· عندما تغيب الارادة ...وتضعف الرغبة تغيب الانتصارات ...وعندما نفتقد ل (الروح) ..نفقد اي شيء. · اصبحنا نلعب في مدني ..فنفقد امام الاتحاد (نقطتين)..نشوف لينا اعذار ..نقول ما مشكلة ...الهلال كان مغلوب 0/ 2..وعدنا بي (نقطة). · رجعنا في شوط المدربين. · نقطة احسن من لا شيء ..لا سيما وان الهلال وقتها كان يستعد لمواجهة افريفية هامة. · مالها (النقطة)..عيبوها لي؟. · نقطة في اليد ..ولا الف طاير. · ناس المريخ لو لقوا (نقطتنا) دي يضبحوا ليها. · والله نحن ما غايظانا (نقطة) مدني ...نحن غايظنا (لسان) حداثة الطويل دا. · عشان طولة لسان (حداثة) ..ناس الاتحاد ديل مفروض تضربوهم خمسة. · كل ما تفتح ليك جريدة ..تلقى (حداثة)..الزول دا غندور ..وإلا سيد الخطيب وإلا امين حسن عمر؟. · حداثة دا ما فاضل ليه إلا يكون في وفد التفاوض مع الحكومة في اديس ابابا. · ملعون ابوك (نقطة)...خلت لينا (حداثة) زي مورينهو. · كل يوم عامل ليه (محاضرة) في جريدة. · تقول جاب ليه (نقطة) من نفط الجنوب ...من جوبا رأسا. · يا اخوي الهلال الايامات دي لو قابلو (قطر) بشيل منو (نقطة). · قعدنا نصبر في نفسنا ..ونتقبل بالامر الواقع ...ما في فريق ما بخسر ...(برشلونة امس خسرت 0 /4 ..تقول كانوا لاعبين في الكاملين). · قلنا بينا وبين نفسنا ..اكيد غارزيتو عمل حسابو عشان مباراة الاياب امام سيوي العاجي. · النقطة دي بي فهم ...(غارزيتو) دا ما بفقد (نقاط) ساكت. · اكيد دي (خطة) لي سيوي...(انتوا ما قايلين اعلام الهلال قال غارزيتو ما عاوز يكشف اوراقو). · اوراق شنو؟..هسع لو قلنا (سنكارا) دا عندو (اوراق) في زول بصدق. · سنكارا ..اوراق ثبوتية ما بتكون عندو. · سنكارا دا ..(احلف عليه)...بعد سنة ونص ح يجينا زي يوسف محمد وايفوسا ويقول عاوز (قروشي). · ينطط في عيونو ..تقول ببيع في فجل. · نوع ديل ...بس بظهروا وقت يكونوا عاوزين قروشهم. · ما بتحس بيهم إلا وقت يظهروا ليك ويقولوا عاوزين حقهم...في الميدان ما عندهم اي اثر. · سنكارا دا مفروض تشوفوا ليه (طرادات كتيرة) من هسع. (بتعرفوا الطرادة) ..تديهو حقو..عشان يتخارج من الان ..ما عاوزين نشوفو بعد سنة ونص في شارع البلدية. · ما تزيدوا في (الطرادات) قرش. · حاسبوه بالفكة دي. · والله مفروض تعطوه حقو (سمك)..عشان يتخارج سريع. · امس شفتوا سنكارا دا ..قطع ليه كورة – ثبتها على صدرو ..واتجاوز المدافع ودخل الخط ..بدل يلعبها على رأس خط 6 الموجود فيه كاريكا وتراوري وساني ..وداها (الكشافات). · هسع دا فرقو شنو من (موسى الزومة). · الناس كلها بتعاين في (الشبكة)..ودانا (الكشافات). · الله يدينا الصبر بس. · بلعنا (نقطة) مدني زي حبوب الملاريا...(والله لا بتتبلع ولا حاجة). · جينا في نفس الاسبوع ...طلعنا امام سيوي العاجي من دور ال (32). · نحن نطلع من دور ال (32). · دا شنو؟...انتوا ما قلتوا فقدتوا امام اتحاد مدني (نقطتين) عشان تتأهلوا في البطولة الافريقية. · لا لقينا بلح (الدوري الممتاز)...ولا شفنا عنب (البطولة الافريقية). · اتصدمنا تاني. · المجلس استقال. · قعدنا نحنس. · يا جماعة ما كدا ...يا جماعة اصبروا ...يا جماعة روقوا. · الفيفا ظهرت لينا زي (النسابة)...يوسف محمد بي جهة ..وكامبوس بي جهة ..وايفوسا عشان شفقان جاء براهو. · ديل فكيتوهم لينا من وين؟. · جنسهم شنو ديل؟. · كلهم جونا في وقت واحد كدا زي (سيد البيت ..وسيد اللبن ..وسيد الدكان). · زي يوم الاحد (الصباح)..اي زول عاوز منك قروش يجيّك يوم الاحد الساعة (9) صباحا. · الما بجيّك ...بضرب ليك. · والما بضرب ..برسل ليك (رسالة) ..يقول ليك بجيّك بعدين ..