* أي شي في البلد دي اتغير , والسودانيين طبعاً أصلاً مغرمين بالقديم وأي حاجة قديمة الناس بتحبها * الواحد لو جبت سيرة أي شئ يقول ليك ( ياحليل زمان ) * تجيب سيرة السكر يقول ليك زمان ( الوقه ) بي ( تعريفة ) !! * و( الوقه ) يا ناس التسعينات هي وحدة وزن و ( التعريفه ) دي جزء من العملة * أها تجي للكورة يقول ليك ياحليل زمان * وزمان ناس صديق منزول كانو وكانو و. و ... * المهم نحن ناس مغرمين بالقديم * وواحدين عندهم فلسفة أكتر يقولو ليك زمان الجنيه السوداني بعادل 3 تلاته دولار واليوم ماعارفو بي كم * المهم أي شئ اتغير * بس في ناس بقولو اتغيرو الناس وواحدين بعتبرو الزمن اتغير * المهم متفقين في أنو في تغيير * لكن في رأيي أنو نحن السبب * المهم نحن دايرين ننطلق من هنا * ونعيد ذكريات زمان * مع أنو العالم كلو مطور بس نحن راجعين لي وراء * والكلام دا لسبب واحد بس .. لأنو نحن تراجعنا وماضينا أفضل من مستقبلنا * ولذلك لابد من ثورة تراجع فيها الأخطاء ويتم دراسة الوضع الحالي وتشخيص العلل ورسم خطط المستقبل * ولابد أنو نفكر بجدية ونكون عازمين نعمل حاجة , وأهم شئ مانشتغل بكلام البرلمان * ونواب البرلمان قالو ( الفلس ) مابخلي الناس تفكر ويمكن يخليك تسهو في الصلاة * الكلام دا كلام ناس البرلمان * وإذا كان برلماننا مهزوم نحن الله يعلم يكون فينا عمار * بس ضروري نفكر وبجدية كمان * والكاردينال قالو عمل يوم مفتوح للاعبين والمدرب * وإن شاء الله مايكون يوم ترفيه ساي * إن شاء الله يكون يوم لبداية عهد جديد * نعيد فيه ترتيب الأوضاع ونخلي ( الكجار ) ونقدم مصلحة الهلال والسودان عشان ننهض ونحقق الأحلام * ولابد أن يدرك الكاردينال أن الفرح المتبقي هو كرة القدم ( 2 ) * وعشان ماتقولو أنا زول متفلسف ساي * أنا ذاتي مغرم بي زمان * ونحن كنا لم نلق جريدة رياضية كنا بنتكيف شديد ونشيل الجريدة عشان نشوف صور جكسا وديم الصغير وتنقا وكاريكا ووالي الدين وطارق أحمد آدم ويوهانس والناس كانو بقطعو الصورة ويعلقوها في الغرف والرواكيب وحتى الدكاكين * بس ماداير أقول الجرايد الليلة فيها شنو .. * المهم زمان اليوم طويل الواحد يقوم من الصباح يطلع العندو مدرسة والعندو شغل ويرجعو نهاية اليوم على حدود الساعة اتنين * لا في زحمة مواصلات لا حاجة * تحضر عالم الرياضة الساعة اتنين ونص وتتغداء وتطلع الميدان العصر وتلعب كورة وترجع مع أذان المغرب وتقضي زيارتك لو أمكن وبعد داك تحضر مسلسل ( تسعه ) حتى اليوم يكمل * والناس كانت مرتاحة وهمها بارد * والليله في الخرطوم تطلع الصباح وترجع نص الليل * وإيقاع الحياة سريع جداً وو * الله يكون في العون ( 3 ) * قوون مهند الطاهر في المريخ ماديرين نتكلم عنو * لأنو المريخ ظروفو صعبة شديد , والوالي سرو باتع * والوالي شكلو داير يرجع , والإدارة زي ( حلاوة حربة عند الأطفال * والبضوقها مابخليها وأسألو صلاح إدريس !! * الشئ الوحيد الممكن نقولو في هزيمة المريخ بالأبيض أنو إعلام المريخ مهد ليها عشان تستقيل لجنه التسيير * والخطأ الأكبر أنو أهل المريخ مهدوا للاعبين أنو ( اللعب بالقروش ) ( 4 ) * الدنيا ما بترجى السكات .. * والفيها ما عاد ينضمن.. * أضمن تلاقي الأمنيات .. * باكيات تكفف دمعهن
