…و…. محمد عبد الماجد سيحة بحلها ليكم يوم الجمعة هدف اكاديمية تشتي (تسلل) …و يا جماعة انتوا ما تزعلوا. الموضوع ما بستاهل يعني شنو لو طيرتوا من بطولة حوض النيل؟. هي بطولة حوض النيل شن طعمها – عشان تزعلوا عليها. عادي ..(جديدة عليكم يعني). متعودة دائما. و… (ادخل في الموضوع). اصلو ما في حاجة بتزعل ، ولا تزعلوا ، ولا تغضبوا…(في زول طبعا بكون اشتر وقت يكون عاوز يشاطر ليه زول الاحزان). بقوم يقول ليه كلام اشتر – لا في السما لا في الواطة. مثلا يمشي ليه لي زول عيان في المستشفي عنده (قلب) ..يقوم يقول ليه : (يا زول ما تشيل هم يمين جدي كان عندو قلب – نفس مرضك دا عاش 7 شهور). اصلو ما تشيل هم. الكلام البقولوه ليك الدكاترة ديل ما تشتغل بيه. انت ما عندك اي حاجة ..صحتك زي الحديد…(لكن عيونك دي مالها شاحبة كدا). عندنا زول (اشتر) تاني النوع الوقت تجي (كديسة) مارة قي البيت بقوم يدخل ليك في الموضوع ويقول ليك : (الكديسة دي كديستكم وإلّا كديسة الجيران؟). و… (وشنو تاني). خبيث في الرأس. لقى ليك الزول العيان دا قاعد يشحن في الموبايل..قام الزول الاشتر بدون ما يشعر قال ليه : (خط واحد كفاية) ما في داعي تقّفل البطارية لي اخر خط. قام عشان يصلحها قال ليه : (الحياة من الموت ما معروفة). عندنا زول (عريس جديد) كل يوم نشوفو ليك نازل بالسلم وشايل ليه (انبوبة غاز) في كتفو. اليوم والتاني زولكم نازل ليه بي (انبوبة غاز) في رأسو. واحد من ناس الحلة متابع الموضوع دا..وقت تجيب ليه سيرة العرس بقول ليك : (والله انا ما عاوز اعرس عشان ما ينزلوني ليك بي انبوبة الغاز اليوم والتاني). ما في حاجة مطيراني من العرس غير (انبوبة الغاز). صاحبكم ارتبط العرس عندو ب (انبوبة الغاز). عشان كدا قال ما بعرس. هسع ناس المريخ اي بطولة ارتبطت عندهم بالطيران. الطيران بقى عندهم البند الاساسي في كل مشاركاتهم. الغريبة (الطيران) في مطار الخرطوم خلوه…وديل لي هسع شغالين (طيران). لكن يا جماعة عشان ما تزعلوا وعشان ما تلخبطوا ساكت …موضوع الطيران من (حوض النيل) دا موضوع ساهل. بصلح ليكم الحكاية. يوم الجمعة ..طلعوا تلفزيوناتكم في (الحوش). الجابركم على (السخانة) دي شنو؟. طلعوا تلفزيوناتكم في الحوش …واقعدوا احضروا برنامج (عالم الرياضة) يوم الجمعة. فيصل سيحة بلقى ليكم حل. فيصل سيحة يعني عاوز يعمل شنو؟..ح يقول شنو؟…اصلو ما عندو طريقة. فيصل سيحة ح يقول البطولة دي ما قانونية …وهي ما عندها اي قيمة؟. لا. فيصل سيحة ح يقول (ارضية) الملعب كانت غير جيدة؟. لا. فيصل سيحة ح يقول (استفادة) المريخ من البطولة كانت كبيرة والخروج سوف ينعكس (ايجابا) على المريخ في المرحلة القادمة؟. لا. فيصل سيحة ح يقول الامطار اثرت على اداء المريخ؟. لا. فيصل سيحة ح يقول معنويات لاعبي المريخ كانت هابطة لأن الهلال في المجموعات والمريخ في سيكافا؟. لا. طيب فيصل سيحة ح يقول شنو؟. فيصل سيحة ح يعمل لينا (الفيلم) داك ذاتو ..