* في محاكم الأحوال الشخصية بالسودان ثبتت (قضية طلاق) سببها (صباع معجون) .. * رجل طلق زوجته لأنها ب(تعصر صباع المعجون من النص) .. * والله صحي .. * وشكل (الصباع المعصور من النص) يشبه تماماً مريخ هذه الأيام .. * لو ما شفت (صباع معجون معصور من النص) شوف المريخ ، ولو كمان ما شفت المريخ حاول شوف ليك (صباع معجون معصور من النص) .. * وأنا ما بفسر وأنت ما تقصر .. * احترام الرابطة كوستي سيكون هو مدخل الانتصار .. * والهلال في بعض الأحيان يقلل من الخصوم فيفشل في الوصول .. * الرابطة فريق محترم وعلى الهلال أن يحترمه ويجزل العطاء حتى يعود سالماً غانماً بإذن الله .. * غياب بشه الكبير خسارة كبيرة ولكن مشاركة بشه الصغير ممكن تكون مكسب أكبر .. * بعد ذهاب كافالي لن نقبل بمشاركة أقل من ثلاثة لاعبين شباب في كل تشكيلة .. * أي تشكيلة للهلال يجب أن يكون فيها ثلاثة أو أربعة من النجوم الشباب .. * وما شاء الله الهلال كلو شباب في شباب .. * مجلس الهلال هو مجلس شاب .. * والجهاز الفني بعد انضمام العشري أصبح كله شباب .. * والتيم أيضاً لابد أن يكون شباب مع وجود عناصر الخبرة التي لا غنى عنها دون شك .. * فريق بيشارك فيه أبو عاقلة والثعلب ووليد وأطهر وبشة الصغير لن يترك البطولة تذهب للمريخ حتى ولو كان (العربون) الأحمر بسبوسة وليس لقيمات .. * بمناسبة اللقيمات .. * المفروض لاعبو الأهلي الخرطوم يرتدون (الكمامات) في مباراتهم غداً أمام المريخ .. * والله صحي .. * أمام الأهلي فرصة ذهبية لتوصيل رسالة قوية لكل العالم .. * كل لاعب في الأهلي يجي ب(كماماتو) .. * على الأقل (الكمامات) دي ممكن تحميكم من (بونية) بكري المدينة .. * شخصياً لو كنت بلعب في الأهلي سأشارك غداً أمام المريخ ب(كمامة) واليحصل يحصل .. * بدل (الشينكارات) تعالوا لابسين (كمامات) .. * المهم !! * بسبب (البرمجة) الهلال سيعود من كوستي غداً وسيغادر الأثنين القادم إلى كوستي لمواجهة مريخها .. * والله دي زي حكاية زول تعمل ليهو مسكول يرجع ليك بمسكول .. * في ناس كده .. * الواحد تمسكل ليهو يرجع ليك بمسكول (نفس الحجم) .. * وعلى فكرة المسكولات ما بتتشابه .. * في فرق بين مسكول ومسكول .. * يعني مسكول جاي من بت سمحة ما بيكون زي المسكول الجاي من البت الشينة .. * والمسكول البيجيك من البت بتاعت (البيع بالأقساط) ما زي المسكول البيجيك من البت الماسكة نتيجة المعاينات .. * والمسكول البيجيك من الكاردينال ما زي المسكول البيجيك من الأراقوز .. * هو يعني الكاردينال بمسكل ؟ * غايتو جنس غايتو !! * مرات في حافلة المواصلات أكتر زول نصيح بيكون (مجنون) .. * أنصح زول مجنون .. * وفي المريخ أحسن زول (نعسان) .. * أكتر زول (صاحي) في المريخ (نعسان) .. * والله صحي .. * الكاردينال في آخر تصريح قال : (من أجل مصلحة الهلال ممكن كل دقيقة نشيل مدرب) .. * بالغت عديل .. ده مدرب ولا نغمة يا كردنة ؟ * لو ضغطت (نجمة) ما ممكن تشيل في كل دقيقة (نغمة) .. * المهم في الموضوع إنو طارق العشري يلبس (الكسكتة) قبل ما يباشر مهامه عشان ما يلحق كافالي اللحق أمات طه .. * أنا لو ما شفت العشري لابس الكسكتة بصراحة قلبي ما برتاح .. * الكسكتة تعني حصانة ضد الإقالة .. * مش بيقولوا ليك : (التطعيم ضد الشلل) !! * نفس الشيء .. (الكسكتة ضد الإقالة) .. * وعلى فكرة هيثم مصطفى زاتو ما لبس الكسكتة .. * هيثم لو داير يستمر عليه أن يلبس (الكسكتة) بأثر رجعي .. * قام المريخ بتعيين محمد موسى مديرًا للكرة .. * وهذا خطأ كبير .. * المريخ كان يجيب خالد جوليت أو صلاح الضي أو محمد حمدان لدائرة الكرة .. * وذلك لأن نجوم المريخ حالياً هم : (بكري المدينة ، عمر بخيت ، المعز محجوب ، عبده جابر ، تراوري وعلاء يوسف) .. * هذه تشكيلة كانت تلعب للهلال وهي تستحق أن يقودها في دائرة الكرة لاعباً هلالياً وليس لاعباً وصيفابياً .. * والله العظيم يا جماعة أنا في حاجة لحدي الأن لما اتذكرها بضحك .. * حتى لو نايم بضحك .. * قول لي شنو ؟ * المريخ لما سافر الكنغو لمقابلة مازيمبي في المربع الذهبي ساق معاهو (10) بودي قاردات و(4) طباخين و(3) فنيين بتوعين فحص هواء المكيف .. * هسه الكلام ده لو قالوا لزول مجنون بيصدقو ؟ * بالذمة في زول عاقل بيصدق إنو الكلام ده حصل من فريق سوداني ؟ * ياخي والله هيفاء وهبي لو مشت الكنغو ما بتسوق معاها (10) بودي قاردات .. * وبعد ده ياريت لو جابو نتيجة .. * ساماتا خلى ليك الطباخين في حتة والبودي قاردات في حتة .. * الحاجة دي أنا ما قادر أنساها وبفتكر إنها من طرائف ونوادر كرة القدم في العالم ومن بنات أفكار (عزو) الشهير بجمال الوالي .. * بفتكر كده .. * وأي زول طبعاً حر في (إفتكاراتو) .. * المهم .. * نرجع ونقول .. * ساماتا بتاع أفريقيا في هذا العام هو شيخ موكورو .. * موكورو هو ساماتا الجديد .. * وموكورو ما شاء الله زي (الديليفري) بصلك في محلك وبديك الدايرو وبتخارج .. * عشان كده إحنا مصرين إصرار كبير على مباراة السوبر .. * عايزين نشوف موكورو في أول طلعة خارجية قبل انطلاقة الأبطال .. * دي أمنيتنا .. نشوف موكورو في السعودية .. * وعليكم الله ما تحرمونا من تحقيق الأمنية دي .. * عليكم الله .. * أرح معانا السعودية .. * وبنتنازل ليكم من (نثريتنا) .. * مش قالوا في حالة السوبر يكون في السعودية هنالك هدية (عُمرة) لكل اللاعبين ؟ * طيب جداً .. * إحنا عندنا لاعبين (غير مسلمين) بنتبرع ليكم بفرصهم في (العُمرة) .. * علييييكم الله أرح السعودية .. * بالمناسبة .. * لو ما مشيتو معانا السعودية بنقابلكم هنا برضو .. * يعني سيك سيك معلق فيك .. * خليكم مع (كماماتكم) دي إن شاء الله تضوي ليكم .. * الكمامات دي ممكن تحجب عنكم ريحة المطار .. * والله صحي .. * إنتو ناس بتشمو ريحة المطار عشان كده الكمامات دي ممكن تشوش ليكم الشم .. * الكمامات دي خلوها لينا إحنا لأننا متضررين من ريحة اللقيمات .. * أول مرة في حياتي أشوف لي (نافخ كير) بضايق من (ريحة كيرو) .. * و... و(كيرو وعين الله ترعاكم) .. * و..و.. * وليه تشيل في قلبك والدنيا مليانة أكياس ؟
