من هنا وهناك هيثم صديق ده حق مازدا الثلاثية دي ما مرقت من أعمدة الهلالاب كل ما نقرأ عمود نلقاه بقي ركشة مازدا كأنو جاب التلاتة دي في قونو اها ناس المريخ صمموا يعيدوا لولدهم اعتبارو علشان تاني أي هلالابي ما يكرب ركشة ذاتو الغريبة الأهداف الأربعة جابوهن أولادنا أدينا بكري قون ودخلناه الجيب نجيب محفوظ فاز بالثلاثية بنوبل المريخ فاز بالثلاثية بكأسه كاس المريخ _السودان سابقا- مفروض الكورة دي تنتهي اتنين التالت ده هدية لناس الدمازين السنة الفاتت الدماعة زاغوا السنة دي (ذاقوا) سما زعافا ثلاثي الابعاد حسن عبد السلام وجمال الكيماوي احسنا التجهيز جهزوا الاستاد ليفوز فريقهم احمد الباشا قالوا ليه انت شيل الكاس بس ما تتعب ناس الشغيل ديل ما بشيلوا الا في خاطرهم لقد تاخر المريخ بهدف فتاه لدقائق الا انه سرعان ما تماسك لماذا لانه يملك حارس مرمي مميز كنت حقيقة ارجو ان تصل المباراة للترجيحيات لان جمال سالم موجود لكنهم اضاعوا ركلة من خلال المباراة ففوت المريخ لهم هذه الفرصة مبروك للمريخ فالكاس كاسه وبيستاهلو لجماهيره الهادرة والقادرة والوفية للذين رفعوا الهمة وحرقوا العمة ولوحوا بصورة القبطان حاج حسن عثمان عاد المريخ من بعد التوهان الي عهده القديم الي المقاتلة والمجالدة والبسالة حامد بريمة كان اوغندي امس وجمال ابو عنجة كان مصريا ايمن سعيد اعطانا احساس ان جمال ابوعنجة يلعب وبدر الدين بخيت يقاتل ونحن جيل وجدنا جيل مانديلا ينتصر وكما اتي اؤلئك بسيكافا جاء بها هولا وتذكرنا ثلاثية حمد الجريف وعاد المريخ الي فرض قانونه القانون الاحمر قون بالضفر من ضفر قون بالركبة وعودة من ايمن سعيد ايمن سعيد عرف انه المعز لو وقع ما بيقوم بسهولة وفعلا اما راجي فلقد ملأ كاسه ككل مرة راجي كان راجي القون التاني يخش وبعدها غنا المعز شيل شبابي شيل عينيا المعز كان محجوب من مدافعيه كورة راجي (الويكية) انزلقت حتي الشباك وكانت ساعة النصر انهزام الهلال بكرة الدماعة حا يقبلوا علي عصمت كلو من عدم الشعار عدم الشعار بجيب العار وكان يمكن ان يلعب الهلال ناقصا لو كان وديدي شجاعا لقد تم الاعتدا علي ايمن سعيد ووديدي غير بعيد ومع ذلك غفرنا كفاية جضمنا كفرنا اولادنا الجايننا كانوا بره الشبكة والباقيين شغالين شفقة وحقق المريخ الثلاثية المتتالية بالثلاثية الغالية لو كان تراوري غير موجود لنال الهلال ثمانية المالي كان سلبيا ومسالما عليكم الله ما عايزينوا في نهائي الدوري وكنت قد كتبت اول امس ان المريخ يهزم الهلال ويفز بالكاس وقلت ان ذلك هو عنوان كل الصحف صباح الاثنين صباح اليوم ولقد وعدت صديقي خالد من بارا واخوانه من مريخاب المدينة الجميلة اني سأهنئهم اولا بالكاس وهانذا افعل فالمريخ منتصر بكل المقاييس والارهاصات بالجدية والباصات مبروك للمريخ كأسه ونبارك الهلال باصه الذي حوله المريخ لركشة من ثلاثة لساتك وسنتحدث عن الكاس لثلاثة ايام وعن الثلاثة اهداف و خلي واحد تاني يجيب سيرة مازدا .
