محمد عبد الماجد …و…. حالتها دي بالواتسآب وبدون مدرب كمان الحبيب مامون ابوشيبة الذي دائما ما ارجع اليه واكتب عنه (تفضلا) لصدقه في كتاباته ووضوحه – غير الكثيرين الذين يتجمّلون في كتاباتهم ويأتوا باشياء بعيدة عن قناعاتهم واهواءهم. من ثم فان ما بيني وبين ابوشيبة من ود – يسمح لي ان اراجعه فيما يكتب – رغم ايماني التام وقناعتي ان كل شخص حر في اراءه وفيما يكتبه. صدق ابوشيبة في كتاباته يجعل كل هذه (المفارقات) – والتى تأتي في كثير من الاحيان باعترافات خطيرة…فيكون جميل الكتابة فيها – والرجوع اليه. ابوشيبة كتب امس في زاويته (قلم في الساحة) الاتي : (9 مباريات متبقية للمريخ منها 4 مباريات خطيرة تبدأ غداً (اليوم) بمعركة (النمور) في أمدرمان ثم صراع (الذئاب) في كوستي وهناك مواجهة (الأسود) بكادوقلي.. فضلاً عن لقاء القمة في الختام. أي تعثر للمريخ في أي مباراة قادمة ولو بتعادل واحد يعني فقدان الاحتفاظ باللقب.. لأن المنافس الهلال في أحسن حالاته ويعيش استقراراً في التشكيلة.. وتتميز فرقته بالأجسام القوية والقامات الفارعة واللياقة البدنية العالية وأسلوب اللعب الضاغط السريع.. وبالتالي لا يتوقع أن يخسر الهلال أي نقطة في بقية مبارياته). شفتوا (الخوفة). شفتوا (الرجفيبة). يا ابوشيبة كلامك دا ما بقولوا زول شايل (سيكافا). انتوا مالكم؟. ما كنتوا كويسين الحصل عليكم شنو؟. يمكن نشوب خلافات بين برهان تية ومحسن سيد والذي اجتهدت صحف المريخ منها وليها كدا في نفيّه – يجعل المريخ يعاني وقد بدأت معاناة المريخ واضحة عندما اصبح ينتصر بهدف وحيد وبمساعدة الحكام كمان. ويمكن ناس ابوشيبة شافوا ليك (التلاتات) دورت في الهلال جوة وبرة العاصمة قامت دخلتهم (خوفة). طبعا ابوشيبة لمن يقولوا ليه الهلال غالب تلاتة بقفل الشباك وبقفل الموبايل ..وبشوف ليه (بطانية) في السخانة دي ..ويقعد تحتها. يا ابوشيبة (التلاتات) دي ماشي عليكم. نحن بديناها من مريخ الفاشر وح نقيف بيها في مريخ ام درمان. يعني اي مريخ قدامنا ح نقابلو ح يأخد (تلاتة). التلاتة دي (الامل) عطبرة ما بنعفيها منو. و… (وشنو تاني؟). ابوشيبة تحدث عن الهلال وقال فيما جاء ذكره سلفا : (المنافس الهلال في أحسن حالاته ويعيش استقراراً في التشكيلة.. وتتميز فرقته بالأجسام القوية والقامات الفارعة واللياقة البدنية العالية وأسلوب اللعب الضاغط السريع.. وبالتالي لا يتوقع أن يخسر الهلال أي نقطة في بقية مبارياته). بالله شوفو الكلام. انتوا ما قلتوا نحن تعبانين. ليه وقت مباراة القمة بتقرب بتقوموا تطلعونا (برشلونة). الهلال الايامات دي شغال بدون مدرب – ويقوده فنيا مساعد المدرب عاكف عطا. علما ان الهلال اشرف عليه في خلال (9) شهور (7) مدربين. (7) مدربين …وابوشيبة بقول الهلال يعيش استقرارا في التشكيلة. نحن عارفين ..ناس (بشه) ديل بطيروا القلوب. عليكم الله في زول عاقل كدا بنتظر ليك (بشه). بشه ما شاءالله عليه بتحرك في الملعب زي (الليزر). شغال بالمساحات. بحسبها بالملمتر يا حبيبي بالملمتر. بشوف ساعة الكورة بتنضرب هو مفروض يكون واقف وين؟. مهندس المساحة محمد أحمد بشه ربنا يشوفو ويغطي عليه ان شاءالله بوزعها ليك بالحساب. بالورقة والقلم. زي الكتاب ما بقول. ولا بتلفت في الحاجات دي. عشان كدا ناس ابوشيبة الحالة الدخلو فيها دي ..نحن بنعذرهم فيها – مهندس المساحة بشه (الامريكان) مجهجهم ليكم. زول صعب. زول شفت. و… (تعالوا هنا). تعالوا عليكم الله شوفوا مامون ابوشيبة قال شنو في الهلال؟. ابوشيبة قال عن الهلال : (تتميز فرقته بالأجسام القوية والقامات الفارعة واللياقة البدنية العالية وأسلوب اللعب الضاغط السريع). عليكم الله هسع الكلام دا ما احسن منو مامون ابوشيبة كان يقول (الروب). ابوشيبة قال الروب عديل. الكلام القالو مامون ابوشيبة نحن الهلالاب ما قاعدين نقولو. يا الله غطي على الهلال ..