بقينا في استادنا ..نقعد نتلفت (تقول في صالون حلاقة) ..بقينا نخاف على الهلال حتى من اهلي مدنى الذي يحتل مكانة متأخرة في روليت الدوري الممتاز. الاهلي مدنى ..(مدرب ما عندو)..بقى يعمل لينا مشكلة.
الاهلي مدني ...(مجلس ما عندو)..عاوز يعطّل الهلال في استاده..(هو قالوا ليكم نحن ناقصين).
بقينا نلقط في النقاط نقطة نقطة ...زي (الختة).
الاهلي مدنى امس وضع الهلال في مطب حقيقي ..وشكل خطرا كبيرا على الهلال.
آخر عشرين دقيقة من عمر المباراة ..دفاع الهلال ارتكب فيها امام منطقة الجزاء قرابة ال (10) مخالفات.
هذه المخالفات لم تكن امام فريق خطير ..او كبير ..تلك المخالفات كانت امام الاهلي مدني الذي كان يفترض ان يتعامل معه دفاع الهلال بوعي وثقة اكبر.
يعني ما في داعي للمخالفات دي.
علاءالدين بابكر كورته (محفوظة)...منذ (10) سنوات ..نفس الحركات ..ما في اي جديد.
مع ذلك شكل علاءالدين بابكر خطر على دفاع الهلال.
هذا مع الاعتبار ، والتسليم ان معظم هذه المخالفات ..قاطعها الحكم من رأسو.
لكن مع هذا كان يفترض ألا يمنح لاعبي الهلال الحكم مثل تلك الفرص لكي يقعد يشرع لينا ..(مخالفات من رأسو).
اي كورة مشتركة مخالفة ضد الهلال ..(بغض النظر عن اللاعب المرتكب المخالفة).
اي (همسة) على رأس خط 18 ...مخالفة لصالح فريق الاهلي مدني.
همسة لمسة نسمة ..(طوالي الحكم بصفّر)....مخالفة وكمان معاها كرت اصفر.
حكم مباراة الامس كأنه جاء من (الهايد بارك) حكم حساس جدا ..ورومانسي جدا ..يصفّر على رأس كل (5) دقايق مخالفة ضد الهلال على رأس خط 18 الهلال.
لكن مع هذا نقول ان الهلال هو الذي يضع نفسه في هذه الوضعية (الانعاشية) الخطيرة.
تشعر بان اغلب لاعبي الهلال يلعبون بدون (روح)..بخلوا (الروح) في غرفة اللاعبين وبدخلوا الملعب.
لذلك نحن نمنح لاعبي الفريق الخصم ..روحا حماسية ..بسبب الروح الانهزامية التى نلعب بها.
حتى المدرجات اصبحت خالية ...جمهور الهلال انقطع من مباريات الهلال ..فخلق تلك (الوحشة) في مدرجات استاد الهلال التى افرغت من إلفتها ..وافتقدت الهتافات والنغمات المحببة التى كانت ترددها المدرجات فتمنح لاعبي الهلال الروح والحماس والقوة والانتصار.
اهداف الهلال كانت تصنع في (المدرجات)...تتطبخ في (المدرجات)..فتخرج من (المدرجات)...وتسجل من (المدرجات).
غابت (مدرجات) الهلال ..وكاد ان يغيب الهلال...لذا نحن لا نحمّل اللاعبين المسؤولية كلها ...الجمهور ايضا يتحمّل المسؤولية بسبب انقطاعه عن دخول المباريات.
الهلال يفتقد للمدرجات...اذا عاد الجمهور سوف يعود الهلال.
لا نريد ان نشخّص حالة الهلال كليا اليوم ..فقط اردنا ان نضع شارة صغيرة..قبل محاسبة اللاعبين.
هذا طبعا مع قصور مجلس الادارة وقصور في الاعلام ..وهذا يعني ان (المشكلة) نتحمل وزرها جميعا ..وكلنا نشارك بنسب معينة في هذا التراجع الذي يشهده الهلال في الفترة الاخيرة...وهو تراجع عام في الكورة السودانية ..ليس في الهلال وحده.
اخير نحن ...ناس المريخ ..عندهم مجلس يستقيل يوم الاربعاء ويسحبوا الاستقالة يوم الاحد.
