…..و….. محمد عبد الماجد بين الشوطين لو دقيتوا لينا (دلوكة) بنغلب عشرة …و عبارات (الكرم) كانت عندنا ومازالت تعرف وتأتي على سياق (غسل لي عمك). البشاشة في حلتنا لابسة ليها عمة وجلابية – عراقي وسروال – و (شبشب) قديم. والناس واقفين في الشمس – يقابضوا في الناس للغداء – والواحد وقت يسخن خالص كدا بدخل يقيف شوية في (المزيرة) ويرجع تاني لي شمسو. الناس تعبانة – لكن التعب ما جردهم من المعروف وما خلاهم يقصروا في (واجب). في الواجب تلقاهم قدام اي زول. الناس هنا – لسه الدنيا عندهم بي خير. كانت هنالك ومازالت فرق ومجموعات بينهم – متخصصة في ان تتولى امر الزول متى ما وصل – عشان تغسل ليه. في كل المناسبات السودانية – مشكورين في مجموعة متخصصة في ان تغسل للزول ايديه. يا زول والله ما تقول حاجة. من ثم تبدأ المجابدة – اي مجموعة عاوزنك تقعد معاهم في (الصينية). يفجوا ليكم مكانة – ويصلحو ليك (الكرسي) ولتأكيد الحجز واحد من المجموعة بكورك باعلى صوته : (جيب العيش يا ولد). تلك العبارة تنهي حالة الجدل الذي يحوم حول (جلوس) الشخص. الموضوع انتهى. والناس (فقرانة). وحالتها صعبة. (17) نفر – بتلموا ليهم في (كيس) تمباك – كل واحد يشيل ليه (سفة) ثم ينتشروا ليك في المناسبة. بي حالتهم دي. وقت يسمعوا ليك حسين شندي يغني في (دخلوها وصقيرها حام) او يسمعوا ليك محجوب كبوشية بغني في (داب سار الرسا)..بقوموا يفوروا وينعركوا ويحلفوا لو ما انجلدوا ما بطلعوا. ما بقيفوا. اقل كلمة بتطربهم. ينجلدوا على حالتهم دي – ويمشوا يتعشوا بي (موية فول). الناس بسيطين – ما عندهم اي قضية – وما بشيلوا ليهم حاجة في قلوبهم. و.. (اتذكر). بتذكر في هذه الاثناء – والناس طالعة على الحفلة جديدين وقاشرين وطالعين من علبهم. الحفلة بدأت. لسه ما بدأت …في فنانين (الغتة) ظاهرة في نفختهم – بجوا الحفلة بعد ما الشفع ينومو. وواحد دائما مستعجل (ما عندو علاقة بالفنان ولا بالعروس ولا بالعروسة)..بمسك (المايك) ينفخ فيه – واحد – واحد – اتنين. يا جماعة اقعدوا – الحفلة بي طريقتكم دي ما ح تبدأ. روقوا شوية – افتحوا الشارع للبنات..واي ولد قاعد ليه في كرسي يقوم – الكراسي للبنات بس. الغريبة الزول البقول الكلام دا في اي حفلة بكون ما عندو اي علاقة بالحفلة. زول بكون (متسلبط) ساكت. والناس كلها عارفة كدا. لكن لا اهل العروس ولا اهل العروسة ما عاوزين يحرجو الزول (المتشوبر) دا. الناس طيبة – الطيبة كاتلاهم. بتاع (البنقز) دائما هو مستعجل ..بركب ليك اول واحد في المسرح ويبدأ يستعرض في حركاتو في المسرح. والشفع متكيفة من الحكاية دي ..متحلقين فيه – شايفين اخطر زول في الحفلة بتاع (البنقز). وبتاع البنقز بالجد بعجب ..تلقاه شغال بي اخلاص ..وما مركز في اي حتة غير (بنقزو) دا. شغال بي نفس. بي اخلاص. الفنان وقت يطلع خشبة المسرح الشفع كلهم بكونوا ناموا ..الحفلة ما بكون فيها شافع واحد. غير شافع – شافعين (شفوت) كدا. ديل ما بنوموا. يكملوا ليك الحفلة لمن تصبح. و… (اكمل). النعام آدم – ونحن ننتقل بيكم الى (تلفزة خارجية). طبعا ما منطقي ولا مقبول اكون بتكلم ليكم عن حسين شندي ومحجوب كبوشية وفجأة اقفز بيكم الى (النعام آدم). النعام آدم دا كان فنان (ملكي). قالوا ليك زمان العروسة الما بجيبوا ليها (النعام آدم) بترفع مؤخر الصداق. ولا بتجامل في الحكاية دي. العرس بدون (النعام آدم) بكون زي الناس الفى الحلة القسموا التمرين ..وما لاقين ليهم كورة. واقفين ساكت. وقالوا النعام آدم كان زمان ببدأ حفلاتو بي (ما دام طار جني الوزين يا دوب قل نوم العين). والنعام آدم لمن يغني انت بتروح – وتروح عليك لا تعرف تطلع لا تعرف تدخل. تبقى (متراوح). واقف بين – بين. ما قادر تعمل اي شيء. تبلع في ريقك زي الوابور الما فيه زيت. زمن النعام آدم طبعا ما كان في حالة تصريح بالحب ..ولا في زول بتجرأ ويعلن عن المحبوبة. عشان كدا بتلقى المحبوبات كلهن بشبهون بالوزين والحمام والقمري والغزلان – عشان الرقابة كانت قوية. بس تقعد تغني للوزين – (الفهم فهم والما فهم بي طريقتو). شوفتوا الحياء والعفاف وصل لي وين؟. النعام ادم حتى عندما دخل في الغريق وفصل حالته العاطفية ..لم يفاصل في الحبيب وانما جعل الموضوع (عمومي) وهو يغني للزول الوسيم. ما في تحديد. هسع في زمنا دا الواحد يغني لمحبوبته ينزل رقمها تلفونها في الاغنية ..وبريدها الكتروني كمان. الزمن بقى كعب. النعام آدم – كان ومازال حالة من حالات الطرب (الملكي) رغم من انه غني للعموم الناس – غني للبساطة وللغبش – وللحب قبل التصريح به. النعام آدم – موضوع ح نرجع ليه تفصيلا في مساحات كثيرة – فهو يستحق ان نكتب عنه كل (24) ساعة. و… (انت عاوز تقول شنو؟). كورتنا دي قنعنا منها. نحن اصلو لا عندنا خطط ولا في دراسات – شغالين (حماس) ساكت. وقت الموضوع كلو – حماس – حماس. ناسنا ديل بين الشوطين ما تتعبوا معاهم. ما بشتغلوا ليكم بي خطة. ولا بلتزموا ليكم بي توجيهات مدرب. الناس ديل بين الشوطين يجيبوا ليهم (دلوكة). غنوا ليهم – اشحنوهم (حماس) ودخلوهم للملعب الشوط التاني. يمين يغلبوا عشرة. جماعتنا ديل – ناس دلوكة – ناس ضرب ..ووقت يتحمسوا ما في حاجة بتيقف قدامهم. يغلبوا المانيا ذاتها. و… انتوا سامعين حاجة. حاجة شنو؟. يعني عاملين فيها ما سمعتوا حاجة. عنكم. و… انتهى.