يقول للمخرج كدا ارجع لي شوية كدا. لا بس اقيف هنا. بس بس ..لا لا ارجع شوية. لو سمحت يا رضا اديني (كدارة) اللاعب رغم (12). رضا ح يقول ليه معليش بس الجهاز فيه عطل شوية ما بنرجع اكتر من كدا. لكن كدا نحاول مع (الكنترول). سيحة تاني يقوم بس – بس هنا ..وقف لي (اللقطة) دي عليك الله..تُر شوية كدا ..كمان ..حبة…بس هنا. شفتوا يا جماعة كدا اللقطة واضحة اللاعب (نشيمي ناين) الذي سجل هدف اكاديمية تشتي كان في موضوع التسلل عندما سجل الهدف. تسلل واضح ما في كلام. اللقطة واضحة ..انا ما عارف حكم الرأية كان وين؟…الحالة واضحة يا جماعة نحن بنقول دائما رجل الخط لا بد يكون مع المدافع ..شوف – شوف يا رضا الحكم واقف غلط ..عشان كدا كان لا بد من ان تفوت عليه الحالة دي. بالله يا رضا الحكم دا اسمو منو؟. رضا مصطفى الشيخ يقعد يتململ في الكرسي …ويلكز ليك فيصل سيحة بعد ان يكون مخرج البرنامج قد (لكز) ليك رضا مصطفى الشيخ. رضا يقول : لكن يا سيحة هدف (نشيمي ناين) الذي سجله لفريق اكاديمية تشتي وادرك به التعادل جاء من ضربة جزاء. فيصل سيحة يصلح النضارة ..ويطلع الكتاب ويقول لرضا لا ما في مشكلة …الاتحاد الدولي (ضمّن) مثل هذه الحالة في اخر كتاب صادر من (الفيفا). الصفحة 317 بتقول شنو؟. رضا مصطفى الشيخ بقول ليه بتقول شنو ؟ : (بس يا سيحة عليك الله سريع عشان زمن البرنامج انتهى). لا ..لا ..ح اقول ليك سريع ..ما عندنا حاجة ..المادة 247 أ يا رضا بتقول يعتبر الهدف جاء من (تسلل) واضح اذا كان هذا الهدف قد تم تسجيله في شباك المريخ. ليه المادة دي وضعها مامون ابوشيبة. رضا مصطفى الشيخ كدا يرتاح ليك في الدنيا دي جنس راحة – يجر ليه نفس عميق ويقول نطلع فاصل ونرجع مرة تانية عشان نشوف سؤال مسابقة اليوم. و… (وفاصل على كدا). الحاجات دي نحن حافظنا ..وما قاعدة تفوت علينا ..وشربناها شراب – لدرجة اننا يمكن نديكم البحصل في برنامج عالم الرياضة يوم الجمعة القادمة شنو؟. من (الحصان) البجيبوه جاري في اول مشهد للبرنامج لغاية اهداف فيصل سيحة (التسلل). الحاجات دي نحن شربناها شراب يا سادة. وبقت ما بتفوت علينا. عشان كدا احسن ترجّعوا التلفزيونات جوة …وتخلوا موضوع (الحيشان) دي. صحيح الواطة سخنة ..لكن ما للدرجة البتخليكم تحضروا برنامج عالم الرياضة في الحوش. انتوا تعالوا هنا..سمعت لي خبر غريب. خبر شنو؟. قالوا ليك في جماعة قعدوا يتحروا ليك في روية هلال العيد قبل رمضان. الشفقة كاتلاهم. يا جماعة (العيد) دا بدري عليه. عيد شنو يا زول ..انت دخلت غلط؟. احسن تطلع عشان ما تلقى نفسك قاعد تتكلم في ميدان جاكسون. ان بقى كدا طلعنا. و…. انتهى.