دق الدلجة محمد عبد الماجد ضربة جزاتكو طلعت زي انتخاباتكو هسع دي ضربة جزاء. الزول البغالطك في اول الشارع في (المحطة) النازل فيها انت – خلوه. في ناس..المحطة النازلين فيها بخلوه. ويقعدوا يتفرغوا عشان يغالطوك في المحطة النازل فيها انت. يخلوا محطتهم ..ويمسكوا في محطتك. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس (عثمان ود السقط) …جيبوا ليه ولد ..طقتو عقرب يوم سمايتو. في (مرا) ..جنها غالط. من يوم 27 تقعد تغالط في زوجها في (مرتبو). تحسبها معاهو قرش – قرش. ما بتخلي ليه حاجة. حساب الشاي ..تخصمو من المبلغ الكلي. عشان تشوف الباقي كم من المرتب؟. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس عملتوها ظاهرة يا عبدالوهاب. جيب ليك اي (50) نفر من الميناء البري ما عندهم اي علاقة بالكورة..لو واحد فيهم قال (ضربة جزاء). تبقى (ضربة جزاء). ابوها ضربة جزاء. ومع ضربة الجزاء بنديكم (14) كورنر هدية. هدية مع ضربة الجزاء. محمد فضل الله المباراة كلها يكورك ..تقول مقطوع ليه في شارع. يا محمد فضل الله خلي ليك شوية صوت لمباراة الاياب. مباراة الاياب ح تشتغل (هزاز). كملت (صوتك) في مباراة الذهاب. جيبوا لي (30) مشجع من مشجعي المريخ ..اي مشجع فيهم لو قال ضربة جزاء. تبقى ضربة جزاء. ابوها ضربة جزاء. ما في كلام. انتوا مقتنعين ..نحن خلونا. يمكن نكون بنظر. يمكن نكون بتاعين كلام ساكت. احتمال. انتوا اقتنعتوا. اقتنعتوا زي جماعتنا ديل. جماعتنا منو؟. انا هسع جبت لي سيرة جماعة غريبة هنا. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس (الامين قطع السلك) الدكتور قال ليه تشيل (اللوز)..قام شال (شاحن الموبايل). جيبوا (سيحة)..وطلعوا ليه كرسي برة يوم الجمعة وشغلو ليه الجهاز ..لو فيصل سيحة قال ضربة جزاء تبقى ضربة جزاء. ابوها ضربة جزاء. دا لو فيصل سيحة ما قال ليكم الجهاز اتعطل. وقعد يتعذر ليكم. وانا والظروف ..والجهاز ..ومن الصباح قاعد. والكهربة قاطعة. وبتاع المونتير. وبتاع المونتاج. يحكوا ليك ظروف التلفزيون كلها. او كمان رضا مصطفى الشيخ …يقول ليكم زمن البرنامج انتهى. انتهى. انتهى على منو؟. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس (التومة بت خج القوز) ..من رمضان يقرب بتمسك كليتها. انتوا يا ناس المريخ (الحكام) ديل بتجيبوهم من وين؟. بدقوهم في عمارة الدهب. بتجيبوهم من مصفاة الجيلي. ديل كانوا (مقرشين) وين؟. الجماعة ديل ..الظاهر عليهم اتربوا في نادي المريخ. الشغل دا ما شغل يوم ويومين. ما معرفة اسبوع. الشغل دا معرفة سنوات. (جوشوا بوندو) دا الظهار عليه اتربي عنديكم. دي ضربة جزاء بتاعة (تربية). كمان نحن ما بنعرف (التربية). جوشوا بوندو دا يكون قرأ في مدرسة المؤتمر الثانوية. يكون زامل بكري المدينة في المدرسة. دي معرفة شديدة. وصرتو ذاتها بتكون مدفونة في (الرد كسل). وما بعيد يكون اي خروف ضبحتوه ..(جواشو بوندو) يكون شال (الكرشة). يكون شال (البطن). والجلد والرأس. في زول بيحسب ليه (ضربة جزاء) بالطريقة دي. دي بشار بن برد ما بحسبها. الناس ديل يا جمال الوالي بتجيبوهم من وين؟. ادونا منهم عينة. ادونا ضربة جزاء واحدة. معقولة في كل مباراة يحسبوا ليكم ضربة جزاء. بتجبوهم من وين يا مجدي شمس الدين؟. معقولة في اي مباراة للمريخ يحسبوا ليكم (ضربة جزاء). برشلونة بتمر (6) شهور ما بحسبوا ليها (ضربة جزاء). انتوا يا ناس المريخ (ضربة الجزاء) في مبارياتكم بقت اضمن من (الضربة الركنية). اضمن من العجور. الناس ديل بتلموا فيهم وين؟. واحد فيهم يحسب ليكم ضربة جزاء من (قري). وواحد يحسب ليكم ضربة جزاء ..