* الحق حق .. * لكن مرات عشان تاخد حقك إلا (تحنس) .. * في مؤسسات ما بيدوك مرتبك الشهري إلا بعد تقول ليهم (أمي عيانة) .. * والله صحي .. * تكضب تقول : (أمي عيانة) عشان يمرقوا ليك مرتبك أو جزء من مرتبك .. * وأظن ان الحال في المريخ حاليا قد وصل لهذه المرحلة .. * في المريخ ما بتاخد مرتبك بأخوي وأخوك .. * عشان كده يوم الخميس لما المريخ صرف المرتبات للاعبين السودان كلو عرف إنو ناس المريخ صرفوا .. * حتى الناس الما عندهم علاقة بكرة القدم عرفوا إنو لعيبة المريخ صرفوا المرتبات .. * موضوع مرتبات المريخ إنتشر أكتر من شائعة (أبو القنفد) .. * غايتو جنس غايتو ؟؟ * كالعادة .. رضا وسيحة ما إتمكنو من عرض كل الحالات لان الزمن داهمهم .. * والله نفسي مرة رضا ده يداهم الزمن .. * كل جمعة الزمن هو البيداهم رضا .. * المرة دي قال إنو إنجار صغار السودان اخد كل مساحة البرنامج .. * قال بطولة (جيم) شالت الزمن كلو .. * والجمعة الجاية بطولة (قاف) برضو ح تشيل الزمن كلو .. * سيحة لم يكتف باثبات (ركلة جزاء) تراوري (الغير صحيحة) بل ذهب ابعد من ذلك وإحتسب ركلة جزاء جديدة لصالح مصعب عمر .. * فعلا امبراطور .. * السعودية عند كاريكا أقرب من الكلاكلة .. * ولذلك كاريكا بمشي السعودية في الشهر اكتر من مرة .. * نرجو ان يتوقف كاريكا من سفرياته هذه لان دوري الابطال على الابواب .. * بمناسبة الأبواب دي .. * ويييييين بلة جابر .. * بلة جابر الشهير ب(البوفية) لو حضر زمن الفلس ده كان شال النعسان باعو وإتصرف بقروش .. * أنا عندي معلومات من مصادر مطلعة بتقول إنو مرتبات تراوري وجمال سالم وجابسون ما قاعدة تتأخر ولا يوم .. * ولو المعلومات دي صحيحة أنا بيهمني اسمع رأي علاء يوسف وبكري المدينة .. * اسوأ حاجة في الدنيا دي إنو يكون (العرق مشترك) والمرتبات فيها (فقوس وخيار) .. * عرقكم واحد يا بكري المدينة ليه المرتبات فيها فقوس وخيار ؟؟ * نفس المباريات البيلعبها تراوري بيلعبها بكري ونفس العرق البينزل من جابسون بينزل من عنكبة .. طيب ليه المرتبات فيها فقوس وخيار .. * ما قلنا المرتبات تكون موحدة من حيث (القيمة والكم) لكن كمان من العدل مفروض تكون موحدة من حيث (زمن الصرف) .. * ولا ما كده يا رمضان عجب ؟؟ * ما علينا .. * يصرفوا ولا ما يصرفوا ما بيهمنا .. * المهم .. * مباراتنا أمام الأهلي الليبي في فاتحة مشاركتنا الأفريقية يجب ألا تكون ورقة ضغط على طارق العشري .. * يعني ما عشان طارق العشري كان مدرب في ليبيا يبقى كسر رقبة يكشف لينا أوراق الأهلي .. * القصة ما كده .. * زي ما الهلال كل سنة بتغير وبتدخل عناصر جديدة الاهلي الليبي بتغير .. * صحيح طارق العشري ممكن يلعب على عيوب الكرة الليبية التى بالضرورة يعرفها جيدا .. * ولكن في كل الأحوال يجب ألا ينوم الهلال على عسل إنو العشري عارف الكرة الليبية .. * كونو عارف دي ما كفاية .. * كرة القدم (90) دقيقة على النجيلة تجب ما قبلها .. * عموما .. لو العشري عارف الكرة الليبية ولا ما عارف لاخوف على الهلال بإذن الله .. * عندما علم محترف المريخ اوكرا