* الغزارة في اي إنتاج لما يقابلها سوء في التوزيع بيكون في (خلل) .. * يعني مثلا عندك المريخ ده .. * المريخ (بيزرع) زراعة تشبه زراعة الاهلي المصري والترجي التونسي لكن لما يجي يحصد حصادو بيكون زي حصاد كمبالا سيتي والوحدات الأردني .. * القروش البيدفعها المريخ في التسجيلات أكثر من القروش البيدفعها الأهلي المصري ومع ذلك الأهلي عندو حصاد وفير والمريخ (وصيف ساكت) .. * ناس المريخ عندهم (رأس المال) لكن كمان (التربة) غير صالحة .. * والله صحي .. * عندهم مشكلة في التربة .. * عشان كده عودة جمال الوالي بالنسبة لينا ما بتعني حاجة .. * القصة ما قصة رئيس عندو قروش .. * (الوهمة) كلها في التربة .. * المهم .. * شح الإنتاج لو قابلو توزيع جيد برضو بيكون في (خلل) .. * يعني لابد ان تكون غزارة الإنتاج مطابقة للتوزيع الجيد .. * وبالأمس الهلال كان : (غزارة في الإنتاج ودقة في التوزيع) .. * حقق الهلال الفوز علي الأمير برقم كبير لا يدل علي ضعف الأمير بقدر ما يؤكد ان الهلال وضع قدمه في الدرب الصحيح .. * نعم الأمير لم يبادل الهلال الندية ولم يكن جيدا ولكن هذه ليس مشكلة الهلال .. * كونو الأمير (ينبرش) دي حاجة بترجع للأمير .. * الهلال ما عندو دخل إذا الأمير ضعيف أو غير جاهز .. * ولابد ان نذكر الناس .. الأمير هذا خسر أمام المريخ بفارق هدف وحيد في مباراة كانت فيها (رائحة اللقيمات) أقوي من رائحة (الديتول في مستشفى الولادة) .. * بمناسبة اللقيمات .. * جمهور المريخ براهو خجل من حكاية (الكمامات) .. * خلو الكمامات براهم .. * وأنا حقيقة لابد ان استغل هذه المناسبة واشيد بجمهور المريخ الذي ترك الكمامات بعد إقتنع بأن (مصدر الريحة) في العرضة جنوب .. * جمهور المريخ عِرف إنو (الدابي سِمو ما بكتلو) عشان كده تركوا الكمامات .. * يا جماعة في زول بضايق من ريحتو ؟؟ * في ؟؟ * ما في صاح ؟؟ * يبقي لابد ان نشيد بجمهور المريخ (الواعي) بعد ان ترك الكمامات وتصالح مع (ريحتو) .. * كونك تحب (ريحتك) ده مستوي متقدم في إتجاه التصالح مع النفس .. * والله صحي .. * نرجع ونقول .. * (القلب) بيقول إنو النتيجة التي حققها الهلال بالأمس ليس في صالح الهلال أفريقيا .. * يعني نتيجة جات في وكت ما كويس .. * جمهور الهلال بيخاف من النتائج المحلية الباهرة التى تسبق المباريات الافريقية .. * واعتقد ان هذا الخوف له اسبابه المنطقية .. * ومن اسبابه ان الهلال عودنا ان يتراخى بعد كل نصر كبير .. * صحيح إحنا كنا محتاجين نطمئن علي الهلال أمام الأمير لكن كمان ما للدرجة دى .. * كده بدل نطمئن (نمنا علي العسل عديل يا موكورو) .. * علي فكرة .. * الهدف السجلو مكورو ده إسمو : (نعيب زماننا والعيب فينا وما لزماننا عيب سوانا) .. * والله صحي .. * موكورو من شدة (البخل) كل تلاتة مباريات بيطلع لينا (حركة جديدة) .. * الزول ده بيقسم في (حركاتو) زي مرتب (راجل الاربعة نسوان) .. * بمناسبة المرتب .. * ناس المريخ أول مرة الشهر ده يصرفوا مرتباتهم (أول الشهر) ومع ذلك تعادلوا امام النسور .. * الجماعة ديل لما يلقوا القروش بينسوا الهم .. * لما يلقوا القروش بينسوا الكورة وبيحسموا المباريات من (المقصورة) .. * ومباراة النسور هي وصمة عار جديدة في جبين (الإصيفر) .. * أفتكر إنو لقب (الإصيفر) ده أحسن ليكم