* في (الرأس) عادة (الشعر) بتساقط من حتة وفي الحتة التانية بيكون في شعر .. * أي (صلعة) بتبدأ من (حتات معينة) .. * ما في صلعة بتجي دفعة واحدة .. * في ناس الصلعة بتجيهم من ورا وفي ناس من قدام وفي ناس من نص الشعر .. * يتساقط الشعر من قدام بينما تجد (الجنبات) مليانة شعر .. * نفس (التساقط) ده حدث في إستاد المريخ .. * يوم مباراة منتخبنا وساحل الحاج إنهار جزء من سور إستاد المريخ الشرقي .. * والله صحي .. * وأمس الأول أثناء مباراة الهلال والأهلي انهار جزء من سور إستاد المريخ الشرقي .. * ويوم مباراة المريخ ووفاق سطيف سينهار المريخ أولاً ومن ثم سينهار السور الشرقي .. * وإحنا بصراحة انهيار المريخ ما بيهمنا بقدر ما بيهمنا انهيار السور .. * بيهمنا انهيار السور لسببين اتنين .. * السبب الأول : دايرين سلامة الجمهور .. * والسبب التاني : الإستاد ده هو إستاد الحكومة وإحنا عندنا فيهو (ربع رطل سكر) .. * الإستاد ده زي ما بيهم جمهور المريخ بيهمنا إحنا برضو .. * وأول أمبارح الهلال لعب في إستاد الحكومة .. * والهلال ما غريب على هذا الإستاد الذي نعتبره مثل (المدينة الرياضية) ومثل الملاعب التى دشنها أبوهريرة حسين في وقت سابق .. * يعني الحكومة لو قررت (تقسم إستاد المريخ ورثة) سيكون للهلال النصيب الأكبر في هذه (التركة) .. * والله صحي .. * المهم دعوتنا الآن للرجل الهلالابي والقطب الكبير أسامة ونسي أن يقوم بتصليح هذا السور حتى ينال أجر (صيانة الممتلكات العامة) .. * الممتلكات العامة هي مسؤولية جماعية .. * الطوب البيفضل من (الجوهرة) نرجو من الكاردينال تحويله لملعب إستاد الحكومة .. * ولا اعتقد أن الكاردينال سيبخل على (الممتلكات العامة) بماله .. * المهم .. * رفض جمال سالم الانضمام لبعثة المريخ بالقاهرة .. * جمال سالم كان بيقول ليهم : (أنا جاي بكره) .. * بيصبر فيهم .. * كلو ما يسألوا منو بيقول ليهم (جاي بكره) .. * وهو قصد يقول (بكره دي) عشان يحولوا ليهو قروشو .. * وصبر .. * وصبر .. * لكن هم ما انستروا .. * في النهاية قفل التلفون وعمل رايح .. * يتصلوا ... لا يمكن الوصول إليه .. * ولما قنعوا من الوصول إليه قام أبوجريشة عمل (حركة بحركتين) .. * أبوجريشة قال فيما معناها : (جمال سالم تاني ما بدقها) .. * جريشة قال ما بيحب سياسة لي الذراع .. * هو عليك الله المريخ فضل فيهو ذراع عشان جمال سالم يلوي ؟ * المريخ بقي ما عندو ذراع أصلاً .. * ذراعكم ده الحضري لواهو وكسرو مرة واحدة .. * الحضري الكان بيتمرن مع الفريق الصباح وبيسافر القاهرة عشان يشرب شاي المغرب مع زوجتو !! * الحضري القال إنو جمال الوالي ما كان بيحلم يسلم عليهو في يدو !! * الحضري السافر مصر زعلان وجا راجع في نفس يوم مباراتكم مع أهلي شندي ولقى العربة (الباردو) واقفة في المطار ومن المطار وإلى شندي ثم إلى الملعب مباشرة (أساسياً) .. * وبعد ده يجي أبو جريشة يقول ليك (لي ذراع) .. * هو وينو الذراع ؟ * حكاية الذراع والكرامة وعزة النفس دي نرجو من الأخوة في المريخ أن لا يتحدثوا عنها .. * ما تركزوا على الحاجات دي .. * الظريف في الموضوع قالوا إنو لعيبة المريخ (دخلوا واسطة) من أجل حل مشكلة جمال سالم وعودته للفريق .. * دخلوا واسطة !! * والوساطات بقت في (الطلاق والمشاكل الزوجية) ما جايبه حقها .. * الزول ده (واسطتو) دولار .. * عندكم دولار بيجيكم ما عندكم أحسن (تكثفوا التمارين للمعز محجوب) .. * وبصراحة أنا حكاية إنو لعيبة المريخ توسطوا لعودة جمال سالم ما عجبتني والله .. * ما عجبتني لأنو المعز مظلوم .. * وهروب جمال سالم هو فرصة كبيرة للمعز محجوب .. * وكان من المفترض لعيبة المريخ يقيفوا مع المعز بدلاً من التوسط لعودة سالم .. * اللهم إلا يكونوا ما مقتنعين بالمعز .. * إنتو عندكم رأي في المعز ولا حاجة ؟؟ * لو عندكم رأي قولوا والله .. * أقول ليكم حاجة .. * جمال سالم ولا المعز في النهاية المريخ طاير طاير .. * وطبعاً جمهور المريخ ماسك ليك في (حنك) لو طرنا بننزل الكونفدرالية .. * طيب السبب البطيركم من الأبطال مش برضو ممكن يطيركم من الكونفدرالية ؟ * أنا شايف المريخ لو حجز ليهو مقعدة في سيكافا من هسه أحسن .. * أنا شايف كده .. * وأي زول طبعاً حر في (شوفو) .. * ناس المريخ هسه بيفتشوا في الغريق ولما يطيروا بيجوا يلقوا المطفح فات .. * والله صحي .. * لا بتلموا في سيكافا ولا الأبطال ولا الكونفدرالية .. * باقي ليكم أربع مباريات ألعبوها بدون إزعاج .. * والحمدلله إنو (الكاف) ألزمكم بتلفزة المباريات .. * والكاف ما طلع القرار ده عبث .. * ناس (الكاف) عارفين أي حاجة .. * عارفين (مراكيب النمر) وعارفين (اللابتوبات) وعارفين (الجلاكسيات) .. * حتى (اللقيمات دي) ناس عيسى حياتو عارفنها .. * عشان كده أصدروا قراراً يقضي بتلفزة جميع المباريات .. * والتلفزة بتسهل للكاف معرفة الحكم (الضارب لقيمات) ومعرفة الحكم الإستلم (مركوب نمر) .. * (تحكيم مركوب النمر) ظاااااااااهر .. * وطالما (الكاف) جاب سيرة التلفزة يبقى أكيد بعد يومين بيجيب سيرة (المنشطات) .. * ما علينا .. * المهم .. * موضوع جمال سالم ده احسموا .. * ورسلوا ليهو قروشو .. * لأنو المريخ بدون جمال سالم ما بيسوى حاجة .. * إنتو ذاتكم بالغتوا والله .. * كيف تمشوا معكسر وحارسكم ما أخد قروشو ؟ * كان تشتغلوا بالأولويات والله .. * المعكسر ما أولوية ولا حاجة .. * لأنو أصلاً المريخ لو عسكر في الصين ح يجي يطير .. * كان من الأفضل تحلوا مشكلة جمال سالم وتنسوا المعسكر .. * في زول بعسكر و(فريقو في يوغندا) .. * هسه المريخ ك(اسم معسكر في مصر) والمريخ المتمثل في جمال سالم قاعد في يوغندا .. * جمال سالم هو المريخ والمريخ هو جمال سالم .. * يعني لو المريخ عمل معسكر لجمال سالم وحده هذا ربما يكفي .. * يكفي ب(الثاء) .. * سفركم مصر بدون جمال سالم زي العريس لما ينسى القسيمة ويمشي شهر العسل .. * غايتو جنس غايتو !! * و..و.. * وارجع تعال عود ليا ورجع حنانك ليا وخليني في جواك و....(اعرش على كده) ..