* رمضان فضل ليهو ( 17 ) يوماً, وزمان الناس قبل رمضان بفكرو في تجهيز ( الآبري ) والسكر ومستلزمات رمضان * الآن الناس بتفكر في توفير الكهرباء ومقاومة السخانة * الكهرباء الأيام دي بقت عزيزة عزة شديدة, ولما تلقى ليك (مروحة) شغالة تضحك التقول صارف صندوق * طبعاً صرف المرتب كلكم عارفنو * تصرف آخر اليوم وقبل ماتصل البيت تكون كملت * يعني لو جازفته كدا ممكن تشتري منها كباية عصير وتحول رصيد بي ( ألفين ) * المهم الكهربة سمحة وما بنطير برانا برضو سمحة ( 2 ) * عشان أكون صادق معاكم أنا أول أمس ما حضرت كورة المريخ * النصيحة ليك يالله * ماعشان كنت قنعان من المريخ, بس لأنو الظروف صعبة وأنا زول ساكن بعيد كعاده الغبش في البلد * ولو تأخرت المواصلات بتزيد بالليل * ناس المواصلات طبعاً الصباح بي سعر وبالمساء بسعر * المهم المباراة ما حضرتها عرفت النتيجة وزعلته لي ونسي لأنو راجل طيب * وأمس تفاجأت بي صور للاعبين ناس علاء الدين ساكين المصور المغربي * وفيديو لحاتم محمد أحمد (لكم) فيهو الحكم (بونية) * بيني وبين نفسي قلت المصور دا ياربي يكون شال شنو من علاء الدين * لأنو سكة علاء الدين دي ما طبيعية جاري ورا الزول دا تقول شال مرتبو * وبنيه حاتم قوية والغريب أنها (بالشولا) بونيه ختافية * نحن والله الخسارة ماعندنا فيها مشكلة بس المشاكل ما حبابها * وحرصت برضو أتابع المواقع المغربية والتي تناولت أحداث المباراة بشئ من التهكم ومسحت بنا الأرض * حتى وصل الأمر للتعرض حتى وصل لتناول انفصال الجنوب * غايتو يا حاتم السويتوها فينا الله يجازيكم بيها * البونية بي الشوله أنا منو البلوم ( 3 ) * تعازينا للمدرب البلجيكي إيمال في وفاة والده التي حدثت ببروكسل بعد علة لم تمهله طويلا * إيمال مسكين فقد والدو وفقد الدولار * وناس المريخ مفروض يقيفو معاهو في محنتو * وإيمال احتمال يكون بعيل أخوانو عشان كدا ناس المريخ مفروض ما يقيلو عشان ما يبقى عاطل وتتأثر أسرتو ( 4 ) * من يعتبرون أن خسارة المريخ مفاجئة يكونوا قد أحسنو الظن أكثر من اللازم في المريخ * المريخ به كثير من الأخطاء منذ بداية الموسم وأخطاء ظلت متكررة بسبب السياسة اللينة التي ظلت تتبعها إدارة المريخ السابقة مع اللاعبين * وهناك إشكالية كبيرة وقعت فيها لجنة ونسي وهي مشكلة المال * ومشكلة المال ستظل واحدة من الإشكاليات التي تعيق تطور الكرة السودانية مادام الجلابة هم من يتحكمون في الإدارة * يعني الجلابي لو زعل مشى أهلو إلا الجمهور يمشي يستجداه عشان يرجع * المخرج الوحيد في يد الدولة التي يتعيَّن عليها العمل على خلق مصادر دخل ثابتة للأندية حتى تتفادى قصة أصحاب المال في الأندية خاصة الكبرى ( 5 ) * الانتخابات ستظل واحدة من الإشكالات القائمة في الوسط الرياضي * وما يحدث في انتخابات الأندية والاتحادات الرياضية غير مخفي على أحد ولكن لا حياة لمن تنادي * وما يحدث موبقات أهلكت جسد الرياضة بالبلاد * ومؤكد أن الديمقراطية لا تفرز الصواب في الانتخابات * والديمقراطية بريئة مما يحدث باسمها في انتخابات الاتحادات والأندية * المسؤول الأول عما يحدث في الانتخابات هو الدولة التي يتعيَّن عليها وضع قانون يحسم الفوضى حتى ننعم بوسط معافى ( 6 ) * لن نتحدث عن التسجيلات، لأن التجارب علمتنا أن الحكم يكون فقط في الميدان على اللاعبين الجدد * الميدان يا حميدان * وتحضرنا هنا قصة عمنا العبادي الذي عرض عليه الزواج من قريبة عمنا الراحل إبراهيم العوض أحد ظرفاء نهر النيل * وحينها كانت إجابة العبادي الرجل الحكمة ( شوف العين بنجي ) * وقصة نجوم التسجيلات عندنا ( كلام ) وشوف العين بنجي ( 7 ) * غير نسأل الله يسهل القاسي وتهون * يدينا في باقي العمر صبرا نجففبو العيون * دي القسمة والقدر الوقع والدايره أقدارنا بيكون * بس نحن ناس طيبين خلاص أحسنّا في الدنيا الظنون
