محمد عبد الماجد دق الدلجة لو الواحد سأل عن (سيلا) فيها حاجة مرات تكون قاعد في الحفلة – بدون مناسبة كدا واحد من الناس يسألك ويقول ليك : (العروسة بتبقى للعريس شنو؟). بتبقى ليه زوجتو – هو في اكتر من كدا!!. ومرات تكون راكب ليك في حافلة – بدون مناسبة كدا واحد من الركاب يقول ليك : (السواق دا سواقتو زي الطين). والسواق عندو (صلعة) كابتن طيران ما عندو. ومرات تكون في الاستاد – والمباراة قربت تنتهي ..مشجع من ناس الاستاد يقول ليك : الحكم دا من وين؟. في اسئلة تقليدية كدا. تظهر ليك بدون مناسبة. ليه في بداية اي علاقة عاطفية – (الولد) بحاول يقنع (البنت) انو بكتب شعر. هل كتابة الشعر ضرورية في قيام العلاقات العاطفية. والما بكتب شعر – بقنعها ليك انو حافظ شعر نزار قباني وفاروق جويدة كلو. وهو (دجاجي يلقط الحب) ما حافظها. انا هسع عاوز اسألكم بدون مناسبة كدا من (سيلا). سيلا الواحد دا وين؟. سؤال ما عندو علاقة بالشعر. انتوا يا مريخاب سجلتوه نص الليل عشان ما نشوفو تاني. سيلا اختفى. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). سيلا خلوه. عمر بخيت ذاتو وين؟. عمر بخيت لمن مشى المريخ كتبو فيه شعر. كانوا بنتقدوا فيه (12) سنة – اول ما انتقل عمر بخيت للمريخ رجعوا يكلمونا عن (انيستا). يمكن دي اسئلة محرجة شوية. يمكن تتعقدوا منها. وممكن يصيبكم منها (رمد). وزهايمر. لكن لو قلت ليكم شيء ..وكشفت ليكم سر – سؤالي عن (سيلا) ما طالع من فراغ. اصلو نحن ما بنتكلم ساكت. هي حصلت يا مريخاب الريح علي (كل ما اشوفو في صورة بلقاه بتشوبح) – الريح علي بلعب في (النقعة) وسيلا لا. الريح علي مرة شفناه في الفريق القومي ..قلناهم الزول دا لو جبتوه لينا الهلال كتروا لينا (الجُرم). بتعرفوا (الجُرم) وإلّا ما بتعرفوه لي يا ناس الخرطوم. الجُرم دا حاجة زي (التسالي) لكن ما تسالي. حبوب بتمضغها كدا – تهرسها – ما بتقرفو متل (التسالي). ولو الهلال سجل (الريح علي) كان إلّا نعصر على (الجُرم). عشان نفش غيظنا شوية. الريح علي دا إلّا تجيبو معاه (جُرم). انتوا يا مريخاب جادين عاوزين تجيبوا ليكم تلات نقاط بي الريح علي. عاوزين تغلبوا بي الريح علي – والله قاعدين تبالغو. يعملوها ناس الريح علي وراجي ومصعب عمر وتعملوها في (النقعة). هسع ناس ضفر ديل عاوزين ليهم ارضية. ناس بكري المدينة ديل بعد التلاتة مليار في (البلاط) مفروض يلعبو. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). سيلا عندما اعاره صلاح ادريس للمريخ – كلمنا صلاح ادريس في (51) عمود عن انضباطه. وعن سلوكه وتهذبه واخلاقه العالية. كتب صلاح ادريس عن إلتزامه وعن احترافيته العالية. ونحن الحاجات دي كلها ما عندنا فيها رأي. ولا بتخصنا في شيء. قالوا ليك نحن عاوزين نجيبو البرلمان. نحن بنسأل عن كورتو – عن مستواه الفني – عن تعافيّه من الاصابات – بعد داك بتجي حكاية الانضباط والاخلاق. هو زول ما بلعب ومستواه الفني لا يؤهله للمشاركة – عاوزين بي انضباطه شنو؟. نعمل بي إلتزامه شنو وهو ما قادر يخش تشكيلة المريخ. صلاح ادريس شبك ليك المريخاب مقالات وكلام عن اخلاق سيلا وانضباطه – لمن قلنا ناس المريخ اتعاقدوا مع سيلا سكرتير ثالث. جايبنو (محاضر). جايبنو للخارجية. انضباط شنو؟. خازوق (سيلا) كشف عنه صلاح ادريس امس في عموده – شوفوا صلاح ادريس كتب شنو؟..