دق الدلجة محمد عبد الماجد اللهم اجعلها امطار خير وبركة و (بشه) طبع المريخاب الكعب – صوّر ليهم انو الدنيا دي كلها مفروض ما يكون فيها حكم ممكن يحسب ضربة جزاء للهلال. ضربة جزاء للهلال – اصلو ما ممكن ولا مقبولة ولا باقبلها المنطق…دي من المستحيلات. السما قريب. مقديشو تبقى عاصمة تركيا ممكن …احتساب ضربة جزاء للهلال لا. الصين تبقى دولة عربية من دول الخليج ، واهلها يلبسوا العقالات ..ممكن ..ضربة جزاء للهلال لا. (كاترينا كيف) تعمل ليها كافتيرة شاي في سوق ليبيا …عادي ..ضربة جزاء للهلال اصلو ما معقول!!. ح يكون عندها (قهوة) خطيرة خلاص. مطرتنا النازلة دي تجيب ليها (سمك). والسمك ذاتو يكون مشوي جاهز ..وسخن كمان ومعاه رغيفة زيادة ..جميل ..ممتاز .. ضربة جزاء للهلال يبقى ناس اسامة عطا المنان ما شايفين شغلهم. كيلو اللحمة (مشوي) يوزعوه للطلبة في المدارس مع كراسات الانشاء ..ما في مشكلة – ضربة جزاء للهلال تموت فيها رقاب. المريخاب عندهم ضربات الجزاء للهلال عيب ..مشكلة عديل كدا. بيستغربوا فيها جنس استغراب. ما بتخيلوها دي ..ولا بتصورها. ضربات الجزاء (منحة) خالصة للمريخ بحق او بدون حق وغير مصرح بها ولا مسموح ان تحسب للهلال ضربة جزاء ولو الدم وصل للركب. حليل الزمن الكان فيه الدم بيصل للركب. ناس الزمن ديل لو فيهم واحد (اتخرش) ساكت ..تلقى جرستو للحلة التانية. وتسمع بيه تاني يوم في العناية المركزة. الغريبة رابع موت يقولوا ليك مات. خرشة!!. مالو؟. يقولوا ليك خرشتو (موزة). والموزة الظاهر ما كانت مستوية كويس ..كان فيها شوية قوى. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ناس (التويل ود علي) عندهم صالون وقع. المريخاب ممكن يقبولوا اي حاجة …إلّا ضربة جزاء للهلال. وفي الكاملين كمان. ليه ..(الحكام) ديل جنوا في رأسهم؟ – عشان يحسبوا للهلال ضربة جزاء. عشان كدا ناس المريخ بعد مباراة الهلال امس الاول في الكاملين كلهم بقوا (حداثة). ما في زول شاف ضربة الجزاء لأن المباراة تلفزتها قطعت من (المصدر) مع ذلك طلعوا تاني يوم كلهم يشككوا في ضربة الجزاء. وبهاجموا في الحكام. بس كدا – عشان الهلال حسبوا ليه ضربة جزاء. دي في قانونهم مافي. الحكم ذاتو لمن يمتحنوه في الاتحاد قبل ما يمنحوه الرخصة بيشترطوا عليه ما يحسب للهلال ضربة جزاء. لو جابت ليها قطع رقاب ..ما يحسب ليه ضربة جزاء للهلال. لو جامل الهلال شديد كدا – ممكن يحسب ضربة الجزاء (جدعة). ولو اتحرج شديد بحسبها (كورنر). تاني ما بزيدكم فيها (سنتمتر). المريخاب استغربوا الحكم شاف (لمسة اليد) كيف في المطرة دي؟. دي ما مطرة يشوفوا فيها (لمسة يد). معتبرين ان جمال الجو وروعته يجيز لمدافع الاهلي مدني ان يلمس الكورة بي ايدو. ما فيها حاجة. الموضوع دا لو كان في الخرطوم ممكن تتحسب ..لكن في (الكاملين) اصلو ما معقول. الموضوع عادي شديد. الكاملين دي جيش المهدي عسكر فيها شهور ..ما شفنا لينا فيها (جدعة) ناهيك عن ضربة جزاء. يجي الحكم دا وفي المطرة دي يحسب ليه ضربة جزاء. الزول دا ما عارف ..فيصل موسي ما قاعد يضيّع. فيصل موسي بجيبها ليك زي ما بقول الكتاب. بختها ليك بي (521) طريقة. بنزلها ليك (ما شاءالله) زي (الرصيد). ضربة جزاء للهلال وفي وقت زي دا – والدنيا (مطرة) والله نحن ذاتو ما كنا متخيلنها. ولا بنحلم بيها. الظاهر كدا اسامة عطا المنان بقى ما شايف شغلو. الظاهر كدا بقى ما يطلع تحذيراته ..