� دق الدلجة .. محمد عبد الماجد .. بكري المدينة الفزع خلوه اقرعوا (تراوري) لو الكورة بيقيسوها بالطبائخ ..كنا قلنا كورة المريخ زي (القرع). وقرع بدون ملح كمان. ما عاوزين نجيب ليكم سيرة بكري المدينة. ولا عاوزين نجيب ليكم سيرة (اخراج الشرطة من الملعب) وضرب معلق المباراة. ولا عاوزين نتكلم عن حوار الكاردينال امس في قناة النيل الازرق. وان كنا بنوافق الكاردينال فيما قاله في (الاتحاد العام) – الذي وصلت الامور فيه ان يستلم اسامة عطا المنان (مقدم) عقد الهلال لاللاعب بكري المدينة والبالغ (810) مليون جنيه. ثم يوقع اسامة عطا المنان انابة عن مجدي شمس الدين منتحلا شخصه في خطاب رفع الايقاف عن بكري المدينة. بعد دا كلو يمشي الهلال الى (كأس) المحكمة الرياضية يقوم يلقى اسامة عطا المنان وكيل للمريخ في القضية. اسامة دي عمل اي حاجة. اسامة دي كم اسامة هو؟. الزول دا مالو معانا؟. الزول دا عاوز ليه مشكلة مع الهلال. يا اسامة انت لو عاوز تدخل البرلمان ..ما يكون ذلك عن طريق ظلم الهلال والتعدي على حقوقه. عاوز تدخل البرلمان زي ما دخلت الاتحاد ..ادخل بي طريقتك. الموضوع دا مهم نعلق عليه في حديث (اشرف الكاردينال) امس في قناة النيل الازرق. ونضيف.. الاتحاد العام وربما مجلس المريخ ايضا ..افتكروا انهم يمكن لهم استغفال (الكاردينال)..وانهم يمكنهم التلاعب عليه والمكر. وظنوا ان تمرير الماء تحت الكاردينال امر سهل بالنسبة لهم ..فاتوا بكل هذه الكبائر في فترة وجيزة. وقد كان جمال الوالي واعضاء الاتحاد العام ..معتصم ومجدي واسامة عطا المنان برحفوا من صلاح ادريس وبعملوا ليه الف حساب. وكانوا ما بقدروا يدخلوا في اي صراع مع صلاح ادريس وقد ابتعد جمال الوالي ورفع ايده في كثير من القضايا وعن كثير من اللاعبين فقط لأن صلاح ادريس كان طرفا في الموضوع. اما اعضاء الاتحاد الحالي فقد شهد الجميع (رجفتهم) امام صلاح ادريس. الآن جماعتكم عاوزين يستأسدوا على (الكاردينال) ظنا منهم ان الكاردينال طيب وما عندو مشكلة ويمكن ان يفوّت ليهم ما يقومون به. وهم ما عارفين حاجة ..الكاردينال دا لو مسك في الشيء اكعب من صلاح ادريس. اخير ليكم صلاح ادريس. في شكوى الهلال ضد بكري المدينة ..(بعيدا عن القضية الاخيرة)..حاول الاتحاد العام مع المريخ التزاكي وقتل القضية. حالوا ان يطلعوا بالواحد وينزلوا بالاتنين حتى تموت القضية ..وهم ما عارفين ان اقوى درس قدمه الامين البرير عندما جاء بحكم البراءة من لوزان. يعني يا ناس الاتحاد ويا ناس المريخ ..صلاح ادريس ما براهو. الامين البرير في القوانين وفي الجولات والمعارك التى كسبها كان اخطر من صلاح ادريس. وسوف يكون ان شاءالله اشرف الكاردينال اخطر من صلاح ادريس واخطر من الامين البرير. السر لا في صلاح ولا في البرير ولا في الكاردينال ..السر في (الهلال). يمشي اي زول ..ويبقى الهلال. هذه نقطة كان لا بد من الوقوف عندها بعد حوار الكاردينال امس في قناة النيل الازرق فيما يخص قضية الساعة الرياضية. لا نريد ان نسترسل اكثر من كدا في القضية ..عشان عندنا (17) خروف ناقصة. قالوا لينا مشيت وين؟. قالوا ليهم المريخ عندو مباراة افريقية يوم السبت. انتوا تفتكروا موضوع (الخرفان) دي ح نفكوا ليكم. الامين العام لنادي المريخ الفريق طارق ..لقى ليك الحكاية ماشه ..بقى في اي مباراة للمريخ ..يقول ليك المباراة ما متلفزة. صاحبكم يكون عشمان ليه في ضربة جزء في منقطة قري. الفريق طارق طبعا مهمتو في مجلس المريخ انو يقول المباراة ما متلفزة. عليكم الله دي عاوزة ليها امين عام. الحاجات دي يا سيادة الفريق ما عاوزة ليها رتبة. ولا عاوزة ليها نضارة. متوكل أحمد علي ممكن يقولها. ما فيها اي صعوبة. يوم داك مشينا لينا مناسبة ..