واحكموا بي نفسكم. نسى صلاح ادريس اعارة (سيلا) وكتب في زاويته امس : (والشروط المتميزة وغير المتوفرة في الهلال والمريخ هي ما يصنع الفارق وقد صنعته فعلاً وقد أصبح اهلي شندي طموحاً مشروعاً للاعبين متميزين وكم من لاعب عرضت عليه إدارة النادي الإعارة لأحد ناديي القمة فرفض المغادرة وفيهم من تساءل (مستنكراً) أهلي شندي ما عايزني ليه؟). صلاح ادريس يقول ان لاعبي الاهلي برفضوا الاعارة في الهلال والمريخ – علما ان الهلال لم يعار له لاعبا من الاهلي شندي ولم يسبق له ان طلب لاعبا بالاعارة في عهد رئاسة الكاردينال. الاعارة دي نحن ما عندنا. اما عن الاعارة للمريخ فهو يجسدها واقعا الآن المحترف (سيلا) الذي اعاره الاهلي شندي او صلاح ادريس للمريخ. ناس المريخ هسع المغصة كاتلاهم. قالوا ليك ناس متوكل أحمد علي بعاينو لي (سيلا) زي الزول الماسك الكشف في المناسبة. الناس تحاول تتحاشوه. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). صلاح كشف ان لاعب الاهلي شندي اصبح يرفض الاعارة للمريخ (باعتبار ان الهلال لم يطلب لاعب من اهلي شندي اعارة). وهذا يعني ان سيلا رفض الاعارة للمريخ ولولا اصابة اللاعب وعدم مشاركته مع الاهلي شندي لما قبل سيلا بالاعارة للمريخ. واكيد حسب كلام صلاح ادريس ان سيلا تساءل (مستنكراً) – أهلي شندي ما عايزني ليه؟. الكلام دا ما كلامي. الكلام دا كلام صلاح ادريس وليس هناك لاعب معار من الاهلي شندي للقمة غير (سيلا) المعار للمريخ. الموضوع يبقى واضح. إلّا اذا كنتوا ما عاوزين تفهموا براكم. كلام صلاح ادريس واضح. المريخ ايضا اعار لاعبه سعيد السعودي للاهلي شندي فحدث هذا التبادل بين المريخ والاهلي شندي. قصدنا من ذلك ان نوضح كيف تمت اعارة سيلا فهي اعارة نفذها سيلا مجبورا. ود الناس بقت عليه غربة واعارة. لو سمح لنا بالاجابة على سيلا في سؤاله (اهلي شندي ما عايزني ليه؟) بنقول ليه لأنك مصاب ومستواك الفني لا يهلك للمشاركة. وقد اثبت ذلك فريق المريخ الآن الذي اشرك علاءالدين يوسف وسالمون في الردفاع وارجعهما من الوسط لأنه ما عندو مدافع. وشارك الريح علي في مباراة (النقعة) ولم يشارك (سيلا). بلغة (الكورة) او بالاصح لغة (السوق) صلاح ادريس ركب المريخاب (ماسورة). صلاح ادريس اضر المريخ ضررا كبيرا عندما اعار لهم لاعب مصابا لا رجاء منه. فوق هذا الضرر ألحق صلاح ادريس الضرر بالمريخ عندما جعلهم يبعدوا (الياسو) من اجل تسجيل (سيلا) الذي شغل خانة في الكشف الافريقي دون ان يثبت وجوده حتى باللعب في المباريات المحلية او الودية. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بعدين انتوا يا مريخاب (محترف) صلاح ادريس ملتزم بي مرتباته وحوافزه ونثرياته – منتظرين منو حاجة. اقنعوا ساكت. بلة جابر احسن الف مرة من سيلا هذا. ………… و هسع خانة سيلا الافريقية ما كان اولى بيها ابراهومة. قالوا ليك جمال الوالي بعد ان شاهد مباراة الهلال والنسور سأل عن رديف المريخ. هو المريخ عندو فريق اول – عشان يكون عندو رديف. انتوا بتلعبوا. انتوا لي هسه بتلعبوا بي المعز محجوب وعمر بخيت وبكري المدينة – وعاوزين تعملوا ليكم رديف. الشغل البعملوا فيه ناس وليد الشعلة دا صعب عليكم. كمان جبنا لينا (ثعالب). اعملوا حسابكم. وبشه الصغير ما شاءالله عليه البعمل فيه بشه الكبير كلو قاعد يعمل فيه. ومحمود محمد محمود (محمود ام بدة)..لاعب مكتمل وطرف شمال عصري. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). السيدة (ل) – بقت ما فارقة معانا كتير – اتعودنا على ان نعطل الشوق يوم الخميس والجمعة من كل اسبوع. وقرّض على كدا.