مثل (اللقيمات) و(العدس) .. * غايتو جنس غايتو ؟؟ * تتويج (صغار السودان) في قطر بقدر ما اسعدنا فهو قد احزننا .. * هؤلاء الصغار فضحوا (كبار السودان) الذين أدمنوا الفشل في كل المحافل بقيادة كبيرهم الذي علمهم (التلاتات) مازدا .. * ولن نقول يجب الإهتمام بهؤلاء الصغار لان المميز فيهم سيحصل علي الجنسية القطرية والذي يفشل سيلعب للهلال او المريخ .. * الأفراح في السودان (ضل ضحى) يا حبيب .. * لانها تأتي من غير دراسة وبلا فهم .. * عموما .. مليون مبروك لصغار الجديان وربنا يوفقهم محل ما يقبلوا .. * نرجع ونقول .. * (ركلة الجزاء) في مباريات المريخ أصبحت (ثابتة) مثل (الليمون) في كيس السلطة .. * مع السلطة بيدوك (ليمونة) وشطة خضرا .. * والمريخ مع المباراة بيدوهو (ركلة جزاء) عشان تفتح نفسه للأداء .. * انا عندي سؤال .. * وسؤال لوجه الله .. * إحنا بتاع السلطة بنديهو (قروش) مقابل السلطة ب(ليمونتها) .. * السؤال هو : ناس المريخ لما يدوهم (ليمونة) مع المباراة .. أقصد (ركلة جزاء) هم بيدفعوا شنو مقابل الليمونة دي ؟؟ * ده سؤالي .. * واي زول طبعا حر في (سؤالاتو) .. * في اسئلة كده صعبة وما عندها إجابات .. * هسه لو سألت ليك مريخابي قلت ليهو : (انت ليه بقيت مريخابي) ؟؟ ما ح يعرف يرد .. * لو بالغ بيقول ليك : (عشان جبنا كاس من بره) .. * ما بتحس إنو المريخاب بشجعوا المريخ عشان هدف معين او احساس معين .. * اللهم بس هم ما بيحبوا الهلال .. * ما بيحبوا الهلال بقوا مريخاب .. * دي كل القصة .. * والله صحي .. * و..و.. * وليك أسبوعين ما جيتنا مالك يازول ....(في سجن كوبر ولا شنو) ؟
