* أكتر (ديك) تعب معانا إحنا في السودان هو (ديك المسلمية) .. * ولعل الشهرة التي وجدها (ديك المسلمية) لم يجدها (ديك أي قبيلة سودانية أخرى) .. * وسبب هذه الشهرة إنو ديك المسلمية كان (بعوعي بينما بصلتو في النار) .. * وطارق العشري هو أكثر مدرب (بصلتو قعدت في النار) رغم إنو (مصلحة الهلال بتعوعي) .. * (بصلة كافالي) لم تمض سوى ساعات معدودة في النار .. * ولكن بصلة العشري طاب لها قعاد النار .. * أنا أخشى أن تحترق بصلة العشري ويحترق معاها الهلال ونحترق نحن من كثرت (العوعاي) .. * في مواقع التواصل الاجتماعي ظهر رئيس الاتحاد السوداني معتصم جعفر وهو (فرحاااااان) ب(السيلفي) مع رونالدو وبنزيمة .. * رئيس اتحادنا تابع كلاسيكو أسبانيا من داخل الإستاد وعقب نهاية المباراة (طارد) رونالدو وبقية النجوم من أجل صورة .. * معتصم كان بيضحك لحدي ضرسو الأخير ومن حقه أن يضحك لأن (صورة مع الدون) تعني الكثير .. * وقطع شك رونالدو لما وافق على الصورة ما كان عارف إنو (ده معتصم جعفر بتاع الاتحاد السوداني) .. * ما كان عارف .. * وياريتو لو عرف .. * يا معتصم صدقني رونالدو لو كان عرف حكاية (اللقيمات) ديك ما بتصور معاكم .. * و لو عرف حكاية سمير فضل ولجنة الاستئنافات ما كان اتصور معاك .. * والله صحي .. * بس الحمد لله ما عرف .. * أتوقع الكلاسيكو الجاي محمد سيد أحمد يمشي يتصور مع (بيبي) .. * أتوقع كده .. * وأي زول طبعاً حر في (توقعاتو) .. * المهم .. * مشاكلنا في السودان هي زي (الشعب الصيني) بتتشابه في كل شئ .. * مثلاً .. ناس المحلية كل سنة (الخريف بباغتهم) مع إنو زمنو معروف .. * وناس حلتنا كل سنة (بيدقو الستاير فجر العيد الساعة أربعة صباحاً) مع إنو تاريخ العيد معروف (خاصة عيد الأضحى).. * وأنا لاحظت حاجة .. * أي (ستارة) بيدقوها في الزمن الواقع بين (ليلة الوقفة وصباح العيد) بتقع تاني يوم في العيد .. * أي ستارة بيدقوها يوم الوقفة بعد (12) ليلاً بتقع بعد (48) ساعة .. * ليه ؟؟ أنا ذاتي ما عارف .. * اللهم أنها بتقع .. * في الرياضة لما تجي تشوف مشاكلنا بتلقاها (متشابهة جداً .. * وهي لا تخرج من الآتي : (محترفين كعبين )، والفرق تشتكي المريخ والاتحاد يرفض الشكوى ومنع طاقم التلفزيون من نقل المباراة) .. * هذه مشاكل تتكرر في الدوري السوداني كل عام وبالكربون .. * والله صحي .. * نفس المشاكل .. * والمرة دي التلاتة حاجات دي حصلت من الدورة الأولى .. * التلاتة ديل ظهروا من الدورة الأولى .. * الفرق اشتكت المريخ في (النعسان) والاتحاد رفض الشكوى ..(حصلت ولّا ما حصلت) ؟ * الاتحاد أصدر قراراً ومنع طاقم التلفزيون من نقل مباريات الممتاز .. (حصلت ولّا ما حصلت) ؟ * و(المحترفين كعبين )والهلال شطبهم ..(حصل ولا ما حصل)؟ * الكلام ده كلو حصل قبل نهاية الدورة الأولى .. * يعني لما تجي الدورة التانية احتمال كبير (الدوري يتلغي) .. * والله صحي .. * والسنة الجاية نفس الحصل السنة دي ح يحصل .. * لأنو الحصل السنة دي حصل السنة الفاتت برضو .. * وح يحصل السنة الجاية واللبعديها .. * بس خليكم متذكرين .. * هسه أقول ليكم حاجة .. * والله لو (كشكشت) ست الودع ..