محمد عبد الماجد دق الدلجة حملة تبرع بالمعنويات للاعب المريخ علي جعفر زول (كضاب) شديد معروف بالكضب في الحلة. الزول دا لو قال ليك الساعة خمسة ..معناتها الساعة واحدة. اصلو ما في زول بيصدقو. صاحبكم دا في يوم من الايام جاب ليه (خبر وفأة) حقيقي. زولكم جاء مبسوط ..عشان جايب ليه (خبر حقيقي). عارف الناس ما ح يصدقوه ..عشان كدا قال الليلة يدخلهم ليك (مدرسة). صاحبكم جاء الحلة – لقى ليه ناس واقفة ..قال ليهم لو قلت ليكم خبر بتصدقوني. زول اشتغل بيه ما في. تاني قال ليهم : يا جماعة عوووك لو قلت ليكم خبر بتدصقوه. الجماعة عشان يتخلصوا منو؟..قالوا ليه : قول عندكم شنو عليك الله نحن ما فاضيين؟. قال ليهم : لكن انتوا بتصدقوني. قالوا ليه : بنصدقك عليك الله قول – خارجنا. زولكم الكضاب قال ليهم : عثمان ود الرتيلة طقتو عربية ..كتلتو في ساعتو ..ما قام منها تاني. الجماعة ما اهتموا بالموضوع. ما اشتغلوا بالخبر كتير. وعثمان عمدة في الحلة. تاني قال ليهم : عثمان ود الرتيلة طقتو عربية ..كتلتو في ساعتو ..ما قام منها تاني. واحد من الجماعة عشان يقفل الموضوع قال ليه : عثمان دا الصباح شفتو بي قميصو البيجي فوق دكان التريبلي…انت كضبك دا ما عاوز تخليه. الزول الكضاب قال ليهم ..يا جماعة قلت ليكم عثمان ود الرتيلة بي قميصي البيجي (الضارب) في جيبو قلم (بك)..طقتو عربية ..كتلتو في ساعتو. الجماعة ما اشتغلوا بالموضوع..ولا قالوا ليه انت بتقول في شنو؟. متعودين على الموضوع دا. الكلام دا كل مرة بحصل عليهم. وزولكم الكضاب بيحلف ليهم ان عثمان ود الرتيلة (مات). وانو طقتو عربية. كتلتو في ساعتو. ولا هببوه. ولا قالوا ليه انت بتقول في شنو؟. صاحبكم الكضاب (كبس) شديد ..ومشى قعد ليه تحت شجرة ..منتظر الخبر يتأكد. بعد شوية جماعتكم سمعوا ليك (كوريك) في الحلة. كوريك بكاء حار. بكاء جديد. يا جماعة الحلة فيها شنو؟. الحصل شنو؟. جاهم طالع من الحلة (شافع) شايل ليه (جك فول)..ولا بس ليه فانلة ..وماشي حفيان. قالوا ليه يا ولد الحاصل شنو في الحلة؟. الشافع قال ليهم عثمان ود الرتيلة ..طقتو عربية ..مات قبلو. الجماعة ختوا ايدهم في رأسهم. اتصدموا ليك ..الزول الكضاب جاهم فازع من شجرتو ..وهو ساخر ..قال ليهم ما قلت ليكم عثمان مات ..وانتوا ما صدقتوني. هسع مع اختلاف الادوار. وتأكيد الصدق. نحن لينا زمن بنقول للمريخاب ..علي جعفر دا ما نافع ..علي جعفر دا ما بنستر…علي جعفر دا لو عاوز يلف ساكت ..عاوز ليه قلاب طوب. عاوز ليك بوليس حركة. علي جعفر – لا. وناس المريخ يقولوا لينا علي جعفر دا احسن مدافع في البلد. ونحن بنقول ليهم ..علي جعفر كارثة. علي جعفر تقيل. والمريخاب ما بصدوقني. ونحن نشيل ونوصف. نشيل ونحكي. والكلام ما عاوز يقع ليهم. ما عاوزين يقتنعوا. قلنا ليهم خلاص ما في مشكلة. شيلوا (علي جعفر) دا ..وامشوا بيه على (عزام)..يمين يفرتكوه ليكم عضلة – عضلة. جماعتكم شالوا (علي جعفر) ومشوا على (عزام). وعزام ما بلعب. وعزام ما بهظر. عزام لقى ليك علي جعفر زي (الراكوبة) في الخريف ..ما بتنستر. مدرب عزام ..قال ليهم انتوا عندكم مدافعين ..ما فاضل ليهم إلّا يقابلوا المهاجمين بي (ايسكريم لولي). قال ليهم دا دفاع تقابلوني بيه. ونحن لو بتذكروا قلنا ليكم علي جعفر والريح علي ديل ما بنفعوا يلبعوا سوا. الاتنين (فلافسة). الاتنين (تقال). الاتنين قلاب تراب إلّا شوية. قلنا ليكم ..الريح علي وعلي جعفر زي (الزهور والورد). ما صدقتوا كلامنا ..اعتبرتوه كلام بتاع (حقد) ساكت. نحقد على منو؟. نحقد على الريح علي وجعفر علي. جماعتكم ديل زي الناس البشيلوا (صينية الباسطة). زي الناس البركّبوا الصيوان – ما عاوزين زول يتكلم معاهم. زي الناس البكونوا واقفين بالابريق قدام الصيوان عشان يغسلوا للضيوف. قلنا ليكم الكلام دا ..