دق الدلجة محمد عبد الماجد المجموعات كان تشموه (قدحة) لو ما لبستوا (اخضر) صديق علي صالح جابوه في قناة بي ان سبورت بعد القرعة ..وقال نحن في بطولة (دوري ابطال اوروبا) ما عندنا مشكلة. وح نمثل السودان في دوري ابطال اوروبا. اوروبا شفتها وين؟. كلام بالمعني دا. صاحبكم لخبط. � المجموعات كبيرة عليه. حسب فهمو فاكر (المجموعات) دي (دوري ابطال اوروبا). ما عارف (اللخبطة) من المجموعات ام من القناة. زولكم متعود على قناة النيلين. بي ان سبورت دي ما بعرف يصرح فيها. يا دوب كدا ممكن يصرح في قناة النيلين. يا صديق علي صالح ..المجموعات دي حاجة براها. حاجة مختلفة عن (دوري ابطال اوروبا). ما عندها اي علاقة بي دوري ابطال اوروبا . بطولة برشلونة وبايرن ميونيخ وريال مدريد ويوفنتوس ما تلخبطوها لينا مع ناس العلمة وسموحة والتطواني. ديل وين وديل وين؟. شن جاب (القرع) للسمك كمان؟. هدف (ضفر) من هسع عاوز يخليكم تهضربوا. صاحبكم شاف الاندية الجزائرية الكتيرة دي افتكر نفسو بيلعب في دوري ابطال اوروبا. فهم غلط. يا صديق علي صالح لو فزتوا على الترجي 15 / صفر ما بتلعبوا في دوري ابطال اوروبا. ما في اي علاقة. ما تهضربوا ساكت. إلّا المريخ يطلب حق اللجوء السياسي في اسبانيا. كدا ممكن تلعبوا في دوري ابطال اوروبا – ما في الميدان في (المدرجات). اتخيلوا عنكبة وضفر بيلعبوا في دوري ابطال اوروبا. دوري ابطال اوروبا كان طعمو يبقى ملح – ملح. قرع – قرع. الصورة كان طشت. ديل في قناة النيلين إلّا تلف ليهم (الطبق). تقول (طاحونة). كورة يلفوا ليها (الطبق) دي نحن ذاتو ما سمعنا بيها. ولا جابوها لينا. ناس النيلين يجيبوا ليك (الصورة) تقول ناقلنها بي (كربون). الصورة تقول منقولة بي (برجل). تقول منقولة بي (عنقريب). راجي عبدالعاطي في المباراة يكون لابس الفانلة رقم (11). ناس قناة النيلين يجيبوه ليك لابس (17). ولا في زول بيسألهم. بكري المدينة في المباراة يكون لابس (11). يجيبوه ليك في قناة النيلين لابس (21). ديل مرة جابوا لينا صديق علي صالح على اساس انو (عادل ابوجريشة). في علاقة بين صديق علي صالح وعادل ابوجريشة؟. المريخ يكون مضروب. يجيبوه ليك غالب. لفة (الطبق) دي اصلو ما مريحاني. مرة كان عندنا (سمك). سمك عديل. بتشموا ريحتو. وتشوفوا شوكتو. الولد جاب لينا (الفطور). مشينا على الصينية على اساس انو فيها (سمك)..لقينا الموضوع متصفى علي (قرع). قلنا ليهم دا شنو دا؟. الريحة ريحة سمك ..والطعم طعم قرع. العملية دي عملتوها كيف؟. فسروها لينا. ما وقعت لينا. وقت مشينا بحثنا في الامر ..لقينا ليك الولد حول (الطبق). قام بدل ما يجيب لينا (السمك). جاب لينا (القرع). زي قناة النيلين. حولنا الطبق. السمك رجع لينا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية . بس (سمك) الزمن دا لو ما قسمتو مع (المحلية) ولا بتضوق ليه طعم. يبقى ليك قرع – قرع. بعدين نحن عشان الحركات دي ..قلنا ليكم انتوا ما بتنفعوا تلعبوا في قنوات بي ان سبورت. القنوات المشفرة دي ..ما بتخيل معاكم. ولا بتفع ليكم. في واحد من المريخاب حضر القرعة ..