من هنا وهناك .. هيثم صديق .. الليموني وسيرتدي المريخ علي ارجح الفروض والاقوال اللون الاخضر في مباراة الصعود القادمة في رادس التونسية ولاننا في الانتظار الطويل لمساء الاحد السعيد فلا نملك الا نهرد لهاتنا بالغنوات ونفتح للفرح قنوات ونهيئ الاحساس للكاس مع عمر احساس (تيمي اللخدر كان شفتو بخدر) ولأني ساهدي النصر لاحباب لي في بارا فلا املك الا ان ارقص كرقص الكردفانيين واغني للابس الاخضر (ليمون بارا يا اخوانا شيلو الجلالة) لا اله الا الله وبقرب ذلك سنغني مع البلوم منذ اليوم (الليموني ) وفريقا سرب سربا..خلي الهلال غربا *فليلعب غارزيتو باي تشكيلة يراها مناسبة … لا نملك نحن حتي الاحد الا شوقا وترقبا يقتات من نسج اللحم الحي ويواخي المريخ في الحنايا هناااااااااااااك حيث لم يبلغ حزن ولم يبلغ سرور والنجمة التي ستزين القميص الاخضر في تونس ستكون (فينوس) رمز الجمال فينوس في تونس..تقال مثل الحلوف حالف يركب حافلة … بلا شك سيتعتع كل من يقول ذلك اول مرة كما سيتعتع دفاع الترجي في مواجهة بكري وعنكبة الترجي التسجيلات الجاية الا يسجل بولت الجامايكي كمدافع المريخ بالاخضر في الخضراء الخطة (حرباوية) المريخ اي مكان بيلبس ليه زيو في الجزائر يلبس الاحمر دلالة علي دم الشهداء في كينيا يلبس الاسود دلالة علي الشاي في اجولا يلبس الاصفر دلالة علي النحاس في استاد الهلال يلبس ريش حمام … اي حاجة حسب الحاجة المريخ في دور الثمانية حا يلبس البمبي طبعا في فريق يمكن يلاقي اللمبي واحد صاحبي مزهلل قال لي انت الهلال يوم الاحد لاعب ضد وانغا صاحبي قال لي انت غارزيتو ده ما ساق وانغا ليه كان فاكر الهلال غلب وانغا براه برة قلت ليه داك سانغا مش وانغا وبالاخضر سيعدل المريخ المزاج سيكون مثل الشاي الاخضر القرين تي مش القرنتي مباراة الهلال دي يوم الاحد الا نسمع بيها سمع حا نكون باذن الله في نادي المريخ محتفلين السهرة صباحي والقمر كان صاحي