اشرب معاك شاي المغرب. · شفتوا من يجيب ليك سيرة (شاي المغرب) دا ..اعرف طوالي انو الزول دا عاوز قروشو. · ما تجهز (الشاي)..جهز (القروش)..وإلا اقفل التلفون واتخارج من بدري لو ما عندك ليه شيء. · جينا لعبنا امام الاهلي الخرطوم ...في الخرطوم ... قلنا دي (3) نقاط جاهزة. · ما عاوزة اي تعب. · مهند الطاهر لو شد حيلو براهو بجيبها. · لكن للاسف الشديد في الخرطوم فقدنا (نقطتين) امام الاهلي الخرطوم. · دا شنو دا؟. · بعد كدا مفروض ناس مهند الطاهر ديل يطلعوا ليهم (بدل فاقد). · معقولة نخسر نقطتين في الخرطوم. · قلنا اكيد (غارزيتو) عندو رأي. · اكيد عندو فهم في رأسو. · تصوروا طلع لا عندو (فهم) ولا حاجة. · طلع قاعد ساكت. · اتحرجنا تاني ..احبطنا تاني ...ونفسنا اتقفلت...(السمك) بقى لينا زي (الطعمية). · اتلخبطت لينا اي حاجة. · دا شنو عدم الروح دي؟. · لعبنا امام هلال كادوقلي في (المقبرة)...في استادنا ..حسمنا ليك بي هدف. · تصوروا هلال كادوقلي في اخر ثواني من عمر المباراة اتعادل معانا. · دي كانت بتحصل في استاد الهلال. · برشلونة (ايام مجدها قبل الاربعة)..ما كانت بتحلم تتعادل معانا في استادنا في اخر ثواني من عمر المباراة. · سنكارا (سارح). · سنكارا تاني. · البشوف الهدف الذي سجله هلال كادوقلي في الهلال في المقبرة ..يقول (دفاع) الهلال طوالي يودوه يلعب ليه موسم في الشجرة او الحرية او الاحرار ..عشان يتعلموا كورة ويرجعوا. · ديل عاوزين يدخلوا (اساس) من جديد. · يبدأوا من (الحرية)..ويجونا جاي. · معقولة يا سنكارا ..الموسم كلو بترفع في ايدك. · تقول جيت البلد دي تنقب في الدهب. · كورتك دي ما كورة هلال. · كورتك دي كورة (دهب) ساكت. · يكون في غلط. · الزول دا بدل ما يمشي (قبقبة)..جانا هنا في الهلال. · عليكم الله هسع ذنبو شنو؟..مباراة ريال مدريد شغالة .....وانا اقعد اكتب عن (سنكارا). · ليه بتعملوا فينا كدا. · الناس قاعدة تتابع في المباراة ...وانا قاعد اكتب عن (سنكارا)...هسع لو اشتكيت سنكارا في الفيفا في حرماني من متابعة مباراة الريال ..عليكم الله ما بجمدوا نشاطو. · نخش على صدمة امس. · الهلال والامل عطبرة. · الشوط الاول من هذه المباراة ..اي لاعب مفروض يطلع شعار الهلال ويعتذر للجمهور. · الهلال ما كدا. · شوط زي (الطين). · ما بتعرف المحترف الاجنبي منو ساير ام تراوري؟. · مهند الطاهر بيلعب على الواقف ...تقول ما مشى مع البعثة عطبرة. · مهند تقول قاعد قبلو في الخرطوم ..ما عاوز يتعب ..لا عاوز يشوت ..وفوق دا اي كورة مقطوعة منو بتشكل خطر على الهلال. · مدثر كاريكا ..رايح منذ بداية الموسم. · مباراة امس ..كاريكا كان فيها مفروض يقعد في (الكنبة) من الدقيقة الخامسة من عمر المباراة. · ومساوي في كل مباراة يكرر الاخطاء البقع فيها كل مرة. · تراوري ...خلاص بقى يركز في (الحلاقة). · اما نزار حامد ...والله انا ما عارف ماشي وين؟. · يشيل الكورة ويجري. · جاري وين؟...ما عارف. · نحن في مباراة امس ..قلنا المشكلة في (غارزيتو). · قلنا الروح ترجع ...والرغبة تعود. · لكن وضح ان المشكلة فيكم انتوا وليس في غارزيتو. · لعب بدون روح ..وبدون رغبة ..ووقوع في نفس الاخطاء ..وعدم احساس بالزمن. · الوقت ماشي ..وناس الهلال يطلعوا في الكورة برة. · الشوط التاني قلنا أحمد آدم يعمل حاجة. · لا عمل ...ولا حاجة. · عك ..وعدم قدرة على الوصول الي المرمي ..وفرص ضائعة. · ونقطتين ...تاني ضاعت في عطبرة. · نقطتين بكل سهولة نفقدها هكذا في عطبرة بسبب الاستهتار وعدم التقدير والمسؤولية. · بقينا في كل مباراة نفقد نقطتين. · في كل مباراة نرجع بي (نقطة)...