حتى شبهة (التمثيل) ما موجودة فيها. بكري المدينة لو بعرف يمثل ..كان نقول خدع الحكم. كان نقول ما في مشكلة. لكن بكري المدينة حتى (التمثيل) ما بعرف ليه؟. اقترح تدخلوا بكري المدينة معهد الموسيقي والمسرح ..عشان ما يحرج (الحكام) ساكت. عشان يمثل زي الناس. علموه (يمثل) كويس. يعني تمرين المباراة جيبوا (محمد نعيم سعد) يمسك ليكم التمرين. غارزيتو ما في داعي ليه. لكن انتوا ذاتو محمد نعيم سعد ما محتاجين ليه. بس يا جماعة جيبوه عشان الموضوع يبقى مبلوع شوية كدا. عشان الصحافة ما تاكل لحم الحكم. ما معقول تعملوها ظاهرة كدا. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس (خليفة ود الكار) ..طقاهو قطر ..ما جاتو اي حاجة ..عندو عمو (وزير). ضربة الجزاء حقتكم دي ..عارفين ذكرتني بي شنو؟. ذكرتني بالسماية البقلبوها عرس. يعني الواحد يكون ماشي ليه (سماية)..تقوم السماية تسخن…يقلبوها (عرس). ابو الولد يقول احسن استفيد من (الصيوان). بدل ما نفك (الصيوان)..احسن نعقد للبنت. خاصة ان (التلج) كتير. بدل ما يضيّع ساكت ..نستفيد منو في العرس. والفنان ذاتو ما يرجع ساكت. دافعين ليه خمسة مليون. يدينا فاصل اضافي. يقوموا يشوفوا ليهم مأذون قريب ..عشان يستفيد من باقى التلج ومن الصيوان ومن الفنان. بدل ما يرجعوا (الصيوان). يقوموا يعقدوا. هسع ناس المريخ عملوا نفس الحاجة. بكري المدينة وقع. قالوا نستفيد من (الوقعة) نحسبها (ضربة جزاء). ضربة الجزاء حقتكم ..زي الزول البمشي (المستشفى) يزور ليه قريبو المريض. يقوم يصل المستشفى ويزور المريض ..يقوم يتذكر ليه زول راقد في عنبر الجراحة. يقول احسن ازورو وقت وصلت المستشفى. يمشي يزورو ..اهل المريض بتاع عنبر الجراحة يشكروه ..وما يخلوا ليه حاجة. وهم ما عارفنو جايبو المستشفى (قريبو) ما جايبو زولكم دا. ضربتكم نفس الشيء. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس (مكي ود حبل الجر)…جاتو (نفسيات) من الطحنية الكتيرة. الطحنية الكتيرة علاقتها شنو بالنفسيات. عندها علاقة. بس ما عاوز اشرحها ليكم ساكت. احسن اسكت. احسن ما اقول اي شيء. ان شاءالله يدوكم (10) ضربات جزاء. ومع ضربات الجزاء يدوكم (470) صوت. انا مالي. ……….. و عليكم الله هسع جبت ليكم سيرة للانتخابات. ولا قلت ليكم شيء. ولا عندي نية اقول. ولا عاوز اقول. موش على كيفي. ما عاوز اقول. ما عاوز اتكلم. ولا عاوز المح. بس عاوز اقول ليكم ضربة الجزاء حقتكم دي لا ضربة جزاء ولا حاجة. ولا عندها علاقة بي ضربة الجزاء. لا من بعيد ولا من قريب. ولا في شبه. ولا في ملامح. ممكن تقولوا جدعة تماس. وممكن تقولوا ضربة ركنية. وممكن تقولوا حفلة شاي. وممكن تقولوا اي حاجة. بس ضربة جزاء لا. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية). بس (عدنان حاج الخضر)..قال ليه تاني ما تشرب موية (باردة)..خلي الموية كلها. عشان ما يلخبط. ….. السيدة (ل)..زمن دا ضربات الجزاء بقت زي المسلسلات التركية (رومانسية) عالية. كلها تمثيل في تمثيل. وقرّض على كدا.