بالعربي الكسيح محمد الطيب الأمين البيتو من لقيمات ما بغطي نخرتو ب(الكمامات) !! * البرلمان أجاز (فاتورة الموية) .. * وفاتورة الموية أصلا مربوطة بفاتورة الكهربا .. * والموية عندنا قاطعة ولما تجي بتجي (وسخانة) .. * ولذلك إحنا وأولاد حلتنا بنقترح لناس الهيئة ولناس البرلمان إنو تكون في موية نضيفة عشان نغسل بيها الموية الوسخانة قبل الشراب .. * في مرات كتيرة إحنا بنجيب (موية صحة) بنغسل بيها (موية الماسورة) .. * حصل قابلتك موية بغسلوها بعد داك بشربوها ؟؟ * عندنا إحنا عااااادي بنغسلها .. * المهم .. * بعد زيادة الفاتورة كل ثلاث لاعبين بالمريخ سيتشاركون (قارورة واحدة) .. * اما نجيلة استاد المريخ فستكون مجبورة علي إنتظار الخريف زيها وزي اي نجيلة (حبيبي مفلس) .. * والله صحي .. * في كوستي ظهرت بركات (شيخ) موكورو .. * وظهر الهلال بشكل رائع أكد به ان العافية درجات .. * يمضي الهلال من مباراة لاخرى متصاعدا ولولا بعض الهنات لقلنا ان الهلال دخل الشبكة تماما .. * وحتما إعتبارا من المباراة القادمة سيدخل الهلال الشبكة ومن بعد ذلك ما فيش (يمة أرحميني) .. * القابلنا في الأسابيع الماضية بختو والبيقابلنا في الأسابيع القادمة يا ويلو وسهر ليلو .. * المريخ وصل لقناعة بأن مدربه البلجيكي (كيسو فاضي) .. * والمريخ ممكن يصبر علي (الكيس الفاضي) لانو خزنة النادي تشبه (كيس المدرب) .. * الناس ديل ما عندهم (حق الشرط الجزائي) عشان كده بيشوفوا كيس المدرب الفاضي مليان .. * أصعب حاجة في الدنيا دي إنك تكون مقتنع إنو الزول ده ما بينفع معاك ومع ذلك تخليهو مستمر (غصبا عنك) .. * ودي زي لما زول يكون متزوج ليهو مرا مرطبة وكل ما يقول يطلقها يتذكر قروشها ويرجع يخليها .. * والله صحي .. * المريخ وصل لقناعة إنو يشيل المدرب لكن لما يتذكر قروشو بخليهو .. * غايتو جنس غايتو ؟؟ * نيلسون محتاج (يخفف وزنو) ، وولاء الدين محتاج يشارك باستمرا ر ، وشيخ موركورو محتاج يشيل دهان (فكس في جيبو) عشان يوزعو لمدافعين الخصم .. * نقترح لشركة (سوداني) ان تقدم جائزة نجومية المباراة (كرتونة فكس) لان ما يفعله موكورو بالخصوم يحتاج لمساج عقب كل لقاء .. * والله صحي .. * أنا والله كل ما أشوف موكورو جاري بالكرة بتخيل قدامو علي جعفر .. * موكورو وقدامو علي جعفر ممكن تكون أحلي لقطة في الدوري .. * مش إعلام المريخ قال إنو هدف اوكرا أحلى هدف ؟؟ * طيب أوكي .. * علي جعفر قدام موكورو بيكون زي (صلاح ولي) قدام محمود عبد العزيز .. * بمناسبة صلاح ولي .. * والله يا جماعة انا أمبارح كنت خايف مبارك سلمان يشرك صلاح الجزولي أمام الرابطة .. * كنت خايف صلاح الجزولي يشارك وتاني يوم طارق العشري (يكبرها) .. * ود الجزولي لو شارك في مباراة الأمس كان العشري غادر بدون اذن .. * لكن الحمدلله مبارك سلمان طلع ذكي .. * وإحنا ما ضد الجزولي بل دعمناهو علي قدر المستطاع ولكن الرجل لم يكن عند حسن ظننا .. * الجزولي مجتهد علي قدر إمكانيته ومؤكد ان الجود بالموجود .. * أكثر من عام وصلاح الجزولي (يمد كورتو قدر موهبتو) والقناعة عندي ان