اول ما جاء مدرب الهلال الفرنسي الايطالي (هجوم ذ دفاع) غارزيتو للخرطوم بعد التعاقد معه في الزيارة الاولى ذهب مباشرة لاستاد الهلال. من المطار للاستاد. مشى طوالي زار استاد الهلال. قلت الحمدلله ..الي الان الزول الفرنسي الايطالي دا ما قال ماشي (سوق قندهار). لو قال ليكم كدا يا البرير ..اقنعوا منو؟. والله (فرنسيتو) دي من رأسو تطير. يبقي غارزيتو دا ..زيو وزي العوض. عندنا مدرب وطني كدا ...اليوم كلو في (قندهار)...تقول (جزار). ما عندو أي علاقة بالتدريب. قدر ما تمشي قندهار ..تلقاهو قاعد. اليوم كلو في قندهار. الخطة الوحيدة العارفها في الدنيا ..كان بقولها لينا في كل مباراة هو قوله لنا (قفلوا كويس). غير الكلمة دي ما عندو أي حاجة. غارزيتو من المطار للاستاد ..بي شنطتو ..زول عملي ..الجدية ظاهرة في عيونو. من اول تمرين ..عمل ليك تقسيمها. قالوا ليك ناس عبداللطيف بويا اتهجموا. دي قبل كدا ما ادوها ليهم. ما درسوها. من قولة تتيت اشتغل ليهم بالكورة. دا يعني لمن الموسم يبدأ ح يشتغل ليهم بي (اوركسترا الاذاعة). شغل نضيف. زول نجيض. زمان نحن كان عندنا مدرب ..بقول لينا اول ربع ساعة في المباراة (اكتلو) اللعب. نحن بنفذ ليهو كلامو بي حذافيرو. بي ضبانتو. اول ربع ساعة دي ولا بنتفاهم ..بس بنكتل اللعب. شغالين في الكورة (تطفيش)..تقول ناس الكهربا يوم 4 من كل شهر. ناس الكهربا يوم 4 من كل شهر طبعا بكونوا معلقين في الاعمدة يقطعوا في الاسلاك ..للناس الما دافعين. الكلام دا زمان ..قبل الدفع المقدم. المهم يا جماعة نحن اول ربع ساعة في المباراة كنا بنكتل اللعب. نتوقع ..ونقوم ...عربية الاسعاف تدخل الملعب مية مرة. الزمن داك طبعا عربية الاسعاف كانت عبارة عن (عنقريب). اول على افضل الفروض كانت (نقالة) ..كراعها الرابعة ما في..عشان كدا ناس المستشفي اتنازلو عنها لناس الكورة. اول ربع ساعة في المباراة أي واحد فينا كان بعمل فيها عندو (رباط صليبي). الرباط الصليبي دا كان جديد الوقت داك. اول مرة نسمع بالرباط الصليبي كنا فاكرنو (شنكار) جديد. نسمع ليك أي زول لعاب بقول عندو (رباط صليبي). وحسب طيبتنا افتكرنا الرباط الصليبي دا (شنكار). الشنكار تطير عيشتو. هسه الدخل الرباط الصليبي مع الشنكار شنو؟. فهمنا زمان كان كدا. كان قاصر على (الشنكار). يا زول (شنكار) شنو ..الشابكنا بيهو من الصباح. لكن هسه نحن نخلي الشنكار ..ونشوف غارزيتو. غايتو يا ناس الهلال عندكم مدرب اسمو زي (قدحة التوم). زول صعب. ظاهر عليهو. المدرب الفرنسي الايطالي دا اوعكم تعلموه لينا الاسلوب السوداني. ناس المريخ ديل زمان جابو ليهم محترف برازيلي اسمو (نيتو). نيتو دا قعد ليكم في البلد دي اسبوع ..لما ليك فيه حسن بسبوسة قطع ليك فيهو جلابية وعمة. ومركوب. بتعرفو اغنية وردي يا بلدي يا حبوب ..(جلابية وتوب). اها حسن بسبوسة طبقها ليك في (نيتو). نيتو بالجلابية بقى زي البامية المفروكة بالرغيف. حاجة كدا. لا تعرفو برازيلي ..لا تعرفو سوداني. زي (شايب الهارتي) ...القلوبو ممسوحة. حاجة كدا. قالوا ليك ناس مزمل ابوالقاسم لو ما لحقو (نيتو)...كان حسن محجوب (شلخو). كمان حسن محجوب بيلعب. زول صعب. ما عندو حاجة اسمها خواجة وإلا برازيلي. كلام زي دا ما عندو. كلهم بلبسهم ليكم (الجلابية). عارفين الحصل شنو بعد نيتو لبس الجلابية. نيتو لبس الجلابية بي جاي ...الكورة فكت منو بي جاي. بقى على الجلابية. لابس ليك جلابية يا نيتو انت ماشي (بكا). طبعا حسن محجوب لو لقى ريكاردو دا ...عادي يجيبو ليكم بكرة بي (عراقي وسروال). ممكن يدخلو ليكم التمرين بي (سديري)..وشال من (شندي). ما بتعرفو. والله ريكاردو من مامون ابوشيبة ما تفرز. ريكاردو بالجلابية ببقى (ادروب). ادروب حقو ما بخلي. قالوا ليك (ادروب) اول مرة يدخل تمرين للهلال. مشى الاستاد بدري. اول ما دخل كدا ..كورك لبتاع الجبنة. شرب الجبنة. كورك لبتاع التسالي. اكل التسالي. كورك لبتاع قصب السكر. ادروب اصلو ما بحب يقعد ساكت. التمرين بدأ. هيثم مصطفى (حفظه الله ورعاه)...دخل يسخن. ادروب كورك لبتاع الجبنة ..