دق الدلجة محمد عبد الماجد دي ما عاوزة ليها اي (برهان) زمان في امتحان الرياضات. او حتى في التمرين. لمن (تبص) الاجابة بتاعة المسألة من الطالب القاعد جنبك …الاستاذ بقول ليك (البرهان). تقتعد تتحنح. ما تعرف تعمل شنو؟. انت ما عندك (برهان). لكن اجابة المسألة صحيحة. بس في النهاية جبت الاجابة الصحيحة. جبتها من وين؟. من ورقة زميلك. عشان كدا البرهان مهم يا جماعة. نتيجة مباراة المريخ والرابطة امس جابها المريخ من ورقة (الفاضل ابوشنب). عشان النتيجة ما في ليها اي (برهان). اربعة يا ناس الرابطة. انتوا لعبتوا قدام المريخ قبل ما تحللوا صيامكم. صايمين انتوا؟. اربعة في كوستي. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس الواحد لو وقعت فيها (صاقعة) ما تلموا الصاقعة. لوموا وزارة التربية والتعليم في التبعمل فيه دا. برهان يزعل يسافر (اديس ابابا). ما يزعل يقعد قبلو. عامل ليه موضوع. وشخصية (سفرية) كدا. ونحن نشيل ونصدق. مفروض بعد مباراة امس ..طوالي برهان يمشي (اديس). بس ما بالطيارة. مفروض يمشي (كداري). طيارة شنو كمان بعد (الاربعة) دي. ناس الرابطة ديل خليهم لمساعد المدرب يا برهان …ح يعمل معاهم شغل احسن من الشغل البتعمل فيه دا. سفرك كان احسن حاجة فيك. يا ريت لو سافرت اديس ابابا. يا ريت لو ما رجعت. كان تخلي ناس (الرابطة) بتصرفوا براهم. برهان شابكنا ليك السنة كلها (تصريحات). سوف اهزم المريخ. وسوف ارد على غارزيتو. إلّا ترد عليه في التلفون. تصريحات ساكت. وكلام في الجرايد. وعنتريات في الفاضي. المدرب وقت يكون ما عندو حاجة وفصيح ..ببقى ليك زي العربية الجديدة الما بتدور إلّا بالدفرة. تسمعو كدا تقول (فنجر). من وراني (فنجر). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس الواحد لو طقاهو قطر وما جاتو اي حاجة – القطر بكون مغشوش. يا برهان – نفسي اعرف انت برهان في شنو؟. في علوم البحار؟. في التصوير السينمائي؟. في عالم الفضاء. ورانا (برهان) واحد كدا. علاقتك بالكورة. افتحوا معاه تحقيق. السؤال الاول. علاقتك شنو بي كورة القدم؟. متين مارست اللعبة دي؟. الغشاك منو؟. الضللك؟. طلعت اي كلام يا برهان. يا خسارة (التصريحات). وكمان بتصرح. لو كنت بتسكت – ما كان في زول بيسألك. ما كان في زول بقول ليك حاجة. يا خسارة الجرايد البتنقل ليك في كلامك يا مستر برهان. والله (غارزيتو) اصلو ما خاطي عليك. غارزيتو نظرتو فيك طلعت سليمة. الرابطة كوستي دي هسع لو كان ماسكها (رجل مرور) بتتغلب الغلب الاتغلبتو امس من المريخ. اربعة. وعامل لينا فيها مدرب كبير. برهان دا من (الفلهمة) العندو – قرب يعمل لينا فيها مدرب (اجنبي). اتاريك طلعت ما عندك علاقة بالتدريب. شوف ليك شغلة تانية. ان شاءالله تقرأ طب. تقرأ صيدلة. بيطرى. ان شاءالله تخش كلية الزراعة. تمشى كلية الفنون الجميلة. المنطقة. تفتح ليك صالون. تفتح ليك محل في السوق العربي. تغترب. تمشي ليبيا. تمشي تركيا. المهم الكورة دي خليها. شوف ليك شغلة تاني. كورتك دي في السلك ما بتلعبك. كورة جرايد بس. الكورة دي احسن تخليها. شوف ليك موضوع تاني. جرب السينما. المسرح. مثل مع ناس الطيب الشعراوري ومحمد مهدي الفادني. فرصتك يمكن تكون اكبر. لو مُصر على الكورة..