دق الدلجة محمد عبد الماجد ناس الارصاد الجوي قالوا الليلة في (ضربة جزاء) ناس البلد ..جاهم (ضيف). دوروا فيه (فطير بي لبن). الضيف من (الفطير بي اللبن) بقى زي المزيرة المضروبة جيّر ابيض. بقى ابيض. كل يوم يجيبوا ليهم (فطير بي اللبن). من تمغرب ….يجيبوا ليك الصحن الكبير..وصينية الفطير تجي دافرة. وجردل اللبن يجي شايلنو اتنين. الضيف (النعسة) الفيه تطير من اللبن. الضيف يوم قاعد كدا وقافلة معاهو من العشا …جاهو شافع طائر زي (مشبك الغسيل). النوع البتعلق براهو داك. الشافع سليط …وجنو اسئلة ..زي مبخر البخور. اول مبخر البخور بيسأل. الشافع قال للضيف …تنقر الليلة العشا شنو؟. الضيف قال ليه يعني ح يكون بوفيه مفتوح …في شنو غير (الفطير بي اللبن؟). الشافع قال ليه ابدا …العشا الليلة ما فطير بي لبن. الضيف عاوز يطير من الفرح ..قال ليه تعال ..قعدو جنبو في السرير وقعد ينطط فيه وقال ليه العشا شنو الليلة؟. الشافع قال ليه (لبن بي فطير). الضيف قال ليه طيب عملت شنو؟…لحنتها يعني فطير بي لبن او لبن بي فطير ما كلو واحد – انتوا الغيار عندكم كدا. الشافع قال ليه : لا – لا يا عمو ..انا قلت ليك كدا عشان الفطير لسع ما طلع ..بتعوس فيه خالتي في (التكل). الضيف قال ليه : خالتك دي ان شاءالله تطقها ملاريا ..شهر ما تمشي ليها على (صاج). وفي ناس عشاهم ثابت (شعيرية). يجيبوا ليك صحن الشعيرية دافر زي (الباكات). نوع ديل لو سألوك الليلة العشا شنو؟. قول ليهم (شعيرية). الموضوع دا ما عاوز ليه ناس ارصاد جوي. اي زول بعرف العشا شنو الليلة؟. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). عشان ما اطلع بيكم من الموضوع – خلوني بعد الفطير بي اللبن دا او اللبن بي الفطير ادخل ليكم في الموضوع. ناس الارصاد ديل فاضيين لي درجة بعيدة. عندهم شنو يعني؟. يقعدوا يحرسوا ليهم (مطرة) السنة كلها. يا ربي ناس ديل بيدوهم (مرتبات) على التوقعات دي. المطرة دي بيدوهم فيها (مرتب). نحن ما عندنا مطر. امطارنا كلام جرايد ساكت. مطرة – مطرتين الخريف ينتهي. لكن مطرة واحدة بتقفل ليك الشوارع. والخرطوم بتغرق. وناس تلفزيون الولاية يشغلوا ليك اغنية حمد الريح (عجبوني الليلة جو). وبكريتها يقولوا ليك في (21) نفر ماتوا في المطر دي…و (259) بيت ايلة للسقوط. الاغاثة البيجبوها من الخليج للمنكوبين …المنكوبين بشوفها في التلفزيون بس. بشوفها في النشرة. الما شافها في نشرة عشرة يتعوض الله – تاني ما بشوفها. هسع عليكم الله يا جماعة في الدنيا الكبيرة والعريضة دي تصدقوا في ناس شغلتهم (التوقعات). يقعدوا يتوقعوا بس. فطير بي لبن. شعيرية. العازة ح يعرسها ود عمها العوض. والمطرة يوم السبت. دي شغلتهم. توقعات بس. توقعات شنو يا زول؟..الموضوع دا (علم) عديل كدا. علم وقراية ومعرفة ..وجامعة وشهادات عليا كمان. علم شنو؟..الجماعة بيدخلوا ليهم موقع امريكي كدا يشوفوا الطقس في المنطقة ويطلعوا تاني يوم يملأوا ليك الجرايد. يقولوا ليك السبت القادم في مطرة. جنهم يعملوا الحركة دي. جنهم يقولوا ليك (السبت) في مطرة. ولا بتجي. مطرة بتجي يوم السبت دي مطرة وإلّا ترحيل. اتذكرت ..السبت بقى ما فيه مدرسة. نحن اتهلكنا هلاك بي يوم السبت زمان في المدارس. كان يوم السبت دا عندنا مشكلة. هسع شفع الزمن دا يكملوا جمعتهم كلها – ويوم السبت ما عندهم مدرسة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ناس الارصاد قلت ليهم خلوها (المطرة)…شوفوا لينا مباراة الليلة (المريخ والعلمة) فيها (مطرة). فيها (كتاحة). فيها (حجارة)..