قال ليهو دي جبنة تجيبها لي ..انت ما شفت البرنس دا بسخن كيف. ادروب ..كيفتو التسخينة اكتر من (الجبنة). ادروب عاين للزول الجنبو وقال ليهو : والله نحن في الاقاليم ضاعين ساكت ..عليك الله شوف جنس التسخينة دي. شوية كدا ..مهند الطاهر شات ليهو كورة...ضربت في العراضة ..ونزلت دخلت قون..لمن ادروب اتبسط. ادروب تاني عاين للزول الجبنو وقال ليهو : والله نحن ساكت بنلوم في ناس موسي الزومة. الشغل دا ناس موسي الزومة ما بقدروا عليهو. في اثناء الكلام كدا ..سادومبا قام جاري... ادروب عض ليك العراقي وعمل فكيك ..قال سادومبا دا جريتو دي ما جرية زول ساكت...تكون في طيارة وقعت. الشيء شنو؟. شيء تشوف ..وشيء ما تشوف. الباشا ليهو حق يزعل من مازدا. الباشا هسه ذنبو شنو؟. المهم ادروب حضر التمرين ..وطلع مبسوط. اليوم التاني سافر رجع اهلو. هناك في البلد أي زول بقول ليهو اها يا ادروب جبت لينا شنو؟. ادروب بمسك الزول وبقعد معاه في الواطة ..ويقعد يحكي ليهو عن تمرين الهلال. الزول لمن يتبسط من (التمرين). ادروب يقوم ..ويقول للزول اهات احسن ليك اجيب حاجة من الخرطوم وإلا احكي ليك عن تمرين الهلال. الزول طوالي بقول لي ادروب احكي لي عن تمرين الهلال. ادروب يشيل ويقص عن تمريرة هيثم ..وجرية سادومبا وهوبة مهند. طبعا في كلمات ادروب بزيدها. جرية سادومبا ..ادروب عملها (صاروخ) عديل. هسع ادروب دا ما موضوعنا. موضوعنا (ريكاردو). يا ناس المريخ اوعكم حسن محجوب يقعد ليكم مع ريكاردو ..انا كلمتكم. واوصيكم بي حاجة كمان ..ريكاردو دا ما تخلوا يحوم كتير في ام درمان. لو مشى (الثورة) لي ناس حسن محجوب اقنعو منو. ريكاردو بتسودن. لو دخل الحارة الرابعة ساكت خلاص.. منو العوض وعليهو العوض...اما لو وصل الحارة 61 في الثورة ...ننصحكم تبقوه مدرب حراس. ما بنفع ليكم (مدير فني) تاني. بالمناسبة نحن ريكاردو دا قعد معانا تلاتة اعوام ..كلمة بالعربي ساكت ما قالها. شغال معانا بالرطانة بس. هسع انتوا تخربوا لينا. ملحوظة : غايتو الواحد لما يكون عاوز ليهو سبب. هوامش خالد بخيت قرأت له تصريح في موقع (سودانا فوق) كان على هذا النحو: (اكد مدير الكرة بنادى الهلال كابتن خالد بخيت فى اتصال هاتفى مع (سودانا فوق) قبل قليل انهم فقدوا الاتصال بلاعب الهلال الكاميرونى اتوبونج والذى اكد لهم وصوله فجر اليوم واضاف بخيت ان اتوبونج اغلق هاتفه الجوال ولم نتمكن من الوصول اليه واوضح لا نملك جديد عن حضوره بالرغم من تاكيداته لنا بانه سيصل فجر اليوم ولكن لا ندرى ما الذى حدث وقال بخيت ظللنا نتصل على جواله دون جدوى ولكننا وضعنا له رسالة هاتفيه لكى يتصل بنا وفى رده على سؤال ل (سودانا فوق) حول موعد وصول فلنتاين ويوسف محمد قال انهم فى دائرة الكرة لا يعرفون متى يصل هذان اللاعب فالمطار مغلق وليس لدينا معلومة عن حضورهما لكى نعطيكم اليها). يا خالد بخيت ..التصريحات دي ما تصريحات مدير كورة. من هسه عاوز تلخبط لينا. ما معقول تطلع وتقول لينا فقدنا الاتصال بلاعب الهلال اتوبونج. نحن في فيلم اجنبي. حتى لو فقدتوا الاتصال به ..هذا ليس امرا خطيرا ..عشان تطلع وتصرح بذلك. هواتوبونج دا في (حرب) ..عشان تقول فقدنا الاتصال به. يمكن في الجو. ح تتصلوا بيهو كيف؟. دما ممكن تتبرع من نفسك وتقول اتوبونج قفل تلفونو. القال ليك قفل تلفونو منو؟. انتوا ليه بتحالوا تجرموا اللاعبين. يمكن (البطارية) نزلت. ليه طوالي كدا قلت (قفل تلفونو). خالد بخيت اتبرع تاني وقال وضعنا له رسالة في هاتفه ..متى ما فتح جواله سوف يجد الرسالة. هى رسالة وإلا (كورة) البتضعها دي. هذه تفاصيل خاصة بكم ..مفروض ما تطلع للاعلام. يعني تضربو لي لاعب تلقوا تلفونو مقفول ..ما مفروض تطلعوا في الجرايد والمواقع وتقولوا لقينا تلفونو مقفول. ترسلوا رسالة ...ما مفروض تقولوا لينا نحن رسلنا رسالة. دي تفاصيل خاصة بيكم انتوا. اما عن يوسف محمد وفلانتاين فان خالد بخيت قال ..والله نحن ما عندنا معلومة. طيب المعلومة عند منو؟. ووقت ما عندكم معلومة .بتتكلموا ليه ..ما تسكتوا. عاجل : تعال هنا (المنقا) وينها في العمود دا.