عاوزين تطقوا لينا ناس نزار الصاقعة ونيلسون (عين). قولوا ما شاءالله يا ابوشيبة. وكلامك البتكتبو دا يا ابوشيبة عليك الله خلي هيثم كابو يقرأوها – عشان كابو دا مفتكر ناس جمال فرفور ديل بشيلوا ليهم بطولة. يا كابو ناس (انصاف مدني) ديل ما بنافسوا ليكم – مع الشفوت ديل. اسمعوا كلام ابوشيبة …وما تكابروا ساكت. الهلال صعب. الغريبة الحاجات البقول فيها ابوشيبة دي …والهلال بدون (مدرب). يعني الهلال دا لو مسكو (فرنسي) تمشوا وين؟. الهلال دا لو اضاف ليه (5) محترفين سوبر كدا ..السنة القادمة ح تمشوا وين؟. والله الموسم القادم يا ابوشيبة إلّا تعلنوا انسلاخكم رسمي من المريخ العاصمي والانضمام لمريخ الفاشر. ابوشيبة قال شنو؟. ابوشيبة قال : (المنافس الهلال في أحسن حالاته ويعيش استقراراً في التشكيلة.. وتتميز فرقته بالأجسام القوية والقامات الفارعة واللياقة البدنية العالية وأسلوب اللعب الضاغط السريع.. وبالتالي لا يتوقع أن يخسر الهلال أي نقطة في بقية مبارياته). يا ابوشيبة الكلام دا ما تقولو لي فريق (مدرب ما عندو). يا ابوشيبة كلامك دا تاني ما تقولو. بلة جابر عرفها قال عندو اصابة في عضلة السمانة. هي وينها (السمانة) يا بلة؟. وقطع شك لو (ضفر) قرأ كلام ابوشيبة دا – برضو ح يقول عندي مشكلة في عضلة السمانة. احسن يا (سلك) موضوع عضلة السمانة دي تسدوها من بدري. الشيء دا لو اتفتحت ليكم – ما تلقوا ليكم لاعب واحد يلعب ليكم امام الهلال في القمة القادمة. ابوشيبة قال شنو؟. ابوشيبة قال (المنافس الهلال في أحسن حالاته ويعيش استقراراً في التشكيلة.. وتتميز فرقته بالأجسام القوية والقامات الفارعة واللياقة البدنية العالية وأسلوب اللعب الضاغط السريع.. وبالتالي لا يتوقع أن يخسر الهلال أي نقطة في بقية مبارياته). طيب يا عالم صلاح مليشيا يقول شنو وقت مامون ابوشيبة بقول كدا؟. قلنا ليكم الهلال دا خطير- بلعب في المجموعات ..قعدتوا تغالطوا فينا ..وقلتوا دا كلام هلالاب ساكت. اها ابوشيبة قالها ليكم. احترف ليكم. بس يا ابوشيبة عليك الله ابقى حافظ كلامك دا. ابقى عارف. اوعك يوم الهلال يضرب المريخ تلاتة في الدوري وفي الكأس – اوعك تقول لينا (الحكام). وعندنا ضربة جزاء سنة 1996م – الحكم ما احتسبها لينا. اوعك. الشيء الغريب بالجد. ومدهش. وما قادر افهمو الى الان. ان الهلال مع حالتو دي ..ومع الوصف الجميل الذي كتبه ابوشيبة عن الهلال – الهلال بدون مدرب. والهلال كمان يدار ب (الواتس آب). يا ابوشيبة (واتس آب) ساكت يجهجكم كدا. الكاردينال بالواتس آب عمل فيكم كدا. طيب الزول دا لو جاكم عديل كدا واتفرغ ليكم – ح تمشوا وين؟. الكاردينال شغال تسجيلات شغال تحفيز – شغال اطلاق سراح بالواتس آب. اعادة قيد الثلاثي بالواتس آب. واتس آب ساكت. فقد قال احمد عبد القادر نائب رئيس نادي الهلال (ان غياب الكاردينال رئيس النادي عن الخرطوم ليس مشكله مع تقدم تقنية الاتصالات وتوفر تطبيقات التواصل الاجتماعي موضحا انهم يديرون شؤون النادي عبر قروب في الواتساب يضم جميع أعضاء مجلس ويعرفون خلاله كافه تفاصيل عمل المجلس ويتخذون القرار المناسب في ذات القروب). الواتس آب يعمل فيكم كدا يا ابوشيبة. اها عشان تبقوا عارفين ..التسجيلات القادمة الكاردينال ح يجيها عديل كدا. جاينكم بالباب. و… في زول جاتو رسالة!!. رسالة شنو يا زول. اطلع منها عليك الله. ….. انتهى.
