بالعربى الكسيح-محمد الطيب الأمين الدنيا دى فيها ناس (شُتر شديد) .. والزول الاشتر ما على شرط يكون اشتر في الرقيص .. حتى التصرفات والافعال والاقوال مرات الزول بيكون فيها اشتر .. يعنى مثلاً : جمال الوالى لما قال : (العارف عزو مستريح) كان اشتر شديد .. وفي مباراة الهلال اليوم أى هلالابي قاعد في الخرطوم وما ح يخشو الاستاد ده معناها هلالابي اشتر .. والهلالاب حاشاهم (الشتارة) .. الهلالاب عندهم (الشطارة) وما بعرفو (الشتارة) .. الشتارة دى حقت ناس المريخ .. هو عليك الله المريخ لو ما اشتر بيلعب في سيكافا حصل شفت ليك فريق عمرو (84) سنة بيشارك ليهو في بطولة مشارك فيها فريق عمرو (7) سنين عزام عمرو سبع سنين وشهادتو (تسنين) وعندو رقم وطنى .. ناس المريخ ديل بيذكروني حاجة .. زمان في بيوت الاعراس بتلقى ليك واحد لابس ملابس فاخرة وغالية ومتعطر بريحة قوية جداً .. الزول ده بيكون لابس ملابس هى الأغلى ما بين جميع ملابس المعازيم .. لكن لما (الحفلة تبدأ) الزول ده رقيصو بيكون زي كورة المريخ .. الموسيقى ماشه في اتجاه وهو بيرقص في اتجاه تانى .. وفي الجانب الاخر من (الحفلة) تلقى ليك شافع بيرقص تحلف تقول ما عندو عضم في جسمو .. هسه المريخ اشتر .. تشوف استاد المريخ تحلف تقول الناس ديل بيلعبوا كورة بحجم استادهم .. ولما تجى تشوف كورتهم بتلقاها في اتجاه وشكل الاستاد في اتجاه .. ما في انسجام بين كورة المريخ واستادو .. البيشوف استادكم ما يشوف كورتكم .. أمبارح صحف المريخ ابرزت صور لإيهاب زغبير وهو يحمل الحارس جمال سالم على الاعناق .. ايهاب حمل جمال سالم على الاعناق عقب التأهل على حساب عزام .. كويس إنو التأهل ده خلى ايهاب يظهر في الصورة .. أنا لو ما الصورة دى كنت فاكر ايهاب اتشطب .. دور ايهاب الآن في المريخ هو حمل اللاعبين على الاعناق .. وهذا دور مقدر لإيهاب .. نقترح أن يتخصص بله جابر في حمل الاداريين على الاعناق عقب كل فوز للفريق .. بقترح كده .. وأى زول طبعاً حر في (مقترحاتو) .. الليلة كنت ناوي اكتب عن الهلال وبس .. لكن قلت احسن اكتب عن المريخ واشاركهم فرحتهم بالتأهل لدور الاربعة .. الهلال بالاجتهاد والروح العالية سيحقق النصر .. بعيداً عن الشكوى يجب أن يفوز الهلال .. نريد للهلال أن يغادر الابطال مرفوع الرأس .. والزمالك لن يكون صيداً سهلاً اليوم .. ومهم جدًا مشاركة صانع لعب في مباراة اليوم .. إذا كان سيدى بيه غير جاهز فيجب اشراك وليد رغم أن اللقاء كبير على وليد .. ولكن وجود صانع لعب يدعم خط الهجوم الذى يمارس الصيام الان .. زيارة الكاردينال للاعبين في تدريب امس الاول جاءت محبطة جدًا .. الذى علمته أن الكاردينال هدد اللاعبين بشكل غير مباشر .. والتهديد في مثل هذا التوقيت من شأنه أن يأتى بنتائج عكسية .. يجب أن يتعلم الكاردينال (لين القول والدبلوماسية) حتى لا ينفر نجوم الفريق .. نعم بعض اللاعبين محتاجين العين الحمرا ولكن ليس في مثل هذا التوقيت .. حكاية : (المباراة دى بنقيِّم فيها كل لاعب) ما لذيذة يا كاردينال .. مثل هذا القول سيشتت افكار اللاعب .. عموماً الهلال قادر على النصر بثورة جمهوره وعزيمة ابطاله إن شاء الله .. وقد نعود لحديث الكاردينال عقب اللقاء بإذن الله .. نرجع للناس المشاترين .. هسه كلام الكاردينال مع اللاعبين ده برضو (اشتر) .. المهم .. محترف المريخ المصرى أيمن سعيد بكى وخلع الفانلة عقب التأهل .. الزول ده شكلو كده فاكر إنو المباراة كانت في دورى الابطال .. لو عارفها دى سيكافا ما ببكى .. سبب واحد بيخلى يبكى ما في .. إنتو الزول ده يا محسن سيد ما صارحتو بالحقيقة ولا شنو ؟ ما قلتو ليهو دى سيكافا ؟ كان تكلموا إنو دى بطولة سيكافا والفريق اسمو عزام عشان ما يبكى ساكت .. يعنى ايمن سعيد لو كان بيلعب في الهلال واتأهل من دور ال(32) لدور ال(16) كان مات من البكى .. ولو بلغ مع الهلال دور المجموعات كان يكون بيبكى لحدى الان .. غايتو جنس غايتو المحترفون ديل كلموهم وقولو ليهم دى سيكافا ما الابطال .. عشان ما يبكو عقب كل فوز سيكافا دى زي كأس السودان لما تطير المفروض تفرح ولما تتأهل يفترض تبكى من الحزن مش تبكى من الفرح .. دى بطولة الفوز فيها خسارة .. مش زمان كان في كأس اسمو كأس مانديلا ؟ هسه سيكافا دى سموها (دورة كأس الوالى) .. الاسم ده سياحي اكتر من سيكافا .. وستتجدد المواجهة مع كمبالا سيتى .. بس للأسف كمبالا يفقد (14) لاعباً من تشكيلته الاساسية .. و..و.. وعلى الاستاد مارقين سوا وشافهم الزمالك وإنكوى ..