جمال الوالي يوافق على العودة يوم الاربعاء ..يرفض يوم الاحد.
الكوكي ..ما معروف حتى وقتنا هذا ..هل هو مدرب المريخ ام لا.
محمد موسي مختلف مع خالد احمد المصطفى ...والعجب زعلان ...وفي كل مباراة المريخ بفقد (3) نقاط.
نحن بنفقد نقطتين ...هم بفقدوا (3) نقاط.
نحن افضل من المريخ الف مرة.
دعونا نعود الي المباراة (المريخ خلي لي بكرة) ...خلونا في كورتنا نبحث عن ازماتها التى كانت ماثلة امامنا في مباراة الامس.
الهلال في مبارياته الاخيرة ظل يلعب (الشوط الاول) باستهتار ..ويضيّع اسهل الفرص ويتعامل مع (الوقت) بعدم مسؤولية.
كأن (الشوط الاول) دا ما حقنا ..زي كأننا جايين حفلة تعارف..ما في زول عاوز يتوسخ او يتعب اي واحد فيهم يلعب باطراف اصابعه.
زي كأنو اي واحد قاعد ليه في (تربيزة) مطرفة ...وبسمع في الحفلة ...وما في زول شايفو.
يضيع مننا (الشوط الاول) نسبة لسوء التصريف معه ..ونتيجة لاهمال الاحساس به.
حتى اذا جاء (الشوط التاني) نفسنا قام ..اهتزت الثقة في لاعبي الهلال وارتفعت عند لاعبي الفريق الذي يباري الهلال...(نتيجة لأن الوقت يمضي والهلال لم يسجل بعد).
الى جانب هذا فان اضاعة الوقت من لاعبي الفريق الخصم في (الشوط الثاني) تصبح منطقية ومقبولة ومبررة ..في كل لعبة مشتركة (اصابة).
وفي كل اصابة ..(نقالة) تدخل وتطلع بدون اي حاجة.
عشان كدا نحن بنقول احسموا المباراة من الشوط الاول ..عشان الشوط التاني يكون للمتعة ...وللزيادة...بدلا من ان تحرق اعصاب الجماهير على هذا النحو.
في الشوط التاني في مباراة الهلال امس امام الاهلي مدني ...لو الحكم صفّر لضربة تماس ..(النقالة) تخش وتطلع.
لاعبو الاهلي مدني امس زي كأنهم في (ام روابة)..الواحد فيهم يقع ..ويعتب ..ويطلع ويرجع تاني.
يا اولاد ما تثبتوا ..دا شنو البتعملوا فيه دا ..الواحد منو وليه يقع.
بدون سبب كدا (يقع).
مع ضياع الزمن هذا ..واهداره في دخول (النقالة) وخروجها. (صفارات) الاستهجان من جماهير الهلال بتظهر او بتسمع ، وهي من دون شك تحبط لاعبي الهلال وترفع معنويات لاعبي الفريق الاخر.
هكذا اصبحت كل مباريات الهلال في الفترة الاخيرة ..(الشوط الاول) ما مفهوم هو ذاتو شنو؟.
هل هو كورة وإلا حاجة تانية ما عندها اي علاقة بالكورة؟.
الشوط التاني يأتي ليحرق اعصاب الجماهير ..ويفور دمها.
اسوأ من هذا المستوى الذي يقدمه الهلال في الفترة الاخيرة ..انه اصبح يكتفي ب (هدف) واحد ...هذا الهدف يضاعف الضغوط على لاعبي الهلال ..ويمنح الدافع للاعبي الفريق الخصم من اجل التعديّل.
يمين لو ما (ترواري)...كان بعد مباراة الاهلي مدني دي إلا تعملوا ليكم (يوم ترفيهي).
الحمدلله ان احمد آدم اشركه في الشوط التاني ومنذ بدايته.
بصورة عامة ليس هناك اسوأ من نتيجة 1/صفر (هذه النتيجة مغريّة جدا للفريق الاخر ومحفزة له)...هى نتيجة قابلة للتعديل في اي لحظة (ما عندنا ليها غير انها حارقة للاعصاب) ..خاصة في ظل دفاع الهلال هذا ...(دفاع) اي كورة مشتركة مقطوعة منو...واي كورة عالية بتشكل خطر عليه.