الودع ألف مرة لن تتوقع أن يشطب الهلال موكورو (الأساسي) ويجدد الثقة في إيشيا (الاحتياطي) .. * خليك من ست الودع .. * إيشيا نفسه ما كان يتوقع أن يستمر هو ويغادر موكورو .. * وما حدث في هذه النقطة بالذات يؤكد أن الكاردينال محتاج (درس عصر) فيما يتعلق بالمحترفين وعملية الشطب والتسجيل .. * غايتو جنس غايتو !! * الأيام دي لو عايز تموت من الضحك اقرأ (صحف المريخ) .. * إعلام المريخ (السالب) كما أطلق عليه جمال الوالي هذا اللقب يتحدث عن (تخريب إستاد المريخ من قبل جمهور الهلال) .. * ومجلس إدارة المريخ قال في حديثه للصحف الهلالية إن جمهور الهلال برئ من (حكاية التخريب دي) .. * وجمهور الهلال مستحيل يكسر (الممتلكات العامة) وهذا الإستاد هو إستاد الحكومة .. * إستادكم ده زي إستاد الخرطوم واحد .. * إعلام المريخ يبكي على (السور المنهار) .. * والبعض من كتاب الإعلام السالب يبكون من أجل جمال سالم .. * واحدين ببكوا على (السور) وواحدين ببكوا على (جمال سالم) .. * وأبو جريشة لما سألوه من موضوع سالم قال : (الزول ده أنا أديتو ألفين دولار ووصلتو لحدي غرفة السلامة بمطار الخرطوم) .. * أبوجريشة قال : (أنا أول مرة أودع لاعب لحدي غرفة السلامة) .. * أبوجريشة نسى لما كان بيسافر يجيب (17) محترفاً دفعة واحدة .. * نسى زمن شيكورا وشيكوزي وغيرهما من (أشباه المحترفين) .. * جريشة قال : (جمال سالم داير مننا مرتب شهر ونص) .. * خليك من شهر ونص يا أبو جريشة .. * ده حق ولا ما حق ؟ * شهر ونص ولا أسبوعين في النهاية الزول قال داير حقو .. * وبصراحة جمال سالم ما عندو فيكم ثقة عشان كده داير يضمن حقو بعد داك يركب يجيكم .. * وبالنسبة ل(2000) دولار الأديتها ليهو بالمطار طوالي تخصمها يا أبو جريشة .. * أديهو مرتب شهر ونص ناقص ألفين دولار .. * وجمال سالم لو عرف إنك ذكرت في الصحف حكاية الألفين دولار دي تاني ما بجي رسمي .. * يعني عشان أنت أديتو ألفين دولار يقوم هو يخلي ليكم مرتب شهر ونص ولا كيف ؟ * ما صاح كده .. * أنا وبصراحة مستغرب في حاجة واحدة بس .. * إنتو جمال سالم الذي هو (المريخ) ما أديتو قروشو دايرين تدوا منو طيب ؟ * إذا كان جمال سالم ما صرف يبقى البيصرف منو ؟ * الكلام ده بيعني إنو في لعيبة في المريخ ليهم ستة شهور ما صرفو .. * المريخ (عبارة عن جمال سالم) ، ولما جمال سالم الذي هو (المريخ) ما يصرف يبقى الباقين ليهم زمن طويييل ما صرفوا .. * المنطق بيقول كده .. * وبإذن الله (وقعت المريخ ح تكون سوداء) .. * المريخ ده السنة دي يجيب ليكم كارثة أكبر من كارثة الوحدات الأردني .. * وإحنا بنتفرج وممكن نساعدكم بالموية الباردة .. * ااااي طرنا .. * طرنا وشبعنا طيران .. * بس إنتو (اركزوا للجاية) .. * قال أديتو ألفين دولار قال !! * دولار ب(الناء) .. * و..و.. * ولو القديم فاتنا وأدلع نجيب الجديد يلمع.!! *