بالعربى الكسيح محمد الطيب قروشك دي يا الوالي بنشرب بيها (قهوة) في الديم!! * العروس الكبيرة في السن يوم الزفاف البنات بيشيلن حالها.. * يقولن ليك: (العروس شدة ما كبيرة لما وشها محفر).. * وطبعاً البنات البايرات لمن يمشن الصالة ويلقو العروس كبيرة ده بالنسبة ليهن موضوع.. * شهر كامل بتكلمن عن (سن العروس).. * والعجب لو العريس كان صغير..
* ده خلاص يكون المطلوب ذاتو.. * مرات الحب بيخليك ما تنظر لسن حبيبتك.. * لكن البورة عند البنات بتخليهن ينظرن لفارق السن.. * إحنا كان عندنا جيرانا في الحلة عندهم تسعة اولاد.. * التسعة أولاد ديل كلهم إتزوجو نسوان أكبر منهم بتلاتة سنوات على الأقل.. * واحد تلقاهو صغيرون يتزوج ليهو واحدة عمرها (36) سنة.. * زي جمال الوالي.. * أغرب حاجة في المريخ إنو جمال الوالي صغير في السن لكن بيحب يسجل كبار السن.. * الحاجة دي أنا ما عارفها صدفة ولا مرتبة.. * لاحظ الوالي (شاب) لكن كل تسجيلاته (شياب).. * انا لاحظت الوالى عندو غرام مع الحاجة دي.. * وامسكها ليكم واحدة واحدة.. * ريتشارد لعب للخرطوم (3) ما يقارب التلاتة سنوات.. * وجاء لعب للهلال سبعة سنوات.. * ولعب للاسماعيلي سنة.. * وريتشارد لما خلاص عمرو وصل ال(36) جمال الوالى دخلو غرفة تسجيلات المريخ.. * وبالفعل سجلو.. * نفس الشئ مجاهد القدال.. * مجاهد لعب معانا لما شطبناهو وبعد ما عمرو وصل ال(35) جمال الوالى دخلو غرفة تسجيلات المريخ.. * عندك طمبل.. * طمبل لما خلاص فترة صلاحيتو باقى ليها تلاتة سنين الوالى فاوضو وسجلو.. * الحضري بعد ما تجاوز الاربعين الوالى جابو.. * هيثم مصطفى الذي يحبو بلهفة نحو الاربعين الوالي سجلو.. * فييرا لعب للمريخ زماااان وجانا في الهلال شاب وبعد ما بقى كبير الوالى سجلو.. * النفطي ، النفطي ده لف الدول العربية (زي الكاردينال) من طيارة لطيارة وبعد ما الفيهو كملت الوالى سجلو.. * أوليفيه بعد ما (قلع ليهو ستة ضرس) جمال الوالي سجلو.. * الزول ده بيحب كبار السن حب غريب.. * برضو عشان ما ننسى اخونا المحترف البوسني (نجاد).. * نجاد لما جاء المريخ عمرو كان قدر عمر مازدا بالظبط.. * حاليا المريخ يفاوض عمر بخيت ومهند والمعز.. * انا غايتو عندي ظن في الحتة دى.. * بظن إنو جمال الوالى بيسجل كبار السن ظنا منه بأن لعيبة الاندية الاخرى سحترمون اللاعبين كبار السن.. * اظن كده.. * وأي زول طبعا حر في (ظنونو).. * جمال الوالي على حس إنو ما بيعرف كورة بيكون فاكر البطولات بتتحقق باللاعبين كبار السن.. * مسكين فاكر كده.. * عشان كده (ردم) ليك المريخ عجائز لما خلي ليك اعضاء المجلس يضايرو.. * الوالي ده لو بيركز على الشباب على بالنعمة في ال(13) سنة دي كان عمل مريخ يهز ويرز.. * كان عمل مريخ ما بيلعب التمهيدي.. * المريخ ده كلو سنة وصيف محلي وبيلعب التمهيدي وبيطير من التمهيدي بسبب كبار السن.. * جابو ليهم (50) مدرب والحال نفس الحال.. * طيران على الريق.. * وده كلو سببو تسجيلات الشياب.. * هسة مش بكري المدينة لعب في الهلال خمس سنوات ده غير فترتو في فريق المدينة واهلي مدني واهلي شندي؟؟ * بكري بعد ده كلو يعتبر ناشئ في كشف المريخ.. * ده بحسابات جمال الوالي ناشئ ساكت.. * طفل ساكت.. * جمال الوالي لما يجيبو ليهو لاعب وشو ما مكرفس بيستغرب.. * لأنو إتعود يسجل اللاعبين الكبار في السن لدرجة إنو وجوههم مكرفسة.. * عشان كده دفع لبكري المدينة قروش النار ما تأكلها.. * امبارح محمد جعفر قريش قال إنو صديق علي صالح قال ليهو سجلنا بكري المدينة باتنين مليار و(150).. * ده كلام صديق علي صالح القالوا لمحمد جعفر قريش.. * وأنا شخصيا بتوقع إنو المبلغ يكون أكبر من كده.. * لأنو دائما البتظهر هي (نصف الحقيقة).. * دي ما الحقيقة يا قريش.. * إتخيل.. بكري استلم قروش قدر دي وراجي عبد العاطي اعاد تسجيلو ب(200) مليون.. * راجي الذي هو حاليا كابتن المريخ سعرو (200) مليون بينما بكري المدينة سعره اتنين مليار وما خفي اعظم.. * والله لعيبة المريخ ديل مساكين.. * انا لو كنت لاعب في المريخ (لا قدر الله يعني) ما بلعب بعد تسجيل بكري بالقروش دي.. * والله ما ادق ليكم كورة لو نططو.. * لكن لقيتو اللاعبين ديل مساكين.. * مساكين وما عارفين حاجة.. * انا متأكد ضفر بيكون اعاد تسجيلو ب(300) مليون.. * والله ال(300) مليون بتاعتك دى بكري المدينة بيشرب بيها (قهوة) في الديم يا ضفر.. * لكن نرجع ونقول تستاهلو.. * سعر كل من يرتدي شعار الهلال (مليارات).. * هسه معاوية فداسي ده لو شطبناهو المريخ بيدفع ليهو مليار.. * والله يا الكاردينال حقو تشطب معاوية ده عشان يستفيد.. * خلو يمشي يصلح وضعو الاقتصادي.. * اقتصادي ب(الهاء).. * و..و.. * ويا خواني شوفو العجايب…(البنية زوجها لشايب)!!
