تصريحات غارزيتو الاخيرة ..تؤكد ان الرجل اصيب بالخرف الفني (وهو بالتأكيد ليس خرفا مبكرا) ..فقد قدم لنا غارزيتو نفسه الان في (كوكتيل) من المتناقضات الغريبة والعريضة. دا (تناقضات) على شوية فرنسي مع شوية ايطالي ، بتدينا (غارزيتو). كنت احسب حتى قبل اقالة غارزيتو ان استمرار هذا المدرب مع الهلال فيه فائدة للهلال وان المصلحة العامة تستوجب ان يستمر غارزيتو مع الهلال حتى لو كان في استمراره هذا سوف يدفع الهلال ثمنا غاليا...ونحسب دائما ان بقاء المدرب خير من ذهابه. نحن كنا مع استمراره حتى آخر مباراة ادارها غارزيتو مع الهلال ، ندعو للتمسك به ، والمحافظة عليه. وقد دعمنا هذا المدرب الفرنسي حتى ابان ازمته مع هيثم مصطفى ..وان انتقدناه في كثير من الامور إلا اننا ثبتنا وجهة النظر التى تدعم استمرار المدرب وقيادته للهلال...وقد رفضنا مرارا وتكرارا رحيل غارزيتو ..وحسبنا في استمراره استقرارا للهلال ونصرة لمجلس الهلال ان يبقى المدرب ويستمر في الادارة الفنية للهلال وهو مرفوض من الجميع. لكن الان اتضح لنا اننا كنا (مغشوشين) فى هذا المدرب (الخدعة) ...وان الهلال كان يمكن ان يذهب بعيدا في البطولات الافريقية العام الماضي وهذا العام لو ان الهلال كان يقوده مدير فني غير هذا المدرب. لا اريد ان اضغط على (غارزيتو)..ولا احب ان اقسو عليه حتى بعد هذا الذي جاء منه ..وقد تحاشيت التعليق على الكثير من تصريحات غارزيتو الغريبة والمتناقضة. لكن كان لا بد لنا من العودة ..فقد صار (غارزيتو) في كل يوم يخرج لنا بامر جديد ..واوشك ان يشكل (حملة فرنسية) على الهلال ، الذي (ينبش) في اسراره الان. نحن في البدء نقر ان غارزيتو واجه ظروفا صعبة في الهلال وان مجلس الادارة بقيادة الامين البرير قصّر في الكثير من الامور المادية. ولا نعفي مجلس الهلال باي حال من الاحوال عن هذا الذي وصلنا اليه ..ورمتنا فيه الايام. إلا ان غارزيتو مع هذه الاوضاع كان مستمرا وقايدا للهلال فنيا بل تقاعد مع الهلال في الموسم التاني ووقع عقدا مع المجلس كما يدعي (وبطرفه الان عقده مع الهلال) رغم الكلام والحديث الذي اخرجه غارزيتو عن الهلال في الموسم الماضي. انت يا غارزيتو وقت الامين البرير ما بفهم كورة ..وما عندو قروش ..وما حقق ليك مطالبك ..(البخيلك تتعاقد معاهم تاني شنو؟). اغرب من هذا ان غارزيتو الان (اقيّل)..ولم يستقل ..ليظهر لنا في هذا الموقف البطولي وكأنه رفض الهلال واستقال بسبب اوضاعه المادية والادارية. تصوّروا ..غارزيتو بعد ما شالوه ..كان ماشي يقود تمرين الهلال ، الا ان مجلس الهلال قال له اننا لن نتحمل مسؤوليتك اذا ذهبت الي مران الهلال في هذه الاوضاع ، فقد تفتك بك جماهير الهلال. تاني زول بعد ما شالوه ماشي يقود التمرين...(ماشي يقود فريق يتحدث عنه الان بهذا السوء..ويهاجم مجلسه باستمرار). ثم بطلع في هذا الوقت متعففا ..ومتدللا..وكأنه هو الذي رفض واستعصم وأبا. نعرف ان تراجع الهلال في نتائجه ، وان انخفاض مستوى الهلال في المواسم الاخيرة كان ناتجا من اخفاقات (ادارية)...ومالية قد لا يسأل عنها غارزيتو. إلا اننا مع هذا نعود الي غارزيتو ..لنقدم (مركب) تناقضاته ..ونفضح مزاجيته الغريبة ..والتى احسب انه صارت (مفضوحة) للجميع. واظن ان تصريحات غارزيتو خدمت البرير ووضحت ان هذا الفرنسي لا يصلح حتى لقيادة (عجلة) ناهيك عن الهلال بعظيم قدره وتاريخه وجماهيريته. نحن لا نفعل اليوم شيئا غير اننا نأتي ببعض ما جاء من الامين البرير في حوار صحيفة (الاسياد) الذي قدم لنا (غارزيتو) كما هو ..