قام قال لي صاحبو : اسمع نحن تاني ح يجيبوا لينا مبارياتنا في بي ان سبورت زي ناس الهلال. صاحبو قال ليه والله ما بستبعد ناس الهلال يجبونا في قناة (النيلين). بي ان سبورت كتيرة على ناس بكري المدينة. ديل ناس (لفوا الطبق). وشوف الصورة لو كانت جاءت. والصوت فيه شخشخة. ناس قناة النيلين كمان عندهم صورة – الكورة تكون ماشه على القون ، المخرج يطلعها ليك من القون. ناس النيلين عندهم (مخرج) اخطر من حارس المرمي. اعادة الهدف يجيبها ليك بعد التعادل. يعني بعد ما يحقق الفريق التاني التعادل المخرج بيعيد هدف التقدم. تقول عاوزين يعيدوه في (البريميرليغ). غايتو يا ناس النيلين عندكم جنس (اعادة). تندمو الزول على هدفو. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس يا صديق علي صالح انت وقت ما بتعرف تتكلم ..خلي (ضفر) يتكلم نيابة عنكم. انت قايل نفسك عملت حاجة. المجموعات دي وصلكم ليها (ضفر). لو ما ضفر كان هسع بتهاجموا في ارضية الملعب. الشيء الما لاقي ليها تفسير. ولا عاوزة تقع لي. زي (القرع) القاعد اتكلم ليكم عنو من الصباح. ناس المريخ ديل. ناس المريخ مالهم؟. ناس المريخ ديل لو ما تنكروا ما كان صعدوا للمجموعات. لو ما غيروا اللون ما بصعدوا. لو ما طلعوا اللون الاحمر والاصفر ما كان بيلعبوا معانا . الناس ديل ما وصلوا المجموعات إلّا بعد ما لبسوا (الاخضر). احمركم دا حدو (سيكافا). ما بوديكم ابعد من كدا. لو ما لبستوا (الاخضر) المجموعات دي تشموها (قدحة). كان تقعدوا تتفرجوا علينا. تشوفوا (ميساوي) بتقدم كيف؟. واتير توماس بعمل شنو؟. ومحمد عبدالرحمن. محمد عبدالرحمن قال لينا ما تلفوا (الطبق). قلنا ليه طيب نلف شنو يا ود الناس؟. قال لينا انا بلف ليكم مدافع سانغا ابو شعر داك. بالله محمد عبدالرحمن كسر بيك بالمدافع الكونغولي لمن حكم المباراة كان عاوز يصفر (هدف). لو ما خجل ساكت. المدافع دا فيه (11) ضلعة مشت شرق. و(7) ضلعات مشت غرب. و(5) ضلعات نزلن تحت. الرقبة صرجت. والكلي الاتنين كل كلية مشت على اتجاه. والنخرين اتفتحن بمقدار (120) سنتمتر. وحصل ليه تقشعر في الركب ..ورغبة في (الاستفراغ). الفانلة لونها ذاتو قلب. انت يا محمد عبدالرحمن الزول دا عملت ليه شنو؟. محمد عبدالرحمن بعد الكسرة قدم الكورة مقشرة لي بشه. بشه ذاتو قلبو يتصرف معاها. ما شاءالله على محمد عبدالرحمن ربنا يحفظو. شوفوا الزول دا يوم الاحد القادم ممكن يعمل شنو في اعمامكم امير كمال وعلاءالدين يوسف. الصهاريج ديل كلموهم يشوفوا ليهم بلد. لا بقدروا على (الكسرات) دي ولا حاجة. ولا عندهم صبر. والعمر ذاتو ما بيسمح ليهم يستوعبوا الاوضاع دي. احسن ليكم تتخارجوا ساكت. الموضوع خطير. ………… و مباراة صعبة للهلال اليوم في الفاشر. نسأل الله التوفيق للهلال. وان يتحقق الانتصار. مباراة اليوم مباراة بطولة. مباراة بالممتاز كلو. لذلك لا بد من انتصار الهلال. والهلال في هذه الوضعية وبتلك المعنويات قادر باذن الله وتوفيقه على الانتصار. انتصروا اليوم. تنتصروا يوم الاحد باذن الله. دعواتكم للهلال. الكوكي سوف يضع الخطة والتشكيلة التى تكفل له الانتصار. …….. السيدة (ل)..ما في علاقة بين النسور وبرشلونة إلّا في المتناقضات. وقرّض على كدا.