وما صدقتونا. اها صروا واشربوا. علي جعفر والريح علي ديل (الزهور والورد) ذاتها. ما تقعدوا تشكروا لي في الراكوبة في الخريف. المريخ لعب امام عزام …وجاء راجع المريخ من تنزانيا ..الجماعة كلهم قلبوا ليك على (علي جعفر). علي جعفر بلعب في الموردة؟. علي جعفر بلعب في الهاشماب؟. في القليعة؟. ما خلوا ليه صفحة يتقلب عليها. نجضوه نجاض. بالله لمن نحن ذاتو شفقنا على علي جعفر. وعملنا ليه (صندوق). صندوق دعم علي جعفر. علي جعفر ذاتو طلع في جرايد المريخ ..وقال انا (نفسياتي تعبانة). يا ولد ..(نفسياتي تعبانة) دي ما تقولها لينا هنا. نحن لا بنعرف نفسيات تعبانة ..ولا بنجامل في الحاجات دي. انت قايل نفسك في (فيلم هندي). انت قايل نفسك قدام (كارينا كيف). انت قايل نفسك في السنة النهائية في الجامعة …قاموا خطبوا البنت الرامي عينك عليها. اوعك تقول (نفسياتي تعبانة). انت قايل المريخ دا (حضانة). الطريف ..والحاجة البتحير ..المريخاب او اعلام المريخ تحديدا وقت لقوا نفسهم قسوا على (علي جعفر) قالوا يصلحوا الحكاية شوية. الجماعة عاززين يصلحوها. ودي ما بتصلح. خلاص ..الحكاية انكشفت. تاني ما بتصلح. جماعتكم ..عملوا حملة (نظافة) شاملة في صحف المريخ …دعما لعلي جعفر. عاوزين يدعموه. عملوا ليه حملة تبرع بالمعنويات. بدأوا ليكم الحملة من غارزيتو. غارزيتو قال علي جعفر احسن مدافع في السودان ..وح يكون نجم مباراة الاياب. يا غارزيتو يعني انت عاوز تلعبو في الاياب. ناس (عزام) ديل حافظين علي جعفر. حافظنو حفظ. تاني ح تجيبوه ليه. عبدالصمد الرئيس الدائم لبعثات المريخ – هو ذاتو طلع يدافع عن (علي جعفر). الشيء البحيرنا ..علي جعفر دا هاجموا اعلام المريخ. نحن اصلو ما سألناه. انتوا براكم حملتوه خسارة عزام. جماعتكم وقت لقوا الكلام دا غلط منهم وما عندهم خيار غير (علي جعفر). رجعوا تاني عشان يصلحوا الموضوع. بعد شنو؟. بعد ان انهارت نفسيات علي جعفر. نفسياتو انتهت. بعد ما علي جعفر قال نفسياتو تعبانة. زولكم قال انا متأزم نفسيا. شوفوا شكل الازمة النفسية دي كيف؟. كدا اتخيلوه في علي جعفر. عليكم الله دي ما حاجة بتحرج. زول بعد العمر دا يقول ليك انا متأزم نفسيا. طيب ابراهومة يقول شنو؟. شمس الفلاح يعمل ايه. متأزم نفسيا دي حتتها ما هنا يا علي جعفر. انت قايل نفسك في فيلم هندي. خلاص عاوز تنقلوا لينا حركات الافلام الهندية في الكورة. بكرة ضفر يطلع ويقول انا احساسي مرهفة شوية. كلام زي دا ما بنفع معانا. ولا بنسمح بيه يحصل في مباراة الاياب. نحن مدافع يقول انا متأزم نفسيا ما بدقها معانا تاني. يونيو قرب. كلام واضح وصريح. الظاهر خليفة هيثم مصطفى ظهر. الباص اللعبو علي جعفر ..هيثم مصطفى في الاهلي شندي ما بلعبو. ………… و مباراة الهلال اليوم امام هلال الابيض مباراة صعبة. نتمنى ان يتجاوزها الهلال. ما عاوزين الهلال يقفل لينا ملف الافراح. مهم ان ينتصر الهلال اليوم باذن الله وتوفيقه عشان يمشي الهلال قدام. اي نتيجة غير الانتصار ..بتلقى بظلال غير حميدة في الهلال. ما عاوزين نركز على حكاية شباك نظيفة. الكلام دا ما تنقوا فيه. ما تكرروه. ترديد مقولة شباك نظيفة بحرّض الفرق التى تلعب امام الهلال ويحفزها على التسجيل في شباك الهلال. لذلك اغفلوا هذا الامر ..على الاقل يوم المباراة. وما تشغلوا بيه كتير. المهم ان ينتصر الهلال. نسأل الله ان ينتصر الهلال على هلال الابيض اليوم. ان شاءالله الافراح تتواصل. وتاني ما نقيف. ………. السيدة (ل)…خلينا نختلف – طولما ما قادرين نتفق. وقرّض على كدا.
