من هنا وهناك هيثم صديق بكري المدينة ابشر يا عريس طبعا مجيء بكري للمريخ عمل في الدماعة عمايل ولا عملية احضار سيكافا قبل شهور ولا تسجيل البرنس ولا الحضور لمطار الخرطوم واستقبال بطولة الابطال الافريقية الايامات دي ناس الهلال زي الزول القال خلا الشاي
طبعا الشاي ده عندو مدمنين ممكن الواحد يطلع في عمود لو ما لقاهو الزول القال خلى الشاي بيقول للزول العايز يخلي الشاي شاي الصباح …بالزلابية خليتو وشاي الضحى خليتو ولا جاتني حاجة وشاي الفطور بالنعناع خليتو واهو الحمد لله كويس وشاي الظهر بالجنزبيل الاحمر خليتو وتراني فل وشاي الغدا بالقرنفل خليتو ولله الحمد ما علي حاجة الزول التاني قال ليهو هو الشاي تخليهو غير الجن الماسكك ده بيسوي شنو الدماعة طلعوا بكري المدينة كيشة من مشاركتو مع المنتخب في المباراة الاخيرة الزمن كلو يتغزلوا في الفلجة هسي طلعوهو شروم زي المشوكش الشوكشتو معلمة لما عرس وجاب بنت سماها ( احب) علشان المعلمة في المدرسة لما تنده اسمها تقول (احب علي مأمون) علي مأمون منتظر سبعة سنة علشان يسمع احب بكري طلع فقري وعرس كمان الدماعة قالوا لبشة الا تعرس انت برضو قال ليهم قروشكم دي لو خطبت لي كويس عرس بشة كل الهلالاب جوهو البرير جاء النقر جا برضو النقر قال معتصم شاف الكورة وين في ناس قالوا قاصد معتصم جعفر وفي ناس قالوا قاصد معتصم محمود وفي ناس قالوا قاصد معتصم ووليد بتوع طيور الجنة بشة في الصور منطر عيونو ما عارف الجماعة جوهوا غبينة في المدينة الدماعة بقوا دبل غبينة بقوا (كرين) وبكري المدينة العريس ولا هاميهو عارفهم بيهدوا بعد شوية الناس الطلعوا الابراج نزلوا والمدينة نحن سميناهو المديدة اصلا هو بتاع طاقة والمريخ بتاع تعدين واهو اتلموا الطاقة والتعدين المديدة دي قوية مش باكمبا بالجنبة ماشة معانا طحنية وسمن على عسل بكري كان بشوت في الكشافات زمان لانها المكان الوحيد الواضح لكن في (الريد كتر) الكلام مختلف وعلي بكري ومعاهو اصلا ما بنختلف جاء (لمليار مدريد) مدد المدينة المداح الحمر مدحولو (يا بكري المدينة جمال بجيبك لينا) المديح ده بالهلال بال(طار) يعني ويقولوا ليك اروش بعد القروش دي بقى (اروش) زول بصم وبسم علا الدين ذاتو بصم وبسم وفاوض المدينة كمان علولو بيحب البصم خلا ليهم (البص) مة البص الخسر من اول فردة ما بيفرح يا فردة وبكري عاجبنا ولدنا زي المعلم عمر بخيت مطلوب في المريخ زول بقيمتو الفنية والتاريخية حرام يرموه كده ناكرين الجميل الخزنة اصفار والوفاء اصفار والرئيس شغال اسفار الكاردطار ده ببالغ كل يوم في بلد واللجنة ساكاهو التقول هو بكري المدينة اتمنى ان لا يستعجل المجلس في التعاقد مع مصاب ويمكن الاستعانة باي محترف قد ينجح يأتي به الهلال اهو توفير مال وجهد واحتكاك غايتو المريخ ده حقار يشيل الريد ويشيل ودو ويشيل نسمات عبير وردو ويشيلك في القليب نوار جميل ناير وفاق حدو ويشيل بكري المدينة ويشيل نزار حامد و شيلوا الصبر تنويه:- (الاغنية دي للعرسان فقط)