اقلبها سلة. طايرة. اي حاجة – ان شاءالله (تنس). بس كورة القدم دي خليها. شوف موضوع السباحة دي. شارك في مسابقات المدارس. ان شاءالله تمشي تشارك في (اغاني واغاني). بس الكورة دي ما عندك فيها نصيب. ونحن ذاتو ما فايقين نكتب عنك. ولا عندنا وقت للحاجات دي. ما تقعد تزعجنا ساكت. وتملأ الاعمدة. قال برهان قال. برهان على شنو؟. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس الواحد لو كسر كراعو في الدافوري – عارفين الكسر ح يكون من شنو؟. من التشخيص الخاطي. الدكتور تمشي ليه (نصيح) زي الاسد ..يرقدك في العناية المركزة. يطلعوا ليك مرض من مافي. حاجات ما بتسمع بيها – كلها يطلعوها فيك. المريخ الشافينو قدامنا دا ..اي فريق ممكن يغلبو. ما عاوز ليه مجهود. ولا عاوز ليه (برهان). ما تقعدوا تقطعوا لي من رأسكم ساكت. دا فريق اعمار لعيبتو وصلت الاربعين. الموضوع ما عاوز ليه سفر لاديس ابابا يا برهان. المريخ تعبان. مرة يغلب بالحكام. ومرة بي ناس اسامة عطا المنان. ومرة بي ناس برهان ..وصلاح ادريس. كل الاندية بتتحمش …وتتحفز بس لمن تلعب امام الهلال. الاهلي شندي (نمر) على الهلال وامام المريخ (نعامة). الاهلى شندي ..الشفناهو امس الاول امام الهلال في ام درمان تعالوا شوفوه امام المريخ. حمام. النعام ذاتو يقصر. من الكرم الفيهم ..(القهوة) ح يجيبوها ليهم في (التسخينة). ناس (يس يوسف) ديل من المغرب قبل المباراة ما تبدأ…بكونو مهزومين خمسة. مرة يجلي الكورة النور. ومرة يفكها باسيرو. ومرة يصرجها (سيلا). ومرة الدعيع. ومرة مالك. عليكم الله احسبوا كم مرة (صرجت) من مدافع الاهلي شندي في مباريات المريخ. البصرج والما بصرج ..قدام المريخ بصرج. مالك يلعب في الاهلي. يمشي المريخ. يقوم تاني يرجع الاهلي. دا شنو دا. الحوش فاتح في الحوش. نظام (النفاج) الى الان شغال بين الاهلي والمريخ. سيلا يلعب في الاهلي. يعيروه للمريخ. يس يوسف من المريخ يمشي الاهلي. شغالين كدا بس. الحالة واحدة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس الواحد ذاتو ما عارف يقول شنو في الحركات البتعملوا فيها دي. طه سليمان جابوه في اغاني واغاني ..انا افتكرتو في البرنامج التاني. افتكرتو قاعد في قناة تانية. لخبطة شديدة. الفي البرنامج من المافي البرنامج ما بتعرفو. يا ناس الاهلي شندي. يا ناس الاهلي وقت تلعبوا امام الهلال كلكم بتبقوا زي (النمور). (نمور) على الهلال وامام المريخ (نعامة). بس دي التبعرفوا ليها. عليكم الله امام الهلال ..كم مرة ناس الاهلي شندي ديل بيجلوا (الكورة). يقولوا ليكم الكلام مية مرة. في رمضان دا – إلّا يعيدوا ليكم الكلام. وارغو الما بسجل ..في الاهلي بيجيب. ليما (الباك)..برضو في الاهلي بيسجل. بعدين يا (الكوكي) عليك الله انت ما في زول قعد معاك. انت مدرب (اجنبي). معقولة بس صلاح ادريس من السعودية يقود فريقه (فنيا) عشان يخرج بالتعادل امام الهلال وهو بلعب في استاده وبين جماهيره. وانت معسكر في تونس تلاتة اسابيع. معسكر تونس دا ..كان في (شندي). …………. و نشوف الهلال امام مازمبي بعمل شنو؟. الكوكي عليه الرد. ولاعبو الهلال تقع مباراة مازمبي على مسؤوليتهم التامة. ما عاوزين كلام كتير. تعادل ذاتو ما بنقبل بيه. فترنا نحن من التعادلات. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس الاسبوع دا لو انتهى ..العيد جاء عديل كدا. هسع الكباري تتقفل. ………. السيدة (ل) …الواحد في رمضان دا مفروض يتكلم معاك باللغة (الصينية)..عشان اللغة الايامات دي لغة صواني ساكت. وقرّض على كدا.