تقول في حصة انشاء. · هسع ناس خالد بخيت يقولوا عاوزين نعمل للاعبين (يوم ترفيهي). · نقطة عطبرة دي محتاجة لي (يوم ترفيهي) سريع. · حالتنا بقت صعبة. · نحن البعمل لينا يوم ترفيهي منو؟. · معقولة كل مباراة نطلع بي (نقطة). · دا الهلال ..وإلا فريق تاني. · قفلوا النادي (24) ساعة ..وحاسبوا اللاعبين ..وشوفوا الناقص شنو؟. · اعيدوا لهم الروح القتالية ..واعيدوهم لنا ...كما نعرفهم. · راجعوا خطوط الفريق منذ الان ..وابحثوا عن اضافات حقيقة للهلال في يونيو. · احسموا موضوع المدرب منذ الان ...(والله لا بنقدر ننتظر الي يونيو ولا بنكضب). · لو انتظرنا ب (آحمد آدم) للدورة الثانية ..نقطة تانية ما بنلقاها. · الهلال يحتاج الي (روج جديدة)...والروح يمكن ان تكون في التعاقد مع مدرب كبير ..واسم عظيم. · ما معقول تشيلوا غارزتيو ..وتجيبوا أحمد آدم. · والله نحن تاني ما بنستحمل نفقد اي نقطة. · الريال مغلوب تلاتة الي الان. · يعني في الدقيقة 55 بروسيا دورتموند جاب التالت. · انت وقت برشلونة والريال ..بتغلبوا كدا .....مالك زعلان على الهلال. · انا زعلان على (النقطة). · ملحوظة : والله انا خايف يلم فينا اهلي شندي نقاطنا العندنا يشيلها مننا. هوامش · الاهلي شندي برضو كالعادة ..اتعادل في شندي امام النيل. · الاهلي دا يكون فاكر النيل ...الاسماعيلي. · متى ينتصر الاهلي في شندي؟. · الاهلي في شندي بنتصر فقط على المريخ. · الريال مغلوب الي الان اربعة. · الايامات دي ...برشلونة وريال مدريد ..بقوا متلنا ..يتغلبوا عادي بالاربعة. · والله نحن ساكت بنلوم في ناس الهلال. · برشلونة امس انضربت اربعة ..زي طلاب الصف الثالث. · بس ناس مرحلة الاساس. · والريال حتى الان مغلوب اربعة. · ديل شنو البقلدوا فينا ديل. · يا احمد الحاج ..خلينا نكمل مباراة الريال وبروسيا ...ونرسل ليك العمود. · نشوف نهاية الكورة دي شنو؟. · خلينا نمرق شوية من كورة الهلال والامل. · نقطة عطبرة دي ...الطلوع منها ما ساهل. · مجلس ادارة نادي الهلال من اجل عودة الجماهير ..وعودة الروح ..لا بد من ان يتعاقد مع مدرب كبير. · ولا بد كذلك من الترتيبات والتخطيط منذ الان لتسجيلات يونيو. · بي صراحة ...الهلال ذاتو محتاج ليه لي (والي) مستجعل كدا. · المريخ استعان بي جمال الوالي. · ونحن ورطتنا دي ما بطلعنا منها غير (والي). · شوفوا لينا ( والي) هلالي كدا. · يدفع لينا الغرامات ..ويسجل لينا ..ويجيب لينا مدرب كبير. · البرير لو بعمل الحاجات دي ..يقعد طوالي. · الامين البرير ...محتاج ان يقوم بهذه الاشياء. · عاوزين اعادة ثقة. · ان شاءالله ترجع لينا (اتوبونج). · المهم اعمل اي حركة. · اهم من كل ذلك ...التعاقد مع مدرب كبير. · الهلال لا بد من الترتيب منذ الان للموسم القادم. · اذا اردنا ان نتقدم افريقيا في الموسم القادم ..يجب ان نخطط لذلك منذ الان. · ممكن الهلال يحضر مدرب الان ..ويتابع الدوري فيما تبقى من مباريات الدورة الاولى ..على ان يشرف على الهلال أحمد آدم حتى الدورة الثانية. · المدير الفني لا بد من ان يحضر الان عشان يشوف الحاصل ..وعشان يعطي ذلك دافعا للاعبين ..وللجماهير. · لذلك لا بد من حسم امر المدير الفني الان. · شريطة ان يكون المدير الفني اسم كبير. · لن نقبل باقل من غارزيتو. · ناس الهلال ديل رفهوا ليهم بعد كدا في اهرامات الجيزة. · الترفيه في الجبل ...ما جايب حقو. · كل ما اشوف كورة الريال ..القى ليك الريال لاعب تحت الضغط. · الحارس يطلع في الكور من القون ..والمدافعين يشيلوا ويطلعوا في الكور كورنر. · يا احمد كورة الريال دي لسع ..احسن نرسل. · عاجل : نقطة – نقطة الليل نعدو.