وفوق دا المخالفات تحدث من لاعبي الهلال على رأس خط (18) في اوقات صعبة من عمر المباراة.
كل الاهداف التى استقبلها الهلال في المباريات الاخيرة ..كانت عبارة عن كورة عالية تضرب ليها في (ضهر) مدافع من الهلال ..تأتي للمهاجم ليسجل منها هدف.
شوفوا الاهداف سوف تجدوها (صورة) واحدة ..مكررة ..زي كأنهم صوروا (هدف) واحد ..وعملوا منه (نسخة) لي اي هدف تستقبله شباك الهلال.
هذا مشهد اصبح مألوفا في كل مباريات الهلال (حفظناه حفظ)...لذلك كنا في كل مباراة في الممتاز نخسر (نقطتين) في اخر ثواني المباراة.
اشد ألما من هذا اننا في البطولة الافريقية خرجنا بهدف جاء باخطاء دفاعية (مركبة)..وزاد من وجعته انه جاء في اخر دقيقة في المباراة.
يعني (بلاوي) الوجع كلها اتلمت فيه.
اي حاجة كعبة في الكورة ...اتلمت على ذلك الهدف الذي مازالت (مرارته) في الحلوق.
شلنا هذا (الخطأ) الافريقي ..واصبحنا نكرره في كل مباراة يلعبها الهلال في الدوري الممتاز.
بقينا نصوّر ذلك (الهدف) في كل مباراة.
سامي متأخر ..سيف الدين مساوي (بتنفر)..جمعة بطلع من المرمى - قون عمر بخيت يظهر في الاطار بتكلم مع الحكم.
كل الاهداف تأتي في الهلال على هذا النحو ..(ونحن قاعدين نتفرج).
وما قادرين نعمل اي حاجة.
ربما هذا مستوى ونتائج منطقية في ظل الظروف التى يعيش فيها الهلال.
لكن يجب ان نخرج من هذه الظروف وان نتحرر من تلك القيود ليعود الهلال وتعود الجماهير ..ونشوف الهلال الذي نريد.
نحمد الله ان الهلال امس ظفر بالنقاط الثلاث...وكانت هناك مؤشرات جيدة في المباراة.
سجّل تراوري ..وتصدر قائمة الهدافين...وظهر اكثر من لاعب في الهلال بمستوى جيد.
عاد مهند الطاهر الي مهند الطاهر ..رغم الاخطاء التى يقع فيها وتشكل خطرا على الهلال.
لكن عندما يكون مهند الطاهر متألقا ..فانه يغطي على تلك الاخطاء ويعوض عنها.
كذلك كان نزار حامد في افضل حالاته ..قدم مباراة كبيرة ..وان لم يكن هو نجم المباراة الاول ..فهو من نجومها من غير شك.
نصرالدين الشغيل ايضا كان جيدا في وسط الهلال قدم مباراة كبيرة.
مدثر كاريكا مازال يبحث عن (كاريكا).
سنكارا كلاعب محترف غير مقنع ...لا نريد محترف بهذا المستوى ..سنكارا بمستواه هذا ما عندو فرق من اللاعب الوطني.
كايا كان بسببه يمكن ان يخسر الهلال ..شارك في وقت صعب ..وهو بعيد عن المشاركة.
وكايا مع مشاركاته المستمرة ممكن ان يشكل خطرا على الهلال ..(كيف اذا كان غايب من الملاعب فترة طويلة).
تراوري ..هو المحترف الذي يصنع الفارق ..شارك في الشوط التاني وبأقل مجهود واقل حركة سجل (هدفا) جميلا.
هدف يؤكد انه محترف.
هدف محترفين بحق.
هذا مع ان تراوري لم يشارك في التمارين الاخيرة ...شارك في المران الاخير فقط ..لكن قبلها كان متوقفا.
اضف الي ذلك ان تراوري (عنده قروش من ناس الهلال) لم يستلمها بعد.
يعني امس شارك تراوري وسجل بدون ما يصرف مرتباته ومتأخراته.
وقالوا كمان تراوري امس ما كان (فاطر).
الزول دا لو استمر في التمارين ..وادهو حقو ..وانتظم في وجباته ..وخلى الاستهتار ...ح يكون اخطر محترف لعب في السودان.