شديدة اللهجة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). السريرة بنت عباس العفش ..المطرة قاطعهم في الحلة…الرغيف ما قادرين يطلعوا يجيبوه. هسع عليكم الله لو ما ساي – الجو الرهيب دا جو (ضربة جزاء)..دا جو (سمك) عديل كدا. جو قون يسدد من (الهلالية). قلت ليكم (الهلالية) عشان المباراة في (الكاملين). جو رومانسي خالص …ضربة الجزاء ممكن تحتسب في الجو دا ضربة غير مباشرة. ضربة مرمي. ممكن. الدنيا مطر ..والمريخاب يشوفوا العمى وما يشوفوا ليهم حكم بحسب ليه ضربة جزاء للهلال. ليه؟. وعشان شنو؟. واشمعنا؟. في خلل في الكون. يا ربي امريكا ادخلت في الموضوع. يمكن تكون في ضغوط من الولاياتالمتحدة. الايامات دي في مفاوضات بين الحكومة وامريكا. يمكن امريكا تشترط. في شوية حريات ..وضربات جزاء. استهداف اعلام المريخ للحكام ..ظهر امس في كتاباتهم بصورة مخجلة. الجماعة ديل ما قاعدين يشعروا هم بقولوا في شنو؟. معظم كتاب المريخ امس اعترضوا على ان حكم مباراة الهلال والاهلي مدني اضاف (5) دقائق كوقت بدل ضائع. مع الوقيع ..والتمثيل البعملوا فيه ناس الاهلي. ومع الاتربة والمطرة ..شافوا الخمس دقائق كتيرة. في الوقت الذي منح فيه حكم مباراة هلال كادوقلي والمريخ العاصمي (5) دقائق ايضا كزمن بدل ضائع. الجماعة ديل شافوا الخمس دقائق بتاعة الكاملين كتيرة ..وما مفروض تكون..والخمس دقائق بتاعة كادوقلي عادي. يا ربي التوقيت بختلف. خمس دقائق في كادوقلي ما زي خمس دقائق الكاملين. شفتوا الناس ديل بقيسوا الامور كيف؟. انتوا لو بتعاينوا للحاجات البتحصل عندكم ..بتخجلوا تتكلموا في الحاجات العادية دي. نحن في الدقيقة الثالثة للزمن البدل الضائع سجل للهلال بشه قون التقدم ..قون الفوز. انتوا ما عندكم (بشه) نعمل ليكم شنو؟. مشكلتكم انتوا ما الحكم. مشكلتكم (بشه). يمين بشه يلقى دفاعكم (التقيل) دا ..دفاع زي الكوتشينة الما مشكوكة ..يجيب في جمال سالم البطلع ساي دا تلاتة اقوان. زي رمزي…وعصان الحضري. انتوا مجربين (بشه). انتوا عارفين (بشه). بشه جاب ليه قون في الدقيقة (93). وفي الكاملين. وفي المطر. وفي الاهلي. والمريخ في نفس الوقت. الزول دا تاني يعمل ليكم شنو؟. الظاهر كدا – مع المطر دي في واحد من الهلالاب ..قال : اللهم اجعلها امطار خير وبركة وبشه. اتذكر (بركة) دا مع ناس الامل مرة جاب ليك قون في المريخ ..زي اقوان (رزاق). كترت عليكم يا مريخاب. شيء بشه. وشيء رزاق. وشيء عماري. الاسماء ذاتها كترت علينا. بقينا ما بنعرف نحسب من الكترة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……….. و الهلال لعب امام الاهلي مدني عصرا. وسوف يلعب الهلال امام سموحة عصرا ايضا. مجلس الهلال يتفرض ان يحول مباراة الهلال والرابطة كوستي لتلعب عصرا ايضا بدلا من ان تلعب مساء. الفائدة والبروفة الحقيقية يجب ان تكون في نفس توقيت مباراة مصر. مباراة الهلال بعد غد يجب ان تكون عصرا. لا جدوى من مباراة تلعب مساء ..ومباراة سموحة تلعب عصرا. مباراة الهلال امام سموحة صعبة في ظل جاهزية سموحة وعدم تعرضه لضغوط في المباراة. لا نريد ان نخسر مباراة سموحة من الخرطوم. ……….. السيدة (ل)….بكرة سطر جديد. وقرّض على كدا.
