عندنا زول قريبنا ..الله يرحمه كان (سبابي) سمك وكان ياتي فجرا للمشرع ليشتري السمك وكان اهلي (الحواتة) يلقبونه ب(الشافو شالو) كان لا يترك لهم حتي السمك الذي يحملونه للمنزل اي سمك بيشوفو بيشيلو علشان كده سموه (الشافو شالو)زي جمال الوالي بالضبط جمال الوالي ما شاف حاجة عجبتو للمريخ الا شالها ولو بعد حين مثل نكة الرجل الذي ارسله ولده ليخطب له فلانة رجع خاطبها هو قال ليهم انا الاسمي انا يا الله ادوني ليها لامن الفنطوط ولدي ده نشر الدماعة صورة بصهم وعليه صورة فريقهم انا خف الوالي يشيل البص ويتبعوا لافراس اتاريهو عايز الفريق شال بكري المدينة بكري المدينة هو المرق والاخرين الرصاص شيلة المرق اتشتت الرصاص زمان الهلال جاب ليه لاعب اسمه مرق لامن مرق حتي عرفوه ما مرق البص جا لام مريخ-ام درمان سابقا- الدماعة غيروا الصورة لصورة تانية زي الناس البغير البروفايل في الواتساب الواحد تلقاه عامل صورة بالبدلة قبل ما تتحمل معاك يبدلها بصورة بالجلالبية الصورة الباصية الجديدة كانت لرسم متخيل لما سيكون عليه استاد الهلال خيالهم واسع خلاص اوسع من القبر في قصيدة عاطف خيري (وانا شفتو ساعة مات ماسك طرف كفنو طرز عليه منديل منديل لمن دفنو حلم كان تبقي القبور اوسع اوسع شبه وطنو) جمال الوالي اكيد شاف صورة استاد الهلال الناس دي قنعت من استادها ذاتو الشافو شالو شاف صورة الاستاد والله تاني الا تتصبرو باغاني هاشم ميرغني (وهسي كان داير تشيلو حتي باقي العمر شيلو) ممكن تسمعوهم يغنوا لمريخ (يال اللعيبة والعاطلة دراجة وروني البطولات واقعدوا فراجة) بكري المدينة هو المرق كما قلنا والمعز كان الباب هسي غرفة الهلال بلا سقف لا باب كالمدرس طه ود خدوم عند الدوش (مقطوع من شجر لا زاوية لا قوس لا وتر) مثلث الضياع يا ولداه ويقولوا ليك نحن املنا في الرديف فعلا حلم الجيعان رديف مسكين الفاتح النقر كان بيحلم يكون مدرب المنتخب الحلم طرشق حلم يكون مدرب مستمر للهلال الحلم طرشق حب يكون مساعد مدرب اجنبي الحلم طرشق اتعاقدوا معاه مدرب للرديف الفاتح النقر معاكم لحدي (الفة) بس نتمني الكاردينال يتعجل في مشروع الجوهرة ده المريخ لو شفق بشيل المغبرة دي طبعا سمها المغبرة بالغين من غبار حصل تحريف وسموها المقبرة وهناك خلط ايضا وقع فيه المريخاب والدماعاب معا ما بين (يحاكي) و(يقلع) المريخ يقلع من الهلال ولا يحاكيه المريخ (القلع عبد الحفيظ اديل كده) ويا عناقيد العنب بحر المريخ بالعهم جب