من لقب (نجمة المسالمة) .. * أفتكر كده .. * واي زول طبعا حر في (إفتكاراتو) .. * واللقب ده كويس معاكم والله .. * وان شاء الله إحنا سنمد المعلق سوار الدهب بهذا اللقب حتى يذيعه في مباراتكم الافريقية القادمة .. * الهلال مشهور ب(سيد البلد) .. * والمريخ مشهور ب(الإصيفر) .. * الإصيفر أمام النسور أدوهو ضربة جزاء وطردو ليهو لاعب .. * يعني الحكم وفر ليهم كل أسباب التفوق ومع ذلك فشلوا .. * عشان كده أنا قبيييييل قلت ليكم مشكلة الإصيفر في (التربة) .. * كده خليكم من الإصيفر .. نرجع لسيد البلد .. * نجوم الهلال مطالبين بأن يعلموا ان الأمير لن يواجههم في تونس .. * ونحن من جانبنا لا نقبل خسارة الهلال في تونس .. * كل المطلوب ان يؤكد لنا الهلال ان ما تحقق بالامس لا يعني ضعف الأمير بقدر ما يعني ان الهلال إنطلق فعلا .. * طبعا أجمل حاجة في الموضوع إنو الأمير ده لعب مع المريخ .. * يعني إعلام المريخ ما بقدر يسخر من الأمير ولا بقدر يتغزل في الهلال .. * إعلام المريخ حالو بيكون زي حال الزول الداير (يعطس وما قادر) .. * والله صحي .. * لو عايزين يسخروا من الأمير .. ياهو الأمير الوقف معاهم (ألف أحمر) .. * حالتهم صعبة .. * المهم .. هنالك (4) حاجات رئيسية ظهرت من خلال مباراة الأمس .. * الحاجة الأولى : (سيسه ما بقعد كنبة اللهم إلا لو مصاب ، وبالمقابل أبوعاقلة في الإرتكاز إضافة للهلال) .. * وشكل الهلال كان مختلفا بالأمس لان التشكيلة خلت من التوليف .. * الحاجة التانية : (بشة هداف المنافسة ويجد دعما غير محدود من نجوم الهلال وهذه روح عظيمة فعلا) .. * حسينا بالأمس أن كل نجوم الهلال كانوا يخدمون بشة حتى يعتلي صدارة الهدافين .. * هذه الروح ستكون هي كلمة السر في الهلال .. * ولعل هذه الروح لم تقف عند تعامل اللاعبين مع بشة بل تجاوزته وبلغت حتى محمد عبد الرحمن الذي سجل هدفا كان محتاجا له كثيرا .. * محمد عبد الرحمن تضرر معنويا بسبب الاصابات المتلاحقة وتنفيذه لركلة الجزاء أمس قصد من خلاله نجوم الفريق (رفع معنوياته) وفتح شهيته للعودة بعد غيبة طويلة .. * وهذا (أدب) لا يوجد إلا في الهلال .. * الحاجة التالتة : (عودة الشغيل في هذا التوقيت إلي جانب إيجابية وليد الشعلة الذي اثبت انه أحق بالمشاركة اساسيا) .. * الحاجة الرابعة : (الفوز بهذا الرقم الكبير يعتبر ميزة وكسر للعادة لان الأرقام مهمة جدا حتى ولو كان الخصم ضعيفا ، والهلال وضع رقما كبيرا في شبكة الأمير .. * ثم ان بشة يعتبر هو اول لاعب يسجل (سوبر هاترك) هذا العام .. * بل اظن ان الدوري السوداني ثلاث سنوات للوراء ما فيهو زول سجل (سوبر هاترك) والله اعلم .. * يبقي ده رقم يحسب لصالح بشة .. * وانا والله حقيقة عايز أشيد إشادة خاصة بنجوم فريق الأمير .. * حقيقة الاولاد ديل عندهم اخلاق عالية جدا ، برغم الخسارة حافظوا علي الأخلاق وكانت (المباراة نضيفة) .. * وأخير جدا نقول .. الأمير خسر زي خسارة المريخ في الأردن زائد واحد .. * يعني يا وصيفاب إنتو والأمير في سرج واحد .. * نتيجة الهلال دي والله ذكرتني الوحدات الأردني .. * يخلق من الشبه أربعين .. الهلال بيشبه الوحدات الأردني والمريخ بيشبه الأمير .. * وبشة هو (شلباية الهلال) .. * شلباية ب(القا) .. * و..و.. * ويمة الحنينة الشوق ... غلب (8 – صفر) ..
