بالعربى الكسيح محمد الطيب في نظر اسامة عطا .. هيثم (خيار) والعجب (فقوس) !! * الاجهزة الطبية التى يستخدمها مدرب الهلال باتريك في التمارين تبدو افخم من الاجهزة الموجودة في مستشفى الزيتونة .. * أجهزتنا دى يا مأمون حميدة بنديك ليها هدية بعد المعسكر .. * ان شاء الله تفحص بيها للضفادع .. * امس سجل بكري المدينة اول هدف له بشعر المريخ ..
* وباذن الله ده يكون اول واخر هدف لبكوري بشعار الوصيف .. * بس يا عماد ألحقونا ب(لوزان) .. * بكري مزق شباك (منتخب الصحفيين المصريين) .. * قال ليك منتخب الصحفيين المصريين الذى لعب معه المريخ امس اصغر لاعب فيهو قدر الاستاذ كمال حامد .. * اعدادكم لو مشى بالطريقة دي (عزام) ح يفعلها رايح جاي .. * كمية الألعاب النارية التى (تلعلع) في سماء الخرطوم ليلة رأس السنة يمكن ان تحرر فلسطين .. * يا ريت ولاية الخرطوم تصدر قرار مثل قرار (الكاف) تمنع بموجبه الألعاب النارية في ليلة رأس السنة .. * تشكيلة الهلال في الموسم الجديد فيها (اتنين عريس) .. * بشة وسيدي بيه .. * وعرسان الهلال لن يقبلوا هذا العام إلا بعروس افريقيا وذلك الذهب الذى استعصى علينا زمنا طويلا .. * إذا اجتهد نجوم الهلال سيكون كلهم عرسان وعروستهم هى (الاقريقية السمراء) .. * (المنبه) هو الكائن الوحيد الذى (يصحيك من النوم) بمنتهى الذوق الادب .. * المنبه لا بيجر منك الملاريا ولا بكشح فيك جك موية عشان تصح .. * بل ان المنبه من شدة الذوق بيديك خيارات يقول ليك : (عايز غفوه) ولا ما عايز ؟؟ * منتهى الذوق والله .. * اعلن السيد اسامة عطا المنان ان هيثم مصطفى سيقود صقور الجديان في معسكرهم القادم .. * اسامة قال الكلام ده بحرقة وإنفعال شديد .. * نقول لاسامة : إحنا اصلا ما عندنا منتخب والبيحصل ده لعب عيال عشان كده تجيبو هيثم تجيبو جندى نميري تجيبو ادوارد جلدو ما في مشكلة .. * بس في حاجة بنقولها لاسامة عشان يقولها لهيثم .. * هيثم ده تانى ما بشوف الهلال إلا في التلفزيون زيو وزي اى ريتشارد جاستن .. * ونقول أيضا: نفس السبب الذي جعل اسامة يختار هيثم للمنتخب يفترض يتم اختيار العجب .. * ولا عشان العجب ما صاحبك يا اسامة ؟؟ * العجب عشان يرجع للمنتخب لازم يبقى صاحب اسامة عطا المنان زي هيثم كده .. * السبب البيخلى هيثم يرجع المفروض يرجع العجب .. * بل الان العجب اكثر جاهزية من هيثم .. * هيثم سنة كاملة ما هبش كورة والعجب السنة الفاتت كلها جاري زي الحصان ماشاء الله .. * هيثم (خيار) بالنسبة لاسامة، والعجب (فقوس) في نظر سمسم .. * في صحف المريخ اليوم ستجد تصريح لمحسن سيد يقول فيه : (مباراة الامس كانت تجربة حقيقية) .. * محسن سيد اي مباراة عندو هى تجربة حقيقة .. * ولما ساعة الحقيقة تجي المريخ بيطلع (مواطن ساكت) .. * المريخ كان عليه ان يقطع معسكره بعد ان علم انه سيواجه عزام في التمهيدي .. * عزام ما داير ليهو معسكر .. * مع صباح كل يوم جديد يظهر (موبايل) شاشتو اكبر من شاشة موبايل الامس .. * انا خايف بعد سنة تلقى ليك زول شايل ليهو تلفون شاشتو (32) بوصة وبتكلم بيهو .. * غايتو جنس غايتو ؟؟ * وجه الشبه بين الكاردينال والارباب ان كلاهما (مرهف بالرجالة) .. * والمشاعر ما فيها رجالة ، ولكن كردنة والارباب مرهفين بالرجالة .. * ده بكتب شعر وداك بيلحن .. * بس وجه الخلاف بينهما هو ان : الكاردينال مما مسك رئاسة الهلال ما كتب قصيدة .. * وصلاح ادريس وهو رئيس للهلال لحن (اعذريني) .. * طبعا بعض الناس يقولون ان اعذريني من ألحان سيف الجامعة ولكنها منسوبة لصلاح ادريس .. * انا ما عارف الناس ديل جابو الكلام ده من وين ؟؟ * الانباء الواردة من الفجيرة اكدت ان كاريكا عندو كلام في العام القادم .. * كاريكا امام تحدى كبير في الموسم الجديد لتأكيد ان الهلال لم يتأثر بالاستغناء عن (عضم الفريق) .. * كثيرين ينتظرون انطلاقة الدورى من اجل الشماتة في الهلال كثر .. * وللأسف معظمهم من اهل الهلال .. * وهذا يتطلب من كاريكا وبشة والشغيل ومساوى وبوي جهد كبير .. * يجب ان تتعمق العلاقات بين القدامى والجدد حتى يظهر ذلك في اول ظهور للهلال.. * الألفة والمحبة داخل الفريق من شأنها ان تقود الهلال إلى منصات التتويج .. * إقتربت قناة (قوون) من الفوز بحصرية نقل الدورى الممتاز .. * وإذا كانت (قوون) ستنقل المباريات بذات الطريقة التي نقلت بها مباريات الموسم قبل الماضى فهي غير جديرة بذلك .. * في نهائي الممتاز (قوون) نقلت المباراة ب(الاقساط المريحة) .. * وفي النهاية قالوا هنالك تشويش متعمد قد حدث .. * هذه السلبية التى تتعامل بها (قوون) لن تمكنها من النجاح في تقديم الخدمة المنتظرة .. * اول حاجة على قناة قوون ان تشتري كاميرات بدلا عن كاميرات الجلاكسي دى .. * وبما ان القناة قناة الارباب فنحن نتوقع ان تنقل قوون عشرة دقائق من كل مباراة للهلال .. * نتوقع ذلك .. * واى زول طبعا حر في (توقعاتو) .. * عموما نتمنى ان تستفيد قوون من السلبيات التى صاحبتها في الفترات السابقة وان تقدم خدمة متكاملة اذا فازت بحصرية النقل .. * و..و.. * ويا غالية يا زينة حياتي (مستاء) من شوفتك لي زمن ..