موهبته لا تؤهله للاستمرار اكثر من ذلك في الهلال .. * وشهر خمسة باقي ليهو شهرين ونص ولا اظن ان الحبيب الجزولي سيقنعنا في هذه ال(75) يوما .. * المهم .. * أول ضربة جزاء محتسبة لصالح المريخ في أقرب مباراة سيحاولون تقليد (ميسي) الذي مرر الركلة في مباراة البرسا الأخيرة .. * المريخ الذي يعيش علي تقليد الاخرين لو حاول ان يقلد هذه اللعبة قطع شك الحكم سيعيد الركلة (22) مرة دون فائدة .. * اوعى تقلدو الحركة دي عشان ما يضحكوا فيكم .. * أصلو إحنا كده كده السنة دي بسببكم يا متنا من الضحك ويا كمان الضحك كتلنا .. * نرجع ونقول .. * أقل لاعب بيدخل كشف الهلال من حيث الإمكانيات بعد إكتمال (الجوهرة الزرقاء) سيكون مثل ساماتا وشلباية .. * إحنا ما بنقبل بلاعب أقل من شلباية يا الكاردينال .. * الجوهرة دي محتاجة للاعبين يذكرونا (سبعة الوحدات الإردني) .. * أردني ب(الفاء) .. * من حكمة الله ان جعل لكل مرض (أعراض) .. * اي مرض في الدنيا دي عندو أعراض .. * والأعراض ما عند المرض بس .. * في حاجات كتيرة عندها أعراض .. * عندك زي المريخ مثلا .. * لو جيت ماري (جمب) اي استاد وسمعت الحكم بيصفر علي رأس كلو دقيقة طوالي تعرف إنو المباراة دي طرفها المريخ .. * صفافير الحكم الكتيرة عندها علاقة بالمريخ .. * لانو الحكم بيصفر كتير (حماية للمريخ) و(ظلما للخصم) .. * والله صحي .. * والليلة المريخ لاعب أمام الاهلي وشوف براك الحكم ح يصفر كم مرة ؟؟ * وتعال شوف اي مباراة للهلال الحكم بيصفر كم مرة .. * بتلقي الفرق كبير .. * المهم .. * المرض قبل ما يجيك بيعمل ليك مجموعة من (المسكولات) .. * في ناس من خلال تكرار الأمراض بيعرفوا (مسكول المرض) قبل ما يجي .. * مثلا .. أصبحت الصباح عندك (صداع خفيف) معناها (نزلة) مرتقبة .. * وجع مفاصل معناها (ملاريا) موعودة .. * خليك من المرض .. * الصراف الألي لما يكون فيهو قروش كتيرة بتجيك (الخمسينات) طالعة .. * ولما تكون القروش في (بطن) الصراف بسيطة بتجيك (العشرات) .. * والله يا جماعة الصراف الألي ده فيهو حلاة صوت .. * عجييييييب .. * احلى صوت ممكن تسمعو في حياتك هو صوت الصراف الألي لما يكون بيحسب .. * انا اللحظة دي عندي أجمل من اللحظة البشوف فيها الكرة داخلة شبكة المريخ .. * والله صحي .. * اصلو إحنا في الدنيا دي بنحب (7) اصوات (5) هي : صوت الزول لما يقول ليك المريخ مغلوب وصوت الزول لما يقول ليك (هاك) وصوت الصراف الألي .. * ما علينا .. * أعراض المريخ حاليا هي : (فلس في الجيب) و(كمامة في الانف) و(لقيمات في حي الصفا) .. * بديهيا (الكمامة واللقيمات) ما بتلاقو .. * انت بتاع لقيمات المفروض ما تكون بتاع كمامة .. * الحاجة دي معروفة .. * وما دايرة درس عصر .. * والليلة جمهور المريخ لو لبس الكمامات إحنا بنجدعو باللقيمات .. * والبيتو من (لقيمات) بغطي نخرتو ب(الكمامات) .. * والله صحي .. * غايتو أنا في حياتي ما شفت قوة عين زي قوة عين الحناطير ديل .. * ديل عيونهم أقوى من عين حرامي المسجد .. * حرامي ب(الثاء) .. * و..و.. * ومن أجل تحقيق الوصول بركب ….(هايس) ..