وقارورات. عاوزين نعرف (طقس) مباراة اليوم كيف ؟..عشان الواحد ما يلبس ليه (جلابية بيضاء) ساكت. ناس الارصاد قالوا لينا المباراة فيها (ضربة جزاء). بعملوها كمان مع (ديديه) عشان يرفعوا ليه روحه المعنوية ..المرة الفاتت رفعوا روح (بكري المدينة). المرة دي الدور على (ديديه). قلنا ليهم (ضربة الجزاء) دي معاها (مطرة). قالوا لينا نحن المطرة ما بنعرفها – لكن (الضربة) اكيدة. قادر الله ..ناس الارصاد خلوا شغلهم ..وخلوا مطرتهم ..وبقوا يقولوا ليك نحن المطرة ما بنعرفها .. يعني بتعرفوا لضربات الجزاء؟. ضربات الجزاء دخلها شنو بي شغلكم؟…لو ما حركات هلالاب ساكت. قالوا لينا ما عندها دخل ..بس ضربة الجزاء حاجة ثابتة في مباريات المريخ. زي الفطير بي اللبن. زي الشعيرية عند ناس كلتوم. بكري المدينة دا بيلعب في الهلال (6) سنوات – ما حصل عملوا معاهو ضربة جزاء. ولا حتى في (الكابلي يتذكر). ما في اي ضربة جزاء عملوها مع بكري المدينة وهو بيلعب في الهلال. بكري جاء المريخ بقوا يحسبوا ليه ضربة الجزاء من النص. قبل ما يدخل خط (18). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). قلنا نتغاتت شوية. يا ناس الارصاد شوفوا لينا الضربة البنفذها منو؟. ناس الارصاد قالوا لينا (عمر بخيت). قلنا ليهم عمر بخيت معاهو (كتاحة). والله بقيتوا يا ناس الارصاد خطيرين شديد …المباراة بقت عندكم زي (المطرة). البنفذها بتعرفو. ناس الارصاد قالوا لينا خطيرين شنو؟…حاجات ناس المريخ دي محفوظة..معروفة. الجماعة ديل نحن شاربنهم شراب. المريخاب ديل عندهم عقدة من الهلال. الضربة ينفذها عمر بخيت..ونجم المباراة يقولوا ليك بكري المدينة. واحتمال المعز محجوب في كنبتو يمنحوه لقب (رجل المباراة). ديل عندهم مشكلة اسمها (الهلال). عشان كدا اي لاعب قادم للمريخ من الهلال برفعوه السما ..وبحاولوا يخلقوا ليه روح معنوية من مافي. تتخيلوا تراوري عملوا ليه (مؤتمر صحفي). تقول عاوز يعلن نتيجة الشهادة السودانية. لكن تراوري (شفت) – بي المؤتمر الصحفي ما قعد. عملوا مؤتمر الصحفي وغادر. تذكروا تراوري دا ناس المريخ السنة الفاتت رفعوا لينا كيف؟. ما خلوا ليه شيء. دا كلو عشان تراوري جاهم من الهلال. تراوري بعد (كسير التلج) العملوه ليه – قال ليهم ما بقعد. تذكروا تراوري وقت كان في الهلال …قدم كورة صاح ..اول مباراة يلعبها مع الهلال كانت في الفاشر امام مريخ الفاشر. تراوري سجل هدفين في تلك المباراة. هدف جابو من نص الملعب. يا حليل تراوري. الزول دا في المريخ قدر ما رفعوه. قدر ما عملوا ليه (مؤتمر صحفي) ..ما نفع. ولا قعد. وما عمله تراوري سوف يعمله بكري المدينة. المعز محجوب مصيرو (الكنبة). عمر بخيت سوف يرافق المعز محجوب ايضا في (الكنبة). …………. و ناس المريخ مرقوا. الكلام نحن يوم الاحد. جيبين لينا حكم (جنو) ضربات جزاء. ضربات الجزاء عندو زي (التسالي). روحو ما بترقد لو ما احتسب ليه ضربة جزاء. دا في المباراة الواحدة ممكن يحسب ليه تلات ضربات جزاء. عشان كدا مساوي خلوه برة. الحكم دا لو شاف مساوي ساكت ممكن يحسب ليه ضربة جزاء. …………….. السيدة (ل)…قالوا بفكروا في رسوم اضافية على (الابتسامة) اثناء ساعات العمل الرسمية. وقرّض على كدا
