دق الدلجة محمد عبد الماجد ابقوا (رقاق) نظرية ان (الاستاذ) بكون عارف اكتر من (التلميذ) النظرية دي انتهت…دي نظرية قديمة زمن جدول اربعة كان كلو (اربعات). والجغرافيا كانت كلها (تضاريس). هسع جغرافية الجماعة ديل كلها (شوكلاتة). تاريخنا زمان كان كلو كرري وام ديبكرات ومحمد أحمد المهدي. الدم للركب. الجماعة ديل هسع تاريخهم من (محمود المليجي) وانت ماشي علينا جاي. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس لو سمحتوا اصبروا لي شوية …مباراة الهلال ومريخ كوستي بتكلم ليكم عنها. يعني نحن طايرين. ما تصبروا انتوا؟. نحن قاعدين. ومريخ كوستي قاعد. يعني ح نمشي وين؟. تلامذة الزمن دا عارفين اي حاجة ..وما بتفوتهم اي حاجة. التكنلوجيا قدمت (العلوم) عن طريق اسهل الطرق وعبر ايسر الوسائل. حكاية المدرسة والفصول وكتاب الجغرافيا البكون مشترك بين 3 تلاميذ انتهى. الزمن داك انتهى. والتلاميذ الشفوت ديل – بقوا عارفين اي حاجة. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس لو سمحتوا اصبروا لي شوية …مباراة الهلال ومريخ كوستي بتكلم ليكم عنها. يعني نحن طايرين. ما تصبروا انتوا؟. نحن قاعدين. ومريخ كوستي قاعد. يعني ح نمشي وين؟. نحن زمنا – الواحد وقت يقول ليك بعرف (اعوم) بكون ما خلى حاجة. العوامة كانت اصعب حاجة في وقتنا. عشان كدا نص جيلنا غرق. العوامة ذاتها كنا فاكرنها حاجة غير (السباحة). السباحة الى وقتنا هذا ما بنعرفها. لمن الواحد فينا يقول ليك بعرف (اضبح) خلاص بكون ققل اي حاجة ..(شفت) رسمي. ما في حاجة بتفوت عليه بعد كدا. تعال شوفوا تلاميذ الزمن دا …الواحد فيهم بدخل ليه في (برنامج) انت لو درسوك ليه في جامعة ما بتفهم فيه حاجة. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس لو سمحتوا اصبروا لي شوية …مباراة الهلال ومريخ كوستي بتكلم ليكم عنها. يعني نحن طايرين. ما تصبروا انتوا؟. نحن قاعدين. ومريخ كوستي قاعد. يعني ح نمشي وين؟. بقى ما في عدل ..ومافي انصاف في قسمة الاشياء ..ما معقول الطالب يكون عمرو (14) سنة شايل ليه جلاكسي 5 ..والاستاذ (25) سنة خدمة في مجال التربية والتعليم شال ليه جهاز (ربيكا). تلقى الاستاذ شايل تلفونو وقت يضربو ليه يطلع تلفونو بالدس …خجلان من طلبتو. وعاوزين يكون بعد دا كلو في نفس النظرة للاستاذ. وفي نفس الخوف عند التلاميذ. إلّا تجيبوا ليكم تلاميذ (هنود)..تلاميذنا ديل فتحوا ..تاني ما بسكتوا ليكم. زمان نحن وقت نشوف الاستاذ في بداية الشارع الواحد فينا بدون ما يشعر بلقى نفسو بيسمع في (القصيدة). تقول النظرية (تلقائيا). تعال شوف الحاصل هسع. التلميذ بشوف الاستاذ في مناسبة …بدل ما التلميذ يقول دا استاذنا ..بتلقى الاستاذ براهو قام من نص الجماعة وقال ليهم (الطالب) دا انا بدرسو. يعني الاستاذ بقى يعرف نفسو بالطالب. بفتخر بي طالبو عشان راكب ليه عربية. او عشان ابوه رجل اعمال كبير. كلامي دا طبعا ما قسوة على الاساتذة ..ولا تقليل ليهم ..ولكن تأكيد لقسوة الزمن وتبدل القيم والمفاهيم. الطالب يمكن عادي جدا ..يعاين ليك في الاستاذ ..ويقول ليك الشكل دا ما غريب علي. وتلقى الاستاذ والتلميذ في قرب مشجعي (ريال مدريد). التلميذ يقول ليه الف كلمة فارغة. زمان في كلام زي دا بيحصل. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس لو سمحتوا اصبروا لي شوية …مباراة الهلال ومريخ كوستي بتكلم ليكم عنها. يعني نحن طايرين. ما تصبروا انتوا؟. نحن قاعدين. ومريخ كوستي قاعد. يعني ح نمشي وين؟. الموضوع ليس على الاساتذة فقط – اولاد الزمن دا بقوا يعرفوا اكتر من الاباء ايضا. تلقى الولد بفتح ليه برامج وبدخل (نت) ما بخلي ليه حاجة …والاب اكتر حاجة كدا يمكن يعملها في حياتو التكنلوجية انو يحضر نشرة عشرة في التلفزيون القومي. الموازين اتغيرت. يجب ان ننتبه الى ذلك. ونعمل حسابنا كمان. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس لو سمحتوا اصبروا لي شوية …مباراة الهلال ومريخ كوستي بتكلم ليكم عنها. يعني نحن طايرين. ما تصبروا انتوا؟. نحن قاعدين. ومريخ كوستي قاعد. يعني ح نمشي وين؟. المريض ..بقى يمشي المستشفى يقابل ليك الطبيب ..يقعد ينافش ليك الطبيب في اي حاجة. من البنكرياس لمن يصلوا موقف جبرة القديم. المريض ..بقى يدخل (نت) ..يشوف الحاصل شنو؟. يدرس ليك اعراضه دراسة ..ويسأل عنها في (الواتساب). اي زول عندو تجربة يقوم يشخص ليه الحالة. عشان كدا المريض لمن يمشي على الطبيب ..بمشي ليه عارف اي حاجة..وقت الدكتور يكتب ليه (حبوب) بقوم يغالطو ..ويقول ليه لكن يا دكتور لو كتبت لي حبوب تانية غير دي موش بكون احسن من دي. المرضى بقوا عارفين اي حاجة. الدكاترة في خطر. قالوا ليك المريض بقى يخدروه تخدير كامل للعملية ..واثناء العملية بناول الدكتور (المقص) ووقت الدكتور يخيط البطن ..بقول ليه يا دكتور اوعك تنسي ليك حاجة جوة – شوف تلفونك وين؟ قبل ما تقفل. العالم تتطور. والموازين زي ما قلنا ليكم اختلفت ..حكاية السن بقت ما حكم. حكاية التخصص ..ما شرط. الناس كلها اتساوت في المعرفة..وانت واجتهادك. المواضيع ذاتها بقت ما عاوزة ليها (شطارة) ولا عاوزة ليها (موهبة)..عاوزين (اجتهاد) بس. تكون زول (مجتهد) يمكن تعرف اي حاجة. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس لو سمحتوا اصبروا لي شوية …مباراة الهلال ومريخ كوستي بتكلم ليكم عنها. يعني نحن طايرين. ما تصبروا انتوا؟. نحن قاعدين. ومريخ كوستي قاعد. يعني ح نمشي وين؟. قالوا ليك في برامج نزلت جديدة في النت. برنامج (نقاشة). وبرنامج (تركيب ستائر). وبرنامج (خياطة). وبرنامج (توصيل كهربة). وبرنامج (قطيع بصل وتوريق ملوخية). يعني ممكن تنزل ليك برنامج من النت ..تقطع بيه البصل ..وتورق بيه الملوخية. بدون ما تعمل الحاجات دي. وفي برنامج (مكوة). انا هسع كل ما اشوف (سيد اللبن) واقف قدام البيت العصر – بجهجهو ليكم. بقول ليه بعد سنة ونص – انت ما بكون في داعي ليك …ح ننزل في تلفوناتنا برنامج (سيد اللبن). يجيبوا لينا اللبن بالواتساب. وما بعيد يكون في النت في برنامج (حلاقة). يعني بدل ما تمشي صالون الحلاقة ..تنشط الخدمة بس. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس لو سمحتوا اصبروا لي شوية …مباراة الهلال ومريخ كوستي بتكلم ليكم عنها. يعني نحن طايرين. ما تصبروا انتوا؟. نحن قاعدين. ومريخ كوستي قاعد. يعني ح نمشي وين؟. …………. و الترجي امس غالب الملعب التونسي 4 / 1. دا ما شغل نصاح. ابقوا لينا (رقاق). الجماعة قلبهم وقف. حالتهم بقت صعبة. شايفهم الايامات دي حايمين في المحليات. ما عارفين يعملوا شنو؟. اليعقوبي دا ..علي جعفر لو شرب ليه (خرسانة) ما بقدر يقيف قادمو. علي جعفر يرجف براهو زي الهمرة الفي نص السطر. المشكلة في اسامة الدراجي. اها اسامة الدراجي دا يمكن يجيكم بي حصان. ولا بتفاهم. الدراجي دا (25) حكم راية ما بثبتو. تقول لي (ضفر). انتوا قناعنين من ضفر؟. انتوا عاوزين تشطبوا ضفر في مايو. يا ضفر ..اوعك اسمك يطلع في كشف الشطب يوم السبت القادم. كلمناك. رمضان عجب عرفها. ارتاح في عضمو دا. المشكلة ما في اليعقوبي. ولا في اسامة الدراجي. المشكلة في يانيك نجانغ. نجانغ دا ..إلّا توقفوا ليه (51) اسد من الدندر قدام جمال سالم ..عشان يثبتوا ليكم. غير كدا ولا تحاولوا. قلنا ليكم ابقوا رقاق. شوفوا برنامج (الكونفدرالية) من الان. عشان بعد الكونفدرالية ح تبقوا ناس (سيكافا) ساكت. الله – نسيت اكلمكم عن مريخ كوستي. كان تذكروني. …….. السيدة (ل)..كباية شاي اللبن في شارع النيل بي (10) جنيه من غير لبن ..ومن غير شاي!!. وقرّض على كدا.