كان معانا واحد مريخابي. الموضوع عادي ما تتحسسوا. مرات بكون معانا مريخابي. مشينا المناسبة لقينا ليك في تلاتة خرفان مربوطة قدام الصيوان. المريخابي بدون ما يشعر ..قال لينا والله الخرفان التلاتة دي فيهن حلاة مباراة ودية. الجماعة بقوا يقيسوا المباريات بالخرفان. اصلو (الخرفان) دي نحن ما بنخليها. مشينا لينا لي مريخابي ..لقيناه عندو متحف عديل كدا. عامل صالوني متحف. المريخابي معلق ليك في الديوان صورة جمال سالم ..وصورة بلة جابر وصورة تراوري وصورة غارزيتو…و21 جلد خروف!!. قلنا للمريخابي الصور عرفناها …(الجلود) دي شنو؟. المريخابي قعد يشرح لينا ..طلع لينا (9) جلود ..وقال دي جلود خرفان مباراة عزام. ودي جلود خرفان مباراة اهلي شندي. ودي جلود مباراة خرفان مباراة مريخ شندي. قلنا ليه ان بقى كدا ..انتوا عاوزين ليكم (750) خروف لمباراة الهلال في الممتاز. يمين خرفان الثروة الحيوانية الفي البلد دي كلها ما تمرقكم من (كيبي). كيبي البجيب القون باللفة. الزول دا علاقتو بالكلاكلة اللفة شنو؟. مرة كدا دخلنا مباراة للمريخ ..لقينا ليك الجمهور ثقافتو كلها ثقافة (لحمة). المباراة كلها الجمهور بتكلم عن (اللحمة). وعشان اثبت ليكم (اللحمة) شوفوا جمهور المريخ بعلق كيف في المباراة؟. نحن قاعدين نحضر في المباراة ..(بكري المدينة) شات ليه كورة في السماء. مشت (الكشافات) طوالي. واحد من المريخاب قام ليك من نص المدرجات وقال لي بكري المدينة ..يمين كورتك دي يا بكري (ربع كيلو لحمة) كتيرة فيها. نحن سكتنا وما قلنا حاجة. تراوري ..قطع ليه كورة ومشى على المرمى …واحد من جماهير المريخ قام ليك وقال للجماهير الكورة بتاعة تراوري دي فيها جنس شية. طبعا نحن نشيل ونستغرب..ما فاهمين اي حاجة. الناس ديل كورتهم كلها بقت لحمة. قالوا ليك الحكم الرابع في مباراة للمريخ عاوز يرفع الزمن البدل الضائع في المباراة قام رفع ليه (ضلعة). الناس اتهجموا ليك جنس (هجمة). في زول (شفت) بعرف اي حاجة ..فصيح وما في زول بقدر عليه. زولكم اعترف وقال في مباراة المريخ ومريخ الفاشر ..طلعوا (الشرطة) من الملعب عشان (اللحمة) التى كانت في الاستاد كانت (لحمة) ما صحية. خافوا تجيب ليهم (هوا) ..عشان كدا طلعوا (الشرطة). في مباراة تانية للمريخ ..قالوا ليك (وانغا) جاب ليه قون ..موش مفروض يجري على (الكنبة). ابدا الكلام دا ما حصل. وانغا وقت يجيب ليه قون بيجري على (الحلة). الحاجة العجيبة ..قالوا غارزيتو رفع تقريره الفني لمجلس ادارة نادي المريخ واوصى فيه بشطب (13) لاعب من المريخ ..وتغيير السوق البجيبوا منو (الخرفان) قبل المباريات. لاعب مريخي قديم ..انتقد مجلس ادارة نادي المريخ بعد خسارة المريخ في شندي ..وقال في التلفزيون : (نحن نغلب كيف اذا كان الخرفان البضبحوها دي كبيرة ولحمتها معصعصة). قلت ليكم الجماعة ديل كلامهم كلو بقى (لحمة). محسن سيد قاعد جوار غارزيتو في الكنبة. غارزيتو قال بالفرنسي لمحسن سيد المباراة باقى ليها كم دقيقة؟. محسن سيد فتح الصبارة وقال ليه باقى ليها (12) دقيقة يا كوتش و(7) كيلو لحمة ضان. اعمل ليكم شنو؟. حاجة اخيرة …ناس المريخ ركزوا ليك في (بكري المدينة) الموقوف. بكري الجفل. ونسوا ليك موضوع (تراوري). اقرعوا تراوري. يغشوكم بي بكري. اها يا ناس المريخ ..فقدتوا (تراوري) بدون اي (بونية). غارزيتو اوقفو ..وابعدو ليكم ..عشان تراوري غير منضبط. جيبوا اسامة عطا المنان ..بحل ليكم المشكلة ..بوقع ليكم ..ويرجع ليكم تراوري. …………….. و عشان مباراة الاهلي شندي ما عاوزين نتقل على المريخاب. نتمنى انتصار الاهلي اليوم انتصار يحسم به امر التأهل من شندي. الجماعة عندهم بكرة مباراة. لو عاوزين تضبحوا قوموا من بدري. …….. السيدة (ل)..الواحد لو عمل فيها ما سامع .. في البلد دي يطلعوا ليك اعمى. وقرّض على كدا.