بانه غير مشارك في مباراة الاهلي الأخيرة رفض القيام بعملية الإحماء مع زملائه .. * رفض (رجااااااله كده) .. * ومش رفض وبس .. * ده رفض وغادر الاستاد قبل نهاية المباراة .. * غادر (رجاااااااله كده) .. * وأنا بقول (رجاااااااله) لاني عارف ما في زول بقدر يسأل اوكرا حتى ولو اوكرا غادر إلي وطنه في اجازة مفتوحة .. * في المريخ ممكن (تهف ليك) تسافر شهر شهرين وتجي راجع عادي .. * زي أخونا تراوري .. * تراوري سنة ونص حايم ما بين دبي والدوحة ومالي ولما (فلس) رجع المريخ وشارك من اول مباراة .. * والله صحي .. * تراوري كان حايم في دبي مع (خطيبتو) ولما القروش انتهت قال احسن يرجع لجمال الوالى الشهير ب(عزو) .. * ولما رجع ما لقى (عزو) لكن لقى اسامة ونسي وفي النهاية ونسي بشيل من (عزو) .. * وهسه تراوري يومين تلاتة تااااني بيسافر دبي .. * تراوري يسافر علي كيفو .. * والحضري يقول رئيس المريخ ما كان بيحلم يسلم علي في يدي .. * عادي .. * الناس ديل ما حاسبين المريخ فريق عشان كده بتعاملوا بالطريقة دي .. * المريخ الذي اعاد تسجيل فييرا (هوادة) مع البرنس برغم قصة البصمة .. لن يستطيع محاسبة اوكرا .. * الأندية البتحاسب معرووووفة يا مولانا .. * وعلي فكرة .. * الحاجة دي زي (الزواج) .. قسمة ونصيب .. * كونو تكون فريق عندك شخصية .. دي قسمة ونصيب .. * وإنتو قسمتكم كده .. * الله ما قسم ليكم الشخصية .. * والله صحي .. * المهم .. * خريج الإسعافات الأولية لما يمشي قرية ما فيها طبيب بربط (مكنة) مأمون حميدة .. * والله صحي .. * تلقاهو ما بفرز (الحُقنة) من (الحبة) ومع ذلك بيعمل ليك فيها مأمون حميدة .. * ووفق هذه النظرية فإن مشاطيب الهلال الآن (قابضين الجو) مع أنديتهم .. * خليفة في اهلي الخرطوم عامل فيها مأمون حميدة .. * وصدام الدروشاب في اهلي شندي عامل فيها مأمون حميدة .. * وعمر بخيت في المريخ عامل فيها مأمون حميدة .. * وأحمد الفاضل في هلال كادوقلي عامل فيها مأمون حميدة .. * وأحمد عادل في هلال الفاشر .... مأمون حميدة .. * والطاهر حماد في الأمير مأمون حميدة .. * والتاج ابراهيم في هلال الأبيض مأمون حميدة .. * وده كلو يا جماعة بيأكد عظمة الهلال وبيثبت إنو مشاطيب الهلال هم نجوم في الفرق التانية .. * هذا يبرهن عظمة الهلال ويقلل شأن المريخ تحديدا .. * طبعا أنا ما جبت سيرة مهند الطاهر لانو مهند طلع من الهلال وهو مأمون حميدة وحاليا في هلال الابيض مأمون حميدة ولو رجع الهلال مأمون حميدة ولو إعتزل برضو مأمون حميدة .. * وحبنا لمهند الطاهر لن يقطع لان مهند بيشبه الهلال والهلال بيشبه مهند .. * ومهند باذن الله طال الزمن ولا قصر بيجي يختم حياتو في الهلال .. * قلت لي يا رضا بطولة (جيم) مالها ؟؟ * اخدت زمن البرنامج كلو ؟؟ * كلامك ده يا رضا قولو لزول ما عندو خالو شغال في التلفزيون .. * شوف ليك زول ما عندو (جيب خلفي) وقول ليهو الكلام ده .. * لكن إحنا (اولاد تسعة) ودافننو سوا .. * قال بطولة (جيم) قال ؟؟ * جيم ب(الهاء) .. * و ..و.. * والكنت قايلو فات زمان ...(تااااااني رجع يمسكل) !!