وفضحه كذلك حواره في قناة النيلين اذ (نبش) الحوار غارزيتو. وما بين حوار صحيفة الاسياد المميز وحواره في قناة النيلين يكاد غارزيتو ان يكون (متناقضا) في حوارات لا يفصل بينها اكثر من 72 ساعة. انت يا غارزيتو في شرق النيل عندك رأي ..وفي غرب النيل عندك رأي. الساعة واحدة بي رأي ...والساعة اتنين بي رأي تاني..واتنين وربع بي رأي ثالث. فرنسي على ايطالي على سوداني كدا...(مشكلة) جاهزة. قال غارزيتو مدرب الهلال السابق ..في صحيفة (الاسياد) انه رفض في الفترة السابقة ان يتحدث عن الهلال ومشاكله حفاظا لاسرار البيت الهلالي ( يا سلام)....لا ادري ما الذي غيّر غارزيتو الان ليخرج علينا صحفيا وفضائيا للحديث عن اسرار الهلال. اسرار الهلال دي الان بقت (عجور)..البخليك تتكلم عنها شنو؟. كنا سوف نحترمك لو تحدثت عن (اسرار) الهلال وانت مديرا فنيا ..وكان احترامنا لك سوف يكون اكبر ..لو انك رفضت الحديث الان عن اسرار الهلال بعد الاقالة. غير انك صمت في موقع الكلام ..واتكلمت في موقع الصمت. كان سيحفظ لغارزيتو موقفا عظيما لو انصف هيثم مصطفى وهو مديرا فنيا للهلال ..بدلا من (تقطيع) قائد الهلال في اكثر من حوار عندما كان غارزيتو مدربا للهلال وهيثم مصطفى كابتنا له. للاسف ، والاسف الشديد كمان - غارزيتو عندما كان مدربا للهلال كان يهاجم في هيثم مصطفى صباح مساء ..وكان يستفزه ويعمل لاخراجه من طوره. وقد قال غارزيتو في حواره مع حسن فاروق في صحيفة (الراي العام) عن هيثم مصطفى كلاما لا يقبله لاعبا تحت السن دون (17) سنة...وقال انه ابعده من حساباته ، وقد حوله ليلعب مع لاعبي المرحلة السنية ..ونقل عن غارزيتو قوله ان (حذاء) هيثم الذي احضر له من اوروبا إلا يركب فيه (موتر). الكلام دا كلو هل لم يكن بقناعة غرزيتو ..وهل كان المدرب الفرنسي في ذلك ينفذ في توصيات رئيس النادي ..(طيب وينها شخصيتك ..شابكنا انا مدرب كبير ..وانا عندي شخصية). هذا الموقف ذكرني ليكم بي (تعريجة) كدا ..بس يا جماعة (الكلام دا ما يطلع من العمود دا). واحد في مؤسسة حكومية ..قالوا ليه : اسمك رباعي. قال ليهم والله انا عارف لغاية الاسم التاني ..رباعي دا إلا اتمو ليكم بالمدام. هسع غارزيتو عاوز يتمها لينا بالمدام. الان غارزيتو (بعد ما شالوه) يخرج ويقول ان البرير رئيس نادي الهلال طالبه بشطب هيثم مصطفى لانه (بتاع مشاكل)...وقد شطب غارزيتو هيثم مصطفى واخرج تقرير فني يدعم شطب هيثم مصطفى وعلاءالدين يوسف. التقرير الفني دا طالع من ادارة المخازن. لو ان هيثم مصطفى مستمرا مع الهلال الي الان ..لقلنا ان غارزيتو رفض شطب القائد ..وابقى عليه...ولحظفنا لغارزيتو موقفا. لكن هيثم الان مشطوب ..واذا كان الشطب قد تم بتوصية من الامين البرير فان غارزيتو يصبح مدرب بلا قيمة وبلا شخصية ..وان كان الشطب تم بقرار فني فان الواجب هنا يفرض على غارزيتو ان يعترف بذلك ..وان يبقى على موقفه ، وان يتحمل المسؤولية ..لا ان يتبدل ويتلون لأن مجلس ادارة نادي الهلال اطاح به. بعدين غارزيتو في هذا تمثل بي انه ابعد (موبوتو) في مازمبي اها موبوتو دا برضو قال ليك ابعدو (البرير). عليه فان المسؤول الاول والاخير عن شطب هيثم مصطفى من الهلال هو غارزيتو ..سواء كان ذلك بتوصية من الامين البرير او لا. جمعتنا الكثير من الحوارات والمهاتفات التلفونية مع هيثم مصطفى وهو لاعب في الهلال وهو لاعب في المريخ ..وكان هيثم مصطفى يقول لي دائما ...ان اكبر (خدعة) هو الفرنسي غارزيتو ..وانه مدرب ضعيف الشخصية..وهو لا قيمة له حتى (فنيا)...وكنا نختلف معه في ذلك. وكان هيثم مصطفى يصر ويقول اننا مخدوعون في هذا المدرب ..(لانه كضبة كبرى)..