من هنا وهناك هيثم صديق حكم ملثم البلد بقت كلها ملثمين زي النسوان الماشات التراويح ملثمين يهاجموا صحفي وملثمين يهاجموا صحيفة الفاتح وديدي مفروض يتلثم يحكم المباراة متلثم الناس ما تعرفوا ده منو الا يجي في فيديو يتبني عملية نقض البلنت شايل صفارة وكروت تطلع جماعة من الحكام تتبني ظلم المريخ الباقي ليهم كده الحكام ديل قلنا في رمضان يتصلحوا في رمضان يتصلح الفول بس الفاتح وديدي ببالغ بهاء الدين ضرب رمضان في رمضان ضرب رمضان والحكم في رمضان ما انصف رمضان المباراة ماشة علي غلب المريخ الاهلي صعب والدليل انه تعادل مع الهلال واحد قال لي كده قلت ليه هو الما اتعادل مع الهلال منو هسي المريخ بيغلب المريخ درن الكورة الباقي ليها دقيقة واحدة بقت زي الزول الصحا قبل الامساك بدقيقة لو مشي الزير ما بلفي يشرب لو مشي التلاجة ما بيلفي ياكل الدماعة تلفوناتهم بقت تضرب زولنا كان مفتح كان خاتي البلح تحت المخدة بقي معاه زي كيس السعوط زي رجزنا الزمان حاجة حليمة اديني سفة تلقي الكيس تحت المخدة تراوري وهو مضروب لعلب الكورة باص الباشا ختاها جوه الشبكة الحكم قرب يرجع الكورة ضربة جزاء ممكن تضيع علي كل حال المريخ اتصدر البطل السابق واصل صدارته بفريق جديد ومبشر فريق الاتحاد الافريقي مصري زي السم واوغندي مرجوء ومالي مالي قينان وعاجي وعاجبنا احلي حاجة في المباراة انو المريخ ما استسلم الحكم ولاعبين الاهلي والشمات قالوا انتهت الباشا قال ليهم انتهيتو انتو غنا ليهم رائعة سيف الديسوقي وابراهيم عوض تاني ما تقول انتهينا نحن يادوب ابتدينا نحن عز الدنيا دية ونحن عز الدنيا بينا نحن في الايام بقينا قصة ما بتعرف نهاية ابتدت ريدة ومحبة واصبحت في ذاتها غاية ومريخ الغايات متميز اهل المريخ يسوقوا للمقصورة وغيره يلمع في الماسورة فرقا شتي بين مصنع مصنعين والكاردينال في الهلال قال حايضرب بيد من حديد البرير كان بيضرب بيدو العادية الرئيس الجديد حا يغير الخطة وحا يكتل القطة وما اظنوا يجيب من بره نقطة تصوموا وتنقطوا علي خير كامبوس قال حاضرين للحرب النفسية وحرب بكري وسيسيه ..انتهت لو انتهت كلمونا قال ليك الهلال حا يستحدث وظيفة (حجّاز) مهمته الفصل ما بين المتشاكلين في ناس قالوا يعملوا بسط امن شامل في استاد الهلال في جماعة قالوا ممكن الهلال يتدرب بره استادو اقترحوا يعملوا بوليس الهلال يسافر معاه ويتحرك معاه علي كل حال الناس دي في مهمة وطنية في الكنغو والدنيا قبايل عيد نسأل الله لهم السترة وسترة النجاة واحد قال لي هسع سترات النجاة في الطائرة الماليزية عملت شنو قلت ليهو ما سمعنا بيها عملت حاجة في طيارة منكوبة انا شخصيا ما بتوتر في الطيارة الا ساعة بث تعليمات السلامة سترة النجاة تحت مقعدك مباشرة يا حلاة لقلق متين مرقت ليها زول اي طيارة وقت ما في زول مرقتو سترة نجاة زي الهلال ما حصل شال كاس من بره الاماني بس تحت المقعد يقولوا ليك لو شلنا كاس حانشارك في بطولة الاندية العالمية وووو الماليزية والكنغولية وااااااااااااحد