* في الأحياء والقري والمدن لما تلقي في (اولاد) نص النهار قاعدين في (الحلة) تأكد إنو الأولاد ديل يا (عيانين ويا كمان عاطلين عن العمل) .. * الزول البيكون يوم الثلاثاء (مقيل في الحلة) يا عيان ويا عاطل .. * إحتمال يكون عندو (أورنيك مرضي) وإحتمال يكون (لسه الله ما وفقو في إيجاد وظيفة) .. * لكن مستحيل زول يكون شغال تلقاهو مقيل في الحلة نص النهار وفي نص الأسبوع كمان .. * وعلي طريقة الأولاد المقيلين في الحلة بالنهار ، سيصل الخرطوم اليوم خمسة محترفين لاجراء إختبارات مع الهلال .. * والخطوة من حيث المبدأ تبدو جيدة ومنطقية ولا غبار عليها .. * هذه خطوة تثبت ان الكاردينال يريد ان يصحح الطريقة التي ظل يستجلب بها الأجانب .. * ولكن هذه الخطوة تحتاج لتحليل من زاويا اخرى .. * وهذا التحليل نحن نقصد من خلاله مصلحة الهلال ومصلحة الكاردينال بالضرورة .. * الكل يعلم ان معظم الدوريات في العالم (شغالة حاليا) .. * وهذا يعني ان جميع اللاعبين مشغولين بالدوريات في بلدانهم .. * أنا أتحدث عن الدوريات المحلية وليس البطولة القارية .. * ومن الصعب جدا ان تسمح الاندية للاعبيها بالذهاب لاجراء اختبارات اثناء دوران عجلة الدوري .. * خاصة لو كان هؤلاء اللاعبين هم من نجو م الصف الأول .. * ولعلنا نذكر كيف منع الهلال لاعبه مدثر كاريكا من الذهاب لاجراء اختبارات في السعودية .. * الهلال منع كاريكا من هذه الخطوة لانها تزامنت مع إنطلاقة معسكر الفريق بتونس مطلع هذا العام .. * ولعل الجمهور يذكر جيدا ان كاريكا لم يلحق بمعسكر الهلال في تونس إلا بعد اسبوع كامل فقد كان (حردانا) بسبب رفض الهلال وقتها .. * هذا يوضح ان الأندية المحترمة لن تسمح بذهاب لاعبيها لاجراء اختبارات أثناء الدوري او أثناء فترة المعسكرات .. * يبقي من حقنا أن نسأل السيد رئيس نادي الهلال عن هوية هؤلاء المحترفين الخمسة الذين بشرونا بهم ؟؟ * من وين ؟؟ * وكانوا بيلعبوا وين ؟؟ * ولشنو جايين هسه والدوريات شغالة في بلدانهم ؟؟ * وهل هم سليمين أم مصابين أم كبار في السن أم انهم من لعيبة الصف الثالث في بلدانهم ؟؟ * هذه اسئلة جوهرية يجب ان يسألها الكاردينال لنفسه قبل ان يقوم بأي خطوة تجاه هؤلاء اللاعبين .. * نكرر ونقول أجراء الاختبارات هو سلوك إحترافي ممتاز .. * لكن كمان لما تجيب محترفين يعملوا اختبارات والدوريات في بلدانهم شغالة دي بالنسبة لي موضوع فيهو شك كبير .. * في حالة زي دي طوالي أنا بتذكر ليك الاولاد البقيلوا في الحلة في نص الأسبوع .. * المنطق بيقول كده .. * هسه لو نادي السد القطري طلب أبوعاقلة لاجراء اختبارات الأسبوع القادم هل الكاردينال سيوافق ؟؟ * وهل لو طلب الأهلي المصري محمد عبد الرحمن للاختبارات في هذا التوقيت هل سيوافق الهلال ؟؟ * لن يوافق دون شك .. * ولكن إذا طلب الترجي التونسي صلاح الجزولي لاجراء اختبارات ربما الهلال يوافق وذلك لاسباب تتعلق بعدم تأثير الجزولي علي الهلال .. * يبقي المحترفين ديل بالمنطق كده يا الكاردينال يا هم مصابين ويا كمان عاطلين وقاعدين ساكت ويا كمان أحسن واحد فيهم زي صلاح الجزولي .. * وأنا لما أقول صلاح الجزولي بقصد صلاح الجزولي قبل (القون الجابو أمس الاول) .. * يبقي يا الكاردينال ورينا المحترفين الخمسة ديل من ياتو صنف ؟؟ * مصابين ؟؟ * ولا عاطلين ؟؟ * ولا زي صلاح الجزولي قبل ما يجيب قون امس الاول ؟؟ * إختار يا الكاردينال .. * نقول هذا الحديث من باب حرصنا علي الكاردينال الذي هو و حده من يدفع الأموال وهو وحده المسؤول أمامنا .. * ولن نشك مطلقا في ان الكاردينال يريد صناعة هلال مهاب .. * ولكن كردنة في كثير من الأحيان يروح ضحية في حضرة السماسرة .. * هسه يا الكاردينال المحترفين ديل لو جابوهم ليك سماسرة أنا بتمنى تسألهم الاسئلة السألتك ليها دي .. * بتمنى والله .. * هذا جانب .. * نجي للجانب التاني .. * إختبارات هؤلاء المحترفين الخمسة يجب ان لا تكون أمام التحرير والجريف والرديف .. * يعني لو دايرين تختبروا المحترفين ديل أوع تعملوا ليهم مباراة ودية مع رديف الهلال .. * طبعا مع أكيد إحترامي لفريق الجريف والتحرير ورديف الهلال .. * إحنا بنجيب المحترفين بنعمل ليهم إختبارات مع اندية الدرجة الثالثة بولاية الخرطوم وبينجحوا وبيتألقوا .. * ولما الدوري يبدأ بيكونوا عاديين .. * ولما نمشي الأبطال بنلقاهم زي أبيكو .. * والله صحي .. * عشان كده إنت داير تعمل إختبارات للمحترفين تعملها أمام فرق عندها وزنها .. * فرق كبيرة .. * صحيح الإختبارات الطبية والبدنية لا تحتاج لفرق كبيرة ولكن إختبارات المردود الفني يجب ان تكون أمام فرق لها وزن فني عالي .. * لو الهلال ح يشارك في سيكافا تبقي دي فرصة طيبة لاختبار هؤلاء المحترفين .. * نشارك في سيكافا بنجوم الاختبارات ومعاهم خمسة لاعبين من الرديف .. * رغم إنو سيكافا الفرق الفيها أخير منها اندية الثالثة الخرطوم .. * وإحنا اصلا ضد المشاركة في سيكافا لانها لن تحقق المكاسب التي يبحث عنها الكاردينال .. * المهم .. * الهلال في فترة التسجيلات التكميلية لن يحتمل اي محترف فاشل .. * والفرصة أمام الهلال كبيرة لاختيار عناصر قادرة علي الاضافة والتميز .. * والحاجة الاهم من ده كلو .. * اسعار المحترفين .. * مبدئيا كده أنا بأكد ليكم إنو المحترفين الخمسة الجايين ديل كلهم بيكون ب(400) ألف دولار والله أعلم .. * وده الكلام الما بينفع .. * الغالي بغلاوتو .. * تجيب ليك محترف واحد وسعرو غالي ومستواه مدهش أفضل من تجيب تلاتة محترفين (نص نص) وبسعر رخيص .. * دايرين محترفين بيحدثوا فارق .. * محترفين بصمة .. * بالمناسبة دي .. * هو كان علاء الدين بصم ولا ما بصم ؟؟ * من زمن بصمة علاء الدين ناس المريخ كانوا بتوعين لقيمات .. * من زمن البصمة هم بعرفوا اللقيمات بس إحنا ما إكتشفنا الحاجة دي إلا مع الكاردينال .. * والله صحي .. * اللقيمات دي حاولوا يعملوها مع دكتور كمال شداد كم مرة .. * لكن شداد طلع ما بحبش اللقيمات .. * علي بالنعمة بصمة علاء الدين دي لو كانت في زمن معتصم جعفر عيييييييك كان علاء الدين ده راح شمار في مرقة .. * غايتو جنس غايتو !! * و..و.. * وقالوا متألم شوية ياخي ...(ما تأكل باكمبا نص النهار) !! *