وقد اكد ذلك هيثم مصطفى في حواره في قناة الشروق عندما ارجع هيثم مصطفى البطولات التى حققها غارزيتو مع مازمبي لعوامل اخرى ليس من بينها (غارزيتو). هيثم مصطفى في ذلك الوقت المبكر الذي صنف فيه المدرب الفرنسي غارزيتو ..واكد فشله اثبت من خلال ذلك التقويم ..بعد نظره وخبرته ودرايته ..فقد ثبت كلام هيثم مصطفى في غارزيتو وتأكدت نظرة هيثم مصطفى الان في غارزيتو ..وقد كنا نحسب ان الخلافات هى التى جعلت هيثم مصطفى ينظر تلك النظرة لغارزيتو الذي اتضح لنا الان انه (اي كلام). نقطة اخرى في حوار (الاسياد) تدين الفرنسي غارزيتو ..وهو قوله عن المحترفين (البلغار) الذين اتى بهم مجلس الهلال للتعاقد معهم ...بانهم اي كلام ..وقد استدل غارزيتو في ذلك بنظرية تنطبق عليه ، وذلك حينما قال ان (بلغاريا) ما ممكن يأتي منها لاعب مميز عشان يلعب في السودان. طيب يا سيد غارزيتو انت خليت (ايطاليا) موطنك الاصلي ..وخليت (فرنسا) ذاتها ..وجيت السودان عشان تعمل ليك منظمة خيرية. برضو ممكن نقول ليك ليس هناك مدرب متميز ..وفي سنك دي بجي يدرب في السودان. ويدرب منو في السودان؟. يدرب الهلال بكل مشاكله التى تحدثت عنها ..ومجلسه الما بعرف كورة. متقدمة بلغاريا ام ايطاليا؟. بل متقدمة بلغاريا ام فرنسا؟. يا غارزيتو عليك الله تاني وقت (تخرف)..خرف ليك بي شيء معقولة كدا. خرف ليك بي حاجة تصدق. ما تبقى زي ود التورلي ..القالوا ليه ود المحيتري اشتري ليه (لوري). قال ليهم : البسوقو ليه منو؟. انت مالك ؟...ان شاءالله يقرشو في (ذاكرة) الموبايل. ملحوظة : فرنسي ما عندو رأس. هوامش ريال مدريد يلعب اليوم امام دورتموند ...في مباراة صعبة اشبه بالمباريات التى يوضعنا فيها الهلال. الليلة يا ناس ريال مدريد إلا رونالدو يبقى ليكم (بشة) عشان تتجاوز النادي الالماني. البطولة الاوروبية هذه المرة غريبة ...اندية اسبانية في مواجهة اندية المانية. الاندية الاسبانية ..خسرت بالاربعة..يعني الالمانية كسبت بنفس النتيجة في جولة الذهاب. ما سوف تنتهى عليه مباراة اليوم ...سوف تنتهي عليه مباراة الغد. رغم قوة الاندية الالمانية والتى تلعب بدفاع منظم ..وهجوم مولع نار..إلا ان الاندية الاسبانية ممكن تفعلها. رونالدو وميسي يمكن ان يصعدا بالريال وبرشلونة رغم المهمة المستحيلة. الغريبة رونالدو كان بشكي من اصابة وهو غير جاهز تماما ..وميسي ايضا كان يشكي من اصابة وهو غير جاهز بدنيا. ظروف الريال وبرشلونة تتشابه. زي ظروف الهلال والمريخ هنا. ديل اتغلبوا اربعة ...ديك اليوم التاني اتغلبوا اربعة. نحن كنا فاكرين نفسنا برانا. اتاريها ...الحكاية بايظة من كبارها. برشلونة طبعا بنت خالة الهلال. اما الريال فهو اخونا لزم. انتوا يا ناس المريخ شوفوا ليكم (بلد وليد) اتلموا عليها. عصام الحاج عاوز يورط جمال الوالي ..عاوز يمسك ليه لجنة عشان تحل الديون ..وتعمل استثمارات ...وتعيد بناء الفريق. بعد ما تعمل اللجنة الكلام دا ..عصام الحاج يجي بي مجلس تاني. لكن جمال الوالي عرف ليهم ..بدل ما يمقلوبه ..مقلبهم. جمال الوالي رفض رئاسة اللجنة. خايف ناس عصام الحاج يقوموا يسحبوا الاستقالة. معقولة ..المريخ ما لاقين ليه رئيس. المريخ بقى زي اهلي مدنى. ما في زول موافق يبقى رئيس. الحمدلله ...نحن ناسنا في الهلال يتخاطبو على الرئاسة. صلاح ادريس طلع الي الان ما عارف يرجع كيف؟. الكاردينال ..محاولته كلها باءت بالفشل. المريخ دا يا جماعة لو غلبكم...مسكوه (المحلية). مسكوه (محلية) ام درمان. هم بتصرفو. ان شاءالله يعملوا (كوبري). معقول نادي (4) شهور يفتشوا ليه لي (رئيس). الوالي لو ما وافق ..شوفوا ليكم (محافظ). الهلال والاهلي مدنى اوعكم من حكاية (النقطة ولا صمة الخشم). عاجل : غارزيتو دا ناوي يقعد كتير في البلد دي.
