* أسوأ (10) حاجات في الدنيا دي (7) هي : * 1- الشاكوش العاطفي في رمضان * 2- رمضان في السجن * 3- السجن في الغربة * 4- الغربة داخل الوطن * 5- والدوري البتتحكم فيهو اللقيمات * الاتحاد العام في كل عام يرفع شعار (دوري بلا تأجيل) .. * وقبل أن ينتهى النصف الأول من الدوري يقوم الاتحاد بتأجيل المباريات تقديرًا لظروف المريخ (الفنية) .. * الاتحاد يعلم أن خسارة المريخ في الأبيض وخسارته في كادوقلي تعني أن المريخ سيكون (مساعد وصيف) هذا العام .. * أجلوا للمريخ مبارياته (المؤجلة أصلاً) حتى يقوى عوده ويعود لسكة الانتصارات .. * ولكن اعتقد أن الاتحاد لم يكن ذكياً هذه المرة .. * كان يمكن أن يلعب المريخ كل مبارياته المعلنة وإذا خسرها في الميدان يكسبها بالشكوى من داخل المكاتب .. * في الموسم الماضي النقاط التى كسبها المريخ بالشكاوى أكثر من النقاط التى كسبها داخل الملعب .. * إنها اللقيمات يا مولانا .. * أكثر (7) حاجات بتجيب ليك أخلاقك في طرف نخرتك (5) هي : * 1- البواب بتاع المستشفى الحكومي * 2- الشماعة في بص الوالي والكبري فيهو حادث * 3- رسالة (الرقم أعلاه يطلب الاتصال به) * 4- والإداري الفرحان البحب الصور أكتر من إيمان لندن * الوسط الرياضي ده فيهو إداريين بيحبوا الصور أكثر من إيمان لندن .. * الواحد لو (صلح العمة والشال) بيأخد ليهو صورة .. * لو غيَّر النضارة بيأخد صورة .. * مرات أنا بحس إنو في ناس بيشتروا ملابس جديدة عشان تكون بالنسبة ليهم مبرراً للصورة .. * والله صحي .. * الإداري البيحب الصور في الغالب كيسو بيكون زي كيس العشري .. * نحن نبحث عن إداري الصور بتحبو وليس العكس .. * غايتو جنس غايتو !! * أكتر (5) كلمات الواحد بيحب يسمعها (3) هي : * 1- جمال سالم لا يسأل عن الهدف الذي ولج مرماه * 2- والهدف الذي ولج مرمى جمال سالم مسؤولية الدفاع * نفسياً والله يا جماعة أنا برتاح جداً لما أشوف الكرة جوه شبكة المريخ .. * الحاجة دي بتبسطني جداً .. * لما أشوف الكرة جوه شبكة المريخ زي لما أسمع عثمان حسين أو زي لما يدوك حافز مع المرتب .. * بحب أشوف الكرة جوه الشبكة الحمراء .. * ولذلك من أسعد الأيام في حياتي يوم (الوقفة) ويوم (المرتبات) ويوم (شلباية) .. * كل ما أحس بالدنيا ضايقة وكل ما أحس بالزهج بعمل تلاتة حاجات .. * الحاجة الأولى : بحضر فيلم لمحمد هنيدي .. * ولو الفيلم ما فكه لي الضيق بفتح مخلص مباراة المريخ والوحدات الأردني على اليوتيوب .. * ولو أهداف شلباية ما فكت الزهج طوالي بطلع جرايد المريخ وبقرأ ما كتبه إعلام المريخ قبل سفر الفريق إلى الكنغو لمواجهة مازيمبي في المربع السنة الفاتت .. * لما أقرأ الجرايد التي سبقت مباراة المريخ ومازيمبي بالكنغو بحس بشعور عجيب .. * تقرأ الجرايد التى كتبت عن الطيارة الخاصة والبودي قاردات العشرة والطباخين الأربعة و(الفني) الساقوهو معاهم عشان يفحص هواء مكيف الفندق في الكنغو .. * بالذمة في زول بيصدق إنو المريخ ساق معاهو (فني) لفحص هواء المكيف بالفندق ؟ * في زول بيصدق إنو المريخ سافر الكنغو ومعاهو الفني ده ؟ * قالوا احتمال مازيمبي يعمل ليهم (مخدر في المكيف) .. * هو وينو عليك الله الفريق البيعملوا ليهو (مخدر) ؟ * مخدر ما عملوا للهلال يعملوا ليكم إنتو ؟ * دنيا والله .. * ولما المباراة بدت الجماعة اكتشفوا إنو (المخدر) ما في المكيف، المخدر في كراع ساماتا .. * والله فعلاً مرات نبكي من كفرنا ومرات كفرنا يبكي الكافر .. * المهم .. * أكتر (5) حاجات بتخليك تضحك من الضرس للضرس (3) هي : * 1- الرصيد البيجيك عن طريق الغلط * 2- الغلط البيجيك عن طريقو الرصيد * 3- ولما الكهربا تقطع وتعاين لتلفونك تلقى نسبة شحن البطارية (92%) .. * والله صحي .. * بتحس أنك بطل لما الكهربا تقطع وتلفونك يكون فيهو (92%) .. * وطبعاً يا جماعة موضوع الكهربا ده زي ما قالوا بيكشف ليك إنو إحنا السودانيين ديل بنحب لأنفسنا كما نحب للآخرين ولكن بالعكس .. * قول لي كيف ؟ * لما الكهربا تقطع في البيت أنت بتزعل جداً ولما تطلع الشارع وتلقاها قاطعة عامة بتفرح واحتمال كبير تبتسم .. * بنتكيف لما المصيبة تكون جماعية .. * غداً الأربعاء، وأكتر (6) شخصيات مهمة ليوم غدٍ (4) هم : * 1- مهند الطاهر * 2- وردة * 3- والغزال * كل آمال وتطلعات جمهور كردفان الراقي معلقة على النجم الكبير مهند الطاهر .. * الغزال مؤهل ليكون عريساً أمام المريخ إذا أحسن التركيز والتهديف .. * ومهند أصلاً متعود على الحراس الأجانب ولذلك نتوقع منه زيارة أو زيارتين لشبكة جمال سالم .. * أكتر (6) حاجات ما بتتنسي (4) هي : * 1- الكلب البيسكك في شارع مليان بنات سمحات * 2- والمثل البيقول : (العارف عزو مستريح) .. * ديل ما بتنسو نهائي .. * وأكتر (4) حاجات تؤكد سوء حظك (3) هي : * 1- تهبط للكنفدرالية ومازيمبي يهبط معاك * 2- وتسقط من الأبطال ومازيمبي يسقط معاك * والله صحي .. * ده سوء حظ عجيب وغريب .. * يعني في حالة زي دي المريخ لا عارف يهزم مراكش المغربي عشان يقابل مازيمبي في المجموعات ولا عارف يتغلب من مراكش ويطير وبالتالي يرتاح من مازيمبي .. * بالجد حاجة صعبة .. * وصعوبة الحاجة دي إنو مازيمبي السنة الفاتت (لبعهم لبعة جامدة جداً) .. * مازيمبي ضاق المريخ وتاني ما بخلي .. * مش زمان بيقولوا ليك (الضاق أيدك ببقى رفيقك) ؟ * هسه مازيمبي ضاق الجماعة ديل وتاني ما بخليهو .. * مازيمبي ح يبقي ليكم في العزيزة .. * وأنا والله خايف لو هبطوا سيكافا مازيمبي يهبط معاهم .. * عشان كده أفضل حاجة إنكم تتخارجوا من بدري .. * الحل الوحيد مراكش يغلبكم هنا وهناك .. * وتجوا تشاركوا في دورة دبي الرمضانية .. * في الحالة دي مازيمبي بيخليكم .. * غير كده والله العظيم أنا شامي لي ريحة (سبعات) .. * سبعات ب(الواء) .. * و..و.. * ومزروعة في جواي وأنا ...(بسقي فيها موية صحة ليل ونهار) ..